Pinongurugan 23

Minatoi si Sara

1Maatus duo nopulu om turu toun umur ni Sara, 2minatoi-o iyo so Ibrun so tana' Kanaan. Mangi'-tangi' si Abraham oupus nu sawo niyo ri.

3Soko iri po, laiwi yo niyo bangkai nu sawo niyo ri mian so lobuw bansa Iit, minolak so tontong oono, om mutongaro yo nu, 4“Aku yo po porantau mido-ido molak tuui so kou, nga lilai muyu yo aku momoli nu tana' polobongan ku nu sawo ku ri,” koo.#Ibr 11:9,13; P'rapan 7:16

5-6Sumombuto yo nosiro nu, “Mongorumat kai kiawi' so ikau, nu soko wowaidon mai. Indadi, lobongi ya sawo mu no so polobongan owarong songapan mai no. Sobana ko osanang-a inawo mai monaak so ikau nu tana' polobongan nu sawo mu no,” koo.

7Sumurukudo yo sono si Abraham so tiningkuangon nosiro ri, 8om mutongaro yo nu, “Bang tumaayun kou ya nu nilobong ku sawo ku no tuui, mokitabang aku maam so kou mokilila' so si Iprun, anak kusoi ni Juhar, 9su' niwoli niyo so aku uang nu watu ingoranan nu Uang Makpila so isan nu umo niyo ri. Owarong nu kumondiri iyo mian tuui powoli nu ono s'aku so tiningkuangon muyu.#23:9: Iya oono, bang kuwai oogot, subai puupokatan so tiningkuangon nu lobuw suang. Puuron ku ya mongoorogo tana' oono su' osongapan ku,” koo.

10Iya oono songogoman-a si Iprun nu lobuw Iit iiri so pomusombatan so pintu nu bandar-i. Sumombuto yo iyo so tiningkuangon nu lobuw dii ri nu, 11“So tiningkuangon nu bansa ku kondiri, mutangar aku nu umo om uang nu watu oono nitaak ku yo so ikau, polobongan mu nu sawo mu no,” koo.

12Sumurukudo yo si Abraham so tiningkuangon nosiro ri, 13om mutongaro yo so si Iprun nu, “Rongowo yo! Wolion ku kiawi' umo oono. Olapo yo siin tu, su' kolobong ku sawo ku ri tuui,” koo.

14-15Sumombuto yo si Iprun nu, “Oo tuan, orogo yo po nu tana' oono opat-o naatus siin pirok, nga onu yo ka koorotian nu ono so kito? Lobongi ya sawo mu ri nai,” koo. 16Tinumaayun-o sono si Abraham nu botang iiri. Mongiapo yo iyo nu siin pirok ontob nu nibotang ni Iprun opat naatus kaping, mongowaid nu sukuban pokayon nu ongo moomudagang, om borayi yo niyo si Iprun so tiningkuangon nu lobuw Iit-i.

17Soko iri yo kosongapan-ngapan ni Abraham nu tana' ni Iprun so Makpila, umpak so pusitan nu Mamri. Tana' oono kiumo om uang nu watu om tonom-tonoman so pubaatan-i. 18Notooyunan-o sono nu kiawi' lobuw Iit so puimpugan iiri nu songapan-o ni Abraham tana' iiri.

19Soko iri po, lobongi yo sono ni Abraham sawo niyo ri, si Sara so uang nu watu Makpila so tana' nu Kanaan. 20Indadi nosongapan-o sono tana' iiri ni Abraham, om inurug nu polobongan.

Currently Selected:

Pinongurugan 23: TomPWPgLgPn

Highlight

Copy