Pinongurugan 40

Nopoorati si Yusup nu upian nu duo koyuwan nojiil

1Dai olaid kiat nu iri, kikosola'an sono so raja nu Masir, iri moomaal nu anggur om moomaal nu baang-baang so iyo ri. 2Minungot sono sobana raja ri nu duo koyuwan iiri, 3om pojiili yo niyo nosiro so waloi nu wowaidon nu moongipat nu waloi nu raja, iri pinojiilan so si Yusup. 4Olaid-a nosiro so jiil iiri, om si Yusup-o su pinongoorapan nu wowaidon nu moongipat so waloi nu raja ri so nosiro.

5Ido awi, nokoupi moomaal nu anggur om moomaal nu baang-baang iiri, om musondiang orati nu upian nosiro ri. 6Nokologa' yo po si Yusup dii so nosiro nu susuab-i, nosiou niyo nu oogutan nosiro. 7Duato yo sono niyo nu, “Nokuro ka su oogutan kou osiou ku nu runat iitu?” koo.

8Sumombuto yo nosiro nu, “Kiupian kai siawi, nga insan ong ido oilo poorati nu upian mai oono,” koo nosiro.

Mutongaro yo si Yusup nu, “Kinoringan-o su oilo poorati nu upian muyu oono. Tuturani muyu ka so aku,” koo.

9Monuturano yo sono moomaal nu anggur iiri nu, “Nokoupi aku nu kuwai sompuun anggur so tiningkuangon ku. 10Batang nu anggur iiri tolu raan. Nokopuroun-a ongo raan-i, muwusako yo, om kibua' yo sono nu oonsak. 11Iya oono, muyut-kuyut aku nu sawan poonginuman nu raja. Indadi kotuo ku yo bua' nu anggur iiri, pogaa ku yo so sawan kuyut-kuyutan ku ri om taaki ku yo so raja ri,” koo.

12Sumombuto yo si Yusup nu, “Itu yo orati nu upian mu oono. Tolu raan iiri, orati kotoluan. 13Kotoluan po, polobuson ko yo nu raja om ompunon ko om popugogoma'an ko yo sono koimbagu nu gogoma'on mu gulu ri, moomaal nu anggur. 14Nga ondomo aku yo ong osanang ko yo koimbagu. Obari sono raja no suat so aku su' aku nga polobuson-a niyo. 15Aku yo po tinongawan kiat so wonuo nu lobuw Ibrani, om d'ado ya sala' ku tuui so Masir nu kopongojiilan so aku,” koo.

16Norongou-o po nu moomaal nu baang-baang-i nu mutoop-a orati nu upian nu moomaal nu anggur-i, mutongaro yo iyo so si Yusup nu, “Aku nga kiupian-a nu minongodundung aku tolu mutimpak raga kiasuw nu baang-baang. 17Raga so timpak bana ri kiasuw nu boroginis nu baang-baang suat so raja, nga linumoga' sono kobombologan mongaawi' mongokan nu iri,” koo.

18Sumombuto yo si Yusup nu, “Itu yo orati nu upian mu oono. Tolu raga iiri, orati kotoluan. 19Kotoluan po monuu' yo raja no nu lobuw poponotok nu liou mu no, om bangkai mu no nitawid so pasok om okanon sono nu kobombologan,” koo.

20Kotoluan kiat nu iri, nogonop-o toun pongoondoman nu kinopuonakan so raja, muromi-romio yo sono raja ri om soginaa yo niyo kiawi' moomugogoma'on niyo ri. Indadi, monuuo yo sono iyo nu polobuson moomaal nu anggur om moomaal nu baang-baang so iyo ri om owiton so tiningkuangon nu kiawi' moomugogoma'on so waloi niyo ri. 21Iri moomaal nu anggur-i pinopurogama' niyo koimbagu nu gogoma'on niyo gulu ri, 22nga iri moomaal nu baang-baang-i, inukuman nu potoyon. Onu yo po tinangar ni Yusup, iri ya su nourug, 23nga dai yo sono noondoman si Yusup nu iri moomaal nu anggur-i.

Currently Selected:

Pinongurugan 40: TomPWPgLgPn

Highlight

Copy