Lukas 13

Matoi ong dai rumorogo momaal nu koraayan

1Iya oono, kuwai lobuw nopotuturan so si Yisus suat nu lobuw kiat so wonuo nu Galilia pinatoi ni Pilatus nu laid nosiro pousaa' so Kinoringan nu pongayam ginaras so Waloi Maayo nu Kinoringan so Yirusalim. 2Nga sumombuto yo si Yisus nu, “Indadi, ponontaman muyu sono gaam nu nokaalib koraayan nu lobuw Galilia pinatoi oono ko' lobuw Galilia wokon-o? Sobana ko dai ya. 3Mongaabar Aku so kou nu, bang dai kou ya rumorogo momaal nu koraayan, kou nga matoi ya soko nosiro! 4Om onu ponontaman muyu nu opulu om walu koyuwan minatoi noonsitan nu waloi watu opangkat so obi' nu Siluam-i? Ponontaman muyu ya gaam nu maayo po koraayan nosiro ko' kiawi' lobuw so Yirusalim? Sobana ko dai. 5Insan po mongaabar Aku so kou, bang dai kou ya rumorogo momaal nu koraayan, kou nga matoi ya soko nosiro,” koo si Yisus.

Salig-salig suat nu puun dai mubua'

6Musolig-soligo yo si Yisus nu, “Ido koyuwan kitonoman nu bubua'. Arap-arap niyo nu kibua', nga d'ado ya pala. 7Mutongaro yo sono iyo so pinopukoraja niyo ri nu, ‘Tolu yo notoun mongindad aku nu mubua' tonoman ku tu, nga dai ya mubua'. Togado yo ono! D'ado ya kosudaan nu ono muu'-tuu' so' dai ya mubua',’ koo songapan nu bubua' ri. 8Sumombuto yo pinopukoraja oono nu, ‘Oo tuan, adang po togadon nu toun tu. Songkulon ku po tana' so pililiwut-o om bojaan ku, 9kalu mubua' nu toun sunduron tu. Bang dai ya mubua', togadon nai' sono,’ koo pinopukoraja oono,” koo si Yisus.

Momali' so Runat Pongintoronan

10Ido Runat Pongintoronan, minontuduk si Yisus so waloi sosombooyangan. 11Dii kuwai ido woinoi sinorungan nu moinat. Opulu yo om walu toun laid niyo morosakit, om otongkud-o, dai kosintor mundii. 12Pogsiou ni Yisus nu woinoi iiri, paawo yo Niyo porani dii so Iyo om tongaro yo nu, “Oo inan, kaatu' ko yo sono,” koo. 13Topopo yo Niyo limpupuduan nu woinoi iiri om iya ya iiri kosintor-o sono mundii, om minongorayou nu Kinoringan.

14Nga minungot wowaidon so waloi sosombooyangan iiri so' minomali' si Yisus so Runat Pongintoronan. Mutongaro yo wowaidon-i so kolobuwan-i nu, “Onom-o runat kowasa kou mugogoma'on, om ono yo su iyaon muyu mokiubat. Nga, ong Runat Pongintoronan, dai kowasa,” koo.#Kin 20:9-10; Pom 5:13-14

15Nga sumombuto yo si Yisus nu, “Oo su lobuw ongo roraai, tantu polabus kou ya nu pongayam poinum nu Runat Pongintoronan. 16Siowi muyu woinoi iitu. Opulu yo om walu toun morosakit om otongkud-o soko winungkakung nu moinat mongkogos. Woinoi iitu no nga solusuk-a ni Abraham. Kopotutan-o po uyadan om nilabus nu Runat Pongintoronan,” koo si Yisus. 17Noiyu'an sono ongo lobuw rinumoraayan so Iyo ri nu norongou sambut Niyo ri, nga wokon-i osudu'an nu nokosiou nu koiran-iran winaal Niyo ri.

Salig-salig suat so linsou oworos

(Mat 13:31-32; Mrk 4:30-32)

18Mutongaro yo si Yisus nu, “Bang mogkuasa yo Kinoringan soko raja, gama' Niyo soko 19linsou oworos nisasad so umo. Tumuu' sono om ourug nu kayu okutuw, osiou nu lobuw suang, om murumun#13:19 murumun; intawa: murumbun sono bombolog so raan-o,” koo si Yisus.

Salig-salig suat nu poongombang nu tapung

(Mat 13:33)

20Mutongaro po si Yisus nu, “Bang mogkuasa yo Kinoringan soko raja, 21rumuang sono lobuw so Pogkuosaan Niyo oono soko poongombang nu tapung nigawul so tapung om ouli' kokombangan,” koo si Yisus.

Pintu opiit

(Mat 7:13-14,21-23)

22Laid ni Yisus manou-panou sundur so Yirusalim, mambai-ambai Iyo so ongo bandar om kampung montuduk. 23Duato yo sono Iyo nu ido koyuwan nu, “Oo Tuan, owako ya ka lobuw kaalap nu kowiawan kiat so Kinoringan?” koo.

24Sumombuto yo si Yisus nu, “Pogkari'-kari' kou yo su' kaasuw kou so pintu opiit-o, so' obaran Ku kou nu osuang lobuw mokiaasuw nai, nga dai kaasuw. 25Bang tutubon nu songapan nu waloi-o pintu no, mundii-dii kou ya so dilabus-o maid nu monoritik om mutangar nu, ‘Oo tuan, sukabi kai po nu pintu,’ koo kou. Sumambut sono iyo nu, ‘Dai ku kou otondu'an. Siombo ka kiat muyu?’ koo. 26Sumambut kou sono nu, ‘Nokourung kai so ikau mongokan, om ikau-o su moomontuduk so kai,’ koo kou. 27Nga sumambut po iyo nu, ‘Dai ku oilaan ong siombo kiat muyu. Oo su moomaal nu koraayan, pulaiw kou ya,’ koo iyo.#Lgu 6:8 28Iya yo oono osiou muyu si Abraham, si Isak om si Yakub om poo'abar nu Kinoringan gulu ri, sumudu'an so surga, nga kou sono mangi'-tangi' om osonsara' sobana so' susubon kou polabus.#Mat 22:13; 25:30 29Lumoga' sono lobuw okon ko Yaudi kiat so kiawi' wonuo so pusitan om lidopan, kiat so utara om solatan, om osudu'an nosiro so' nosodia' yo polakan nosiro so surga.#Mat 8:11-12 30Soko ono ya pudi lobuw monokod nu kopogulu kologa' so surga, nga dai ya kologa'. Om lobuw monokod nu kotoudi kologa' so surga, nga kopogulu po kologa',” koo si Yisus.#Mat 19:30; 20:16; Mrk 10:31

Noluluudan si Yisus nu lobuw so Yirusalim

(Mat 23:37-39)

31Iya oono, lumoga' yo sono lobuw Parisi dii si Yisus mutangar nu, “Pulaiw-o tuui, om ian so tontong wokon so' pokipopotoyan Ko ni Irudis,” koo nosiro.

32Sumombuto yo si Yisus nu, “Panou-o om obari si Irudis, moongaakal oono nu, ‘Runat tu om suab monusub Aku nu komoinatan om momali' nu lobuw, nga so kotolu no, oopod Ku yo gogoma'on Ku no,’ koo yo muyu ya. 33Soko ono pona, lumombus Aku ya nu runat tu, suab om sonsuaban, so' subai dii ya so Yirusalim su pomotoyan so Aku, soko ongo poo'abar nu Kinoringan gulu ri,” koo.

34Koondom-o sono si Yisus nu kogoyaan nu lobuw so Yirusalim om mutongaro yo Iyo nu, “Oo su lobuw Yirusalim, sumona Aku so kou nu pinatoi muyu ongo poo'abar nu Kinoringan, om pinimpilayan muyu nu watu moomontuduk sinuu' nu Kinoringan. Obulit Aku yo lumoga' mokipopongipat so kou, soko puunan mongoob nu anak niyo, nga dai kou ya musimaid. 35Pagka soko ono, dai yo sono maid-waid Kinoringan so kou. Ondomo yo, kiat kosiono dai kou yo kosiou so Aku, musingkoputangar muyu so Aku nu, ‘Oborokatan-o Iyo, ono linumoga' sinuu' nu TUHAN-o,’ koo kou,” koo si Yisus.#Lgu 118:26

Currently Selected:

Lukas 13: TomPWPgLgPn

Highlight

Copy