Matyo 22

Jaa lar tuna ɓaar sul

Luk 14.15-24

1La Jesu ja gɨ bi jaa lar paa cam. 2«Ndɨla na waan ti kuna wa̰ay paa ne ka ər ɓa̰ na ɓaar. 3Ər toon ər bi tɨ cida ka a si a soon bi ne ər hom a ɓaar, lɛ a taam hina lo. 4Ər toon ər bi tɨ cida jak cam tɨ gɨ bi tɨ ɓaar ja ɓə: “Tudi tɨ ndog teni, ən hun ən yii magdigɨ la yəm ton ndula ndini la. Mum gun ti ndog. I hina i tuy wa̰y tɨ ɓaar!” 5Lɛ usu a lo la a o̰ a si, tapeer si tɨ waal la, peer paa si tɨ kingɨ kar la. 6Tapeer par bi tɨ cida kar ka gɨ a pɛw la a hun a la. 7Hul laa ka wa̰ay: Ər toon eli-a tɨ bi tɨ ɓijim kar ne humna la laa wur tɨ a lɔr sul la. 8Gɨna ər ja gɨ ər bi tɨ cida: “Wa̰y tudi tɨ ɓaar ti ndog lɛ bi tɨ ɓaar dwari lɛm hina wa̰y ne tudi lo. 9I si tɨ ul lɔ jegri i hom bi gun ne yḭ ten a, ka a hina a twi wa̰y tɨ ɓaar.” 10Bi tɨ cida si tɨ ul sul a hom bi gun ne a ten a. Bi tɨ ɓijim kar la, bi tɨ ɓari kar la. Bi dɨbla hina a sir un tɨ ɓaar kar. 11Wa̰ay wur tɨ li hul tɨ bi tɨ ɓaar ləg gɨna, ər ləg ɓər paa ne wur sər tɨ ɓaar lo. 12Ər jaa gɨ ər: “Ən paa kɔr, ka waa ta əm wur tɨ un ne bla sər tɨ ɓaar a?” Lɛ ɓər ɗo gɨ ər tɨ nin lo. 13Gɨna wa̰ay ja gɨ ər bi tɨ cida: “I ɓəw ər ɗa̰y la ər daa la, i jiga ər tɨ bayri, tɨ un ɗoyri hul. Tɨ un ne ər ɓə cḛy la ər ɓə ər ɗəngni lɔ tudi la.” 14La Jesu ja gɨ a: A ɓə bi dɨbla soon lɛ ɓa̰ndḛni ngoy jo ɓə wur tɨ ndɨla waan.»

Jaa tuna Lambo sul

Mrk 12.13-17; Luk 20.20-26

15Gɨna Parisyḛ-a si a ten peer a ilgɨ tɨ ul mu tɨ Jesu suri na ka̰r tuna jaa ne wo wag tɨ ər mu. 16A toon a bi tapeer hari na Erod na bi tɨ Jesu ndɔ tɨ gɨ ər jaa. A ja gɨ ər ɓə: «Wo tɨ wa̰y ɓla, yini una əm jaa tɨ ja tɨ kuri: Əm ɓla gɨ bi Ndɨla na ul na kuri la, əm ɓini wo ɓudu lo la, kəysul əm jul wo ji lo. 17Əm ja gɨ i: Yini na ul mu tɨ gɨ wa̰ay ɗəng Sesar lambo naa ɓee gɨ ər naa lo a?» 18Lɛ Jesu una a ilgɨ ɓijim ər duga gɨ a: «Bi gṵ tɨ ndidi! Kəyjaa yḭ sang ən a? 19I ɓla gɨ ən gursu tɨ lambo naa.» A hina gɨ ər na gursu ɓudu. 20La Jesu ɓiri a: «wo sul ne la, ndil ne la, tɨ ja maan a?» 21A duga gɨ ər: «Tɨ Sejar maan.» La Jesu duga gɨ a: «I naa gɨ Sesar wa̰y ne tɨ Sejar maan la, i naa gɨ Ndɨla wa̰y ne tɨ Ndɨla maan la.» 22Gorne a laa ər jaa ne a, ɓɔr a ji nari. A nɨm ər la a ɗo a sul a si.

Jaa ɓiri tuna wag tɨ ngalɨm

Mrk 12.18-27; Luk 20.27-40

23Na ɗa̰y ɗay, Sadusḛ-a tapeer hina tɨ Jesu ndɔ. Ya̰ tɨ bi ton a ja ɓə bi ɓə wag tɨ ngalɨm lo. A ɓiri ər jaa ne: 24«Wo tɨ wa̰y ɓla, toni Moys ja ɓə: “Jo wo uy ɓla ɓa̰ gɨna, ka ər ɓun so ər ii tɨ ndirimu toy na ɓa̰ nɨ ka ti ər kalɔ.” 25Tɨ ɓari, peer ɓungɨ kili wo nin, ne toni mani ko ii lɛ ər uy bla ɓa̰, ər nɨm ər ii ndirimu gɨ ər ɓun. 26Wo tɨ ndidi mani uy kuna ne la, tɨ tedi mani kaw uy in la, marway a ji kili gun. 27Tɨ a gor ii ne kaw uy la. 28Ɗa̰y ne bi tɨ ulu ɓə wag tɨ ngalɨm, ii ne ɓə tɨm ja na ii a? Kəysul a ji kili gun a ko ər!» 29Jesu duga gɨ a: «Yḭ una wa̰y lo kəysul yḭ una Ndɨla jaa lo la Ndɨla dwari lo la. 30Gorne bi tɨ ulu ɓə wag tɨ ngalɨm gɨna, a ɓə peer kula cam lo. Lɛ a ɓə tɨm kuna malayka-a tɨ ndɨlasul. 31Tuna wag tɨm jili sul, pay yḭ edɨ ja ne Ndɨla ja gɨ i lo a? Ər ja ɓə: 32“Yin tɨ Abraham na Ndɨla la, tɨ Isak na Ndɨla la, tɨ Jakob na Ndɨla la.” Ndɨla tɨ Ndɨla tɨ bi tɨ ulu maan lo, lɛ tɨ Ndɨla tɨ bi tɨ tɨm jili maan.» 33Bi ne laa ər wa̰y tɨ ɓla ɓɔr a ji nari.

Gṵ sula ne ura peer

Mrk 12.28-34; Luk 10.25-28

34Gorne Parisyḛ-a laa ɓə Jesu par Sadusḛ-a na jaa gɨna, a tay peer. 35Wo tɨ gṵ hul ɓla paa tɨ a daan taam ər sangni. Ər si tɨ Jesu ndɔ la ər ɓiri ər: 36«Wo tɨ wa̰y ɓla, kəy gṵ hul jo tɨ ɗəng ura peer gun tɨ Ndɨla na Gṵ hul daan a?» 37Jesu duga gɨ ər: «Əm ɓə əm Baali Ndɨla kumkar na əm hul gun la, na əm ndo̰yngɨ la, na əm ilgɨ gun la. 38Ne tɨ gṵ hul ne ɗəng la ne ndinimani ura peer gun. 39Tɨ ndidi mani ne wag paa jo le: “Əm ɓə əm paa kum kar kuna yim mam la.” 40Moys na gṵ hul gun la nebi na mum tɨ ɓla gun ɗolɔ tɨ gṵ hul tɨ ndidi ne sul.»

Krist Dabid na kaa

Mrk 12.35-37; Luk 20.41-44

41Parisyḛ-a tay peer la Jesu ɓiri a jaa ne: 42«Kəyjo yḭ ilgɨ tuna Krist wo ne Ndɨla ɛr ər sul a? Pay yḭr tɨ ja na kalɔ a?» A duga gɨ ər: «Tɨ Dabid na kalɔ.» 43Jesu duga gɨ a: «Kəyjaa jo Dabid gorne Lal hina tɨ ər sul, ər soon ər “Baali a?” Kəysul ja ər ɓə:

44“Baali Ndɨla ja gɨ ən Baali:

Hina, əm ti tɨ ən lɨma sul marway,

ən ɓə əm peer tɨ pɛni kay tɨ əm ɗa̰y lɔ#22.44 Psa 110.1.”

45«Jo gorne Dabid may soon ər ɓə “Baali” gɨna, ka waa ta Krist ɓə tɨm ər ɓa̰ ngoy a?» 46Wo ɓudu in tɨ Parisyḛ-a daan lɛm gɨ Jesu jaa ɓudu in duga lo. La ɗolɔ tɨ ɗa̰y ɗay, a oy ər jaa ɓiri.

Currently Selected:

Matyo 22: nie

Highlight

Copy