SAN LUCAS 3

Tej tkꞌumen Juan Bautista tyol Dios

(Mt. 3:1-12; Mr. 1:1-8; Jn. 1:19-28)

1Otktzen bint olaaj jnabkꞌi tcawbil Tiberio tibaj cykilca twitz txꞌotxꞌ, tej takꞌ Juan kbalte tyol Dios. Tej tyem, tocx xsunj jxin Poncio Pilato cawel tuj departamento te Judea, bix tocx jxin Herodes cawel tuj departamento te Galilea, bix tocx Felipe, jxin titzꞌen Herodes, cawel cyuj departamento te Iturea bix Traconite, bix tocx jxin Lisanias cawel tuj departamento te Abilinia, 2bix eteꞌc xsunj jxin Anás bix Caifás nejenel cye pala cyxol judío. Jatzen te Juan, tcwal Zacarías, e ten jaaꞌ min-al xjal najl. Dios e kꞌonte kej yol te Juan tuꞌn tkbante cye xjal. 3Bix e xiꞌ Juan tiyꞌ tuj cykil lugar ttziiꞌ nimaꞌ Jordán te kbalte cye judío tuꞌn tcyaj cykꞌoꞌn cyil tuꞌn cymeltzꞌaj tuya Dios, tuꞌntzen tnajset cyil, bix tuꞌn cycuꞌx tkꞌoꞌnxin tuj aꞌ te jun techel otktzen chi oc tuya Dios.

4Tej tkꞌumente Juan juꞌwa, juꞌtzen eꞌla jaxxix tyol Isaías, jxin kbalte tyol Dios nejl. E tkba Isaías tuj tyol Dios: “Tuj jun lugar min-al xjal najl tuj, cjawel jlet jun xinak, bix ctkbaꞌ cye xjal cyjulu: ‘Tzul Kaaw tuꞌn tten kxol. Juꞌ tzunj, key xjal, cyjel cykꞌoꞌna cyila, tuꞌntzen binne cytena oj tul. 5Tisentzen binne tten jun be cyuꞌna oj tul jun jawnex cawel. Il tiꞌj tuꞌn tbaj cynojsaꞌna jul tuj tbexin, bix tuꞌn tcub kuutz̈ꞌit witz tuya buꞌj tuꞌn tcyaj chkꞌajlaj. Bix kej be at cyẍoquel, tuꞌn cycyaj jiquen, bix kej be at xak cyuj, cjawel buchet, tuꞌn cycyaj jiquen. 6Chꞌix tpon tumel cykil xjal cylaꞌ jun colbil ke tkꞌaꞌ Dios,’ juꞌ ctkbaꞌ jun xjal,” tz̈i Isaías.

7Nim xjal e pon tiꞌ Juan ttziiꞌ nimaꞌ tuꞌntzen cycuꞌx tuꞌnxin tuj aꞌ. Bix e xiꞌ tkbaꞌnxin cye:

—Minaꞌx tcyaj cykꞌoꞌna cyila. Ke cyey nuk tisen lbaj nchi el ok twitz kꞌakꞌ. Cyaj cyey tuꞌn cycuꞌxa wuꞌna tuj aꞌ nuk tuꞌn miꞌn cub castiwa cyibaja tuꞌn Dios. 8Ka cycyꞌiy tuꞌn tcub cycastiwiya tuꞌn Dios cyibaja, cybinchamtzen alcyej baꞌn, tuꞌntzen tchicꞌajax ka otk cyaj cykꞌoꞌna cyila bix otk chi meltzꞌaja tuya Dios. Miꞌn cykbay: “Tuꞌnj tiyꞌjil Abraham koꞌya, mlay tzaj kcastiwiya tuꞌn Dios, cuma t-xjal Dios koꞌya.” Yaaꞌn juꞌwa. Cxeꞌl nkbaꞌna cyey ka at xjal t-xjal Dios nuk tuꞌnj tiyꞌjil Abrahamke, cykilcatzen loj xak lu baꞌn toc te t-xjal Dios, cuma attzen tipemal Dios tuꞌn cyoc te tiyꞌjil Abraham. 9Jaxte tzulte castiwa cyibaj kej xjal yaaꞌn baꞌn twitz Dios. Cꞌoquel cycꞌuꞌja tiꞌj ja tumel lu. Taaw cab tken loꞌpj cꞌoquel tcyeꞌyen cyiꞌ cyken loꞌpj. Kej min cyakꞌ cywitz, chi jawel txꞌomet ttzi txꞌotxꞌ, bix nuk te tuj kꞌakꞌ chi ajbela―tz̈i Juan cye xjal.

10Bix e xiꞌ cykanen xjal te Juan:

—¿Titzen pjel keya, tuꞌntzen tchicꞌajax ka otk ko meltzꞌaja tuya Dios?―tz̈i ke xjal.

11E xiꞌ tkbaꞌn Juan cye:

—Jun xjal at caꞌba tcapẍeyen, il tiꞌj tuꞌn t-xiꞌ tkꞌoꞌn jun te tej xjal mintiiꞌ tcapẍeyen. Bix jun xjal at twa, il tiꞌj tuꞌn t-xiꞌ tkꞌoꞌn chꞌin tej mintiiꞌ twa―tz̈i Juan.

12E pon cab chmol alcabala tuꞌn cycuꞌx tuꞌn Juan tuj aꞌ, bix e xiꞌ cykanen te Juan:

—¿Titzen pjel keya tuꞌn tchicꞌajax ka otk ko meltzꞌaja tuya Dios?―tz̈ike.

13E xiꞌ tkbaꞌn Juan cye:

—Chi chmola alcabala nuk jaj tzin tkbaꞌn ley. Miꞌn chi chmona pwak nuk te cyexa―tz̈i Juan.

14Bix at cabtl soldado ttziiꞌ nimaꞌ, bix e xiꞌ cykanen te Juan:

—Yajtzen keya, ¿titzen pjel keya tuꞌntzen tchicꞌajax tuꞌn kmeltzꞌaja tuya Dios?―tz̈ike.

Bix e xiꞌ ttzakꞌbeꞌn Juan cye:

—Miꞌn tzꞌel cykanena cypwak xjal tuꞌn cyclet cywitza. Miꞌn jaw cyxtzꞌimena cyiꞌ xjal tuꞌn cycamana cyiꞌj. Miꞌn nuk cub cytziy tiꞌj twiꞌ cycꞌuꞌja―tz̈i Juan cye soldado.

15Cykil aj Israel nchi ayon tuꞌn tul jxjal Scyꞌoꞌn tuꞌn Dios te cawel, jxjal Cristo, bix kej xjal e pon ttziiꞌ nimaꞌ e yolenke tiꞌ Juan, ka ja Juan te Cawel at tulel, bix ka min. 16Tbinte Juan juꞌwa, bix e xiꞌ tkbaꞌnxin cye xjal:

—Weya, yaaꞌn jawnex kena twitzj xjal tzul. Jxjal tzul, mintlpetiiꞌ woclena tuꞌn tel npjuꞌna takꞌel t-xaab. Weya, nuk jun techel tzin nkꞌoꞌna, jaj tuꞌn cycuꞌxa wuꞌna tuj aꞌ. Pero ja tzunj xjal tzul, yaaꞌn nuk jun techel ctkꞌaꞌ, sino ctzaal tkꞌoꞌnxin Espíritu Santo te cyej cyey ma cyaj cykꞌoꞌna cyila, bix ctzaal tkꞌoꞌnxin tuꞌn cyxiꞌy tuj kꞌakꞌ te cyej cyey min cyaj cykꞌoꞌna cyila. 17Juꞌtzen tten pjel tpaꞌnxin kej xjal at tuꞌn cyclet cyuyaj xjal at tuꞌn cyxiꞌ tuj kꞌakꞌ, tisen jun awal triwa qꞌuelel tpaꞌnxin twitz tuya t-xcꞌomel. Jtwitz triwa cꞌoquex tuj txꞌutxꞌ, pero ja tzunj t-xcꞌomel cꞌoquex tuj jkꞌakꞌ min yubtzꞌaj―tz̈i Juan cye xjal.

18Juꞌtzen tten tej tkꞌumen Juan tyol Dios cye xjal, bix tuya mastl tumel tiꞌj colbil cye e tkꞌumexin cye xjal. 19Pero bix e pon tumel tuꞌn mintl e kꞌumen Juan tyol Dios, tuꞌn tyol Herodes, cuma otk tzꞌel tiiꞌn Herodes t-xuꞌl ttzicy, Herodías tbixuj, bix otk bint mas kaꞌ tuꞌnxin. Tuꞌn tzunj lu e xiꞌ tkbaꞌn Juan texin otk bint kaꞌ tuꞌnxin. 20Juꞌ tzunj e tbinchaxin juntl tkaꞌyelxin, jaj tuꞌn ocx tkꞌoꞌnxin Juan tuj tzeeꞌ.

Tej tbautizarj Jesús

(Mt. 3:13-17; Mr. 1:9-11)

21Tej tcuꞌx tkꞌoꞌn Juan ke xjal tuj aꞌ, bix e pon Jesús tiꞌjxin, bix e cuꞌx tkꞌoꞌnxin tuj aꞌ. Tejtzen tjatz Jesús tuj aꞌ, bix akꞌ naꞌl Dios, bix e jket cyaꞌj, 22bix e cub Espíritu Santo tibajxin tisen tcyeꞌnc junjil cucuꞌ, bix e tzaj tkꞌajkꞌajel yol tuj cyaꞌj. Tz̈i yol cyjulu:

—Jay Ncwala n-oc takꞌa weya. Nchin tzalaja jay ma scyꞌet wuꞌna―tz̈i Kman Dios te Jesús.

Ke tiyꞌjil Jesús

(Mt. 1:1-17)

23Tejtzen tbint jlu tiꞌ Jesús, bixsen e xiꞌ ttzyuꞌnxin jtaakꞌenxin otk tzaj tkꞌoꞌn Dios tuꞌn tbint tuꞌnxin cyxol xjal. Tej takꞌxin akꞌanal tiꞌ taakꞌen Dios, otk japanxin winaklaaj jnabkꞌi. Bix cybi tiyꞌjilxin jaaꞌ ela itzꞌjxin ejeeꞌ tzunj lu: Tuj cywitz xjal, tcwal José jaxin. Yaltzen te José, tcwal Elíxin. 24Yaltzen te Elí, tcwal Matat-xin. Te Matat, tcwal Levíxin. Te Leví, tcwal Melquixin. Te Melqui, tcwal Janaxin. Te Jana, tcwal Joséxin. 25Te José, tcwal Matatíasxin. Te Matatías, tcwal Amósxin. Te Amós, tcwal Nahumxin. Te Nahum, tcwal Eslixin. Te Esli, tcwal Nagaixin. 26Te Nagai, tcwal Maat-xin. Te Maat, tcwal Matatíasxin. Te Matatías, tcwal Semeixin. Te Semei, tcwal Joséxin. Te José, tcwal Judáxin. 27Te Judá, tcwal Joanaxin. Te Joana, tcwal Resaxin. Te Resa, tcwal Zorobabelxin. Te Zorobabel, tcwal Salatielxin. Te Salatiel, tcwal Nerixin. 28Te Neri, tcwal Melquixin. Te Melqui, tcwal Adixin. Te Adi, tcwal Cosamxin. Te Cosam, tcwal Elmodamxin. Te Elmodam, tcwal Erxin. 29Te Er, tcwal Josuéxin. Te Josué, tcwal Eliezerxin. Te Eliezer, tcwal Jorimxin. Te Jorim, tcwal Matat-xin. Te Matat, tcwal Levíxin. 30Te Leví, tcwal Simeónxin. Te Simeón, tcwal Judáxin. Te Judá, tcwal Joséxin. Te José, tcwal Jonánxin. Te Jonán, tcwal Eliaquimxin. 31Te Eliaquim, tcwal Meleaxin. Te Melea, tcwal Mainánxin. Te Mainán, tcwal Matataxin. Te Matata, tcwal Natánxin. Te Natán, tcwal Davidxin. 32Te David, tcwal Isaíxin. Te Isaí, tcwal Obedxin. Te Obed, tcwal Boozxin. Te Booz, tcwal Salmónxin. Te Salmón, tcwal Naasónxin. 33Te Naasón, tcwal Aminadabxin. Te Aminadab, tcwal Aramxin. Te Aram, tcwal Esromxin. Te Esrom, tcwal Faresxin. Te Fares, tcwal Judáxin. 34Te Judá, tcwal Jacobxin. Te Jacob, tcwal Isaacxin. Te Isaac, tcwal Abrahamxin. Te Abraham, tcwal Taréxin. Te Taré, tcwal Nacorxin. 35Te Nacor, tcwal Serugxin. Te Serug, tcwal Ragauxin. Te Ragau, tcwal Pelegxin. Te Peleg, tcwal Heberxin. Te Heber, tcwal Salaxin. 36Te Sala, tcwal Cainánxin. Te Cainán, tcwal Arfaxadxin. Te Arfaxad, tcwal Semxin. Te Sem, tcwal Noéxin. Te Noé, tcwal Lamecxin. 37Te Lamec, tcwal Matusalénxin. Te Matusalén, tcwal Enocxin. Te Enoc, tcwal Jaredxin. Te Jared, tcwal Mahalaleelxin. Te Mahalaleel, tcwal Cainánxin. 38Te Cainán, tcwal Enósxin. Te Enós, tcwal Set-xin. Te Set, tcwal Adánxin. Te Adán, tcwal Diosxin.

Currently Selected:

SAN LUCAS 3: mamTS

Highlight

Copy