Malakai 2
2
Maanmaannib sa'alʋg
1“Maanmaanniba, sa'alkaŋa anɛ ya din.” 2Zugsɔb onɛ an Paŋtita'ar Sɔb la yɛl ye, “Ya ya'a pʋ kɛlisɛ, ka pʋ gban'e ya sʋnfʋn ye ya na'asi m yʋ'ʋrɛ, m na kɛ ka nɔpɔɔr paae ya, ka kɛ ka ya bareka la lieb nɔpɔɔr. Ɛɛn, m pʋn pɔ nɔɔri tisi ya sa, bɔzugɔ ya pʋ gban'e ya sʋnfʋn ye ya na'asi ma.
3“Yanam zug m na namisi ya yaas, ka nɔk bʋnkɔnbid banɛ ka ya mɔri maan maana la pʋti suoɛn ya nindaas, ka ba na vaae ya nɛ pʋt la mɔri keŋ. 4#Kal 3:11-13 Ala ka ya na baŋ ye man tisi ya sa'alkaŋa la anɛ ye li kɛ ka nɔnaar linɛ ka m maal nɛ Levi dim la na kpɛn ken tuon.” Zugsɔb onɛ an Paŋtita'ar Sɔb la yɛl ya. 5#Kal 25:12 “M nɔnaar linɛ ka m da maal nɛ ba la da anɛ nɔnaar linɛ mɔr vʋm nɛ sumbʋgʋsʋm, linɛ ka m nɔki tis Levi dim la, ye ba zɔti m yʋ'ʋr ka na'asidim. 6Yɛlsida pa'alʋg da bɛɛ ba san'an ka linɛ yʋ'ʋri buon ziri pʋ yii ba nɔɔrinɛ. Ba da dɔllim nɛ sumbʋgʋsʋm nɛ burikinnim, ka fɛndig nidib bɛdegʋ yis tʋʋmbɛ'ɛdin.
7“Maanmaannib sʋm ye ba pian'ad nɛ baŋir, ka nidib na di'edi ba pa'alʋg, bɔzugɔ ba anɛ Zugsɔb onɛ an Paŋtita'ar Sɔb la tʋmtʋmnib. 8Amaa ya fɛndig ya, ka bas yɛlsida suor la, ka ya pa'alʋg la kɛ ka nidib bɛdegʋ yidig; ala ka ya san'am nɔnaar linɛ ka m maal nɛ Levi dim la.” Zugsɔb onɛ an Paŋtita'ar Sɔb la yɛl ya. 9“Ala ka m kɛ ka ba nɛ'ɛsi ya ka pɔ'ɔgi ya nidib la sʋʋgin, bɔzugɔ ya pʋ dɔlli m suoya la, ka mɔr baregaŋ nɛ m wada la pʋʋgin.”
Juda ka' sida sɔba
10Ti wʋsa ka'anɛ ba' yinne biisɛɛ? Li ka'anɛ Wina'am yinne maali tii? Ka bɔɔ kɛ ka ti san'amid nɔnaar kanɛ ka ti mɔr nɛ taaba la? Ala ka ti san'amid nɔnaar kanɛ ka ti yaanam da maal la.
11Juda dim pʋ lɛn zi'e sida suorinɛ. Jerusalem nɛ Israel wʋsa tʋm yɛlkisʋg. Juda dim kɛ ka Pʋ'ʋsim Yir kanɛ ka Zugsɔb nɔŋ la lieb dian'ad, ban di teŋ zʋŋ pu'a banɛ pʋ'ʋsid wina banɛ yi teŋ zʋŋ na la. 12Dau kanɛ maal nɛ'ɛŋa la wʋsa, o ya'a bɔɔd on an ninsi'a wʋsa, Zugsɔb la na yis o Jakob buudi la kallin, ka ba mɛ kʋ paas banɛ mɔr maana kenna tisid Zugsɔb Paŋtita'ar Sɔb la nii.
13Yanamɛ lɛn niŋid si'el anɛ ya kɛya ka Zugsɔb daka la pɛ'ɛl nɛ ya ninta'am, ka ya kum ka kaasid on pʋ lɛn di'esidi ya maana la zug, bɛɛ o di'e li ya nu'usin nɛ ya'amlɛog la yɛla. 14Ya bu'osid ye, “Ka bɔ ka li aan ala?” Linɛ kɛ ka li aan ala la anɛ Zugsɔb la di sɛɛda fʋn nɛ pu'a kanɛ ka fʋ da di fʋ na'akinnim saŋa la, amaa fʋ pʋ bɛ nɛ pu'a la nɛ sidaa, la'an nɛ on an pu'a kanɛ ka fʋ da di nɛ nɔnaar la.
15Zugsɔb la pʋ maali ba ka ba anɛ yinnee? Ba niŋgbiŋ nɛ ba siig la wʋsa anɛ o din. Bɔ ka o maali ba ka ba an yinnɛ? Li anɛ on bɔɔd ye ba ya'a du'a biis banɛ na an Wina'am din la zug. Alazugɔ gu'usim ka sɔ' da san'am nɔnaar kanɛ ka o maal nɛ o pu'a kanɛ ka o da dii o na'akinnim saŋa la.
16Zugsɔb onɛ an Israel Wina'am la yɛl ye, “Man kis si'el anɛ dau na bas o pu'a. Li nwɛnɛ on na zaŋ zaba ka li kilim o fuug ka o yɛɛdnɛ.
“Alazugɔ, gu'usimi ya mɛŋ ka da san'am kaanb kanɛ ka ya kaanbi zi'el taaba nɛ sida laa.”
Sariakadib dabisir li'el ya
17Ya kɛya ka Zugsɔb la gɛɛn ya pian'ad.
Amaa ya bu'osid ye, “Ti niŋ bɔ ka o gɛɛn ti pian'adɛ?”
Li anɛ yanamɛ yɛt ye, “Banɛ wʋsa tʋm bɛ'ɛd la an sʋm Zugsɔb la tuon, ka o sʋnf malis nɛ ba la,” bɛɛ bu'osid ye, “Wina'am kanɛ an yɛlsida sɔb la bɛ yaanɛ la?”
Currently Selected:
Malakai 2: kus_gh
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
