Pinongurugan 32

Minurigap-rigap si Yakub sumambat

so si Isau

1Lumombuso yo si Yakub, om lumogaa yo ongo susuu'on nu Kinoringan sumambat so iyo. 2Nosiou-o po niyo ongo susuu'on oono, mutongaro yo iyo nu, “Tuui yo pinubosolagan nu Kinoringan,” koo. Ingorani yo sono niyo tontong iiri nu Mahanaim.#32:2: Orati yo po nu Mahanaim nga, duo pomubosolagan.

3Soko iri po, suuo yo sono niyo lobuw niyo ri popogulu lumombus so Idum sumambat so si Isau, ongko niyo ri. 4Mutongaro yo si Yakub so nosiro nu, “Soko itu tongaron muyu so ongko ku si Isau nu, ‘Aku yo po si Yakub, uripon mu, iri minogol nu solaid oono dii si Laban. 5Kosiono kiongo sapi aku, koladai, dumba, kambing om kouriponan. Poowit aku nu kodau so ikau om umarap aku nu osanang-a inawo mu sumambat so aku,’ koo yo muyu ya,” koo.

6Nokopululi' yo po pinusuu' oono dii si Yakub, mutongaro yo nosiro nu, “Nokosambat kai yo so si Isau ongko mu ri, om mian-a iyo tuui sumambat so ikau, maid nu opat naatus lobuw,” koo. 7Norongou-o po iri ni Yakub, linumaa' sono iyo. Indadi boogio yo niyo lobuw niyo ri duo boogian om soko ono ya pudi dumba, kambing, sapi om unta niyo ri. 8Koo si Yakub so inawo, “Bang mokimutuda' si Isau nu ido boogian, koduo boogian-o kosampat po mulaiw,” koo.

9Mogdu'a yo sono si Yakub nu, “Oo Kinoringan usaa'on ni aki ku si Abraham, om amo ku si Isak, rongowo aku yo! Sinuu' mu aku pouli' so inungkiaton ku om so suku-sakat ku om minujanji Ko nu owarong-a kiawi' waalon Mu suat so aku. 10Pagka lobuw aku ya koopotan, dai su otoop somodan om suluton Mu. Iya nu muripau aku so Bowang Yurdan tu ri, ado ya onu-onu inowit ku sondiang ko' tutungkud. Kosiono minululi' aku yo maid nu kiduo boogian iitu. 11Mindamo aku so Ikau nu sopulo aku yo kiat so si Isau, ongko ku no. Lumaa' aku nu mokimutuda' iyo so aku om luwuson niyo, kiat-o so kowoinoyan kumoo yo so kololaingan. 12Ondomo yo janji Mu ri nu owarong-a kiawi' waalon Mu so aku om posuangon Mu solusuk ku sampai dai oiap, so' koosuang-o soko pantai so imbing nu raat,” koo.#Pgn 22:17

13-15Nokowaloi-o po nosiro so tontong oono, mongolapo yo si Yakub nu pongayam niyo ri nu nitungkap so si Isau, ono yo duo naatus kambing woinoi, duo nopulu kambing kusoi, duo naatus dumba woinoi, duo nopulu dumba kusoi, tolu nopulu uyog nu unta maid nu ino, opat nopulu sapi woinoi, opulu sapi kusoi, duo nopulu koladai woinoi, om opulu koladai kusoi. 16Boogio yo niyo pongayam oono tinu-tinu baanan om komoulii yo niyo ido koido baanan so kouriponan niyo ri. Mutongaro yo iyo so nosiro nu, “Pogulu kou yo mompanou, om subai kuwai puola'an nu ido koido nu baanan,” koo. 17Imuuni yo ni Yakub uripon so pinoguluon-i nu, “Bang mongoduat si Isau ong isai tuan mu, om siombo ianan mu, om isai songapan nu pongayam inowit muyu iitu, koo, 18sombuti muyu ya nu, ‘Itu yo po songapan ni Yakub, uripon mu ri. Nipoowit niyo itu su itungkap so ikau. Om uripon mu, si Yakub, dii so tinoudion,’ koo yo muyu ya,” koo. 19-20Soko ono ya tangar ni Yakub so uripon niyo wokon-i so' pikiran niyo oinsosomodan si Isau nu nitungkap niyo oono, om ompunan sono iyo ni Isau ong kopusambat nosiro. 21Indadi poowiti yo niyo popogulu itungkap niyo oono, nga minaloi po ong iyo so bosalag niyo ri.

Kiuna' si Yakub Mu'uut so Piniil

22Awi ya iiri pinongowitan ni Yakub nu kiduo sawo niyo om duo po woinoi pinokosawo niyo om opulu om ido inonakan niyo ri muripau nu Bowang Yabuk. 23Nokoripau-o po nosiro, minululi' yo iyo om nopaapit nu gonggamon niyo, 24nga minogol po ong iyo.

Lumogaa yo sono ido kusoi mu'uut so si Yakub nosuaban. 25Pagka oirosaan nu lobuw ono nu odoog iyo mu'uut, linubak sono niyo tobing ni Yakub, om nokopusulak su tulang. 26Mutongaro yo lobuw oono nu, “Wiliwi aku yo, dai yo olaid sumuab,” koo.#Us 12:3-4

Sumombuto yo si Yakub nu, “Dai ku po ikau iwiliw ong dai mu po aku borokatan,” koo.

27Mongoduato yo lobuw ono nu, “Isai ngaran mu?” koo.

“Ngaran ku si Yakub,” koo.

28Mutongaro yo lobuw oono nu, “Okon-o ko si Yakub su ngaran mu. Pagka nokopulawan ko yo nu Kinoringan om lobuw, om nokomanang ko ya, ngaran mu sono si Israil,” koo.#Pgn 35:10

29Mutongaro yo si Yakub nu, “Obari yo ngaran mu no,” koo.#Hak 13:17-18

Nga sumombuto yo iyo nu, “Kodi ya duato ong isai ngaran Ku,” koo, om borokati yo sono Niyo si Yakub.

30Mutongaro yo si Yakub nu, “Nokosambat aku yo nu Kinoringan, om kakal-a miau aku,” koo. Ingorani yo sono niyo tontong oono nu Piniil.#32:30: Tangar Piniil so tangar Ibrani ogon-ogon muinong nu tangar “buatan nu Kinoringan”. 31Musit su runat, momponowo yo iyo kiat so Piniil, nga kolimpo iyo so' nokopusulak su tulang nu paa niyo ri. 32Kiat nu iri dai yo sono mongokan solusuk ni Israil nu onsi nu puungolan nu paa nu kulos-kulos sampai kosiono, so' iri pinongolubakan nu tobing ni Yakub.

Currently Selected:

Pinongurugan 32: TomPWPgLgPn

Highlight

Copy