Matius 8

Yesusti nimi kon tena pololamogne wali nembaogha

(Markus 1:40-45; Lukas 5:12-16)

1Yesus yimag anekoa kulukul aogpa, nimi maikno longol aek nimi taneko elag neleplamek. 2Neleplamekpa nimi nhon konag naikna poloro telamogne nhon yaog. Yingkina Yesus whingag yabu sanukto pulingkina yubu lelamogti, “Nai, andi na, ‘Wali nembanun,’ sembamen tanena, an mikipneri na wali nembanululam,” seog.

3Wene aro molbaogpa, Yesusti sae nginikto nimi enekoag palilamogti, “Wali semban. An wali nembaghenun. Kut taghele!” seog. Wene seog abeneko pere nimi enekori kon eneko wali kut taog. 4Kut taogpa, Yesusti nimi enekoag yubu lelamogti, “Wali uro ka'ebalulam! Nari an wali nembaghenne sembe ora nimiag ambatsiseng kom! Aghana memne Allah sembe paliropne ponekoag peket pimendi, Musari samenag, ‘Tatlulom,’ aro aruksirop yubu sunsunum uro Allah sembe pimnepne elag pabululam. Pabimendi andamne elag lag nenep talulam. Eldi an kembaghelenge pere agha, ‘Sik uro yabil,’ senenne kekneba nenekori sin nimi taneko el nembahilul,” aro ambarog.

Yin salerop nang sikindo arukna Yesusti wali nembaogha

(Lukas 7:1-10; Yohanes 4:43-54)

5Yesus Kapernaum asag wa'alamogpa, yin salerop nang sikindo Romange nhon Yesusag, “Yepnululam,” aro molol aog. 6Yaogti yubu lelamogti, “Nai, arukna naringe aeag mo lebe senep koma seklero malamla,” seog.

7Wene seogpa Yesusti, “Hae yaneri wali nenel anun,” seog.

8-9Wene seogpa, yin salerop nang sikindo ponekori Yesusag, “Nai, nari ae lomag an nimi nubunge wa'al ananne olog sunsunum komdi, na nimi ologneri aeag yanep kom. Andi yubuag agha nari arukna, ‘Wali talul,’ semenba wali talul. Nimi mikipneri yubu leplenge sik uro yabinepne sembe na el wamna. Na babe aruksirop yubu umag wamnari, ka'ero saelba ulamna. Nari yubu lelamnange babe na umag nimiri ka'elamangdi, saelba ulamang. Nari nimi nhonag, ‘Pululam’ senep tanena, nimi eneko pinep. Nari nimi orangeag babe lelamnari, ‘Yalulam,’ senep tanena yanep. Nari arukna nhonag, ‘Undo ualulam,’ senep tanena nari, ‘Ualulam,’ senne sunsunum uro eldi uanep. Ane sembe an nimi nubunge wamlamdi, mo yubu lepmenba, wali talul,” seog.

10Wene seogpa, Yesusti ka'ebaogti, lo'om seog. Lo'om seogti, Yesusti elag neleplamek nimi tanekoag, “Yubu sikne agha ambatnuahin. Nimi eneri nanag sik tapto, ‘Mikipne,’ aro wana paliro seneraglamnel. Eldi nanag sikne aro seneraglamnel saog uro Israel nimiri nanag undo seneragtop nimi nhon babe ia ulamsin kom! 11Lemnuan yubu ene ka'eamsut. Nimi heng walelingkirobag siba babe, heng purukul pirobag siba babe yalamikti, ‘Imagne ponekori na saelba ulamnelul,’ aro wa'alamukang. Eldi saelba ulamsil nimi taneko salero pipsileri, sani yoro kwaneng tatsirobag aneko pul aukang. Pul aikti Abrahamap, Ishakap, Yakubap kwaneng nhon tukang. 12Allahri saelba uhirop nimi wamnep nimi tanekori Allahri wepto pogtopne yubu sia lenne poneko kipnepneog wamla. Aghana el kipna koma ulamik tanena, inibin sirikag yag lambahileag tanekona, si keleng tereba yo lelem engero wamukang,” aro neleplamek nimi tanekoag ambatsiog.

13Wene aro ambatsiogti, Yesusti yin salerop nang sikindo ponekoag yubu ambatto lelamogti, “Andi nanag wana paliro, ‘Yepnelul,’ aro seneraglamlamne nene sik talul. Wali pululam,” seog. Wene seog ko'o abenekoag, yin salerop nang sikindo arukna aneko wali taog.

Yesusti nimi maikno wali nembahiogha

(Markus 1:29-34; Lukas 4:38-41)

14Yesus Petrusti aeag aneko piogti kemelamogpa, Petrus elyamalkel bobo naikna naiklamogti, ae lomag malamogha Yesusti kembaog. 15Kembaogti kel enekori saeag Yesusti sae pibogpa, bobo naikna kom taog. Kom taogpa, puka yingkina kel enekori Yesus tena yepto yobarelamog. 16Inipna peram talamogpa, nimi maiknori phia nimi kulomag wamsiogne Yesusag poa yalamsiek. Yubu kiki nhonag agha Yesusti phia yonge nimi kulomag wamsiogne yag lanalamsiogti, nimi naiktop nimi babe ni wali nenelamsiog. 17Yesusti undo unulamogne neneko samenag Allah yubu silimu tiptopne Yesayari mome toro pibogneap sunsunup taog. Allah Yubu sunup taog nena,

“Nu nong pesa uropne eldi toro poplari,

nu naikna naiktopne wali nenero sa'obatsil,”

aro mome toro pibogne sunsunum uro ulamog.#Yesaya 53:4

Yesusti nimi wenehiro elag nelebanepne sembe ambatsiogha

(Lukas 9:57-62)

18Nimi maikno Yesus wamoghag kanero longolaeka kembahiogti, “Mag longorop mag kauro tara sip pukap,” seog. 19“Pukap,” seogpa nimi nhon Musari yubu amohiropne Yesusag yaogti, “Nai, an yubu amohinne wamlam. An tala-tala palapmenag na babe anag neleplangkenun,” seog.

20Wene seogpa, Yesusti samoro ambarelamogti, “Pai kam ae kwanero manag selenga ua urop. Winang im toman yabiropne tanekori ae manag ae soa urop. Ot na mog so'oag nimi tahinge enekori ae manag orog,” aro ambarog.

21Wene seogpa, Yesusti yubu ka'ero neleptopne nhondi, “Nai, nu saelba uhiropne wamlam. Ot nari nai sam mali taleba, so'oag sikil pineri, amik nelebaghenunne hae te?” seog.

22Wene seog aghana, Yesusti elag samoro, “Anna nanag nelebanululam. Teptop nimiri sin teptop nimi so'oag siksinep,” seog.

Yesusti khao aingnibaogha

(Markus 4:35-41; Lukas 8:22-25)

23Yesus kabongag waelbaogpa, eldi yubu ka'ero neleptop nang taneko babe elap nhon waelbaek. 24Waelbaekpa mag nubu uro longorop mag alip toman agha kabongag nhon palamekpa, lo'om aro khao nubunge mu aro yalamog. Khao nubunge mu aro yalamogneri kabong anekoag sipto yom-yomolamogpa, mag kula'eptobari sin nikniro opsineba ulamog. Ulamogpa Yesusna malamog. 25Opsineba ulamogpa, Yesusti yubu ka'ero neleptop nang taneko pina kamolamekti, “Nai! Nu magti opsineba ulamlaba yepsi!” alamek. 26Wene alamekpa, pukogti Yesusti sinag samoro yubu ambarelamsiogti, “A'un sa'a sembe log senelamlomdi, nanag wana palilamlom kom?” seog. Wene seogti, Yesus sekom agha khaoap, mag nubu uro longorop maghap irikto aingnilopsiogpa, mu ana nubunge ni aneko paplobog. 27Paplobogpa sin tanekori, “Yaghe,” aro lo'om seekti, “Nimi enena, wela saog nimiri khaoap, mag nubu uro longorop maghap eldi yubu leplange ka'ebarangdi aingnibarang,” alamek.

Yesusti phia yonge nimi phende kulomag wa'isiogne yag lanaro wali nembahiogha

(Markus 5:1-20; Lukas 8:26-39)

28Yesus mag longorop mag nubunge kauro Gadara#8:28 Gadara - Mog so'o si nhon Gerasa (Markus 5:1; Lukas 8:26). nimiri mog so'oag piog. So'o anekoag nimi phende phia yonge sin kulomag wamsiogpa, nimi teptoba kirik hogtobaag pail pirobag ua ulamdekti, yo sirik uro wamdek. Yo sirikti, nimi taneko sin peram toman pinep kom wamog. Wamdek so'o anekoag Yesus yaogpa, nimi phende abeneko Yesusag yarek. 29Yesusag yubu nubu uro yopto, “Allah Elme-o! Nunag, ‘Huahinun,’ aro yalam? Allahri nu opsinepne webog sum anam yabin komag, ‘Seklebaukang,’ aro nu opsinepne sembe yalam te?” aro haum serek.

30Wene alamdekag anekoa olog weag pham maikno longolaekti, so'o ero tolamek. 31Ero tolamek pham taneko tiboghaekti, nimi kulomag wamek phia yonge tanekori Yesusag mololamekti, “Andi nimi abeneko kulomag agha nu yag lambahimen tanena, ‘Pham taneag wa'isut,’ aro nu arukahilulam te?” aro molbaek.

32Wene aro molbaekpa Yesusti, “Hae pululom,” seog. “Pululom,” seogpa, phia yonge taneko nimi abeneko kulomag agha lambaekti, pham taneko kulomag wa'iek. Wa'iekpa pham ni taneko merelamekti, kwerenag eba tiniro mag nubu uro longorop maghag tag purukom seekti tebaek. 33Pham ni tebaekpa, pham yae paia ulamsiek nang taneko laplobi agha as peramag wamek nimiag merebaek. Pham tebaekne sembe babe, phia yonge nimi abeneko kulomag agha lambaekne sembe babe merero ambarel pihiek. 34Yubu poa piekpa, as soro kalurop as anekoag wamek nimi, “Yesusap haiptaukap,” aro elag lambaek. Yesusag yaekti kemelamekti, “Nuri mog so'o eneag agha pululam te?” aro molbaek.

Currently Selected:

Matius 8: kklKOS

Highlight

Copy