متّی 3
3
یُوحنّا بپتِسمہ ݙیوَݨ آلے دا پرچار کرَݨ
(رَلدا مِلدا حوالہ: مرقس 1:1-8؛ لُوقا 3:1-18؛ یُوحنّا 1:19-28)
1کُجھ عرصہ بعد صوبہ یہُودیہ دے بَربیابان اِچ یُوحنّا بپتِسمہ ݙیوَݨ آلا آیا اَتے ایہ پرچار کرَݨ لڳا، 2”اپݨے گناہیں کنُوں توباں کرو کیوں جو اَسمان دی بادشاہی نیڑے آ ڳئی ہے۔“
3ایہ اُوہو نبی ہے جَیندے بارے اِچ خُدا پہلے کنُوں اپݨے یسعیاہ نبی دی راہِیں ݙسایا ہا،
”بَربیابان اِچ ہِک اَواز اَندی ہے جو خُداوند کیتے راہ تیار کرو اَتے اُوندے رَستے پَدھرے کرو۔“
4اَتے یُوحنّا اُٹھ دے والیں دا بݨیا چوغہ پَیندا اَتے چمڑے دی پیٹی چیل نال ٻَدھیندا ہا اَتے او تِݙیاں اَتے جنگلی ماکھی کَھندا ہا۔ 5اِیندے بعد شہر یروشلم اَتے سارے صوبہ یہُودیہ اَتے یَردن دریا دے چَودھاروں ٻَہُوں سارے لوک نِکل کرائیں یُوحنّا کولھ اَندے ریہے۔ 6اَتے او اپݨے گُناہیں کُوں مَن کرائیں یَردن دریا اِچ یُوحنّا کنُوں بپتِسمہ گھِندے ریہے۔
فرِیسی اَتے صدوقی بپتِسمہ گھِنݨ اَندِن
7اَتے ٻَہُوں سارے فرِیسی اَتے صدوقی وی اُتھاں بپتِسمہ گھِنݨ اُوندے کولھ آئے اَتے اُنہیں کُوں ݙیکھ کرائیں اُوں آکھیا، ”اَے نانگیں دی اولاد! کَئیں تُہاکُوں چِتائے جو آوَݨ آلے غضب کنُوں بھڄو؟ 8اَتے اپݨے کَمیں کنُوں ݙِکھاؤ جو تُساں اپݨے گُناہیں کنُوں توباں تائب تھی ڳئے ہِوے 9اِیں کیتے اپݨے دِلیں اِچ ایہ نہ سوچو جو اَساں ابرہام دی اولاد اِچوں ہَیں اَتے اَساں عذاب کنُوں بچ ویسُوں۔ مَیں تُہاکُوں اَہداں جو خُدا اِنہیں پَتھریں اِچوں وی ابرہام کیتے اولاد پیدا کر سڳدے۔ 10ہُݨ کُہاڑا وَݨ دی پاڑ تے رکھیا ہے اَتے جیرھا وَݨ چَنڳاں پَھل نہ چیسی او کَپیا اَتے بھاہ اِچ سَٹیا ویسی۔ 11مَیں توباں کرَݨ کیتے تُہاکُوں پاݨی نال بپتِسمہ ݙینداں پَر جیرھا میݙے بعد اَندا پئے او مَیں کنُوں اِتنا عظیم ہے جو مَیں اُوندی جُتی چاوَݨ دے لائق کَینی۔ او تُہاکُوں خُدا دے رُوح اَتے بھاہ نال بپتِسمہ ݙیسی۔ 12اُوندا چھڄ اُوندے ہَتھ اِچ ہے او کݨک اِچوں بھُوں کُوں چَنڳیں طرحاں صاف کریسی اَتے کݨک کُوں تاں اپݨے گودام اِچ کٹھا کریسی پَر بھُوں کُوں اُوں بھاہ اِچ سَٹیسی جیرھی کݙاہیں نہ وِسمسی۔“
یِسُوع بپتِسمہ گھِندِن
(رَلدا مِلدا حوالہ: مرقس 1:9-11؛ لُوقا 3:21-22)
13اِیندے بعد یِسُوع صوبہ گلِیل کنُوں یَردن دریا اُتے آیا تاں جو یُوحنّا کنُوں بپتِسمہ گھِنے۔ 14پَر یُوحنّا اُونکُوں ایہ آکھ کرائیں روکݨ دی کوشش کیتی ”تُوں میݙے کنُوں بپتِسمہ کیوں گھِنݨ چاہندیں مَیکُوں تاں خُود تیݙے کنُوں بپتِسمہ گھِنݨ دی لوڑ ہے؟“
15پَر یِسُوع اُونکُوں جواب ݙِتا، ”ہُݨ تاں تُوں اِیویں تھِیوَن ݙے تاں جو خُدا دی ساری پاک مرضی پوری تِھیوے۔“ اِیندے بعد یُوحنّا اُونکُوں بپتِسمہ ݙیوَݨ تے راضی تھی ڳیا۔
16بپتِسمہ گھِنݨ دے بعد یِسُوع فوراً پاݨی کنُوں ٻاہر اُتے آیا اَتے اُوندے کیتے اَسمان کُھل ڳیا اَتے اُوں خُدا دے پاکرُوح کُوں کبوتر وانگوں اپݨے اُتے لَہندا ݙِٹھا۔ 17اَتے ݙیکھو اَسمان کنُوں ہِک اَواز اَئی جو ”ایہ میݙا پیارا پُتر ہے مَیں اِیں کنُوں خُش ہاں۔“
Currently Selected:
متّی 3: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
