Pin'ilʋg 12

Wina'am da buol Abram ye Abraham

1 # Tʋm 7:2-3; Hib 11:8 Zugsɔb da yɛl Abram ye, “Basimi fʋ teŋ la, nɛ fʋ nidib nɛ fʋ saam yidim wʋsa, ka m na pa'alif teŋ kanɛ ka fʋ na keŋ. 2M na kɛ ka fʋ buudi lieb buudtita'ar, ka na niŋif bareka ka kɛ ka fʋ mɔr yʋ'ʋtita'ar, ka fʋ na an bareka sɔb. 3Ka banɛ niŋidif bareka la, m mɛ na niŋi ba bareka; ka banɛ kaanbid bɛ'ɛdi tisidif la, m mɛ na kaanb bɛ'ɛdi tisi ba. Ka fʋn zug, dunia nidib wʋsa na paam bareka.”

4Ka Abram da sid bas o teŋ la ka yii keŋ nwɛnɛ Zugsɔb la yɛl o si'em la, ka Lot dɔl o. Abram da yi Haran la o mɔri yʋma pisyɔpɔi nɛ anu (75). 5O da yinɛ o pu'a Sarai nɛ o pitʋ biig Lot nɛ o la'ad nɛ o tʋmtʋmnib ban ka o da paam Haran teŋin la wʋsa, ka ba gban'e suori keŋ paae Keenan teŋin. 6Abram da gɔɔn paae Sekɛm teŋin, ti paae titita'ar kanɛ bɛ Moreh la. Saŋkan la ka Keenan dim da nan bɛ teŋin la. 7Ka Zugsɔb nie o mɛŋi pa'al Abram ka yɛl o ye, “M na nɔk teŋ kaŋa tis fʋn nɛ fʋ yaas.” Ka Abram mɛ maan bimbim n tis Zugsɔb onɛ nie o mɛŋi pa'al o la. 8Ka o yii anina paae zuobanɛ bɛ Betel nya'aŋ la ka zin'in Betel nɛ Ai teŋsʋk, ka Betel bɛ ya-tuona ka Ai bɛ ya-nya'aŋ. Ka o lɛm mɛ maan bimbim anina tis Zugsɔb la, ka pʋ'ʋsid Zugsɔb la. 9Ka Abram duoe anina mɔr ken hali kpa'ad Negef teŋgbauŋ la.

10Saŋkan la kɔ'ɔmtita'ar da li teŋ la ni ka Abram keŋ Egipt ye o bɛ saŋa bi'ela kɔ'ɔm la zug. 11On da bɔɔd Egipt paar la o yɛl o pu'a Sarai ye, “M mi' ye fʋ vɛnl hali, 12alazug, Egipt nidib la ya'a nyɛɛf ba na yɛl ye fʋ anɛ m pu'a. Ba na kʋʋm ka basif. 13Yɛlim ye fʋ anɛ m taʋn ka ba na'asi m ka kʋ kʋʋmi fʋ zugɔ.” 14Abram da paae Egipt la, nidib la sid nyɛɛ o pu'a la ka o vɛnl hali. 15Faaro na'ayikpɛm la da nyɛɛ o la, ba da tu'asi o vɛnlim la yɛla tis na'ab Faaro, ka mɔr o keŋ Na'ab Faaro yin. 16Ka Sarai zug, na'ab Faaro da maal Abram sʋ'ʋŋa ka Abram paam pɛ'ɛs nɛ niigi nɛ bʋŋdaad nɛ bʋŋnya'as, nɛ yamdaad nɛ yampu'ab nɛ yʋgʋma. 17Ka Zugsɔb kɛ ka ban'abɛ'og kpɛn' Na'ab Faaro yin Abram pu'a Sarai yɛla. 18Ka Na'ab Faaro buol Abram ka bu'os o ye, “Bɔ ka fʋ maal mam wala? Bɔ ka fʋ pʋ yɛlim ye o anɛ fʋ pu'a? 19Bɔɔ kɛ ka fʋ yɛl man ye o anɛ fʋ taʋn, ka mam pʋ baŋɛ ka nɔk o ye o lieb mam pu'a? Nɔkimi fʋ pu'a keŋ!” 20Ka Na'ab Faaro tis o nidib la nɔɔr ye ba yisim o nɛ o pu'a la nɛ on mɔr si'el wʋsa ka ba gaad.

Currently Selected:

Pin'ilʋg 12: kus_gh

Highlight

Copy