Luka 24

Yesu aa pinduka kwafu

(Mat 28.1-10; Mar 16.1-8; Joh 20.1-10)

1Mu diyuwa dyo kutanga mu sunda, ruura awo ambuyama a shimbire ehefu no thsende eyi a ciroithserire no ku thza ku thsidi. 2A ka wanine diwe dyo ku thsero thzo thsidi o ku di na arumuniwako. 3Engenine mu thsidi, unone ka waninemo erama ya Fumu Yesu. 4O kwa i cikomokera kengeyo popo kwa keyire akwerume aidi awa a vatire ekoveyo yo kutethzima, emanine ku nyonga thzowa ambuyama.

5Ko ku yapa nene a kupamine pashi, unone awo akwerume aidi a wepurire ci: “Ine eyi mu fotera o muyumi kwafu? 6Ka a dimo muno o na pinduka, mu vuruke eyi a mi amberire mu Galilea ci: 7‘Mwana Munu aa roera ku piwa mu moko anu wevi, no ku mwamba pa mbinda, unone mu diyuwa dyo muthsihatu kenge a ku pinduka kwafu.’ ”

8Popo nawo ambuyama a vurukire maywi a Yesu.

9A tundire pa thsidi no ku ka tongwera tunganda to dikumi na kofoci no ku kwamweya wahe. 10Nedi Madiya Magadalena, Joana, Madiya mama wa Jakovo nambuyama amweya, awa a tongwerire tunganda eyi. 11Unone ka tawire eyi a wa amberire ambuyama, awo ci kuyavayava kwo pohuma. 12Unone Peturu wa katukire ku cirera ku thsidi no ku ka kotama ku hokera mu thsidi, wa ka monine dimbatu dyo lineni apa a vungerire Yesu. Ngou a ka hukire ku diumbo, o ku na cikomokera eyi ya tendaharire.

Erongwa idi ya Yesu o ku i thza ku Emausi

(Mar 16.12-13)

13Dyodyo diyuwa, erongwa idi kwirongwa ya Yesu kuma ya thzire ku diumbo edi di nethsiwa ci Emausi, tunano to ku kwana dikumi na kofoci ku tunda mu Yerusalema. 14Kuma ya thzire o ambaura yoihe eyi ya tendaharire. 15O ku i ambaura kengeyo no ku cipaura, aye Yesu wa henyenine ku kwayo no ku enderera nayo. 16Ya mu monine, unone ka ya mu dimukire.

17Yesu wa ipurire ci: “Ine eyi mu thza o ambaura o ku mu enda?”

Yemanine ko mathsiwa. 18Thsimweya ethsi thsi nethsiwa Kleopa thsa mwipurire ci: “Ene yowe o mwenda pohuma oyu di mu Yerusalema oyu na kana ku dimuka ethsi na thsi tendahara mo aya mayuwa naa pu nji?”

19Aye wa ipurire ci: “Enu mwine?”

Ya tawire ci: “Eyi ya Yesu wa Nazareta. Nedi mukwakukethza o mukoro mu ku amba netenda pa meho a Nyambi nanu. 20Akuru o mapurisita etu naendithsi o mbunga na mu shimbi no ku ka mu ratwera kufa, awopo a mwamba pa mbinda. 21Atwe kuma na tu kurupera ci yodiyo wa ku patura Maisiraele. Unone kwithsa, rero dyoo muthsihatu ku tunda apa na i tendaharera eyi. 22Karo ambuyama amweya ku kwetu a na tu komokithsa. Kuma a na menekera ku mararo mathsikuthsiku shemwa, 23unone ka ka wanine thsithzimbi thsa Yesu. Ou a na ka huka a na tu tongwera ci a na mono thsimona thso tungeru otu tu na amba ci mu yumi Yesu. 24Amweya kowa nekara netu shime aa thza ku mararo no ku ka wana eci edi a na tongora ambuyama, unone aye ka ka mu monine.”

25Yesu wa ambire ci: “Mayuwane amwe mwanu o kupira maano no kukana ku tawa wangu eyi na amba akwakukethza. 26Ene ka na i roera ci Mesiya a nyandithsiwe kengeyo o ku shime kwingena mu kutethzima kwenthzi nji?” 27Yesu ayepo i tongonwena eyi ya ambiwire mu Mañoro keyi yenthzi. Wa tatekire koa a Mushe mane shime ku na kuma koa akwakukethza wahe.

28Ou a kokerire ku diumbo Yesu wa ningire eci a piterera. 29Unone ya mwindire, ya ambire ci: “O kume netu mu diumbo wa piterera othsiku uno.” Ayepo thza nayo.

30O ku nekara nayo ku tafure, wa shimbire dikende no ku kanderera kwa Nyambi, wa di kuyaurire no ku i pa. 31Popo ya kathsukire pa meho no ku mu dimuka, ayepo i thsevuka. 32Ya ambire ci: “Kandi yodiyo thzi na pianena micima thzetu eci mudiro uya a na ambaura yo Mañoro mu dikuñwa?”

33Popo ya hukire ku Yerusalema, ya ka wanine tunganda to dikumi na kofoci namweya o kwa di pofoci nato 34awa a ambire ci: “Yoshemwa! Fumu na pinduka kwafu Simoni na mu mono.” 35No iya erongwa idi iya ya tundire ku Emausi ya tongaurire edi a hokokire Yesu ku kwayo mu dikuñwa, nedi ya mu dimukire ou a kuyaurire dikende.

Yesu aa hokoka kwirongwa yenthzi

(Mat 28.16-20; Mar 16.14-18; Joh 20.19-23; Ete 1.6-8)

36O ku i ambaura eyo, popo Yesu wa nemanine mu kaci kayo, no ku amba ci: “Thsiyaro thsikare nenu.”

37Yoihe ya cishutukire no ku yapa, kuma ya anekerire ci ngwa thsirumba ethsi i na mono. 38Wa ipurire ci: “Ine eyi mu yapa no ku tamangera mu micima thzenu? 39Mu mone mu nyara thzange nedyato yange. Yame shemwa! Mu ni kwatakwate ci mu cimonene, inene thsirumba po ka thsa wana nyama neshoko, unone ame po ni di nayo.”

40Ou a ambire kengeyo wa i monithsire nyara thzenthzi nedyato yenthzi.

41Unone ayo ka ya tawire pakuninga ci kuma ya nyanyukire no ku komoka, ngou a ipurire ci: “Ene mu diko nedya muno nji?” 42Ya mu pire thsicimbi thso thsi o ku tereka. 43Wa thsi shimbire no ku dya o kwa na mu tanekera.

44Wa i amberire ci: “Eyi po yodiyo iya na ni mi tongweranga uya na nikaranga nenu ci eyi ya ñoriwire keyi yange yoihe mu Murao wa Mushe, Akwakukethza no mu vuka thzo Membo yaa roera ku citombora.” 45Wa thziturire maano ayo ci i yuverere Mañoro. 46Wa i amberire ci: “Eyi ya ñoriwire po eyi, Mesiya aa roera ku nyandithsiwa no ku fa, unone kenge a ku pinduka kwafu mu diyuwa dyo muthsihatu. 47Kucera evi ci i teteriwe kenge kwa ku hongiwa mu dithzina dyenthzi ku matunga oahe, ku tatekera mu Yerusalema. 48Amwe po mwa mambangi weyi enu eyi. 49Ame kenge na ku ka mi tumithsera eyi a kumbwethzire Tata, mwikarange muno mu mbongi shime ou wa ku keya Mupepo Oukenu ku na mi pa okoro o ku tunda ku wiru.”

Yesu aa thzina mu wiru

(Mar 16.19-20; Ete 1.9-11)

50Yesu wa i tangererire ku thza ku Betania, ou a ka kumine wa yerurire moko enthzi mu wiru no ku i fiyawera. 51O ku i fiyawera kengeyo, wa i thsiire ayepo twariwa ku wiru. 52Ayo ya mu romberire no ku huka ku Yerusalema ko thsinyanyu thsothsikuru. 53Thsikati thsothsihe kuma na ikaranga mu Tembere, o ku i shangara Nyambi.

Currently Selected:

Luka 24: mho

Highlight

Copy