Markus 6

Lobuw Najarit dai poimaid so si Yisus

(Mat 13:53-58; Luk 4:16-30)

1Dai olaid kiat nu iri, mululio yo si Yisus om mompomaid Niyo ri so inungkiaton Niyo ri. 2Runat Pongintoronan, miano yo si Yisus montuduk so waloi sosombooyangan. Noiranan kiawi' lobuw nokorongou nu pontudukan Niyo ri om minutangar nu, “Siombo gaam pinoguru'an Niyo? Om kiat siombo kuasa Niyo momaal nu koiran-iran? 3Okon ka ko Iyo yo iri tukang kayu ri? Ino Niyo si Maria, om kosusulodan Niyo si Yakubus, si Yusup, si Simun om si Yudas. Kosusulodan Niyo woinoi nga tuui-a minolak,” koo. Pagka soko iri, tinulak sono Iyo nosiro.

4Mutongaro yo si Yisus so nosiro nu, “Koduung poo'abar nu Kinoringan, orumaton so kiawi' tontong, nga dai orumaton so tontong om kosusulodan niyo kondiri,” koo.#Yns 4:44

5Pagka dai nopoimaid nosiro, dai ya minomaal Iyo nu koiran-iran dii, onu ko po nopotopop nu palad Niyo so ulu nu tinu-tinu koyuwan morosakit, momali' so nosiro. 6Noiranan sobana si Yisus nu dai nosiro nopoimaid.

Sinuu' ni Yisus ongo mompomaid Niyo ri

(Mat 10:5-15; Luk 9:1-6)

Miano yo sono si Yisus so kampung orani so tontong iiri montuduk nu lobuw. 7Impugo yo Niyo opulu om duo mompomaid Niyo ri, taaki yo Niyo nosiro nu kopogboya'an monusub nu moinat om suuo yo Niyo soro duo-duo koyuwan. 8Kodawi yo Niyo nosiro nu, “Ikod kou yo pongowit nu onu-onu ya suat so pomponowan muyu, sondiang ko susukud. Adang-o mongowit nu baata', ombubut intawa siin. 9Pukasut kou yo, nga ikod kou yo pongowit nu imoraan. 10Bang kologa' kou so ido bandar, intawa kampung, podium kou yo nu lobuw oingin polakan muyu, om ogol kou yo nai musingkologa' nu lombusan muyu. 11Bang dai kou pologa'on nu lobuw intawa mongkinongou so kou, laiwi muyu ya nosiro, om puyaso muyu koris so rompam muyu no, pongilaan nu insaadan nosiro nu Kinoringan,” koo si Yisus.#P'rapan 13:51 #Luk 10:4-11

12Miano yo sono nosiro paabar so ongo lobuw nu subai rumorogo momaal nu koraayan. 13Minonusub nosiro nu komoinatan, nopotuntug nu inosak#6:13: inosak; intawa: minyak lanung so lobuw morosakit, om minomali' so nosiro.#Yak 5:14

Kinopotoyan ni Yuanis Moongodiu'

(Mat 14:1-12; Luk 9:7-9)

14Si Raja Irudis#6:14: Si Raja Irudis, ono yo, si Irudis Antipas, wowaidon so Galilia. Siowan Kamus Kitab. nga nokorongou-a nu noongourug iiri, so' siombo-ombo nga obantug si Yisus. Kuwai minutangar nu, “Noluli'an-o si Yuanis Moongodiu'. Ono yo ko' kikuasa Iyo momaal nu koiran-iran oono,” koo.

15Nga wokon-i minutangar nu, “Iyo oono si Ilia,” koo.#Mat 16:14; Mrk 8:28; Luk 9:19

Kuwai ya minutangar nu, “Iyo oono poo'abar nu Kinoringan gulu ri,” koo.

16Norongou-o po iri ni Irudis, mutongaro yo sono iyo nu, “Tantu si Yuanis Moongodiu' ono noluli'an, iri nipopunggol ku ulu ri,” koo. 17Gulu ri minonuu' iyo nu nipaakom si Yuanis nu jiilon. Winaal niyo soko iri so' inontun niyo si Irudias, sawo ni Pilipus, sulod niyo ri, 18om obulit-o iyo tongaron ni Yuanis soko itu, “Dai kowasa ontunon mu sawo nu sulod mu no,” koo.#Luk 3:19-20

19Iri yo ko' sinumona si Irudias so si Yuanis om mokipopomatoi so iyo, nga dai linila'an ni Irudis. 20Lumaa' iyo so si Yuanis so' oilaan niyo nu lobuw warong iyo om sinuu' nu Kinoringan. Nokoponuu' yo iyo nu lobuw popongipat so iyo so jiil om pudi pona aagut iyo nu totongaron oono, ototom-a bana iyo mongorongou.

21Nologa' rami-rami pongoondoman nu kinopuonakan so si Irudis, nokooyang-a sono si Irudias nu kopotoi-potoyan so si Yuanis. Iya oono minonogina si Irudis nu ongo pogawai, wowaidon nu soujar, om lobuw Galilia kipangkat-i. 22Minonari sono anak woinoi ni Irudias so tiningkuangon nu lobuw suang-i, om sobana ko noondayan si Irudis nu poonari nu roraa oono. Mutongaro yo sono iyo so roraa ri nu, “Onu-onu ya koinginan mu taakan ku ya ikau,” koo. 23Mongiboto yo iyo so roraa oono nu, “Onu yo po pokitaakon mu tumbaidon ku ya, pudi pona songintonga' nu tana' pogkuosaan ku no,” koo.

24Lumobuso yo roraa ri mongoduat so ino niyo ri nu, “Onu ka su owarong pokitaakon ku?” koo.

Sumombuto yo ino ri nu, “Pokitaako yo ulu ni Yuanis Moongodiu' ri,” koo.

25Mosuwo yo roraa ri om tongaro yo si Irudis nu, “Pokitaakon ku ulu ni Yuanis Moongodiu' nu ono sono tu ya,” koo.

26Sobana ko aagut si Irudis nu iri nga dai yo niyo oolim so' nokopongibot-o iyo so tiningkuangon nu tombuoi niyo ri. 27Mogtuui suuo niyo ido soujar niyo ri popongunggol nu ulu ni Yuanis. Miano yo soujar iiri so jiil om punggolo yo niyo ulu ni Yuanis. 28Sokoyi yo niyo ulu iiri so talam, om owito yo potaak so roraa ri, om taaki yo sono nu roraa ri so ino niyo ri. 29Norongou-o po iri nu mompomaid ni Yuanis, miano yo nosiro moongoi nu bangkai niyo ri om lobongi yo.

Nopookan si Yisus nu limo noribu lobuw

(Mat 14:13-21; Luk 9:10-17; Yns 6:1-14)

30Mululio yo sono pinongoorapan ni Yisus potuturan so Iyo, nu kiawi' winaal om nituduk nosiro ri. 31Osuang lobuw minian dii, sampai dai kotodiri nosiro mongokan. Pagka soko iri, mutongaro yo si Yisus so pinongoorapan Niyo ri nu, “Mian toko yo so tontong oyiyingo mintoron sontagal,” koo. 32Sumokoyo yo sono nosiro so alud om miano yo so tontong oyiyingo.

33Nga osuang lobuw nokosiou so nosiro nu mungkayas nosiro ri om notondu'an-a. Murongkato yo lobuw so pilolongkop iiri minontas-a mogulu so loga'an ni Yisus om mompomaid Niyo ri. 34Nokotindal-o po Iyo so alud-i, nosiou Niyo osuang lobuw dii. Noluluudan sono Iyo so nosiro so' soko osuang koogutan nosiro om d'ado monabang, soko baanan nu dumba d'ado moongipat. Tumugulo yo sono Iyo montuduk so nosiro.#Pong 27:17; 1 Raj 22:17; 2 Kot 18:16; Ijik 34:5; Ja 10:2; Mat 9:36 35Awi-awi ri, lumogaa yo mompomaid Niyo ri, om mutongaro yo nu, “Oo Guru, pagka tumuong-o om oyiyingo tuui, 36owarong suu'on Mu nosiro momoli nu ingkookan so kampung,” koo.

37Sumombuto yo Iyo nu, “Adang-a poponowon nosiro, pookano muyu ya,” koo.

Mutongaro yo mompomaid Niyo ri nu, “Oo Guru, moingin ko bo gaam ong kai su mian momoli nu baang-baang, orogo duo naatus siin pirok,#6:37: Duo naatus siin pirok, ono yo su gaji nu lobuw solaid walu nowulan. ipookan so nosiro?” koo.

38Mutongaro yo Iyo nu, “Impaa muyu ong komuro po baang-baang muyu,” koo.

Noimpa' yo po, sumombuto yo nosiro nu, “Limo po nowatu baang-baang om duo nokayu pait,” koo.

39Suuo yo Niyo lobuw-i poogom mututuruk-turuk so korikutan-i. 40Mogomo yo nosiro mututuruk-turuk, kuwai maatus sonturuk om kuwai ya limo nopulu. 41Olapo yo Niyo limo nowatu baang-baang om duo nokayu pait-i, om tumingaa'o yo mongunsopot so Kinoringan. Noopod iri, kobi-kobio yo Niyo baang-baang-i om taaki yo so mompomaid Niyo ri nu ipotayad-tayad so lobuw suang-i. Soko iri ya winaal Niyo pudi pait-i. 42Mongokano yo ongo lobuw-i sampai nowasug. 43Noopod iri, pumpungo yo nu mompomaid Niyo ri olu'-olu' ri, nokoponu' po opulu om duo podaka. 44Koosampuw nu lobuw minongokan iiri kiro-kiro limo noribu, sondiang po kowoinoyan om kololaingan.

Minompanou si Yisus so kulit nu sungoi

(Mat 14:22-33; Yns 6:16-21)

45Suuo yo ni Yisus mompomaid Niyo ri sumakoi nu alud mogulu so kampung Baitsaida so diipau nu liu' ri nu laid Niyo pouli' nu ongo lobuw-i. 46Nokouli' yo po nosiro, tumidongo yo si Yisus so ido bulud mogdu'a. 47Tumuong-i, nokolintonga' yo mompomaid Niyo so liu' ri, om kakal po Iyo so tona'on-i. 48Nosiou Niyo mompomaid Niyo ri monginoontob gumou so' sobana ko opogon uos-i om osunsulakan po nosiro. Pagka soko iri, duruk sumuab-i lumogaa yo Iyo dii so nosiro minompanou-a so kulit nu sungoi-i, om soko mokipopogulu ya Iyo. 49Nga nosiou-o po nosiro si Yisus minompanou so kulit nu sungoi-i, tinokod nosiro nu moinat Iyo om ginumonsok lumaa' nu, “Moinat-o!” koo.

50Nga tongaro yo ni Yisus nosiro nu, “Ikod kou kigawa! Aku ya itu no! Ikod kou ya kilaa'!” koo. 51Sumokoyo yo sono Iyo so alud nosiro ri om uos-i nga miningkoyod-o. Sobana ko noiranan nosiro, 52so' kakal po dai noorotian nosiro winaal Niyo suat so limo baang-baang iiri.

Minomali' si Yisus so Ginisarit

(Mat 14:34-36)

53Muripawo yo sono nosiro so liu' iiri, om nokologa' so Ginisarit. Dumudulo yo nosiro dii. 54Nokotindal-o po nosiro, notondu'an-o sono si Yisus nu ongo lobuw-i. 55Owito yo nosiro isai yo po morosakit dii so Iyo so siombo-ombo ya ianan Niyo. 56Siombo-ombo ya loga'an Niyo, so ongo kampung ka, so bandar ka intawa so koumaan, nai yo nosiro mongowit nu lobuw morosakit. Mokililaa yo nosiro so si Yisus monaambai nu insan ririg-a nu sabung Niyo ri, om kiawi' nosiro nopoli'an.

Currently Selected:

Markus 6: TomPWPgLgPn

Highlight

Copy