Etenda 16

Timoti aa kwamena pofoci na Paulu na Silasi

1Paulu wa thzire ku Debe no ku Lisitira. Omo kwekarire thsirongwa thso dithzina dyo Timoti, mwana mbuyama o Mujuda o mukwakutawa, unone tata wenthzi nedi Mugerike. 2Akwakutawa o mu Lisitira no mu Ikoniamu a shangarire Timoti. 3Paulu ngou a fotire ci Timoti a mu thsindekethze, wa mu twarire ku mukanda pakuninga ci muya mu mandau a thzire kuma kwekarire Majuda, inene anu wahe kuma a dimukire ci tata wenthzi nedi Mugerike. 4Ou a thzire o pita mu mambongi, a thzire o tongwera anu ku hengeka eanekera yo tunganda nakuru o mu Yerusalema. 5Mweyo, makereke a koropire mu thsitawo nanu awa tawire a civungithsire diyuwa no diyuwa.

Thsimona thsa Paulu thso mukwerume o mu Masedonia

6A Paulu na Silasi na Timoti a thzire mu ditunga dya Firigia no mu Galatia, inene Mupepo Oukenu wa wa kanithsire ku amba diywi mu Asia. 7Ou a ka kumine po pepi na Misia, a erekire kwingena mu Bitinia, unone Mupepo wa Yesu wa wa kanithsire. 8Ngou a pitererire Misia no ku urumuka ku thza ku Toroasi.

9Othsiku Paulu wa monine thsimona thso mukwerume o ku Masedonia o ku nemana ku mu adikanena ku romba ci: “Naa ku romba, o keye ku Masedonia no tu kwathse.” 10Munyima thzo ku mona Paulu ethso thsimona, ko wanguwangu twa ciroithserire ku thza ku Masedonia, ko ku mona ci yoshemwa Nyambi naa twithsa ci tu ka honge Muthzimbu Ouwa kukwo.

Lidia aa piruka mukwakutawa mu Filipi

11Ou twa hunyunine mu Toroasi twa tambire ku Samotirake, diyuwa edi dya randireko twa ka thsekerire ku Neopolisi. 12Ku tunda omo twa thzire ku Filipi, mbongi thzo kutanga mu thsikiriti thsa Masedonia mu kutumina ko Thsiroma. Twekariremo mayuwa oapu.

13Dyo Savata twa tundire mu mbongi no ku thza ku kakuro ko rware, oku twa anekerire ci ngwa ko thzi di ndau thzo marombero. Ou twa ka kumineko, twa kekarire no ku tateka ku ambaura nambuyama awa ciwanenineko. 14Yumweya kowa takamithsire ku tu teerera nedi mbuyama o dithzina dyo Lidia o mu mbongi thza Tiyatira, oyu wa urithsangire eto yo muvara o muhombohombo yo ku tura, karo kuma a romberangire Nyambi. Fumu wa yanthzururire mucima wenthzi ci a teerere eyi a ambire Paulu. 15Ou a pwire ku korovethziwa, aye no mwanda wenthzi, wa ambire ci: “Ngeci mwaa ni shimba ci no mukwakutawa kwa Fumu, tu thzenu mu kekare ku nthzio thzange.” Wa ooterire, shime ou twa thzire nenthzi.

Paulu na Silasi mu kamenga

16Diyuwa dimweya, o ku tu thza ku ndau thzo marombero, twa hanganine mupika o mbuyamaana o mupepo oumango o kuka yo ku rupara karo keyo wa wanithsire añathsire enthzi madi oangi. 17Wa thzire o shupwangethza Paulu natwe, o ku thza o ambanga ci: “Awa anu awa po apika Nyambi, aye o Kuthzinama Nene, awa honga ku kwenu dikuñwa dyo kuyoyithsiwa.”

18Wa shimbire mayuwa oangi o ku i tenda eyi. Ku hura Paulu wa anthzipire, wa cithsetukire no ku ambera uya mupepo ci: “Ko dithzina dya Yesu Krisitu, naa ku tumina ci o tunde mu mwenthzi!” Popo wa mu tundire.

19Uno honi añathsire enthzi ou a monine ci okurupero wo o ku kwama madi u na pu, a kwatire Paulu na Silasi no ku wa purututera pa mbanthza thzo maurithsero ku wa twara kwaendithsi. 20Ou a ka wa kumithsire kwakwakuratura a ka ambire ci: “Awa anu po Majuda karo aa reta mikwangarakanyi mu mbongi thzetu, 21pa ku rongithsa ethsemwa eyi i na kana ku tawethziwa atwe twa Maroma ku i tambura nji ku i tenda.”

22Mbunga thza cipakererirepo ku rwithsa Paulu na Silasi, akwakuratura a tuminine ci a shupuriwe eto a furiwe. 23Ou a manine ku wa fura nene epumu yoingi, a wa thsindekerire mu kamenga no ku raerera mukwakunyunga kamenga ci: “O takamithse ku wa nyunga awo.” 24Oya mukwakunyunga ou a yuvire ethsi thsiraerera, wa wa pakire mu thsitokithsi thso pa kaci ko kamenga, no ku paka edyato yo mu makuro.

25Pa kaci kothsiku Paulu na Silasi kuma romberire no kwimbera Nyambi membo, enthzinda imweya ayo kuma ya wa teererire. 26Popo kwekarire kungangama kokukuru ko kaye, no mishisho thzo kamenga thza ngangamine. Ko wanguwangu mathsero o kamenga oahe a yanthzurukire, no madyenge aa angithsire enthzinda yoihe a putukire. 27Ou a ka tukerire mu wiru mukwakunyunga kamenga no ku mona ci mathsero o kamenga a na yanthzuruka, wa shwamunine mwere wenthzi ci a cipae, inene kuma a anekerire ci enthzinda i nombo. 28Unone Paulu wa mwierire ci: “Wa cikurura, twahe mo tu di muno!”

29Mukwakunyunga kamenga wa rombire mimunyi no ku yakamenamo ko wowa, o ku tutuma no ku ka tongama ku manwi ku rupara rwa Paulu na Silasi. 30Ngou a wa punithsire pora no ku wepura ci: “Añathsire wange, ine eyi ni na roera ku tenda ci ni yoyithsiwe?”

31A ambire ci: “O tawe kwa Fumu Yesu, apo honi kenge o yoyithsiwa, owe no mwanda woe.” 32Ngou a hongire diywi dya Fumu ku kwenthzi no mwanda wenthzi ouhe. 33Momo mu thsikati thsothsiku mukwakunyunga kamenga wa wa shimbire no ku ka wa yoa petwa yo. Ayepo korovethziwa, aye no mwanda wenthzi ouhe. 34Wa wa twarire mu nthzio thzenthzi no ku ka wa pa edya. Wa nyanyukerire pofoci no mwanda wenthzi ouhe pakuninga ci wa tawire kwa Nyambi.

35Ou dya vire diyuwa akwakuratura a tumine tupathso kwa mukwakunyunga kamenga ci: “O punithse Paulu na Silasi a cithzere.” 36Mukwakunyunga kamenga wa tongwerire aa maywi Paulu ci: “Akwakuratura a na tumina ci owe na Silasi mu punithsiwe. Mweyo, mu pune mu thze honi mu thsiyaro.”

37Unone Paulu wa amberire tupathso ci: “Kuma na tu furera pa mbunga o ku tu shime ku raturiwa, karo no ku tu paka mu kamenga shaanga ci natwe twakwaditunga dya Roma! Pano honi ne ngou a fota ku tu punithsa ku mukunda nji? Dyombo! A keye wodiyo athsinda na tu tundithsemo.”

38Tupathso twa hukire ku ka tongora eyi kwakwakuratura, a yapire ou a yuvire ci Paulu na Silasi po Maroma. 39Ngou a keyire no ku na cidirerera kwa Paulu na Silasi. A wa punithsire no ku wa romba ci a tunde mu mbongi. 40Ngou a punine mu kamenga no ku thza ku nthzio thza Lidia. A ka ciwanine nakwakutawa no ku wa tanarithsa, awopo a thza.

Currently Selected:

Etenda 16: mho

Highlight

Copy