Luk 17

Ɓijim kar la hul ɗina la

Mat 18.6; Mrk 9.42

1Jesu ja gɨ ər bi tɨ wa̰y edɨ: «Mum ne ɓə wo din tɨ ɓijim daan dɨbla wo nin. Lɛ jindemni gɨ wo ne ka ər paa tɨba tɨ ɓijim hul. 2Ndini gɨ ər kura ɗəng ɓəwlu tɨ ər aan tɨ ər jiga tɨ ɗaglə ɗəng hul gɨna golgo ura Ndɨla na jaa ne ɓə tungni tɨ ər sul. Kuna ne, batan ər ɓə tɨm ul mu tɨ tɨbɨn tɨ ton maan cam lo. 3Kay i jicina ɓari tɨ i ndɔ sul!»

«Jo əm ɓun ka ɓijim a, əm ja gɨ ər, jo ər nɨm ər ɓijim gɨna, ka əm hul ɗina əm tɨ ər sul. 4Jo ər ka gɨ əm ɓijim laahul kili na ɗa̰y ɓudu hul la, lɛ ər duga ər hina ər ɓiri əm hul ɗina lahul kili la gɨna, ka əm hul ɗina əm tɨ ər sul.»

Hul kula

5Baali Jesu na bi tɨ wa̰y edɨ ja gɨ ər: «Ɗo gɨ i hul kula tɨ paa sul.» 6Baali duga gɨ a: «Jo yḭ na hul kula ɓa̰ ndḛ kuna mutardə ji a, yḭ ɓə gɨ tɨla ɗəng ne ja: “Jul əm ndula na əm ndeem, la əm si əm jaw əm ndula tɨ ɗaglə ɗəng daan.” La ər ɓə gɨ i oy.

Wo tɨ cida na mum tɨ kar

7«Jajo tɨ i daan gorne ər wo tɨ gɨ ər waal cida kar ɓee wo tɨ gɨ ər yəm ɓaw, o̰ tɨ taa hina, ər lɛm gɨ ər ja ɓə ɗira tɨ ndal əm twi wa̰y a? 8M-m, ər ɓə gɨ ər ja: “Tər gɨ ən wa̰y tudi la, əm yɛr əm ngɔmi tɨ gɨ ən tudi naa. Ta ər ɓə ər ja gorne ən tong tudi la ən yiḭ la gɨna ər, dabra əm ɓə əm maan tudi la əm ɓə yiḭ la.” 9Pay Baali ɓə ər wo tɨ cida barka kar kəysul ər ka wa̰y ne ər ɓiri ər a? M-m. 10Kuna ne yḭ kaw, gorne yḭ ka wa̰y ne a ɓiri i gɨna, yḭ ja: “Yini tɨ bi tɨ cida kar bla, yini ka yi cida ngoy.”»

Jesu nen bi tɨ yo dɔkɔmɛ

11Jesu wo ul tɨ saal tɨ Jerusalɛm, ər si na ul ne ɓaan lɔr nəgri sul tɨ Samari a na Galile. 12Ər wur tɨ lɔr paa hul. Bi tɨ yo dɔkɔmɛ hina tɨ ər tina. A lor teni na ər 13la a ɗolɔ tɨ ngɔr kar tɨ ndal, a ja: «Jesu, wo tɨ wa̰y ɓla, ləg yi jindemni!» 14Jesu ləg a la ər ja gɨ a: «Yḭ si, yḭ ɓla i ndula gɨ bi tɨ hima ɓina.»#17.14 Lév 14.2-3 Gɨna a si, a ten nina la a ndula ndeeri la. 15Ɓudu tɨ a daan, gorne ər una ɓə ər ten nina gɨna, ər duga tɨ ər ɗa̰y sul, ər teen Ndɨla tɨ ndal. 16Ər tɨba tɨ Jesu ɗa̰y, ər hulgɨ la ər ka gɨ ər barka la. Ɓər ne tɨ wo tɨ Samari#17.16 Juyb-a ka bi tɨ Samari kuna a tɨ bi ɓoy.. 17Gɨna Jesu ja: «Tɨ bi tɨ yo dɔkɔmɛ jo a ten nina la a ndula ndeeri lo a? A lɛ ya̰ ton dooso wo ɓay a? 18Wo ɓudu in ilgɨ tɨ duga hina tɨ Ndɨla barka kar lo, lɛ tɨ wo ɓoy ne jo duga hina, ər teen Ndɨla.» 19La Jesu ja gɨ ər: «O̰ ndal əm si. Ən nen əm kəysul əm ko əm hul.»

Ndɨla na waan na hina

Mat 24.23

20Ɗa̰y paa, Parisyḛ-a ɓiri Jesu: «Kəy ɗa̰y jo Ndɨla na waan ɓə hina a?» Ər duga gɨ a: «Wo ɓə Ndɨla na waan ləg na hina lo. 21Wo ɓə ja: “Yḭ ləg, ər wo le lo!” La “Ər wo pi lo la!” Yḭ una ɓari, Ndɨla na waan wo i daan teni.»

22La ər ja gɨ ər bi tɨ wa̰y edɨ: «Lula sul ɓə hina ne yḭ ɓə Yin, Wo Ɓa̰ taam tɨ ləg ɗa̰y ɓudu ngoy, lɛ yḭ ɓə ən ləg lo. 23A ɓə gɨ i ja: “Ləg ər tɨ pi!” Ɓee “Ləg ər le!” Yḭ ka saal lo la, yḭ ka i ndula tṵgni tɨ saal lo la. 24Kuna ndɨla yḭba ndeeri un tɨ ndɨla sul la ndeeri un le la pi la, Yin, Wo Ɓa̰ na ən ɗa̰y tɨ duga ɓə tɨm kuna paa ne. 25Lɛ toni barita ən ɓə hina, ən ɓə pɛw dɨbla tina la bi tɨ ndogle ɓə ən ɓini la. 26Toni barita ɗa̰y ne Yin, Wo Ɓa̰ ɓə duga hina ɓə tɨm kuna wa̰y ne ka paa na Nowe na lula sul. 27Bi twi la yiḭ la, a ko peer la a naa gɨ peer aa la marway ɗa̰y ne Nowe wur tɨ bato ɗəng hul. Gɨna ndu lɨma ɗəng o̰ la hun a gun. 28Ɓə tɨm kuna lula sul tɨ Lot maan. Bi twi la yiḭ la, huna mum la ka kingɨ na mum la, jaw mum la kay li la. 29Lɛ ɗa̰y ne Lot#17.29 Lot tɨ Abraham na ɓun tɨ ɓər na ɓa̰, Ər ti tɨ lɔr ɗəng tɨ Sodom ne Ndɨla ɗo la tɨ sul bi na ɓijim jaa. nɨm lɔr ɗəng tɨ Sodom gɨna, laa la, laa məgri o̰ tɨ ndɨla sul tɨbɨn tɨ bi sul. A uy gun ɗad ɗad. 30Ɗa̰y ne Yin, Wo Ɓa̰ ɓə wag ɓə tɨm kuna paa ne.

31«Na ɗa̰y ne, wo ne wo tɨ durdur sul lɛ ər mum wo tahul gɨna, ər lɛm jir ər mum tɨ li hul to lo, la wo ne wo tɨ waal hul, ər ka duga tɨ gə̰y cam lo. 32Yḭ jani i ho̰ni tɨ wa̰y ne an tɨ Lot na ii sul#17.32 Gen 19.26. 33Wo ne taam ər ndula ɓaw ɓə ər ndula haam la wo ne ɓə ndula haam yin jaa gɨna, ər ɓə nina tina. 34Ən ja gɨ i tɨ bayri, na syɛl le, bi tɨ ndidi ne wo ko̰ygɨ hul, a ɓə ne ɓudu sula, a ɓə ne ɓudu nɨm. 35Aa tɨ ndidi wo tɨ wa̰y tuula, a ɓə ne ɓudu sula, a ɓə ne ɓudu nɨm. 36Bi tɨ ndidi ɓə tɨm tɨ waal hul, a ɓə ne ɓudu sula, a ɓə ne ɓudu nɨm.»

37Gɨna, ər bi tɨ wa̰y edɨ ɓiri ər: «Baali, wa̰y ne ɓə an tɨ kəy un a?» Ər duga gɨ a: «Un ne ulu wo nin, cicini-a ɓə peer tay.»

Currently Selected:

Luk 17: nie

Highlight

Copy