Pin'ilʋg 44

1Josef yɛl o tʋmtʋm kanɛ gɔsid o yir la ye, “Pɛ'ɛlim dap la bɔtnam la nɛ diib, ban na nyaŋi zi si'em bɛn. Ka nɔki ba ligidi la su sɔ' wʋsa bɔto ni. 2Ka zaŋi m anzurifa kɔp la niŋ biig la bɔto la nɔɔrin, lin nɛ o ligidi la wʋsa.” Ka o da niŋ nwɛnɛ Josef n yɛl o si'em la. 3Ka bɛkɛung ka ba nɔki ba bʋmisi yi. 4Ban da nam pʋ lalig la, ka Josef yɛl o tʋmtʋm la ye, “Zɔm tɔ'ɔtɔ bɛn dap la, ka fʋ ya'a gban'e ba fʋn yɛlimi ba ye, ‘Bɔ ka ya nɔk bɛ'ɛdi lɛbis nɛ sʋm? 5Li ka'anɛ kɔp kanɛ ka m yisɔb mɔri nuud ka mɔri gɔsid o bɛog yɛla la ka ya zuu? Ya tʋm bɛ'ɛd.’” 6On da gban'e ba la, o yɛli ba ala, 7ka ba lɛbis ye, “Ti zugdaana, bɔ ka fʋ yɛti ti anwa? Ti pɔya ye ti pʋ tʋm bʋnkaŋaa. 8Fʋ mi' ye tinamɛ daa paae Keenan nyɛ ligidkanɛ bɛɛ ti bɔtnamin la, ti daa mɔri lɛbis na, ka wala ka ti na zu sanlima bɛɛ anzurifa fʋ yisɔb la yin nɛ? 9Fʋ ya'a nyɛɛ ti sɔ' ka o mɔr kɔp la, fʋn kʋʋm o, ka kɛ ka tinam banɛ kpɛlim la liebi fʋ yisɔb la sankpan'asnam.” 10Ka o yɛli ba ye, “Li an sʋm, m na maal nwɛnɛ yanamɛ yɛl si'em la, amaa onɛ bɔto ni ka m nyɛ kɔp la, on ma'aa na liebi m yisɔb la sankpan'as.” 11Ka sɔ' wʋsa digil o bɔto ka yɔ'ɔgi li. 12Ka Josef tʋmtʋm la pin'il kpɛɛm la bɔto la ni yiiga n paae ba wʋsa. Ka on da paae Benjamin bɔto la o nyɛ kɔp la anina. 13Bʋnkaŋa da san'ami ba sʋnya pamm ka ba aansi ba fuudi li zug. Ka ba wʋsa zaŋi ba la'adi pa'ali ba bʋmis la zugʋ lɛb teŋin la.

14Ka Juda nɛ o pitib la da paae anina la, Josef da nan bɛ nɛ yin. Ka ba igin o tuon, 15ka o yɛli ba ye, “Ya maal bɔɔ la? Ya zi' ye m na nyaŋi su'a baŋɛɛ?” 16Ka Juda yɛl ye, “Ti zugdaana, ti ye ti yɛl ye bɔ? Ti na niŋ wala ka fʋ baŋ ye ti zi' li ti'irɛ? Wina'am yisi ti gbin. Ti wʋsa na anɛ fʋ sankpan'asnam, kas-kas anɛ onɛ bɔto ni ka kɔp la bɛ la.” 17Ka Josef yɛli ba ye, “M kʋ namisi ya wʋsa. Onɛ ka m kɔp la bɛɛ o bɔto ni la, on ma'aa na liebi m sankpan'as; ka yanam banɛ kpɛlim la na tun'e kuli ya saam yin nɛ sumbʋgʋsʋm.”

18Ka Juda li'el o san'an na n yɛl o ye, “M zugdaana, dim suguru ka m tu'asif bi'ela. Da kɛ ka fʋ sʋnf duoe nɛ ma, baa fʋn zem nɛ Na'ab Faaro la. 19M zugdaana, fʋ daa bu'osi ti ye, ‘Ya saam la nan kpɛn vʋeya, ka ya mɔr ba'abiis sieba ka ba bɛɛ?’ 20Ka ti lɛbis ye, ‘Ti saam anɛ bʋnkʋdʋg. O da kʋdignɛ ka nyaan du'a Benjamin. Ka Benjamin mabiig la mɛ kpinɛ. Ka Benjamin ma'aa vʋe ka ti ba' la nɔŋ o galis.’ 21Fʋ yɛli ti ye ti mɔr o na ka fʋ mɛŋ nyɛɛ o nɛ fʋ nini, 22ka tinam yɛlif ye, ‘Benjamin ya'a kena ka bas o ba' la, o ba' la na kpi.’ 23Ti zugdaana, fʋ daa yɛli ti ye asɛɛ ka ti dɔlli ti pitbil la na, ya'a ka' ala ti kʋ lɛn nyɛ fʋ nindaa. 24Dinzugɔ tinamɛ daa kuli paae ti saam la san'an la, ti daa tu'as o fʋn pian' si'el la wʋsa tisi ti la. 25Li pʋ yuugɛ ka ti saam yɛli ti ye, ‘Lɛm keŋi da' diib bi'ela na tisi ti.’ 26Ka ti lɛbis o ye, ‘Ti kʋ nyaŋi keŋɛ. Ti ya'a na dɔlli ti pitbil la, ti na keŋ; amaa ti ya'a pʋ dɔl o keŋɛ, ti kʋ nyaŋi nyɛ dau la nindaa.’ 27Ka ti saam yɛli ti ye, ‘Ya mi' ye m pu'a da du'a biis ayi' tisim, 28ka ba yinne bɔdig ka basim, ka m da yɛl ye bʋnkɔnbbɛ'ogʋ sid gban'e o ka aans o zɔra-zɔra; ka m pʋ lɛn nyɛɛ o hali nɛ zina. 29Ka ya ya'a mɔr oŋa mɛ keŋ ka si'el ti niŋ o suor zug, m zuobpielim nwa' na sig yaʋgʋn nɛ sʋnsa'aŋ.’ 30-31Tɔ', m zugdaana, m saam nyɔɔg taae biig la nɛ hali, dinzug, m ya'a kuli paae m saam san'an ka biig la ka' ti san'anɛ, li na kɛ ka o kpi. Ka li pa'al ye tinamɛ kɛ ka ti saam zuobpielim sig yaʋgʋn nɛ sʋnsa'aŋ. 32Mam mɛŋ sid daa pɛsigi m mɛŋ ka pɛ'ɛŋ biig la m saam san'an, ka yɛl o ye m ya'a pʋ mɔr o lɛbis naa, taal la na dɔllim hali ti paae n nyɔvʋr bɛn. 33Dinzug, m sɔsidif ye fʋ kɛ ka man di'e biig la zi'esim kpɛlim kpɛla tʋmmi tisidif, ka biig la duoe dɔl o bieya kul o saam san'an. 34Ayei, m zugdaana, m na niŋ wala kuli m saam san'an ka pʋ dɔl biig la keŋɛ? Da kɛ ka m nini nyɛ bʋmbɛ'ɛd linɛ na paae m saam la.”

Currently Selected:

Pin'ilʋg 44: kus_gh

Highlight

Copy