SAN LUCAS 22

Tej cyjyon xjal tumel ti tten tuꞌn ttzyet Jesús

(Mt. 26:1-5, 14-16; Mr. 14:1-2, 10-11; Jn. 11:45-53)

1Chꞌitk tul canan jninkꞌij te Pascua, jaj ninkꞌij oj nchi waaꞌn xjal te Israel pan mintiiꞌ tkꞌanel n-ocx tuj, tuꞌn miꞌn jaw tz̈ꞌiy. 2Bix e baj cychmon cyiib kej xin tneel pala bix ke txꞌolbal ley, te nincꞌulte ti tten tuꞌn tbyet Jesús cyuꞌnxin, cuma nim xjal otk tzꞌoc lpe tiꞌ Jesús, bix at ttz̈i tuꞌn ttzaj cykꞌoj xjal cyiꞌjxin ka ma chi byonxin ja Jesús.

3Jax juꞌx ocx Satanás, taaw il, tuj tanem Judas Iscariote, junxin te cyej cablaaj t-xnakꞌatz Jesús, cuma e tajbe Judas txiꞌ tqꞌueyen Jesús. 4Bix e xiꞌxin yolel cyuya tneel pala bix cyuyaj xin capitán cye cꞌojlal tja Dios tiꞌj ti tten tuꞌn t-xiꞌ tkꞌoꞌnxin Jesús tuj cykꞌab. 5Bix e jaw tzalajkexin, bix e xiꞌ cykbaꞌnxin texin tuꞌn t-xiꞌ cykꞌoꞌnxin pwak texin tuꞌn tonenxin cyexin. 6E cyaj tkꞌoꞌnxin tyolxin tuꞌn tonenxin cyexin, bix akꞌxin cyeꞌyel, tuꞌntzen t-xiꞌ tkꞌoꞌnxin Jesús tuj cykꞌabxin tej tten Jesús tjunal.

Tej twaaꞌn Jesús cyuya t-xnakꞌatzxin tuj xjan kꞌij

(Mt. 26:17-29; Mr. 14:12-25; Jn. 13:21-30; 1 Co. 11:23-26)

7Bix e pon jkꞌij te ninkꞌij oj n-etz cyiiꞌn xjal cykilca tkꞌanel pan tuj cyja, jax jkꞌij at il tiꞌj tuꞌn cybyet carnel tuꞌn tiyꞌset cyninkꞌij. 8Bix e xiꞌ tsmaꞌn Jesús ja Pedro tuya Juan, bix e xiꞌ tkbaꞌnxin cyexin:

—Cyucxeney bix cybincham jwaabj te xjan kꞌij, tuꞌntzen baꞌn t-xiꞌ kwaaꞌn―tz̈ixin.

9Bix e xiꞌ cykanenxin texin:

—¿Jaaꞌ taja tuꞌn tbint waabj kuꞌna?―tz̈ikexin.

10Aj ttzakꞌbeꞌn Jesús cyexin:

—Oj cyocxa tuj tnom, cylaꞌy jun xinak, jun ẍokꞌ aꞌ kꞌiꞌn tuꞌnxin. Chi xeꞌla tiꞌjxin, bix oj tocxxin tuj tjaxin, bix chi ocx lpey tiꞌjxin, 11bix cykbanx te taaw jaaꞌ cyjulu: “Ma tzaj tsmaꞌn kxnakꞌtzala ejooꞌya te kanlte tey: ‘¿Alcyej cwart tuꞌn nwaaꞌna cyuya nxnakꞌatza, tuꞌntzen tiyꞌset Pascua kuꞌna?’ tz̈i kxnakꞌtzala,” tz̈i cybela. 12Oj tbinte taaw jaaꞌ juꞌwa, ctzaaltzen tyeecꞌanxin jun nim cwart cyey tuj tcab cxoꞌlen. Tuj tzunj cwart at nim kꞌukbil tuj bix jun mes. Jatztzen cybinchama waabj―tz̈ixin.

13Bix aj Pedro tuya Juan, bix cykilca e tkba Jesús jax eꞌla. Bix e bint jwaabj tej ninkꞌij te Pascua cyuꞌnxin.

14Bix tej tpon hora te waabl, e cub ke Jesús tiꞌ mes cyuya t-xelxin. 15Bix e xiꞌ tkbaꞌnxin cyexin:

—Nim o wajbeꞌya tuꞌn wiyꞌsana ja Pascua lu cyuyey, jatzen mancꞌbil Pascuaja te mitknaꞌx nbyeta. 16Cxeꞌl nkbaꞌna cyey, mlay chin iyꞌsantla ja ninkꞌij lu cyuyey hasta ojxe tjapan ti japenina tuj tcawbil Dios―tz̈i Jesús cye t-xnakꞌatzxin.

17Bix e jaw tiiꞌnxin jvaso nojne tuya vino otk cub cykꞌoꞌn t-xnakꞌatzxin te cyiyꞌsablxin ninkꞌij, tisex tten cyuꞌn xjal, bix e xiꞌ tkꞌoꞌnxin chjonte te Dios tiꞌj, bix e xiꞌ tkbaꞌnxin cye t-xnakꞌatzxin:

—Cycꞌanx cykilcakey ja vino lu. 18Cxeꞌl nkbaꞌna cyey, mlay chin cꞌantla jvino te Pascua te mitknaꞌx tul tcawbil Dios―tz̈i Jesús.

19Bix e jaw tiiꞌnxin jun pan, bix e xiꞌ tkꞌoꞌnxin chjonte te Dios tiꞌj, bix akꞌxin piẍlcꞌate, bix e xiꞌ tkꞌoꞌnxin cye t-xnakꞌatzxin, bix e xiꞌ tkbaꞌnxin:

—Ja pan lu jun techel nxumlala, cuma cxeꞌl oyet nxumlala te colbil cyey. Cywaaꞌnx ja pan cykilca maj juꞌwa te nabl te weya―tz̈i Jesús.

20Juꞌx e jaw tiiꞌnxin vino tej tbaj cywaaꞌn, bix e xiꞌ tkbaꞌnxin:

—Ja vino lu techel ntz̈ꞌquela, cuma cxeꞌl oyet ntz̈ꞌquela te Dios te cyey. Tuꞌnj ntz̈ꞌquela qꞌuelel tz̈itj, ctemeltzen jun acꞌaj ttrat Dios cyuya xjal. 21Pero cꞌoquel cycꞌuꞌja tiꞌj ja lu. Jxjal cxeꞌl qꞌueyente weya tuj cykꞌab kej xjal nchi kꞌoj wiꞌja, lu xjal at wuyena tzalu tiꞌ mes. 22Il tiꞌj tuꞌn ncyima, cuma juꞌ o tkba Dios, ¡pero ay xsunj xjal cxeꞌl qꞌueyente weya tuj cyamecy!―tz̈i Jesús.

23Tej cybinte t-xnakꞌatzxin juꞌwa, e jaw kleeꞌkexin, bix akꞌkexin kanlte cyxolxxin alcye cyexin tuꞌn t-xiꞌ qꞌueyente Jesús tuꞌn tcubxin. 24Bix juꞌx akꞌkexin kꞌojlel cyxolxxin tiꞌj alcye cyexin mas jawnex. 25Bix e xiꞌ tkbaꞌn Jesús cyexin:

—Cyxol cawel te twitz txꞌotxꞌ, nchi cawen nuk tuꞌn cyajben xjal cye. Bix kej xjal jawnex nchi jyon tuꞌn cykbante xjal ka nim o chi onen cyiꞌ xjal. 26Pero yal cyey, miꞌn cybinchay juꞌwa, sino chi ajbenx cyey cyuyey. Jxjal najben cye cabtl, jatzen xjalja mas jawnex. Ka ejeeꞌy jun cawel, cykꞌoꞌnc cyipena tiꞌj tuꞌn cyajbena cye cabtl. 27Oj nwaaꞌn jun xjal tiꞌ mes, ¿alcyej mas jawnex tuj cywitz xjal? ¿Japa jxjal nwaaꞌn, bix ma jaj xjal najben te? ¿Yaaꞌmpa jaj nwaaꞌn? Pero cꞌoquel cycꞌuꞌja tiꞌj ka inayena, cyxnakꞌtzala, nchin ajbena cyey.

28Pero jaxte cpomel tumel chi cawela. Ejeeꞌ tzuna kej min el ok wiꞌja tej cyjaw yolen cykilca xjal wiꞌja. 29Juꞌ tzunj, cxeꞌl nkꞌoꞌna cyey tuꞌn cycawena wuyena. Ma tzaj tkꞌoꞌn Nmana weya tuꞌn ncawena, bix cxeꞌl nkꞌoꞌntla cyey 30tuꞌn cyoca te jawnex tuj ncawbila. Ckꞌojel cyey tuꞌn cycawena cyibaj jcablaaj cloj tiyꞌjil Israel―tz̈i Jesús cye t-xnakꞌatzxin.

Tej t-xiꞌ tkbaꞌn Jesús te Pedro, jay cwel eꞌwente we oxe maj

(Mt. 26:31-35; Mr. 14:27-31; Jn. 13:36-38)

31Bix e xiꞌ tkbaꞌn Jesús te Pedro:

—Simón, Simón, cꞌoquel tcꞌuꞌja tiꞌj cxeꞌl nkbaꞌna tey. O tzꞌoc tkanen Satanás te Dios tuꞌn toca tuj niyꞌbebl cyuyaj niyꞌtl nxnakꞌatza. Bix taj taaw il tuꞌn miꞌn chi eꞌla baꞌn tuj niyꞌbebl, tisen tzꞌis oj n-el muꞌpet tuj triwa. 32Bix oj toca tuj xkelbil, ctzpetela, Simón. Pero o chin cubsana nwitza te Dios tuꞌn miꞌn cyaj tcyeꞌyena tocslabla. Oj tmeltzꞌaja tuya Dios, ctzaal tonena cyiꞌj niyꞌtl nxnakꞌatza tuꞌn cycywix tuj cyocslabl―tz̈i Jesús te Pedro.

33Aj ttzakꞌbeꞌn Pedro te Jesús:

—Taat, lu kena lu tuꞌn nxiꞌ lpeya tiꞌja, seya tuj tzeeꞌ tocxey bix ka tuꞌn ncyima junx tuyey―tz̈i Pedro.

34E xiꞌ tkbaꞌn Jesús texin:

—Pedro, cxeꞌl nkbaꞌna tey, te ja koniyan jaꞌlewe, te mitknaꞌx tookꞌ cooꞌ, tuꞌn ttz̈i tiꞌja otktzen txiꞌ tkbaꞌna oxe maj min ttzkiꞌna nwitza―tz̈i Jesús.

Paaꞌ, tz̈ꞌus̈ bix spada

35Bix e xiꞌ tkbaꞌn Jesús cye t-xnakꞌatzxin:

—Tej t-xiꞌ nsmaꞌna ejeeꞌy nejl tuꞌn cypocbaꞌna tcawbil Dios bix tej t-xiꞌ nkbaꞌna cyey tuꞌn miꞌn txiꞌ cyiiꞌna pwak bix cypay bix jun chꞌixpubl cyxaaba, ¿atpa ti e paltex cyey?―tz̈i Jesús.

—Mintiiꞌ, cuma onen ke xjal kiꞌja―tz̈ikexin.

36Bix e xiꞌ tkbaꞌnxin cyexin:

—Pero yal cyuj kꞌij chi ul, cycyꞌitl xjal tuꞌn cyonen cyiꞌja tisen nejl. Juꞌ tzunj, ka at cypwaka, cyiiꞌnx, bix cyiiꞌnx cypay. Bix ka mintiiꞌ cyspadey, cyqꞌueyenx cycapẍeyena tuꞌntzen t-xiꞌ cylokꞌoꞌna jun cyspadey, tuꞌn cyclonte cyiiba. 37Nchin yolena juꞌwa tuꞌnj pjel wiꞌja. Tzin tkbaꞌn tyol Dios: “Tuj cywitz xjal cꞌoquel jxin Smaꞌn tuꞌn Dios te tajlal kaꞌ xjal,” tz̈i tyol Dios. Ilxsen tiꞌj tuꞌn tjapan baj ja yol lu, bix jaꞌlewe ma pon tumel tuꞌn tjapan baj―tz̈i Jesús.

38Tuj cywitz t-xnakꞌatzxin chꞌitk tpon tumel tuꞌn cykꞌojxin cyuya xjal. Juꞌ tzunj e xiꞌ cykbaꞌn t-xnakꞌatzxin texin:

—Taat, cyeꞌyenx. Lu naj caꞌba spadawe at tzalu―tz̈ikexin.

Pero e xiꞌ tkbaꞌn Jesús cyexin:

—Min tzꞌel cyniꞌya tiꞌj. Miꞌn ko yolentl tiꞌ spada―tz̈i Jesús.

Tej tnaꞌn Jesús Dios tuj Getsemaní

(Mt. 26:36-46; Mr. 14:32-42)

39Bix etz Jesús, bix e xiꞌxin tcꞌuꞌj jwitz te Olivos, tisenx tzin tseꞌnxin jaca koniyan, bix e xiꞌ ke t-xnakꞌatzxin tuyaxin. 40Tej tponxin, e xiꞌ tkbaꞌnxin cyexin:

—Cykanenx te Dios tuꞌn miꞌn cyaj cykꞌoꞌna cyocslabla wiꞌja―tz̈ixin.

41Bix el lkꞌe Jesús cyiꞌjxin caꞌba oxe cuerdas, bix e cub majexin, bix akꞌxin naꞌl Dios. 42E xiꞌ tkbaꞌnxin te Tmanxin:

—Taat, ka yaaꞌn il tiꞌj tuꞌn tiyꞌx ja qꞌuixcꞌaj lu wuꞌna, kꞌimal wiꞌja. Pero yaaꞌn te weya jwajbil waja tuꞌn tbint, sino jaj o cub tnincꞌuꞌna tuꞌn tbint―tz̈i Jesús te Tmanxin.

43Bix ul jlet jun tsanjel Dios tuj cyaꞌj twitzxin, bix oc tnimsaꞌn tcꞌuꞌjxin. 44Nimxsen bis oc texin, bix e naꞌntlxin Dios tuyaxsen cykil tcꞌuꞌjxin. Bix e tzaj aꞌ tiꞌjxin tisen tz̈iyꞌ el txꞌut tiꞌjxin e cub twitz txꞌotxꞌ.

45Tejtzen tbaj naꞌnxin Dios, bix e jaw weꞌxin, bix e xiꞌxin cyuya t-xnakꞌatzxin. Tej tponxin, nchi wutanxin tuꞌn cybisxin. 46E xiꞌ tkbaꞌnxin cyexin:

—¿Tikentzen nchi wutana? Chi weꞌwey bix cykanenx te Dios tuꞌn miꞌn chin cyaj cykꞌoꞌna―tz̈i Jesús.

Tej ttzyet Jesús

(Mt. 26:47-56; Mr. 14:43-50; Jn. 18:2-11)

47Tzinx yolen Jesús cyuya t-xnakꞌatzxin tej cypon nim xjal. E xiꞌ lpe ke xjal tiꞌ Judas, jaj xin te tcablajan t-xnakꞌatz Jesús. E pon lkꞌe Judas tiꞌ Jesús, bix el ttzꞌuꞌbenxin twitzxin. 48Bix e xiꞌ tkbaꞌn Jesús texin:

—Judas, ma tzula kꞌolbel weya tuꞌn tel ttzꞌuꞌbena nwitza. ¿Tepa tqꞌueybila inayena tuꞌnj n-el ttzꞌuꞌbena nwitza?―tz̈i Jesús te Judas.

49Tejtzen tel cyniyꞌ t-xnakꞌatz Jesús tiꞌj at tuꞌn ttzyet Jesús cyuꞌn xjal, e xiꞌtzen cykbaꞌnxin te Jesús.

—Taat, ¿tajpey tuꞌn kkꞌojla cyiꞌj xjal lu tuya kspadiya?―tz̈ikexin.

50Bix akꞌ junxin t-xnakꞌatz Jesús buul tuya tspadaxin tiꞌ t-akꞌanal jxin tneel pala, biꞌx el jtẍquinxin te tmankꞌabxin. Nuk yoꞌlectl. 51Pero e xiꞌ tkbaꞌn Jesús:

—Miꞌn cybinchatla juꞌwa―tz̈i Jesús, bix e xiꞌ tkꞌaꞌctlxin jaaꞌ eꞌla txꞌomet. 52Bix e xiꞌ tkbaꞌn Jesús cye tneel pala bix cye capitán cꞌojlal te tja Dios bix cye xjal nejenel, ejeeꞌj otk chi pon tzyul texin:

—¿Alakꞌpa kena, tuꞌntzen at il tiꞌj tuꞌn cyula tuya cyspadiya bix cytzeeꞌy te tzyul weya? 53Jaca kꞌij ma chin tena cyxola tuj nintzaj tja Dios, pero min in tzyeta cyuꞌna. Pero ya jaꞌlewe ma pon tumel tuꞌn tbint kaꞌ wiꞌja tuꞌn taaw il, bix ma tzaj tkꞌoꞌn tipemal cyey tuꞌn ntzyeta cyuꞌna―tz̈i Jesús cyej xjal tzyul texin.

Tej tel tiiꞌn tiib Pedro tiꞌj Jesús

(Mt. 26:57-58, 69-75; Mr. 14:53-54, 66-72; Jn. 18:12-18, 25-27)

54Bix e xiꞌ cytzyuꞌnxin ja Jesús bix e pon cyiiꞌnxin tuj tja tneel pala cyxol judío. E xiꞌ lpe Pedro cyiꞌjxin, pero nakch chꞌin. 55Tiꞌjxe tja tneel pala e cub cykꞌoꞌnxin kꞌakꞌ nakch chꞌin twitz peꞌn, bix oc kekexin tiꞌ kꞌakꞌ, bix jax juꞌx te Pedro oc kexin tiꞌ kꞌakꞌ cyxolxin. 56Cyxol tzunj xin kꞌuklec tiꞌ kꞌakꞌ attzen juntxin tkꞌopaj jxin taaw jaaꞌ. Tej tlontetxin Pedro, cyiw ocx tcyeꞌyentxin tuj twitzxin, bix e xiꞌ tkbaꞌntxin:

—Jaan tej xin lu tuya Jesús―tz̈itxin.

57Pero tcyꞌi Pedro jtyoltxin juꞌwa. E xiꞌ tkbaꞌnxin:

—Txin, pero min ntzkiꞌna twitzxin―tz̈ixin.

58Te jun rato, ocx tcyeꞌyen juntl xjal tuj twitz Pedro, bix e xiꞌ tkbaꞌnxin:

—Jaan tey lepchec tiꞌ Jesús―tz̈ixin.

Pero e xiꞌ tkbaꞌn Pedro:

—Xinak, yaaꞌn jaan kenwa―tz̈ixin.

59Te juntl hora, e xiꞌ tkbaꞌn juntl xjal:

—Jaxte jaan tej xjal lu tuya Jesús, cuma te cytanem cyiib te Galileake―tz̈ixin.

60Pero e xiꞌ tkbaꞌn Pedro:

—Xinak, min tzꞌel nniꞌya tiꞌj titzen tyola―tz̈ixin.

Tzinx yolen Pedro tej tookꞌ cooꞌ. 61Bix aj tcyeꞌyen Kaaw ja Pedro, bix ul tyol Jesús tuj tcꞌuꞌj Pedro. Otk txiꞌ tkbaꞌn Jesús: “Te mitknaꞌx tookꞌ cooꞌ, otktzen txiꞌ tkbaꞌna oxe maj min ttzkiꞌna nwitza,” otk txiꞌ tkbaꞌn Jesús. 62Bix ex Pedro bix okꞌ xsunxin nim.

Xmucchaꞌbl bix bujbil tiꞌ Jesús

(Mt. 26:67-68; Mr. 14:65)

63Yal tzunkej xin otk cytzuy Jesús, oc cyxmucchaꞌnxin bix oc cypjuꞌnxin. 64Oc cymaksiꞌnxin twitzxin, bix e xiꞌ cykanenxin texin:

—Kbantz keya, ¿alj xjal kxola s-oc pjunte tey?―tz̈ikexin, 65bix mas oc cyxmucchaꞌnxin jaxin.

Tej tpon kꞌiꞌn Jesús cywitz aj cawel

(Mt. 26:59-66; Mr. 14:55-64; Jn. 18:19-24)

66Tej kskix, e chmet ke xjal nejenel bix kej xin tneel pala bix ke txꞌolbal ley, bix e xiꞌ cyiiꞌn jxin cꞌojlal Jesús ja Jesús cywitzxin. Bix e xiꞌ cykbaꞌnxin texin:

67—Kbantz keya, ¿japa tey Jscyꞌoꞌn tuꞌn Dios te cawel?―tz̈ikexin, cuma e cyajbexin tuꞌn tchicꞌajax nkꞌojl Jesús tiꞌj cawel te Roma.

—Bix aj ttzakꞌbeꞌn Jesús:

—Ka ma txiꞌ nkbaꞌna cyey inayena Jscyꞌoꞌn tuꞌn Dios, miꞌn chin cyocslay. 68Bix ka ma txiꞌ nkanena cyey tiꞌj ti toc tuꞌn tyol Dios tiꞌj Scyꞌoꞌn tuꞌn Dios, cycyꞌiy tzaj cykbaꞌna, cuma cycyꞌiy cykꞌumey inayena Jscyꞌoꞌn tuꞌn Dios. 69Pero cxeꞌl nkbaꞌna cyey, tbajlenxitzen niyꞌ jlu wiꞌja, chin cwel keya tuj tmankꞌab jjawnex Dios, inayena, Jsmaꞌn tuꞌn Dios tuꞌn ntena cyuya xjal―tz̈i Jesús.

70Bix e xiꞌ cykbaꞌnxin cykilcakexin:

—¿Tzimpa tkbaꞌna ka jay mero Tcwal Dios?―tz̈ikexin.

Bix e xiꞌ tkbaꞌn Jesús cyexin:

—Ja tzunj yol lu, ma scyꞌet cyuꞌna wiꞌja, pero miꞌn tzꞌoc nkbaꞌna cyey ka ma chi tzpeta―tz̈i Jesús.

71Tejtzen cybintexin juꞌwa, e xiꞌ cykbaꞌnxin:

—¿Alcyetltzen mas il tiꞌj tuꞌn kbintetl mastl tiꞌjxin? Ma tzꞌoc kbiꞌn jaxxin nkꞌumente Tcwal Diosxin―tz̈ikexin, cuma tuj cywitz jun il te junx maj oj t-xiꞌ tkbaꞌn jun xjal ka junxxin tuya Dios.

Currently Selected:

SAN LUCAS 22: mamTS

Highlight

Copy