Pinongoorapan 23

1Bontongi yo ni Paulus lobuw so Poomubisora'an nu Ugama ri om mutongaro yo nu, “Oo su kosusulodan, oilaan ku nu kiawi' gogoma'on ku sampai kosiono tu koinsanang nu Kinoringan,” koo. 2Nokoputangar si Paulus soko iri, suuo yo nu Imam Maayo Ananias lobuw minundii so obi' ni Paulus monampak nu kobang niyo ri. 3Mutongaro yo si Paulus so Imam Maayo ri nu, “Oo su lobuw oraai musingkowarong-warong, ikau nga sompakon-a nu Kinoringan. Mongobisara' ko so aku mongowaid nu Ukum ni Musa, nga ikau-a kondiri dai mongowaid nu Ukum oono, so' monuu' ko nu lobuw poponampak so aku,” koo.#Mat 23:27-28

4Mutongaro yo lobuw so obi' ni Paulus nu, “Dai ko otoop mubaag nu Imam Maayo nu Kinoringan,” koo.

5Sumombuto yo si Paulus nu, “Oo su kosusulodan, dai ku bo noilaan nu iyo yo su Imam Maayo nu Kinoringan. Bang noilaan ku nai', dai ya su mutangar soko ono so' nokosurat so Buuk nu Kinoringan nu, ‘Adang-o mubaag nu wowaidon nu bansa muyu,’ koo ri,” koo.#Kin 22:28

6Noilaan-o po ni Paulus nu kuwai lobuw Saduki om Parisi so poomubisora'an iiri, mutongaro yo sono iyo nu, “Oo su kosusulodan ku, aku yo po lobuw so puimpugan nu Parisi om solusuk-a nu Parisi. Binisara' aku tuui so' poimaid aku nu oluli'an lobuw minatoi,” koo.#P'rapan 26:5; Plp 3:5

7Notangar-o po ni Paulus soko iri, minusosagka' sono lobuw Parisi om Saduki ri om minupinig. 8(Minupinig nosiro so' dai poimaid lobuw Saduki nu oluli'an lobuw minatoi, om dai poimaid nu kisusuu'on nu Kinoringan, intawa kiatod, nga lobuw Parisi, poimaid nu kiawi' oono.)#Mat 22:23; Mrk 12:18; Luk 20:27 9Sumunduro sono nosiro musosagka'. Mundiio yo tinu-tinu lobuw Parisi moomontuduk nu ugama ri om mutongaro yo dumaawa nu, “D'ado ya sala' nu lobuw iitu. Kalu kuwai atod intawa susuu'on nu Kinoringan minokimutangar-tangar so iyo,” koo.

10Sumokakan-o sono pusosogka'an iiri sampai nokolaa' wowaidon nu soujar-i nu pisi'-pisi'on nosiro si Paulus. Monuuo yo sono iyo nu soujar mongalap so si Paulus kiat so isop nu kolobuwan-i om owito yo koimbagu so poomusombatan nu soujar-i.

11Awi ri, minintolang sono si Tuhan Yisus so obi' ni Paulus om minutangar nu, “Pototapo yo inawo mu no. Nokaabar mu yo abar suat so Aku tuui so Yirusalim, om subai iabar mu ya ono pudi so Ruum,” koo.

Puupokatan momatoi so si Paulus

12Susuab koimbagu ri, muupokato yo lobuw Yaudi ri nu kopatoi-patoi nosiro so si Paulus. Minongibot nosiro nu dai mongokan monginum ong dai po opatoi si Paulus. 13Koosuang nosiro labi opat nopulu. 14Miano yo nosiro so wowaidon nu imam om wowaidon nu lobuw Yaudi ri mutangar nu, “Nokopongibot kai yo nu dai mongokan monginum ong dai mai po opatoi si Paulus. 15Indadi pongodau kou yo so wowaidon nu soujar nu Ruum nu ipoowit si Paulus koimbagu tuui, so' moingin kou kolaai mongolugit so iyo mongoduat. Dai po kologa' iyo tuui, potoyon mai iyo,” koo.

16Nga norongou-a nu komonakon ni Paulus pinuupokatan nosiro ri, miano yo sono iyo so poomusombatan nu soujar-i, pokoilo nu iri so si Paulus. 17Pagka soko iri paawo yo ni Paulus ido wowaidon nu soujar, om tongaro yo niyo nu, “Owito omulok iitu so wowaidon nu soujar Ruum oono su kuwai niabar niyo,” koo. 18Owito yo sono omulok iiri nu wowaidon nu soujar-i mian so wowaidon nu soujar Ruum om mutongaro yo nu, “Sinuu' aku ni Paulus, iri nojiil-i, mongowit nu omulok iitu tuui so ikau su kuwai niabar niyo,” koo.

19Kuyuti yo nu wowaidon-i longon nu omulok-i, mongowit rumawu' sabat om duato yo nu, “Onu ka niabar mu so aku?” koo.

20Sumombuto yo omulok-i nu, “Minuupakat lobuw Yaudi ri nu ipoowit so ikau si Paulus mululi' koimbagu so Poomubisora'an nu Ugama ong suab, so' moingin po bana nosiro kolaai mongolugit so iyo. 21Nga kodi yo imaido suu' nosiro oono, so' labi opat nopulu sampuw nosiro sinumusut so lolanon. Nokopongibot-o nosiro nu dai po mongokan monginum ong dai po opatoi nosiro si Paulus. Nokoputimos-o nosiro, mongimat-a nu sambut kiat so ikau,” koo.

22Mutongaro yo wowaidon-i nu, “Kodi yo tuturani so isai ya, nu minongaabar ko tuui so aku,” koo, om suuo yo niyo omulok-i pouli'.

Niapit si Paulus dii si Pilik

23Indadi momaawo yo wowaidon iiri duo wowaidon nu soujar om mutongaro yo so nosiro nu, “Impugo muyu duo naatus soujar maid nu turu nopulu soujar kikuda om duo naatus soujar kibangkau. Jaam siwoi nu awi tu mompanou kou yo mian so Kaisaria. 24Sodia'on-a kuda sokoyan ni Paulus om ipati muyu yo iyo pusingkologa' dii si Gobonor Pilik,” koo.

25Monurato yo iyo niloga' dii si Gobonor Pilik soko itu nu,

26Oo Gobonor Pilik orumaton ku, surat iitu kiat so aku Klaudius Lisias!

27Si Paulus-o po iitu, inakom nu lobuw Yaudi nu potoyon, nga noilaan ku yo po nu lobuw iyo nu Ruum, minian aku sono maid nu ongo soujar ku monapul so iyo. 28Pagka pokiimutigan ku ong onu pinonopudan nosiro so iyo, inowit ku sono iyo so Poomubisora'an nu Ugama nosiro. 29Nga noilaan ku nu ado ya nowaal niyo nu otoop pongukuman so iyo nu potoyon intawa jiilon. Ponopudan nosiro so iyo suat-a so ukum nu ugama nosiro kondiri. 30Pinokoilo aku nu minuupakat lobuw Yaudi momatoi so iyo. Ono yo ko' nipoowit ku iyo nai so ikau, om pinowaid ku ya lobuw monapud so iyo no pokoilo so ikau nu totapud nosiro no,

koo tangar so surat oono.

31Osipo yo nu soujar-i nisuu' nu wowaidon nosiro ri. Olapo yo nosiro si Paulus om owito yo mian nu awi iiri so bandar Antipatris. 32Susuab-i lumombuso yo soujar kikuda ri mompanou mongowit so si Paulus, om iri ado kuda ri minuli' yo koimbagu so Yirusalim. 33Nokologa' yo po soujar kikuda ri so Kaisaria, taaki yo nosiro surat-i so Gobonor om ogoli yo si Paulus dii. 34Nobasa' yo po nu Gobonor-i surat-i, duato yo sono niyo si Paulus ong siombo inungkiaton. Noilaan-o po niyo nu kiat-a si Paulus so Kilikia, 35mutongaro yo iyo nu, “Oo, bisora'on ku ya ikau ong kologa' yo tuui kolobuwan minonapud so ikau-i,” koo. Minonuu' yo sono iyo nu jiilon si Paulus so waloi maayo ni Raja Irudis.

Currently Selected:

Pinongoorapan 23: TomPWPgLgPn

Highlight

Copy