Matyo 21

Jesu na wur tɨ Jerusalɛm

Mrk 11.1-11; Luk 19.28-40; Ja̰ 12.12-19

1Gorne Jesu a na ər bi tɨ wa̰y edɨ a an tɨ Betpaje ndog na Jerusalɛm tɨ nan tɨ olibe taal gɨna, Jesu toon ər bi tɨ wa̰y edɨ tɨ ndidi, 2Ər ja gɨ a: «I si tɨ lɔr ne ti tɨ i kwi ɗay, i ɓə lamkḛr paa ne a ɓəw ər na ər ɓa̰ tɨ ər taal tina. yḭ cigri i hina gɨ ən na. 3Jo wo ɓiri i kəyja yḭ cigri ər gɨna, i ja gɨ ər: “Baali jo taam ər.” Gɨna a ɓə gɨ i ul mu naa tɨ daamu.»

4Wa̰y ne an kuna paa ne ka jaa ne nebi ja toni ti kuri. ər ja ɓə:

5«I ja gɨ Siho̰ na ɓimi əgɨ:

Ləg əm wa̰ay wo hina tɨ əm ndɔ!

Yḭr tɨ wo hormo̰ la ər hoon tɨ lamkɛ̰r waay sul,

ər ɗol tɨ lamkɛ̰r sul, tɨ lamkɛ̰r ɓa̰ waay.»

6Jesu na bi tɨ cida si. A ka mum gun ne Jesu ja gɨ a. 7A hina na lamkɛ̰r waay ɓa̰ la, a bɛ a sər gol tɨ lamkɛ̰r bəgri nɨ Jesu ti tɨ sul. 8Bi dɨbla ba̰y a sərgɨ tɨ ul sul la bi tapeer jani teri gangɨ wori a bɛ tɨ ul sul la. 9Bi si tɨ Jesu kwi la ər ɓəgri la na ngɔr tɨ a mu ɓə: «Ojana! Taan gɨ Dabid ɓa̰ kaa! Ka Ndɨla jul mu tɨ wo ne hina na Baali ndil sul. Taan gɨ Ndɨla baw ɗəng!» 10Gorne Jesu wur tɨ Jerusalɛm gɨna, bi gun lor na ɗa̰y la a ɓiri peer: «Kəy wo jo kuna paa ne a?» 11Bi duga gɨ a: «Tɨ Jesu Ndɨla na nebi wo tɨ Najarɛt, tɨ lɔr nəgri sul tɨ Galile.»

Jesu kun bi tɨ Ndɨla li hul

12Jesu wur tɨ Ndɨla li jaal hul ər ɗolɔ tɨ bi tɨ cingɨ kar kun. Ər bra bi tɨ gursu yɛr na un la ər bra bi tɨ gugoli cingɨ kar na un la. 13La ər ja gɨ a: «A kya̰ tɨ Ndɨla maktub hul ɓə ən li ɓə tɨm li tɨ Ndɨla soon lɛ yḭ ka ər kuna un tɨ sugi maan!»

14Bi ji nina la, bi kɔgri la, a hina tɨ Jesu ndɔ tɨ Ndɨla li hul nɨ ər nen a la. 15Gorne bi tɨ hima ɓina na woom la, bi tɨ gṵ hul ɓla la, a ləg wa̰y tɨ ji ɓɔr ne Jesu ka la, ta ɓimi ne ka ngɔr tɨ Ndɨla li hul ɓə: «Taan gɨ Dabid na ɓa̰ kaa!» Gɨna, hul laa ka a. 16La a ja gɨ Jesu: «Pay əm laa jaa ne ɓimi wo ja a?» Jesu duga gɨ a: «M, yḭ laa jaa ne a kya̰ tɨ Ndɨla maktub hul ɓə: “Əm ka wa̰y nɨ ɓimi la ɓimi laar la, a wur taan tɨ əm sul.”» 17Ər nɨm a ər wag tɨ lɔr hul ər si ər ley tɨ Betani.

Jesu dobɨn ndɔg

Mrk 11.12-14,20-24

18Na gaan cɔg, gorne Jesu duga hina tɨ lɔr ɗəng hul gɨna, ndula ka ər. 19Ər ləg ndɔg tɨ ul taal la ər si tɨ ndɔ, lɛ ər ten ər gangɨ jo ngoy. Gɨna ər ja gɨ ndɔg: «Əm ɓə ji twila lo marway!» Tɨ daamu, ndɔg oli. 20Jesu na bi tɨ wa̰y edɨ ləg wa̰y ne gɨna ɓɔr a ji. A ɓiri Jesu: «Ka waa ndɔg ne oli tɨ daamu a?» 21Jesu duga gɨ a: «Kuri, ən ja gɨ i tɨ bayri, jo yḭ na hul kula la i hul dugun i lo gɨna, yḭ ɓə wa̰y ne ən ka gɨ ndɔg le ngoy kar lo lɛ, yḭ ɓə lɛm gɨ nan ne ja ɓə: “O̰, əm tɨba tɨ larɨm!” Gɨna wa̰y ne ɓə paa kar. 22Mum gun ne yḭ ɓiri Ndɨla na hul kula, yḭ ɓə tina.»

Ja jo naa gɨ Jesu dwari

23Jesu si wur tɨ Ndɨla li hul, gorne ər wo gɨ bi wa̰y ɓla gɨna, woom tɨ bi tɨ hima ɓina maan la, bi nii tɨ bi sul la, kori tɨ ər ndɔ. A ɓiri ər jaa: «Jaa jo naa gɨ əm dwari tɨ mum ton kar a, ɓee jaa jo naa əm gṵ tɨ mum kuna paa ne kar a?» 24Jesu duga gɨ a: «Yin kaw ən ɓə i jaa ɓudu ngoy ɓiri, jo yḭ duga gɨ ən na gɨna, ən ɓə gɨ i wo ne naa ən dwari tɨ mum ne kar ɓla la. 25Batɛm ne Ja̰ ka gɨ bi o̰ tɨ Ndɨla ndɔ ɓee tɨ biɓari ndɔ a?» A ɗolɔ tɨ gɨ peer ja kuna ne: «Jo yi ja gɨ ər ɓə “o̰ tɨ Ndɨla ndɔ” gɨna, ər ɓə i jaa ɓiri: “Kəyjaa jo yḭ ko Ja̰ hul lo a?” 26Jo yi duga gɨ ər ɓə: “Lɔ o̰ tɨ biɓari ndɔ” gɨna, bi ɓə jaa ɗula tɨ i sul kəysul, bi gun ilgɨ ɓə Ja̰ tɨ Ndɨla na nebi.» 27Gɨna a duga gɨ Jesu ara: «Yini una lo.» La Jesu kaw duga gɨ a: «Yin ɓə gɨ i wo ne naa ən gṵ tɨ mum ne kar ɓla lo la.»

Jaa lar tuna ɓimi tɨ ndidi sul

28Jesu ja cam: «Kəy jo yḭ ilgɨ tuna jaa ne sul a? Ɓər paa na ɓimi tɨ ndidi. Ər ja gɨ ne toni mani: “Ən ɓa̰, əm si əm ka cida tɨ ən damnar waal kakamle.” 29Ɓa̰ duga gɨ ər: “Ən taam lo,” lɛ dabra gɨna, ər par ngɨnɨm tɨ jaa ne ər duga gɨ ər ba sul, la ər si tɨ waal hul. 30Ər ba duga ja jaa ne gɨ ne ɓa̰. Ər duga gɨ ər: “M, Baali, ən ɓə saal” lɛ ər si lo. 31Ɓa̰ tɨ lay jo ka wa̰y ne ər ba hul taam a?» A duga gɨ ər: «Ne tɨ toni mani.» Gɨna Jesu ja gɨ a: «Ən ja gɨ tɨ bayri, bi tɨ lambo tay la aa kərbəgɨ ne huna a ndɔ gɨ bi ɓərgɨ la, a ɓə wur tɨ Ndɨla waan tɨ i kwi. 32Kəysul Ja̰ Batis hina tɨ i ndɔ. Ər ɓla gɨ i ul tugla lɛ yḭ ko ər hul lo, lɛ tɨ bi tɨ lambo tay la aa kərbəgɨ la jo a ko ər hul. Lɛ yḭ ne i ləg wa̰y ne, i ɓini i ilgɨ yɛr tɨ ər hul kula.»

Jaa lar tuna bi tɨ damnar waay

Mrk 12.1-12; Luk 20.9-19

33«Yḭ laa jaa lar jak cam: Ɓər paa waay damnar, ər yeri sul na jal. Ər kaw un tɨ damnar kurbu la ər kaw ko̰ygɨ baw tɨ waal ɓaw la. Lɔ tɨ plaa, ər nɨm gɨ bi tɨ damnar waal ɓaw, ər ja gɨ a ər ɓə gɨ a damnar ji taal naa, la ər ɗo ər sul ər si tɨ ɓoy. 34Gorne pya̰ sul tɨ ya ɓina tɨ ndog gɨna, ər ton ər bi tɨ cida tɨ bi tɨ damnar waal ɓaw ndɔ tɨ ər damnar taal kula. 35Lɛ bi tɨ damnar waal ɓaw par bi tɨ wa̰y tedi ne. A par wo tɨ cida ɓudu a ɗɨb ka ɗɨb la, a hun ne tɨ ndidi mani la, a jigɨn ne tɨ tedi mani na kura tɨ ər humna la. 36Gɨna, damnar Baali ton bi tɨ cida jak cam, dɨbla ura ton tɨ toni mani, lɛ bi tɨ damnar waal ɓaw ka a kuna ton toni cam. 37Mu tɨ tong gɨna, Baali toon gɨ a ər ɓa̰, ər ilgɨ ɓə: “Tɔteni a ɓə gɨ ər ɓa̰ oy”. 38Lɛ gorne bi tɨ damnar waal ɓaw ləg ɓa̰ gɨna, a ja gɨ peer: “Yḭ ləg, wo tɨ ndoogɨ tudi jo le! I hina! Ka i hun ər, ka ər ndoogɨ gə̰y gɨ i!” 39A par ɓa̰ a ɗoli ər tɨ damnar jal ɓəgri la a hun ər la.»

40Gɨna Jesu ɓiri bi: «Gorne Baali tɨ damnar waal ɓə hina, kəy wa̰y jo ər ɓə kar gɨ bi tɨ damnar waal ɓaw ne a?» 41A duga gɨ ər: «Ər ɓə bi tɨ damnar waal ɓaw ɓijim ne humna gun bla a jindemni ləg, la ər ɓə ər damnar waal naa gɨ bi tɨ damnar ɓaw jak. La na pya̰ tɨ ya ɓina gɨna, a ɓə gɨ ər damnar ji naa na lula sul ne ər taam.»

42La Jesu ja gɨ a: «Yḭ edɨ jaa ne wo tɨ Ndɨla maktub hul lo a?

Kura ne bi tɨ li kay ɗoli

duga tɨ kura ndinimani tɨ li jaal sul kay.

Tɨ Baali tɨ Ndɨla na wa̰y tɨ kar,

Tɨ wa̰y ne ɓɔrji!»

43Tɨ nejo ən ja gɨ i: «Ndɨla ɓə ər waan jul tɨ i daa gɨ bi kalɔ jak naa nɨ ɓə ji twila. 44Wo tɨ lay ne tɨba tɨ kura ne sul gɨna ər ɓə ha̰w, lɛ jo kura ne tɨba wo sul a, ər ɓə mbɔri.»

45Gorne bi tɨ hima ɓina na woom la, Parisyḛ-a la, a laa jaa lar ne gɨna, a una ɓə Jesu ja jaa ne tuna a sul. 46A taam ul mu tɨ Jesu par lɛ a oy gɨ bi. Kəysul bi ilgɨ ɓə Jesu tɨ nebi.

Currently Selected:

Matyo 21: nie

Highlight

Copy