Matyo 7
7
Jaa tungni tɨ peer sul
Luk 6.37-38,41-42
1«Yḭ ka jaa tungni tɨ wo sul nɨ Ndɨla ɓə jaa tungni tɨ i sul lo la. 2Kəysul Ndɨla ɓə jaa tungni tɨ i sul kuna yḭ tung na jaa tɨ bi sul la, Ndɨla ɓə gɨ i lɛmni na wa̰y ne yḭ lɛm i naa gɨ i peer la. 3Kəyjaa əm ləg ya̰n tɨ əm ɓun ji, lɛ əm lɛm əm ji lɔ ne door kɔb-kɔb ləg lo a? 4Əm ɓə lɔ sula ɓə kəyjo əm ɓə gɨ əm ɓun ja ɓə: “Ka ən jul ya̰n tɨ əm ji lɔ”, gorne yim mam ji door kɔb-kɔb a? 5Wo gṵ tɨ ndidi, əm jul maler ne tɨ əm ji toni barita gə̰y gɨna, əm ɓə əm ɓun maan ləg ɓari tɨ jul.
6«Yi ka gɨ səw wa̰y ne ndeeri naa lo la i kay i pɛri ɗoli gɨ kosong lo la, kəysul a ɓə nangni la a ɓə duga tɨ i sul tɨ i numni.»
Wa̰y ɓiri la, jablə la, limu ɗɨb la
Luk 11.9-13
7«I ɓiri wa̰y gɨna, a ɓə gɨ i naa, i jab gɨna, i ɓə tina la, i ɗɨb limu gɨna, a ɓə gɨ i təng la. 8Kəysul wo ne ɓiri wa̰y gɨna a naa gɨ ər la, wo ne jab kaw ten la, a təng limu gɨ wo ne ɗɨb limu la. 9Ɓee ja jo tɨ i daan gorne ər ɓa̰ ɓiri ər wa̰y tudi gɨna ər naa gɨ ər kura a? 10Ɓee ər ɓə gɨ ər kɔ naa gorne ər ɓiri ər kaa a? 11Jo yḭ bi tɨ hul ɗoyri kaw i una wa̰y ndinimani naa gɨ i ɓimi gɨna, ka waa ta ī Ba ne ti tɨ ndɨlasul ɓə gɨ bi ne ɓiri ər mum ndinimani naa lo a?
12«Mum gun ne yḭ taam ɓə ka bi ka gɨ i, yḭ kaw i ka gɨ a la: Nejo tɨ wa̰y ne Moys na gṵ hul la nebi-a ɓla.»
Wur na limu ɓa̰
Luk 13.24
13«I wur na limu ɓa̰ kəysul limu ɗəng la bɛl la, tɨ ul tɨ laa ne uy lo ne bi dɨbla wo sula. 14Lɛ limu tɨ saal tɨ un tɨ tɨm jili na kwi tɨ ɓa̰ ɓɔrɔrɔ. Bi ɓa̰ ndḛni ngoy jo wo wur tɨ nin.»
Tɨla na ji
Luk 6.43-44
15«I kay jicina tɨ i ndula sul na bi ne ka a ndɔ ɓə ya̰ tɨ nebi. A hina tɨ i ndɔ kuna həm lɛ a hul ti kuna jərjəng ton ndula ka a. 16Yḭ ɓə a una na a ji tɨ twila. Pay yḭ ɓə damnar kura tɨ galɨm sul a? Ɓee pay yḭ ɓə ndɔg ji kura tɨ səlma sul a? 17Tɨla ndinimani toy ji ndinimani la tɨla ɓijim toy ji ɓijim la. 18Tɨla ndinimani ɓə ji ɓijim twila lo la tɨla ɓijim ɓə ji ndinimani twila lo la. 19A ɓə tɨla ne toy ji ndinimani lo jani la a ɓə ər ɗula tɨ laa la. 20Kuna ne gɨna, yḭ ɓə a una na a ji tɨ twila.»
Ndɨla ndil soon tɨ mu sul
Luk 6.47-49
21«Wo ne soor ən tɨ ər mu sul: “Baali, Baali” ɓə wur tɨ Ndɨla na waan lo, lɛ tɨ wo ne ka wa̰y ne ən Ba tɨ Ndɨla ne ti tɨ ndal pi hul laar jo ɓə wur tɨ ər waan hul. 22Na ɗa̰y tɨ sarya kar bi dɨbla ɓə gɨ ən ja: “Baali, Baali”, pay yini ja Ndɨla jaa na əm ndil lo a? Pay yini kun Lal ɓijim na əm ndil lo a? La yini ka mum ne ɓɔrji na əm ndil lo a? 23La ən ɓə gɨ a ja tɨ bayri: Ən una i ɗa̰y ɓudu lo, i si ɓag na ən, yḭ bi tɨ ɓijim kar!»
Ləgɨ tɨ ndidi
Luk 6.47-49
24«Nejo wo ne laa ən jaa la ər so ər ka na cida gɨna, ər ɓə tɨm kuna wo jicina ne kaaw ər li tɨ kura sul. 25Ndɨla yo̰y la, larɨm o̰ la saaw ɗəng tɨba tɨ li ne sul lɛ ər guur lo bad, kəysul a kay ər lɔ tɨ kura sul. 26Lɛ jo wo laa jaa ne ən ja lɛ ər so ər ka na cida lo gɨna, ər ka ər ndɔ kuna wo pirgɨ ne kaaw li tɨ hḛn sul. 27Gorne ndɨla yo̰y la, larɨm o̰ la, ta saaw ɗəng tɨba la gɨna, li bra kad-kad gun.»
Jesu na dwari
Mrk 1.22; Luk 4.32
28Gorne Jesu tong ər jaa gɨna, ər wa̰y tɨ ɓla ɓɔr bi ji nari, 29kəysul ər wa̰y tɨ ɓla dwari tɨ jak na bi tɨ gṵ hul ɓla maan.
Currently Selected:
Matyo 7: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
