Luka 6
6
Yesu po Fumu o diyuwa dyo Savata
(Mat 12.1-8; Mar 2.23-28)
1Diyuwa dimweya dyo Savata, Yesu wa pitire mu kaci ko makanda o mahangu. Erongwa yenthzi ya corire mashakara o mahangu omo mu makanda a pitire no ku a fenya mu moko o no ku dya oheke. 2Afarithsi amweya epurire ci: “Ine eyi mu tendera eyi i na kana ku tawethziwa mu diyuwa dyo Savata?”
3Yesu wa wa tawire ci: “Ene ka mwa vara eyi a tendire Davida nanuenthzi ou a fire nthzara? 4Wengenine mu nthzio thza Nyambi no ku shimba makende a a tupwerire Nyambi. Wa dire eyi i na tawethziwa pohuma ku diwa ku mapurisita. Wa pireko makende amweya anuenthzi.” 5Yesu wa shumunine ku amba ci: “Mwana Munu po yodiyo Fumu o dyo diyuwa dyo Savata.”
Yesu aa porithsa munu o ku kukutera dyoko
(Mat 12.9-14; Mar 3.1-6)
6Diyuwa dimweya dyo Savata karo, Yesu wengenine mu sinagoge no ku tateka ku rongithsa. Omo mu sinagoge kwekarire mukwerume o ku kukutera dyoko dyo rudyo. 7Arongithsi o murao nAfarithsi ondamenine ci a mone Yesu o ku porithsa munu mu diyuwa dyo Savata, ci ou a i mu monena o ku i tenda a mu cape yoingi.
8Unone Yesu wa dimukire eanekera yo, ayepo ambera mukwa ku kukutera dyoko ci: “O wiye kuno no wimane pa rupara rwanu.” Ayepo katuka no ku kemanapo.
9Yesu ayepo amba kukwo ci: “Naa mipura, ene murao ne waa tawethza ku tenda yoiwa nji, inji yoimango mu diyuwa dyo Savata? Ku yoyithsa mwoyo nji, inji ku wipithsa?”
10Wa endithsire meho enthzi no ku kenga anu wahe mbeci a ambere mukwa ku kukutera dyoko ci: “O orore dyoko dyoe.” Wa tendire kengeyo, dyoko dyenthzi adyopo di hukera nawa. 11Mweyo, Afarithsi narongithsi o murao a anthzipire nene no ku tateka ku ciyongora edi nga twethsa ku tenda Yesu.
Yesu aa hangura tunganda to dikumi na twidi
(Mat 10.1-4; Mar 3.13-19)
12Mwao mayuwa Yesu wa thzire pa mukinya ku ka rombera. Wa ka kuñwerire othsiku ouhe o ku rombera kwa Nyambi. 13A na ci mathsiku, wethserire erongwa yenthzi yoihe ku kwenthzi no ku hangura o dikumi naidi, awa a tire ci tunganda. 14Aa po odiyo mathzina o: Simoni oyu a tire ci Peturu na minenthzi Andereasi, Jakovo na Johani, Filipu na Batolomeu, 15Mateu na Tomasi, Jakovo mwana Alufea na Simoni oyu nethsiwa ci Zeloti, 16na Judasi mwana Jakovo na Judasi Isikariota oyu wa mu kwatithsire.
Mbunga thzaa shupwera Yesu
(Mat 4.23-25)
17Ou a urumukireno ku tunda pa mukinya, a nemanine pa kandaana apa yekarire erongwa yenthzi yoingi no mbunga thzothzikuru ethzi thza tundire mu Judea yomuhe no mu Yerusalema no ku kakuro ko diwate ku Tire na Sidoni. 18Kuma a keyire ku na teerera no ku na porithsiwa kwikora yo, karo akwamathzimu a porithsiwire. 19Munu no munu wa erekire ku mu kwata, inene aye wekarire nokoro oku porithsa munu yomuhe.
Thsiyauthzi nothsimo
(Mat 5.1-12)
20Yesu wa kamburire meho no ku kenga erongwa yenthzi, ayepo amba ci:
“Akwa thsiyauthzi ahepwe,
inene Kutumina kwa Nyambi po kwenu!
21Mwakwa thsiyauthzi amwe mu fa nthzara thsino thsikati,
inene kenge mwa kwikuta!
Mu di no thsiyauthzi amwe mu dira thsino thsikati,
inene kenge mwa ku hekaheka!
22Mwakwa thsiyauthzi anu yoihe a mi thzimba,
ku mi kana,
ku mi tukathzana no ku amba ci mwanu owamango mukaci ka Mwana Munu!
23“Ou ya ku tendahara eyo mwa ku nyanyuke no ku rearea ko thsinyanyu, inene muyambo wenu mu wiru ukuru ou mu na turekiwera. Inene nakwathsañuru wo dya tendire akwakukethza!
24“Unone mwakwothsimo amwe mwa kwa ku fuma,
inene na mu wana kare ohengawethzo wenu.
25Mwakwothsimo amwe mwikuta thsino thsikati,
inene kenge mwa kufa nthzara!
Mwakwothsimo amwe mu hekaheka thsino thsikati,
inene kenge mwa ku dira makuano!
26Othsimo po wenu amwe a shangara thsino thsikati, inene nakwathsañuru wo
dyo na shangaranga akwakukethza o mbango.
Mu shime akwethzimbo yenu
(Mat 5.38-48; 7.12a)
27“Unone ame naa ambera amwe mu na ni teerera ci mu shime akwethzimbo yenu, mu tende nawa awa na mi thzimbi. 28Mu fiyawere awa mi tuka, mu romberere awa mi nyandithsa. 29Ngeci munu aa ku fura ku ditama, o mu pe nedi dimweya kengeyo, o ku ku nyanga vaki woe, wa mu kanithsa ku shimberera no hembe kengeyo. 30O pe oyu na rombo yomuhe, karo ethsi o na nyangiwa wa fota ci thsi ku hukere. 31Dyodi mu na foto anu amweya ku mi kwama, namwe mu wa kwame kengeyo.
32“Ngeci amwepo mu shima pohuma awa na mi shimi ne thsine mwa ku shangariwerapo? Inene nanu wevi aa shima awa a na wa shimi. 33Karo ngeci mwaa kwama nawa kowa a na mi kwamanga nawa, pene apa ku mi shangarera? Inene nanu wevi nawo aa kwamanga kengeyo. 34Karo ngeci mwaa korotithsa pohuma awa mu na kurupera ci kenge a ku mi huthsera ne, thsine mwa ku shangariwerapo? Nanu wevi nawo a korotithsanga anu wevi ko ku kurupera ci kenge a ku wa huthsera.
35“Uno honi amwe mu shime akwethzimbo yenu, mu wa tende nawa, karo mu korotithse ko kukana ku kurupera ci a ku mi huthsere, muyambo wenu wangu wa kwikare oukuru, karo kenge mwa kwikara ana Nyambi, aye o Kuthzinama Nene. Inene aye po o di no thsihemo no ku kowa a na kana ku citarura keyi a na wa kwamena, mofoci kengeyo nanu owamango. 36Mwikare no ñeke eci edi a di no ñeke Tata wenu.
Mwa ratura amweya
(Mat 7.1-5)
37“Mwa ratura, namwe ka mwa ku raturiwa; mwa shomorora, namwe ka mwa ku shomororiwa; mu tetere, namwe kenge mwa ku teteriwa. 38Mu pe, namwe kenge mwa ku piwa. Mucekero ouwa, o ku thsinderiwa no ku nyungiwa shime ku yupathzoka kenge wa ku pakiwa mu thsimbata thsoe. Inene thsothsi thsianekethzithso mu cikwathsithsa thsothsa ku cikwathsithsiwa ku mi huthsera.”
39Karo wa wa terire mutangu ci: “Ene kengenga i tawa ci kapuputwa a tangerere muenthzenthzi kapuputwa nji? Ene nga ka ka wera wahe mu diteke? 40Thsirongwa tumba a piti murongithsi wenthzi, unone o ku na pu ku rongithsiwa, aa twethsa ku cishoka na murongithsi wenthzi.
41“Ngepi edi nga o mona kahonyi aka ka di mu dithziho dya muenthzoe owe o ku di no thsithsini mu dithziho dyoe? 42Owe o mukwamahetaheta, ngepi edi nga o ambera muenthzoe ci: ‘O keye ni ku toore kahonyi aka ka di mu dithziho dyoe,’ owe o ku di no thsithsini mu dithziho dyoe? O tange tango ku tundithsa thsithsini ethsi thsi di mu dithziho dyoe, mbeci o mone nawa no ku tundithsa kahonyi aka ka di mu dithziho dya muenthzoe.
Thsitondo no ima yathso
(Mat 7.16-20; 12.33-35)
43“Kwithsa thsitondo thsothsiwa thso kwima ima yoimango, karo kwithsa thsitondo thsothsimango thso kwima ima yoiwa. 44Thsitondo no thsitondo thsa ku dimukera kweyi yemako, kwithsa o ku koyora ñuyu ku musheunga, karo kwithsa o ku koyora thsikocera thso veine ku mukona. 45Kwa munu o muwa kwa ku tunda yoiwa eyi yekara mu thsinyungero thso mu mucima wenthzi ouwa. Kwa munu o mumango kwa ku tunda yoimango eyi yekara ku mucima wenthzi oumango. Inene mu kanwa ko munu mwa ku tunda eyi yekara ku mucima wenthzi.
Akwakuumba aidi o nthzio
(Mat 7.24-27)
46“Mwaa nithsera ine ci: ‘Fumu, Fumu,’ oku mu kana ku tenda eyi ni mi ambera? 47Kenge ni mi tongwera edi a cipitura munu o ku keya ku kwange no ku yuva maywi ange no ku i tenda. 48Aa cipitura eci munu o ku umbera nthzio pa diwe, aa thsima ku thzungithsa no ku shisha mushisho. Meyu o ku pupa yoihe a keya, muronga waa cora ku tamba apo pa nthzio unone meyu kadi a ku twethsa ku thzi nyanganyithsa, inene na thzi umbiwa nawa. 49Unone o ku yuva no kukana ku i tenda aa cipitura eci munu o ku umbera nthzio pa muve ko kupira ku shisha mushisho. Meyu o ku pupa yoihe a keya, aa na thzi thsindura. Kuthsinduka kwethzo nthzio, kenge kwa ku reta kwiperera kwathzo.”
Currently Selected:
Luka 6: mho
Highlight
Share
Copy
Want to have your highlights saved across all your devices? Sign up or sign in
©2023 The Seed Company
