SAN MATEO 8
8
Tej tkꞌanj jun xjal otk tzaj kꞌey
(Mr. 1:40-45; Lc. 5:12-16)
1Tejtzen tcuꞌtz Jesús twiꞌ witz, nimxsen xjal oc lpe tiꞌjxin. 2Bix ul junxin xjal yaab. Otk tzaj kꞌey t-xumlalxin tuꞌnj yabel lepra. Bix e cub majexin twitz Jesús, bix e xiꞌ tkbaꞌnxin:
—Taat, ka taja, at tey tipemal tuꞌn tel tiiꞌna jyabela wiꞌj―tz̈ixin.
3Bix e xiꞌ tnukpa Jesús tkꞌab tibaj yaab, bix oc tmocoꞌnxin, bix e xiꞌ tkbaꞌnxin:
—Wajwe. Cyajtey baꞌn―tz̈ixin.
Bix tujx naj t-xiꞌ tkꞌumenxin, tzin ncyajtl jxin xjal baꞌn.
4Bix e xiꞌ tkbaꞌn Jesús texin:
—Miꞌn txiꞌ tkbaꞌna cye xjal ti ma baj tiꞌja, sino cutxena tey, bix yeecꞌanx tiiba twitzj xin pala tuꞌn tel tniyꞌ tiꞌj ka ma tzul tnaabla. Bix kꞌoncx jtoybila texin tisen o tkba Moisés, tuꞌntzen t-xiꞌ tkbaꞌn pala cywitz xjal ya ma cyaja baꞌntla―tz̈ixin.
Tej tkꞌanj t-akꞌanal capitán tuꞌn Jesús
(Lc. 7:1-10)
5Bix e xiꞌ Jesús tuj tnom te Capernaum, bix tej tocxxin tuj tnom, e pon twitz Jesús junxin capitán cye soldado te Roma. Bix e cubsanxin twitz te Jesús:
6—Taat, at jun wakꞌanala nim tajbel weya, pero ma yebt. Attzen njaya, bix min yucchtl t-xumlal. Nimxsen nchyon te―tz̈ixin.
7Bix e xiꞌ tkbaꞌn Jesús texin:
—Chin xeꞌla te kꞌanlte―tz̈ixin.
8Pero e xiꞌ ttzakꞌbeꞌn capitán te Jesús:
—Taat, mintiiꞌ wajbela twitza. Juꞌ tzunj, yaaꞌn tumel tuꞌn tocxa tuj njaya. Bix yaaꞌn il tiꞌj tuꞌn tula njaya tuꞌn tkꞌanj wakꞌanala. Nuk kbantza jyol, bix cyjel wakꞌanala baꞌn. 9N-el nniꞌya tiꞌj oꞌcx tuꞌn tyola baꞌn tbint tajbila, cuma jax juꞌx weya o kꞌoj woclena te cawel. At nim soldado tjakꞌ ncawbila. Ka ma txiꞌ nkbaꞌna te jun soldado, “Cutxey,” ka ntz̈iya, il tiꞌj cxeꞌl. Bix ka ma txiꞌ nkbaꞌna te juntl soldado, “Cyixtey,” ka ntz̈iya, jax il tiꞌj cꞌulel. Jax juꞌx ka ma txiꞌ nkbaꞌna te jun wakꞌanala, “Bincham jlu,” ka ntz̈iya, jax il tiꞌj cbinel tuꞌn―tz̈ixin.
10Tejtzen tbinte Jesús tyol capitán, e jaw kleeꞌxin tiꞌ capitán, bix e xiꞌ tkbaꞌnxin cyej xjal lepchec tiꞌjxin:
—Jaxxix cxeꞌl nkbaꞌna cyey, bajxsen wila jun aj Israel n-oc ke tcꞌuꞌj wiꞌja tisen ja capitán lu yaaꞌn te Israel pero ma tzꞌoc ke tcꞌuꞌj wiꞌja. 11Bix cxeꞌl nkbaꞌna cyey, cyxolj xjal chi temel cyxol ttanem Dios tuj tcawbil, at xjal te cykilca twitz txꞌotxꞌ. At te ocne bix at te elne, bix chi cwel ke tiꞌ mes ttxlaj Abraham tuya Isaac bix tuya Jacob. 12Pero kej xjal te Israel, amale ttanemet Dios ejeeꞌ tuj cywitz, pero chi xeꞌl xooꞌn tuj klolj te junx maj, jatztzen chi jawel okꞌ, bix jatztzen cjawele kitxꞌitxꞌin t-xeeꞌ twitz cye―tz̈i Jesús.
13Bix e xiꞌ tkbaꞌn Jesús te capitán:
—Cu txiy. Cbinel tey tisenj ma tocslay―tz̈ixin.
Bix jaxj hora e kꞌanj t-akꞌanalxin.
Tej tkꞌaꞌna Jesús tiꞌj jxuj tjiiꞌ Pedro
(Mr. 1:29-34; Lc. 4:38-41)
14Bix e xiꞌ Jesús tja Pedro. Tej tponxin, e xiꞌ tcyeꞌyenxin otk yebt jxuj tjiiꞌ Pedro tuꞌn cyak. Tjaxxuj twiꞌ wetbil. 15Bix oc tmocoꞌnxin tkꞌabxuj, bix e chewex cyak tuj t-xumlalxuj. Bix e jaw weꞌtlxuj, bix akꞌxuj kꞌolxte waabj texin.
16Tejtzen tcuꞌx kꞌij, e pon cyiiꞌn xjal nim xjal otk tzꞌoc licyꞌpaj biman cyiꞌj, bix el tlojoꞌnxin biman cyiꞌ xjal nuk tuꞌnj tyolxin. Bix oc tkꞌaꞌnenxin cykilca xjal yaab e pon. 17Juꞌtzen tten el jaxxix jtyol Dios e tzꞌiꞌbet tuꞌn Isaías nbyan cyjulu: “Jaj xin Scyꞌoꞌn tuꞌn Dios qꞌuelel kꞌinte kyabel, bix qꞌuelel tiiꞌnxin qꞌuixcꞌaj kiꞌj,” tz̈i tyolel Dios Isaías.
Kej cyajbe tuꞌn cyoc lpe tiꞌj Jesús
(Lc. 9:57-62)
18Tejtzen tlonte Jesús nimxsen tajlal xjal oc chmet tiꞌjxin, e xiꞌ tkbaꞌnxin cye t-xnakꞌatzxin tuꞌn cyiyꞌx jlajxe tnijabel aꞌ. 19Pero attzen junxin txꞌolbal ley e xiꞌ tkbaꞌnxin te Jesús:
—Xnakꞌtzal, chin xeꞌla tuyena nuk jaaꞌxja tuꞌn t-xiꞌy―tz̈i xjal.
20Pero e xiꞌ tkbaꞌn Jesús texin:
—Kej ẍiwel at cyja t-xol xak bix kej chꞌit at cykꞌuꞌsem, pero jatzen tey, ka taja tzꞌoc lpey wiꞌja, ilxix tiꞌj qꞌuelel tniꞌya tiꞌj mintiiꞌ njaya bix nchin wutana te koniyan jaaꞌ nchin poniya, inayena, ja Smaꞌn tuꞌn Dios tuꞌn ntena cyuya xjal―tz̈i Jesús.
21Cyxol xjal chmoꞌn tiꞌj Jesús at juntl xjal e tajbe tuꞌn toc lpe tiꞌj Jesús. Pero e xiꞌ tkbaꞌnxin te Jesús:
—Taat, najsama, waja nejl cwelex nmakuꞌna nmana―tz̈ixin.
22Pero e xiꞌ tkbaꞌn Jesús texin:
—Lpeꞌcꞌa wiꞌja, bix kꞌoncja tuꞌn tcuꞌx cymakuꞌn cyimne cycyimne―tz̈i Jesús.
Tej tweꞌ cykꞌiꞌk tuꞌn Jesús
(Mr. 4:35-41; Lc. 8:22-25)
23Tejtzen tocx Jesús tuj barc, jax juꞌx ocx ke t-xnakꞌatzxin tuj barc tuyaxin. 24Bix jeyꞌ, e cub pokꞌch naj jun nintzaj jbal bix cykꞌiꞌk tibaj aꞌ. Nimxsen oc punntzꞌaj aꞌ tuꞌn cykꞌiꞌk tiꞌ barc, bix e noj barc tuꞌn aꞌ. Pero te Jesús, nwutanxin. 25Bix ul lkꞌe ke t-xnakꞌatzxin ttxlajxin, bix oc cycꞌasenxin jaxin, bix e xiꞌ cykbaꞌnxin texin:
—Taat, ¡ko tclaꞌy, cuma at tuꞌn kcyima!
26Bix e xiꞌ tkbaꞌnxin cyexin:
—¿Tikentzen cutzexsen ttz̈i cyiꞌja? ¿Tiken min s-oc ke cycꞌuꞌja wiꞌja?―tz̈ixin. Bix e jaw weꞌxin, bix e xiꞌ tkbaꞌnxin te cykꞌiꞌk bix te tnijabel aꞌ tuꞌn cyweꞌ. Biꞌx tzinenxsen e cyjaꞌ.
27Bix e jaw weꞌ ke t-xnakꞌatzxin, bix e xiꞌ cykbaꞌnxin:
—¿Altzen loj jxjal lu? Hasta cykꞌiꞌk bix aꞌ ma tzꞌoc tilenxin, bix ma cybi―tz̈ikexin.
Caꞌba xinak aj Gadara otk tzꞌoc biman cyiꞌj
(Mr. 5:1-20; Lc. 8:26-39)
28Tejtzen cyiyꞌx bajkexin juntl jlaj tnijabel aꞌ tuj tnom te Gadara, etz caꞌba xinak tuj camposant bix oc nojkexin twitz Jesús. Otk chi oc nimxsen biman cyiꞌjxin, bix tuꞌn cyipemal biman, e kꞌojlkexin tiꞌ cykilca. Juꞌ tzunj, tuꞌn ttz̈i cyiꞌj aj Gadara, min e betke tuj be tcub ttzi camposant. 29Tej toc cycyeꞌyenxin Jesús, e jawxsen cys̈iꞌnxin, bix e xiꞌ cykbaꞌnxin:
—¿Ti jilel tbinchaya kiꞌja, jay Tcwal Dios? ¿Mapa tzula tuꞌn tbaj tyajlaꞌna ejooꞌja te minaꞌx tpon tumel tuꞌn kxiꞌya tuj qꞌuixcꞌaj?―tz̈i ke biman.
30Nakchtzen chꞌin eteꞌ nimjil boch nchi waaꞌn. 31Bix akꞌ ke biman cubsal cywitz twitz Jesús:
—Ka ma tzꞌex tlojoꞌna ejooꞌya cyuj xjal lu, ko ttzakpiꞌcxa cyxol jil boch luwe―tz̈i ke biman.
32Bix e xiꞌ tkbaꞌnxin cyexin:
—Cyucxey.
Bix el ke biman cyiꞌj xin xjal, bixsen ocxke tuj cyxumlal boch. Bix jeyꞌ, e xiꞌ ajkelkejil tcꞌuꞌj witz tuj tnijabel aꞌ, bix e jaw jikꞌbekejil.
33Yal tzunkej xjal cylel boch, bix e xiꞌ okke tuj tnom. Bix e xiꞌ cykꞌumen cykilca otk baj, bix ti e baj cyej xjal otk chi el biman cyiꞌj. 34Bix cykilca xjal tuj tnom etz te cyeyꞌlte Jesús, bix tej t-xiꞌ cycyeꞌyen jaxin, akꞌkexin cubsal cywitzxin te Jesús tuꞌn tiyꞌxin tuj cytanemxin.
Currently Selected:
SAN MATEO 8: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
