1 Kurintus 16
16
Siin ponabang nu puimpugan so Yudia
1Indadi, itu yo su nisambut ku so kou nu duduat muyu ong onu koo mongorukut nu siin ponabang nu lobuw wokon songapan nu Kinoringan so Yudia, ono yo bang mongorukut kou nu siin ponabang nu inong poimaid, waido muyu ya iri nokotuduk ku yo so puimpugan so Galatia ri.#Rm 15:25-26 2Ono yo, koduung Runat Pongintoronan potou' kou laid nu siin ontob nu odapat-dapat ponabang muyu nu wokon musingkologa' ku, su' dai yo muru' po mongimpug ong kologa' aku. 3Kologa' aku yo, monuu' aku ya nu kolobuwan nopili' muyu yo laid paapit nu siin oono so bandar Yirusalim, om poowitan ku po nosiro nu surat ponondu'an nu lobuw dii. 4Om bang opikir ku nu kuwai opatut tomodon ku so Yirusalim, potundanon ku ya nosiro so aku.
Padu-padu ni Paulus
5Ondaa'on ku ya kou ong opupus aku yo lumongkop so Makadunia so' notapus ku yo nu kotalib aku dii.#P'rapan 19:21 6Kalu olaid-laid aku mogol nai so kou musingkotalib nu kodarun, su' otobangan muyu aku nu kolombus-lombusan ku. 7Dai su moingin ong sontagal aku ya nai so kou. Bang lila' nu Tuhan, olaid-laid aku ya mogol nai so kou.
8Tuui-tuui aku so bandar Ipisus nu ono sono tu musingkotalib nu Rami-Rami Pintakusta,#Ot 23:15-21; Pom 16:9-11 9so' osuang po lobuw mokirorongou nu tinongaran nu Kinoringan pudi osuang-a lobuw poingkoyod so aku potuturan nu ono.#P'rapan 19:8-10
10Bang kologa' si Timutius, torimaa muyu yo iyo nu owarong su' ososonangan iyo mido so kou, so' iyo nga soko aku ya nu mugogoma'on suat so Tuhan Yisus.#1 Kur 4:17 11Indadi, umarap aku nu d'ado ya so kou pobaba' so iyo, nga tobangi muyu yo iyo nu kopululi'-luli'an niyo tuui so aku nu osanang, so' mongimat aku ya nu kologa' iyo maid nu kosusulodan toko wokon.
12Suat so sulod toko si Apulus, obulit aku yo mindamo so iyo nu powaidon so kosusulodan wokon mian nai so kou, nga dai po moingin iyo mian nu ono sono tu. Bang kikosiwatan, kalu mian-a iyo.
Pongoowi'an nu surat
13Koingat-ingato muyu yo om totog kou yo poimaid so si Kristus. Adang lumaa' om adang musimaid kuosaan nu koraayan. 14Onu yo po waalon muyu, waalo muyu yo maid nu musosamod.
15Tantu otondu'an muyu ya no Stipanus sompungu. Nosiro yo su togna nopoimaid so si Kristus tuui so Akaya. Mogkari'-kari' nosiro monabang nu lobuw songapan nu Kinoringan.#1 Kur 1:16 16Mindamo aku sobana so kou nu mongowaid kou nu pontudukan nu lobuw soko iyo om lobuw wokon mugogoma'on maid so iyo.
17Osudu'an aku nu nokologa' si Stipanus, si Purtunatus om si Akaikus. Pagka sobana ko oimpong aku so kou, kinologa'an nosiro soko kou ya su linumoga' tuui so aku. 18Sobana ko nokoponginsudu' nosiro so aku om so kou. Otoop ong orumaton kolobuwan soko ono.
19Lobuw poimaid tuui so Asia pokodau so kou. Si Akwila om si Priskila om lobuw muimpug so waloi nosiro nga pokodau so kou.#P'rapan 18:2 20Kiawi' kosulodan tuui pokodau so kou.
Pusosalam-salam kou yo ponondu'an nu musosamod kou inong koimaidan so si Yisus Kristus. 21Aku nga pokodau-a so kou, om aku kondiri minonurat nu itu.
Kodau kiat so aku, Paulus. 22Isai obisig nu Tuhan Yisus, ukumon nu Kinoringan. Maranata, ono yo “Loga' yo Tuhan Yisus”.
23Muda-mudaan ong borokatan kou ya ni Tuhan Yisus.
24Osamod aku so kou kiawi' nu kopuido yo dii si Yisus Kristus.
Currently Selected:
1 Kurintus 16: TomPWPgLgPn
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
