Pinongoorapan 10

Nopaabar si Pitrus nu Abar Owarong

so si Kurnilius

1Ido kusoi so Kaisaria, ngaran niyo si Kurnilius, wowaidon nu posukan nu soujar nu Ruum, ingoranan nu Posukan nu Italia. 2Iyo om anak sawo niyo sobana ko obinsuut nu oturan nu ugama om mongusaa' nu Kinoringan. Dadan iyo mogdu'a so Kinoringan om monabang nu lobuw Yaudi omiskin. 3Ido runat, kiro-kiro jaam tolu nu awi-awi, nokosorou sono iyo nu susuu'on nu Kinoringan linumoga' om minomaau so iyo nu, “Oo Kurnilius,” koo.

4Bontongi yo ni Kurnilius susuu'on iiri maid nu maa'-laa' om mongoduato yo nu, “Onu ka, tuan?” koo.

Sumombuto yo susuu'on-i nu, “Rinongou-o nu Kinoringan du'a mu ri om nosiowan-o Niyo poonabang mu nu lobuw omiskin, om ondomon ko Niyo. 5Indadi, ponuu' yo nu lobuw mian so Yupa monogina nu lobuw ingoranan so si Simun Pitrus. 6Minintoron iyo so waloi nu pookodat nu kulit, ngaran-o po si Simun. Waloi niyo no so imbing nu raat,” koo susuu'on-i so si Kurnilius. 7Nokolaiw susuu'on-i, paawo yo sono ni Kurnilius duo uripon niyo ri, om ido po soujar moongipat so iyo, iri poimaid so Kinoringan-i. 8Tuturani yo niyo tinangar nu susuu'on nu Kinoringan so iyo iiri, om suuo yo niyo tolu koyuwan oono mian so Yupa.

9Susuab-i, orani yo nosiro so Yupa, tinumimpak sono si Pitrus so taap nu waloi-i mogdu'a kiro-kiro tonga' runat. 10Minokiookan sono iyo so' witilon sobana, nga dai po noonsak ingkookan-i. Nokosorou sono iyo nu, 11minitas su langit om kumut olaab niuluw so riniba tu, mawid-tawid opat pupijuan-i, om 12so asuw nu kumut iiri, osuang ginis nu kulos-kulos opat akod, lulumoloi om bombolog#10:12: bombolog; intawa: pumpulu osiau. 13Norongou-o sono niyo Kinoringan mutangar nu, “Oo Pitrus, tungag-o, goraso yo ono, om okano yo sono,” koo.

14Sumombuto yo si Pitrus nu, “Dai, Tuhan. Dai po su insan mongokan nu osabul intawa osaim,” koo.

15Nga mutongaro po Kinoringan nu, “Kiawi' inurug nu Kinoringan, adang-o tokodon nu osaim,” koo. 16Intolu muuli'-uli' nosorou niyo iiri, om nopudik-o koimbagu kumut-i so langit.

17Sobana ko noiranan si Pitrus nu nosorou niyo iiri om laid niyo mongiro-kiro nu iri, nokologa' yo tolu koyuwan sinuu' ni Kurnilius so waloi ni Simun, om dii yo so pintu ri. 18Monoginaa yo nosiro ido koyuwan, om duato yo nu, “Kuwai ka lobuw minintoron tuui, ingoranan so si Simun Pitrus?” koo.

19Kakal po si Pitrus mongiro-kiro nu nosorou niyo iiri, mutongaro yo Atod nu Kinoringan so iyo nu, “Oo Pitrus, diumon ko nu tolu koyuwan. 20Untiba yo, om ikod-o kilaa' maid so nosiro. Aku yo su minonuu' so nosiro,” koo Atod nu Kinoringan-i. 21Muntibaa yo sono si Pitrus om mutongaro yo so kolobuwan-i nu, “Aku yo diumon muyu no. Onu ka tomod muyu?” koo.

22Sumobuto yo nosiro nu, “Sinuu' kai ni Kurnilius, iri wowaidon nu soujar-i mian tuui. Iyo yo po owarong om lumaa' nu Kinoringan, om orumaton iyo sobana nu lobuw Yaudi. Sinuu' iyo nu susuu'on nu Kinoringan poponogina so ikau ponumbaid nu du'a niyo ri. Sinuu' iyo mongorongou nu onu tongaron mu so iyo,” koo. 23Powoloyo po sono ni Pitrus nosiro dii.

Susuab-i momponowo yo nosiro. Tinu-tinu koyuwan, iri nopoimaid so Yupa ri nga minaid-a so nosiro. 24So koduo runat-i nokologa' yo nosiro so Kaisaria. Mongindad si Kurnilius om inonakan om kouna'an pinologa' niyo ri. 25Nokologa' yo po si Pitrus, sumomungo yo si Kurnilius so iyo om sumurukudo yo so tiningkuangon niyo ri. 26Nga mutongaro yo si Pitrus nu, “Undii yo! Aku nga lobuw-a kosuangan,” koo. 27Sambil ni Pitrus om ni Kurnilius mutangar-tangar om masuw so waloi-i, om nosiou niyo osuang lobuw noimpug. 28Mutongaro yo sono iyo so nosiro nu, “Oo su kosusulodan ku! Tantu nokoilo kou yo nu, lobuw-o po Yaudi pogoson nu ugama gumosayun intawa muupakat nu lobuw okon ko Yaudi. Nga minontuduk Kinoringan so aku, nu dai aku sono kowasa pokosaim intawa pokosabul nu isai-isai ya. 29Ono yo ko', dai aku ya nowogatan momikir nu sogina mu ri. Indadi, kosiono mokikoilo aku ong onu nipotomod mu so aku,” koo.

30Sumombuto yo si Kurnilius nu, “Kotoluan nokotalib-i kiro-kiro soko iya iitu no, minogdu'a aku so waloi tu nu jaam tolu nu awi-awi. Milok po su mundii-dii ido kusoi so tiningkuangon ku ri, kipokakas nu milap-kilap 31om minutangar so aku nu, ‘Oo Kurnilius, tinumbaid-o du'a mu ri nu Kinoringan, om pogokalan mu owarong-i nga ondomon-a Niyo. 32Indadi ponuu' yo nu lobuw mian so Yupa monogina so si Simun Pitrus. Minolak iyo so waloi nu pookodat nu kulit, ingoranan so si Simun. Waloi niyo ri so imbing nu raat,’ koo susuu'on-i. 33Ono yo ko', minonuu' aku nu lobuw monogina so ikau, om sobana ko minoingin ko ya mian tuui. Kosiono, minuimpug kai tuui so tiningkuangon nu Kinoringan, mongkinongou ong onu nisuu' Niyo so ikau potuturan so kai,” koo si Kurnilius.

Pontudukan ni Pitrus

34Tumimpuuno yo sono si Pitrus montuduk so nosiro nu, “Noilaan ku nai' nu ono sono tu nu dai ya mominig Kinoringan nu lobuw.#Pom 10:17 35Lobuw lumaa' so Iyo om momaal nu onu yo po owarong, torima'on-a Niyo pudi okon ko bansa Yaudi. 36Oo su kosusulodan ku! Noilaan muyu yo orati nu abar niloga' nu Kinoringan so lobuw Israil-i. Abar iiri Abar Owarong suat so kopusulutan ong poimaid so si Yisus Kristus, Tuhan nu kiawi' lobuw. 37Noilaan muyu yo noongourug so pilolongkop nu Yudia, iri tinumimpuun so Galilia, nu noopod si Yuanis mongaabar suat nu pongodiu'an. 38Noilaan-o nu lobuw suang nu si Yisus lobuw Najarit, pinili' nu Kinoringan, tinaakan nu Atod nu Kinoringan om kuasa. Om noilaan-o nu lobuw suang nu minanou-panou si Yisus so siombo-ombo ya, momaal nu owarong. Minomali' Iyo nu lobuw kinuasa nu Wowaidon nu Moinat, so' maid-waid Kinoringan so Iyo. 39Kai yo su nokosiou nu pinuwaal Niyo so wonuo nu lobuw Yaudi om so Yirusalim, nga nisalib om pinatoi-a Iyo nosiro. 40Nga so kotolu runat-i, linuli'an Iyo nu Kinoringan om minokisiou po Iyo so lobuw suang. 41Okon-a ko so kiawi' lobuw pinokisiowan Niyo, nga kai ya, iri pinili' yo nu Kinoringan nu gulu ri, nu pinokiimbonaan Niyo. Nokourung kai so Iyo mongokan om monginum, nu noluli'an Iyo kiat so kinopotoyan. 42Om sinuu' kai Niyo paabar nu Abar Owarong oono so lobuw suang, om pokoilo nu Iyo yo su pinangkat nu Kinoringan, mongukum nu lobuw miau po om minatoi-o. 43Kiawi' poo'abar nu Kinoringan gulu ri nokoputangar-o suat so Iyo. Minutangar nosiro nu isai yo po poimaid so si Yisus, ompunon-a koraayan nu kuasa ni Yisus,” koo si Pitrus.

Lobuw okon ko Yaudi kotorima' nu Atod

nu Kinoringan

44Laid ni Pitrus malak-galak-i, muntibaa yo sono Atod nu Kinoringan mogkuasa nu lobuw minongkinongou nu abar iiri. 45Noiranan sono lobuw Yaudi minaid so si Pitrus kiat so Yupa ri, nu nosiou nosiro nu nopotaak Kinoringan nu Atod Niyo so lobuw okon ko Yaudi, 46so' orongou nosiro ongo lobuw-i malak-galak nu ginis nu tinongaran, om mongorayou nu Kinoringan suat nu gogoma'on Niyo maayo. Mutongaro yo si Pitrus nu, 47“Siowi muyu, kolobuwan iitu nokoompit-o nu Atod nu Kinoringan soko toko. D'ado kopomogos so nosiro nu diu'on,” koo. 48Suuo yo sono ni Pitrus nosiro nu diu'on mongorait nu ngaran ni Yisus Kristus. Nopupus iri, owudi po nosiro si Pitrus nu popolakon po dii kotinu-tinuan.

Currently Selected:

Pinongoorapan 10: TomPWPgLgPn

Highlight

Copy