Pinongurugan 34

Pinonowaan so si Dina

1Ido runat, ginumosayun si Dina, anak woinoi ni Yakub om ni Lia so kowoinoyan nu Kanaan. 2Nosiou-o po iyo ni Sikim, anak ni Imur, lobuw nu Iwi, raja so wonuo oono, tongawi yo sono iyo ni Sikim om sondomino yo. 3Nga pagka sobana ko oingin iyo so si Dina, tongaro yo sono niyo si Dina nu poinginon so iyo. 4Mutongaro yo iyo so amo niyo ri nu, “Mindamo aku so ikau nu ontunon ku roraa oono,” koo.

5Norongowan sono ni Yakub nu nosonsawo yo anak roraa niyo ri, nga pagka dai po nokouli' inonakan niyo kusoi-i, dai iyo kopomaal nu onu-onu ya. 6Miano yo sono si Imur, amo ni Sikim, dii si Yakub mokimuupakat, 7om iya iiri nokouli' yo inonakan kusoi ni Yakub. Norongou-o po nosiro iri, nokotigog nosiro om sobana ko minungot so' ginama' ni Sikim iiri kopongusiba' nu lobuw Israil. 8Mutongaro yo si Imur so si Yakub nu, “Sobana ko moingin si Sikim nu anak mu no. Indadi, mindamo aku so ikau nu popuontunon nosiro. 9Mutaayun kito yo nu bansa ku om bansa mu kowasa ya muontun. 10Kowasa ko tumotog molak so tontong mai tu, siombo-ombo ya koinginan mu, om kopogbaya' ko ya mudagang om kaalap nu orata',” koo.

11Mutongaro yo si Sikim so amo om kosusulodan ni Dina nu, “Tumbaido muyu yo indomoon ku no, taakan ku ya kou nu onu ya koinginan muyu. 12Tongaro muyu ya onu pokitaakon muyu om tontuon-o ong komuro buru'. Nitaak ku ya kiawi' onu yo po indomoon muyu ong lila'an muyu aku mongontun nu roraa oono,” koo.

13Pagka nosonsawo yo ni Sikim adi' nosiro si Dina, okali yo sono nosiro si Imur om si Sikim nu, 14“Oiyu'an kai poontun nu adi' mai no so lobuw dai nosunatan. 15Tumaayun kai ya nu indomoon muyu no nga subai ourug kou soko kai nu kiawi' kusoi sunatan. 16Osunatan kou yo, om tumaayun kai nai' nu kowasa toko ya muoontun-ontun. Mido kai molak so kou om ourug nu ido-ido bansa. 17Nga bang dai kou ya tumaayun nu sunatan, olapon mai ya roraa oono om mulaiw kai,” koo.

18Nopikir ni Imur om ni Sikim nu otoop-a totongaron oono, 19mogtuui tinumaayun si Sikim so' sobana ko moingin iyo so si Dina. So kiawi' suku-sakat niyo, si Sikim-o su sobana ko obantug.

20Miano yo si Imur om si Sikim so poomusombatan so longobon nu bandar-i, mokimuupakat so lobuw nu bandar iiri nu, 21“Lobuw-o po nu Israil oono kouna'an toko. Indadi posimaidan-a nosiro tumotog molak tuui om mompanou so siombo-ombo ya koinginan nosiro. Orumposan-a nosiro molak tontong toko tu. Kowasa toko ya muoontun so nosiro. 22Moingin-a nosiro tumotog molak tuui om ourug nu ido-ido bansa, ong tumaayun toko nu kiawi' kusoi so toko sunatan soko nosiro. 23Bang waalon toko ono, osongapan toko sono kiawi' pongayam om orata' nosiro no. Indadi tumaayun toko yo nu indomoon nosiro no, su' kototog nosiro mido so toko molak tuui,” koo. 24Indadi, tinumaayun-o sono kiawi' lobuw so bandar iiri nu totongaron ni Imur om ni Sikim, om sunati yo sono kiawi' kusoi nosukod-i yo.

25Kotoluan kiat nu pinusunatan-i, laid nu osokitan po kiawi' kusoi-i, mongolapo yo sono nu karis duo anak ni Yakub, ongko ni Dina, ono yo si Simiun om si Liwi, om sumolinoko yo mian so bandar, om potoyo yo nosiro kiawi' kusoi, 26maid so si Imur om si Sikim. Owito yo nosiro si Dina mulaiw kiat so waloi ni Sikim. 27Noopod iri, miano yo inonakan ni Yakub wokon-i monolod nu gonggamon, ponunsuli' nu nosonsawo yo adi' nosiro ri. 28Inalap nosiro baanan nu kambing dumba, sapi, koladai, om onu yo po so bandar iiri om so umo. 29Sinolod nosiro kiawi' gonggamon boorogo om tinongawan kiawi' woinoi maid nu inonakan om asuw nu ongo waloi nosiro.

30Mutongaro yo sono si Yakub so inonakan niyo ri nu, “Sobana ko mongaagut kou so aku. Kosiono kiawi' lobuw nu Kanaan om Piris rumoraayan sono so aku. Lobuw toko no owako ya. Bang mugapi' nosiro mongolawan so toko, oluwus toko matoi,” koo.

31Sumombuto yo nosiro nu, “Musuat-a winaal mai oono so' dai otoop olapon adi' mai no nu soko sundal,” koo.

Currently Selected:

Pinongurugan 34: TomPWPgLgPn

Highlight

Copy