Pinongurugan 7
7
Linusuon
1Mutongaro yo koimbagu TUHAN so si Nuu nu, “Asuw-o so kapal-o, maid nu anak sawo mu no. Oilaan Ku nu ikau po su momaal nu koinginan Ku so wonuo tu. 2-3Pongowit-o turu nopasang nu soro ido-ido ginis nu bombolog om kulos-kulos kowasa okanon-o, nga ono kulos-kulos dai kowasa okanon-o, soro sompasang-pasang-a nu kiawi' ginis. Waalo yo soko ono su' kiawi' ginis nu kulos-kulos dai oluwus matoi om rumayat sono koimbagu so wonuo tu. 4Koturuan po posondot Aku yo nu uran dai mutodu'-todu' solaid opat nopulu runat, su' matoi pinuwaal Ku oono,” koo. 5Waido yo ni Nuu kiawi' nisuu' nu TUHAN so iyo ri. 6Umur-o po ni Nuu iya nu linusuon wonuo tu ri, nga onom naatus toun.
7Mosuwo yo si Nuu so kapal-i maid nu anak sawo niyo om nokotakin so iyo ri su' dai nosiro olosod.#Mat 24:38-39; Luk 17:27 8-9Owito ya niyo masuw so kapal ono turu nopasang nu kiawi' ginis kulos-kulos om bombolog kowasa okanon om sompasang nu kiawi' ginis dai kowasa okanon, musuat nu iri nisuu' nu Kinoringan. 10So koturu ri po, lumonio yo sono so pilolongkop nu wonuo tu.
11Iya nu onom naatus toun duo noulan, opulu om turu runat umur ni Nuu, poowaso yo sono nu Kinoringan sungoi kiat so tana' om pourano yo Niyo nu sobana ko osampuw,#2 Ptr 3:6 12om murano yo solaid opat nopulu runat.
13Runat-a iiri inosuwan ni Nuu so kapal-i maid nu sawo, inonakan niyo, si Sim, si Yapit om si Ham, om sawo nosiro ri. 14Om minaid-a so nosiro masuw soro songginis-ginis nu bombolog om kulos-kulos, otuyu osiau, maayo oworos-o. 15Om minasuw-a sompasang soro songginis-ginis nu kulos-kulos om sompasang nu kiawi' ginis nu bombolog so kapal oono, minaid so si Nuu, 16musuat nu iri pinonuu'an nu Kinoringan so iyo ri. Nokaasuw-o po kiawi' iiri, tutubo yo nu TUHAN pintu nu kapal-i.
17Umayo yo sono loni' iiri solaid opat nopulu runat, om linumalom-o bana su loni' om nokolantung-o sono su kapal. 18-20Sumundur-a umayo loni' ri sampai nolantung-o kapal-i, om bulud ongo popangkat-i nga nololoman, turu yo sono nomitor kolalom kiat so timpak nu kobubuludan-i. 21-23Linuwus nu TUHAN momatoi kiawi' miau so wonuo tu, kiat-o so lobuw, kumoo yo so bombolog om kulos-kulos maayo oworos. Iri po su dai minatoi si Nuu om kiawi' nokowaid so iyo so kapal-i. 24Solaid maatus limo nopulu runat dai minosak-osak su loni'.
Currently Selected:
Pinongurugan 7: TomPWPgLgPn
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
