Pinongoorapan 22

1“Oo su kosusulodan om kotutuaan, rongowo muyu yo pusintopanan ku tu!” koo. 2Norongou-o po nosiro nu mutangar si Paulus nu tangar Ibrani, minodog po bana nosiro, om sumunduro yo iyo mutangar nu,

3“Aku yo po lobuw Yaudi, nopuanak so bandar Tarsus so wonuo nu Kilikia, nga naayo aku tuui so Yirusalim. Si Gamalil su minontuduk so aku nu gama' mongowaid nu Ukum ni Musa, iri nipolatas so odu aki toko ri, om sobana ko obinsuut aku so Kinoringan so kiawi' gogoma'on ku, soko kou tuui nu runat tu.#P'rapan 5:34-39 4Minongindoraai aku nu lobuw nopoimaid so si Yisus om nokopomatoi aku. Osuang so nosiro, woinoi kusoi pinuakom ku om jiniil ku. 5Noilaan-a nu Imam Maayo om kiawi' lobuw so Poongobisora'an nu Ugama nu obana ya totongaron ku iitu, so' nosiro yo su minonaak so aku nu surat niposiou ku so lobuw Yaudi so Damsik. Surat oono yo su kopogboya'an ku mongaakom nu lobuw nopoimaid so si Yisus om mongowit so nosiro so Yirusalim nu ukumon,” koo.#P'rapan 8:3; 26:9-11

Minonuturan si Paulus nu gama' niyo nopoimaid so si Yisus

(P'rapan 9:1-19; 26:12-18)

6Mutongaro yo si Paulus nu, “Iya nu tonga' runat dai po nokologa' so Damsik, milok po su kibinaang onawau tumogu' kiat so langit so pililiwut ku ri. 7Noluluk aku sono so tana', om nokorongou aku nu bongut nu, ‘Oo Saulus, nokuro su mongoraai ko so Aku?’ koo. 8Sumombuto aku yo nu, ‘Isai ko ka Tuhan?’ k'aku. ‘Aku yo si Yisus lobuw Najarit sindoraayon mu no,’ koo Iyo so aku. 9Kolobuwan minaid so aku ri nokosiou-a nu binaang-i, nga dai noorotian nosiro bongut mokimutangar-tangar so aku ri. 10Mutongaro aku yo koimbagu nu, ‘Oo Tuhan, onu su mupatut waalon ku?’ k'aku. Sumombuto yo Iyo nu, ‘Tungag-o om lombus-o so Damsik. Pokoiloon ko ya dii nu kiawi' nipogama' nu Kinoringan so ikau,’ koo. 11Nobolou aku sono nu binaang iiri. Indadi tinanud aku ya nu kouna'an ku ri lumoga' so Damsik.

12Kuwai ido koyuwan dii ingoranan so si Ananias. Sobana ko obinsuut iyo so Kinoringan om owasa mongowaid nu Ukum ni Musa. Orumaton iyo nu kiawi' lobuw Yaudi so Damsik oono. 13Lumogaa yo iyo dii so aku om mundiio yo so obi' ku ri om minutangar nu, ‘Oo sulod ku Saulus, kosiou ko yo sono koimbagu!’ koo. Iya ya iiri yinumangag aku om nosiou ku yo iyo. 14Mutongaro po iyo so aku nu, ‘Pinili' ko yo nu Kinoringan iri usaa'on nu odu aki toko ri, su' oilaan mu nipogama' Niyo so ikau, om kosiou om korongou ko so si Yisus, Uripon nu Kinoringan iri minomaal nu koinginan Niyo. 15Pinili' ko nu Kinoringan paabar so lobuw suang nu onu yo po nosiou om norongou mu nu pinutongaran Niyo so ikau. 16Kodi yo imati nu olaid po. Tungago om pokidiu' yo. Pokiidu' yo so Kinoringan nu kiawi' koraayan mu,’ koo si Ananias so aku.

Minontuduk si Paulus so lobuw

okon ko Yaudi

17Mululio aku yo sono so Yirusalim, om laid ku mogdu'a so Waloi Maayo nu Kinoringan-i, nokosorou-sorou aku sono nu 18Tuhan minutangar so aku nu, ‘Sikap-o ya mulaiw kiat so Yirusalim tu so' lobuw tuui dai poimaid nu pontudukan mu suat so Aku,’ koo. 19Sumombuto aku yo nu, ‘Oo Tuhan, noilaan-o nosiro nu minasuw aku yo nu gulu ri so waloi sosombooyangan mongaakom om mongobobog nu lobuw poimaid so Ikau. 20Soko ono ya pudi si Stipanus iri potuturan suat so Ikau gulu ri. Dii-dii aku ya nu pinomotoyan so iyo ri, tinumaayun aku nu potoyon iyo, om aku yo kondiri minongipat nu sabung nu lobuw minomatoi so iyo ri,’ k'aku.#P'rapan 7:58 21Nga minutangar po Tuhan so aku nu, ‘Panou-a! Suu'on Ku ikau mian so ongo lobuw okon ko Yaudi orawu' tuui,’ koo,” koo si Paulus.

22Norongou-o po nosiro nu moingin si Paulus mian so lobuw okon ko Yaudi, lumuapo yo sono nosiro nu, “Potoyon-o iyo! Dai otoop iyo miau!” koo nosiro. 23Puiyaon nosiro nu lumuap om polapos nu sabung, om potias nu koris so dilanggau nu koo'ungot. 24Indadi poowiti yo sono nu wowaidon nu soujar nu Ruum-i si Paulus so poomusombatan nu soujar-i nu lubakon, tayon ong niabar niyo koungotan nu lobuw Yaudi so iyo ri. 25Nga nokogosan-o po si Paulus nu sundur lubakon, mutongaro yo iyo so wowaidon nu soujar mundii-dii ri nu, “Otoop ka insaadan lobuw bansa Ruum, ong dai po oukuman laid?” koo.

26Norongou-o po nu wowaidon nu soujar-i tinangar ni Paulus, miano yo sono iyo so wowaidon niyo ri om tongaro yo nu, “Oo tuan, adang-a lubakon iyo so' lobuw-a iyo nu Ruum kolaai,” koo.

27Miano yo wowaidon niyo iiri dii si Paulus om duato yo nu, “Bana ya ka nu bansa ko nu Ruum?” koo iyo.

“Oo,” koo si Paulus.

28Mutongaro yo wowaidon nu soujar oono nu, “Aku nga nourug-a nu bansa Ruum om osuang siin nokobarai ku,” koo.

Sumombuto yo si Paulus nu, “Nga aku yo po lobuw bana ya nu Ruum so' ino amo ku lobuw Ruum,” koo.

29Indadi iya ya iiri kiawi' soujar sinuu' mongolubak so si Paulus rinumawu' yo sono, om noilaan-o po nu wowaidon nu soujar-i nu lobuw-a nu Ruum si Paulus, linumaa' sono iyo, so' nokoponuu' yo iyo nu soujar mongkogos so si Paulus.

Si Paulus so Poomubisora'an nu Ugama

30Inimutig sobana nu wowaidon nu soujar nu Ruum iiri ong nokuro su sindoraayon si Paulus nu ongo lobuw Yaudi ri. Indadi susuab-i lobusi yo sono niyo si Paulus, om suuo yo niyo wowaidon nu imam om lobuw wokon so Poomubisora'an nu Ugama ri popuimpug, om owito yo sono si Paulus tumingkuang so nosiro.

Currently Selected:

Pinongoorapan 22: TomPWPgLgPn

Highlight

Copy