1 Kurintus 3

Moomugogoma'on suat so Kinoringan

1Oo su kosusulodan ku, iri inianan ku togna nai so kou ri, dai su kopokimutangar-tangar so kou nu soko poomutangar ku so lobuw kinuasa nu Atod nu Kinoringan. Ono yo su poomutangar ku so kou soko poomutangar ku so lobuw kakal-a miau maid nu koinginan nu lobuw dai poimaid, om so lobuw dai po opiot koimaidan so si Kristus. 2Iya iiri, onu ko po kopontuduk aku so kou nu oruoi oorotian, soko lolaing su atas po okanon. Dai su montuduk nu orogon oorotian so' dai kou po koorati. Nga ono su kosola'an, dai kou ya koorati sampai kosiono tu,#Ibr 5:12-13 3so' kakal kou ya kinuasa nu koinginan kondiri. Mokimalun om mokimualod kou. Indadi, koorotian kakal kou ya kinuasa nu koinginan kondiri soko lobuw dai po poimaid. 4Bang mutangar kou nu, “Maid aku so si Paulus,” om wokon mutangar nu, “Maid aku so si Apulus,” koo kou, orati kakal kou ya kinuasa nu koinginan muyu soko lobuw dai po poimaid.#1 Kur 1:12

5Ondomo muyu yo ong isai si Apulus, om isai aku. Muinong kai ya mugogoma'on suat so Kinoringan nopotolunda' so kou poimaid so si Kristus. Kai yo po mugogoma'on-a nu nipogama' nu Tuhan so kai. 6Aku yo su soko populo, om si Apulus soko monuntug nu sungoi, nga Kinoringan-o su potuu' nu ono.#P'rapan 18:4-11,24-28 7Nadi Kinoringan-o su oogot, so' Iyo yo su potuu'. Ono populo om monuntug nu sungoi-o dai ya oogot. 8Kiduo nu ono muinong-a, nu kaalap-a nu ponuli' kiat so Kinoringan musuat nu nisuu' Niyo pogama'.

9Kai yo su mutabang mugogoma'on so Kinoringan, om kou soko umo pugogoma'an Niyo. Om kou nga soko waloi ya nu Kinoringan. 10Maid nu koo'ilo nitaak nu Kinoringan so aku, aku yo su togna minontuduk so kou nu abar nu Kinoringan, soko moomuwaloi powansuk nu pasok, impuunon nu waloi. Om lobuw wokon sumundur montuduk so kou, soko lobuw moningompus momaal nu waloi oono. Isai-isai ya subai mongiro-kiro ong onu koo iyo montuduk, soko mongiro-kiro ong onu koo momaal nu waloi oono. 11So' notantu yo nu Kinoringan nu si Yisus Kristus-o su otoop soko pasok ponimpuunan nu waloi Niyo, om d'ado sondiang otoop kopongoganti' so Iyo. 12Kuwai ya lobuw moningompus momaal nu waloi oono momakai nu omas, pirok om watu boorogo, om kuwai ya momakai nu oruoi oompu' soko kayu, kutad, intawa raami. 13Kiawi' gogoma'on ido soido nu lobuw, osiou-a ong kologa' yo koimbagu si Kristus, so' bang oompu' yo, osiou sono ombo su otaan. Soko ono ya ong kologa'an ni Kristus, osiou sono ombo gogoma'on owarong om oraai. 14Bang dai ya oompu' waloi winaal niyo so pinoposokan oono, taakan moomuwaloi oono nu ponuli'. 15Nga bang oompu' waloi winaal niyo so pinoposokan oono, dai ya iyo insaadan nga ado ponuli' so iyo. Soko lobuw kolaiw so waloi noompu' nu d'ado owit-owit.

16Tantu oilaan muyu ya nu kou yo po soko waloi nu Kinoringan, om Atod Niyo no su mogkuasa nu kowiawan muyu.#1 Kur 6:19; 2 Kur 6:16 17Indadi isai yo po montuduk nu dai obana om kopongusiba' nu koimaidan nu lobuw, insaadan nu Kinoringan, so' waloi nu Kinoringan nga suat-a so Kinoringan, om kou yo su soko waloi oono.

18Adang-o musingakal suat so isai yo su oilo so kou. Isai so kou musingkoilo-ilo so ponokodan nu lobuw dai poimaid, owarong po ong momikir iyo nu ado oilo-ilaan niyo su' urugon iyo nu Kinoringan nu kikoilaan. 19So' onu yo po oilo so ponokodan nu lobuw dai poimaid, olowong-a so ponokodan nu Kinoringan. Soko iri nokosurat-o so Buuk nu Kinoringan nu, “Lobuw monokod nu oilo nosiro, burunsuton nu Kinoringan nu koilaan nosiro oono,” koo ri.#Ayb 5:13 20Nokosurat-a nu soko itu nu, “Oilaan nu TUHAN nu d'ado ya orati nu pomikiran nu lobuw oilo,” koo ri.#Lgu 94:11 21Pagka soko ono, adang-o mongondos nu gogoma'on nu lobuw, so' onu yo po nokotaak-o nu Kinoringan ourug nu songapan muyu. 22Kiawi' osongapan muyu, ono yo aku, si Apulus, si Pitrus, wonuo tu, kowiawan om kopotoyan, iya nu ono sono tu, om so sunduron tu. 23Om kou yo po songapan ni Kristus, om si Kristus songapan nu Kinoringan.

Currently Selected:

1 Kurintus 3: TomPWPgLgPn

Highlight

Copy