Matyo 3
3
Ja̰ Batis na beel ɗula
Mrk 1.1-8; Luk 3.1-18; Ja̰ 1.19-28
1An dɨbla tɨ plaa, Ja̰ Batis wag tɨ tap hul tɨ Jude, ər ɗolɔ tɨ beel ɗula tuna Ndɨla sul. 2Ər ja ɓə: «Yḭ nɨm i ɓijim lɔ, kəysul Ndɨla waan tɨ ndog.» 3Ja̰ tɨ wo ne nebi Esay ja jaa tuna ər sul toni ɓə:
«Wo gṵ cḛy tɨ tap hul ɓə:
“Yḭ kaaw gɨ Baali ul ɓḭ
ka a lor tugla.”»
4Ja̰ na ngɔmi ne a ka na lɔgum ɓwḭ la krab ne a ka na war tɨ ər tuu. Ər twi cər la nini nɨm la. 5Bi tɨ Jerusalɛm la, bi tɨ lɔr nəgri sul tɨ Jude gun la, bi tɨ un gun ne yeri larɨm tɨ Jurdḛ sul la, a hina tɨ ər ndɔ. 6A jul a ɓijim lɔ tɨ bi ji la ər ka gɨ a batɛm tɨ larɨm tɨ Jurdḛ hul.
7Ja̰ una ɓə Parisyḛ-a la Sadusḛ-a la, dɨbla a hina tɨ ər ndɔ tɨ batɛm kar, ər ja gɨ a ɓə: «Yḭ ngɔl kaa kur! Ja jo ɓla gɨ i ul mu tɨ Ndɨla na hul laa ne wo hina yal a? 8Ndini ne i mum tɨ kar si ɓudu na i hul kula. 9Lɛ yḭ ka ilgɨ tɨ i hul tɨ ja ɓə: “Yini tɨ Abraham kəgɨ lo.” Kəysul ən ja gɨ i tɨ bayri, Ndɨla lɛm kura ne yɛr Abraham kəgɨ! 10Kɔwal tɨ ndog tɨ teri ndeem tini: A ɓə tɨla tɨ lay ne toy ji ndinimani lo jani la a ɓə ər ɗoli tɨ laa. 11Yin, ən ka gɨ i batɛm na ndu, tɨ ɓla ɓə yḭ nɨm i ɓijim tɨ kar teni, lɛ wo ne wo hina tɨ ən bəgri ɓə i batɛm kar na Ndɨla na Lal la, laa la. Yḭr na dwari ɗəng ura ən: Ən lɛm ər kungu jul lo. 12Ər naa guṵ tɨ ər daa tɨ ya yeem la ər ɓə ər ya ji bɛ tɨ dawlu hul la. Ər ɓə ya ji to bɛ tɨ dawlu hul la, ər ɓə ya yungni tuglu la.»
Jesu na batɛm kar
Mrk 1.9-11; Luk 3.21-22
13La Jesu o̰ tɨ Galile hina tɨ Jurdḛ. Ər hina tɨ Ja̰ ndɔ ka Ja̰ ka gɨ ər batɛm. 14Ja̰ taam lo la ər ja gɨ Jesu ɓə: «Tɨ yim jo əm ɓə ən batɛm kar, ka waa ta əm hina tɨ ən ndɔ ka ən ka gɨ əm batɛm cam a!» 15Lɛ Jesu duga gɨ ər ɓə: «Ko əm mu ka ti kuna Ndɨla hul taam. Kəysul nejo yi ɓə wa̰y ne Ndɨla hul taam kar.» Gɨna Ja̰ ko ər mu. 16Gorne Ja̰ ka Jesu batɛm gɨna, Jesu wag tɨ ndu la tɨ daamu, ndɨlasul təng la, ər ləg Ndɨla na Lal jir tɨ ər sul kuna gugoli. 17Tɨ un ne, wo na gṵ cḛy tɨ ndɨlasul ja ɓə: «Ɓər ne le, tɨ ən ɓa̰, ne ən ka ər kum nari. Ən ndula laar gun wo tɨ ər ndɔ.»
Currently Selected:
Matyo 3: nie
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2023, ATALTRAB