SAN JUAN 3

Tej tyole Jesús tuya Nicodemo

1Attzen junxin xjal Nicodemo tbi. Cyxol fariseoxin, kej xjal cyiw tuj cyley judío. Bix tocxxin te nejenel te cycloja judío nchi cawen tuj cyley judío. 2At jun koniyan e pon Nicodemo tuya Jesús te yolel. E xiꞌ tkbaꞌnxin te Jesús:

—Taat Xnakꞌtzal, ntzkiꞌna ka smaꞌna tuꞌn Dios te xnakꞌtzal keya, cuma nuket min tzaj tonen Dios jay, mlayettzenle bint cykilcaj nbint tuꞌna―tz̈ixin.

3Bix e xiꞌ tkbaꞌn Jesús texin:

—Min tzꞌel tniꞌya tiꞌj tcawbil Dios. Cxeꞌl nkbaꞌna tey, nuket min ma tzaj tkꞌoꞌn Dios tuꞌn titzꞌj jun xjal tuya jun acꞌaj chunkꞌlal, mlaytzen tzꞌocx ja xjala tuj tcawbil Dios―tz̈i Jesús.

4Bix e xiꞌ tkanen Nicodemo te Jesús:

—¿Ti tten tuꞌn titzꞌj jun xjal tijtl juntl maj? ¿Jacꞌapatzen tzꞌocx juntl maj tuj tcꞌuꞌj ttxu, tuꞌntzen titzꞌjtl?―tz̈ixin.

5Aj ttzakꞌbeꞌn Jesús:

—Jax wuꞌna. Mlay tzꞌocx jun xjal tuj tcawbil Dios nuk oꞌcxj titzꞌjlen tuꞌn ttxu, sino cꞌoquex oj titzꞌj tuya jun acꞌaj tchunkꞌlal kꞌoꞌn tuꞌn Espíritu Santo. 6Jn-itzꞌj tiꞌ jun xjal, jax nuk xjalx. Pero jn-itzꞌj tuꞌn Espíritu Santo, jun acꞌaj wikan tchunkꞌlal. 7Juꞌ tzunj, miꞌn jaw kleeꞌy oj nxiꞌ nkbaꞌna tey il tiꞌj tuꞌn titzꞌja tuya jun acꞌaj tchunkꞌlala kꞌoꞌn tuꞌn Dios. 8Miꞌn tzꞌel t-xooꞌna ja yol lu nuk tuꞌnj min tzꞌel tniꞌya tiꞌj. Min chicꞌaj cykꞌiꞌk, pero nxiꞌ nuk jaakꞌch, bix ntbiꞌna tkꞌajkꞌajel, amale mint tzꞌel tniꞌya tiꞌj jaaꞌ n-itzꞌja bix jaaꞌ npona baj. Jax juꞌx jaca juun xjal kꞌoꞌn jun tchunkꞌlal acꞌaj tuꞌn Espíritu Santo. Amale mint tzꞌel tniꞌya tiꞌj, pero chi itzꞌjel juntl maj―tz̈i Jesús te Nicodemo.

9Bix e xiꞌ tkbaꞌn Nicodemo te Jesús:

—¿Ti tten tuꞌn titzꞌj jun xjal tuya jun acꞌaj tchunkꞌlal?―tz̈ixin.

10Bix aj ttzakꞌbeꞌn Jesús texin:

—Jay jun jawnex xnakꞌtzal cyxol Israel. ¿Titzen tten min tzꞌel tniꞌya tiꞌj? 11Cxeꞌl nkbaꞌna tey, cykilcaj tzin nkbaꞌna tey, jaxxixte, pero ejeeꞌy judío cycyꞌiy. 12Ka mlay tzꞌel cyniꞌya tiꞌj nyola tiꞌj tuꞌn cyitzꞌj xjal juntl maj twitz txꞌotxꞌ tuya jun acꞌaj cychunkꞌlal, ¿titzen tten tuꞌn tel cyniꞌya tiꞌj ka ma txiꞌ nkbaꞌna cyey tiꞌj ti cbinel tuꞌn Dios tuj cyaꞌj? 13Min-al jun xjal baꞌn t-xiꞌ tkꞌumen cyey ti nbaj tuj cyaꞌj, cuma min-al o japan tuj cyaꞌj. Nuk oꞌcx jxjal o cuꞌtz tuj cyaꞌj baꞌn t-xiꞌ tkꞌumen tiiꞌn tuj cyaꞌj, inayen tzuna, Jsmaꞌn tuꞌn Dios tuꞌn ntena cyuya xjal. 14Bix ma chin ula tuꞌn njaw kꞌoꞌna cywitz xjal. Tisenj e jaw tkꞌoꞌn Moisés techel lbaj te xcbil tuj jlugar mintiiꞌ najbil tuj, tuꞌntzen cyclet xjal, jax juꞌx weya. Ilxsen tiꞌj tuꞌn njaw kꞌoꞌna, 15tuꞌntzen cyiikꞌente cykilca xjal cychunkꞌlal te junx maj n-oc ke cycꞌuꞌj wiꞌja, inayena, jxjal Smaꞌn tuꞌn Dios―tz̈i Jesús te Nicodemo.

N-oc cyakꞌ cykil xjal te Dios

16Nimxsen oc cyakꞌ cykil xjal te Dios, bix juꞌ tzunj e tzaj tkꞌoꞌnxin jaj junx Tcwalxin cye xjal. Juꞌ tzunj, alcyej xjal ma tzꞌocslan tiꞌj Tcwalxin, ckꞌojeltzen tchunkꞌlal te junx maj, bix miꞌn txiꞌ tuj cyamecy te junx maj. 17Min e tzaj tsmaꞌn Dios Tcwal twitz txꞌotxꞌ te kꞌol castiwa cye xjal, sino e tzaj tsmaꞌnxin tuꞌn cyclet xjal tuj castiwa tuꞌn Tcwalxin. 18Alcyej xjal ma tzꞌocslan tiꞌj Tcwalxin, mlay cub castiwa tibaj. Pero kej xjal min chi ocslan tiꞌj, ckꞌojeltzen cycastiwa, cuma n-el cyxooꞌn jjunx Tcwal Dios. 19Ckꞌojeltzen cycastiwa tuꞌnj cycyꞌi jxjal ul kꞌol spiꞌyen cye. Min e jaw tzalajke tiꞌj spiꞌyen smaꞌn tuꞌn Dios, cuma mas e cyajbe jcyil twitzj jaxxix yol ul tiiꞌnxin. 20Kej xjal nchi binchan kaꞌ n-el cyiiqꞌuen jspiꞌyen. Cycyꞌi tuꞌn cyul nka tiꞌ spiꞌyen, cuma cycyꞌi tuꞌn tchicꞌajax tiꞌj jkaꞌ nbint cyuꞌn. 21Pero kej xjal nchi oc lpe tiꞌj jiquen, nchi jyon jjaxxix yol, cuma cyaj tuꞌn tel baꞌn cybinchben tuj twitz Dios.

Tej tyole Juan juntl maj tiꞌ Jesús Jscyꞌoꞌn tuꞌn Dios

22Tbajlenxitltzen jlu tuj Jerusalén, bix iyꞌ Jesús tuj tnom cyuyax t-xnakꞌatzxin, bix e bet-xin cyuyaxin cab kꞌij tuj departamento te Judea. Nchi cuꞌx xjal tuj aꞌ cyuꞌn t-xnakꞌatzxin. 23Jax juꞌx e ten Juan Bautista tuj Judea nchi bautizarj xjal tuj aꞌ tuꞌnxin. E tenxin tuj tnom te Enón, nka taꞌ tnom te Salim, cuma at nim aꞌ tuj Enón. Bix nchi ponxetzen xjal tuyaxin tuꞌn cycuꞌx tuj aꞌ tuꞌnxin. 24Tzinx chi cuꞌx xjal tuj aꞌ tuꞌnxin, cuma mitknaꞌx tocx kꞌoꞌnxin tuj tzeeꞌ.

25Tuꞌnj e bautizarj ke xjal tuj aꞌ cyuꞌn t-xnakꞌatz Jesús, juꞌ tzunj e jaw jun kꞌoj cyxol ke judío bix kej t-xnakꞌatz Juan. Yaaꞌn baꞌn tuj cywitz t-xnakꞌatz Juan tuꞌn cycuꞌx xjal tuj aꞌ cyuꞌn t-xnakꞌatz Jesús. 26Juꞌ tzunj e pon lkꞌe ke t-xnakꞌatz Juan tiꞌ Juan, bix e xiꞌ cykbaꞌn texin:

—Taat Xnakꞌtzal, jxjal e ten tuyey jlajxe nimaꞌ te Jordán bix e xiꞌ tkꞌoꞌna jun baꞌn te te tej tjaw tnimsaꞌna tbi, nchi cuꞌx xjal tuj aꞌ tuꞌn, bix cykilca xjal ncyaj cykꞌoꞌn jay tuꞌn cyaj tuyaxin. Yaaꞌn tumel jlu―tz̈ikexin.

27Bix aj ttzakꞌbeꞌn Juan:

—Miꞌn chi labta tiꞌj chꞌin woclena. Mlay tuꞌn tten mas woclena twitzj o kꞌoj tuꞌn Dios weya tuj cyaꞌj. 28Yaaꞌn jawnex kena tisenj xjal nchi yolena tiꞌj. Ejeeꞌxa tstiwa e xiꞌ nkꞌumena: “Yaaꞌn inayena Jscyꞌoꞌn tuꞌn Dios. Nuk jun sanjel kena smaꞌn tuꞌn Dios tuꞌn binne cyten xjal oj tulxin,” ntz̈iya. 29Tisen jun mejoblenel. Yaaꞌn jxjal t-amiwa chmilbaj cmajebel tuya xuuj, sino ja te chmilbaj. Jtaakꞌen jun t-amiwa chmilbaj, nuk ja tej tuꞌn tnincꞌun tunwen, bix cꞌayoltzen ti toc tuꞌn chmilbaj, ka ma tzꞌel baꞌn taakꞌen tuj twitz chmilbaj. Katzen ma tkba chmilbaj ma tzꞌel taakꞌen baꞌn, cjaweltzen tzalaj jt-amiwa chmilbaj. Juꞌ tzunj weya nuk tisen jun tuya chmilbaj kena. Juꞌ tzunj, nimxsen nchin tzalaja tuꞌn nim xjal nchi pon tuya Jesús, cuma baꞌn ma tzꞌel waakꞌena, tisen taakꞌen jun xjal tuj mejoblenel. 30Tumel tuꞌn cypon xjal tuya Jesús, cuma il tiꞌj tuꞌn tjaw nimset tipemal Jesús, bix tuꞌn tcub jweya wipemal cubne―tz̈i Juan.

Jun xjal o tzaj tuj cyaꞌj

31Jxjal ma tzaj tuj cyaꞌj, mas jawnex twitz cykilca xjal. Kej xjal, nchi itzꞌj twitz txꞌotxꞌ, bix te twitz txꞌotxꞌ cynaabl. Baꞌn chi txꞌolban nuk tiꞌj ti tten jnbaj twitz txꞌotxꞌ. Pero jxjal ma tzaj tuj cyaꞌj, 32ttzkiꞌn ti tten tuj cyaꞌj, bix ntxꞌolban j-o til bix o tbi. Pero min-al xjal taj tyolxin. 33Pero ja tzunkej xjal ma cyocsla tyolxin, tzin cyyeecꞌan jax ma cyocsla jtzin tkbaꞌn Dios, 34cuma jxjal e tzaj tsmaꞌn Dios, tex Dios tyol ntkꞌumen. At tipemalxin tuꞌn tyolenxin j-e tkba Dios, cuma o txiꞌ tkꞌoꞌn Dios Espíritu Santo texin te junx maj. 35N-oc takꞌ Tcwal Dios te Tman, bix o txiꞌ tkꞌoꞌn Dios cykilca at tuj tkꞌabxin tuꞌn tcawenxin tibaj. 36Alcyej xjal ma tzꞌocslan tiꞌj Tcwal Dios, attzen tchunkꞌlal te junx maj. Pero kej xjal cycyꞌi tzꞌoc cybiꞌn Tcwal Dios, mlay kꞌoj cychunkꞌlal te junx maj. Nuk oꞌcx chi cyjel ten tuj castiwa tuꞌn Dios.

Currently Selected:

SAN JUAN 3: mamTS

Highlight

Copy