1 Kurintus 14

Pontudukan suat so ponaak

nu Atod nu Kinoringan

1Ono yo ko', pogkari'-kari' kou yo monamod nu lobuw wokon. Om iya ya nu ono mindamo kou yo so Kinoringan nu ongo ponaak nu Atod nu Kinoringan, labi po ponaak suat so koilaan polombus nu pontudukan nu Kinoringan. 2Iri yo po lobuw moilo mutangar nu musosondiang totongaron, okon-a ko mokimutangar-tangar so inong lobuw, nga so Kinoringan-a. D'ado koorati nu totongaron niyo, so' Atod-o nu Kinoringan su poputangar nu Kinoringan-a su koorati. 3Nga iri yo po lobuw oilo polombus nu nituduk nu Kinoringan, lobuw-a su tongaron, su' popiot nu koimaidan nu lobuw, mongobiat, om monginsosamod nu lobuw kikoogutan. 4Iri yo po lobuw mutangar nu musosondiang totongaron, ontob-a nu popiot nu koimaidan niyo kondiri, nga iri lobuw polombus nu abar kiat so Kinoringan, popiot nu koimaidan nu kiawi' lobuw so puimpugan.

5Owarong maam nu kiawi' so kou moilo mutangar nu musosondiang totongaron, nga owarong po ong oilo kou polombus nu tinongaran nu Kinoringan. Lobuw polombus nu tinongaran nu Kinoringan, kikosudaan po ko' lobuw oilo mutangar nu musosondiang totongaron. Owarong-a musosondiang totongaron oono ong kuwai lobuw so puimpugan oilo poorati no, su' kopiot nu koimaidan nu lobuw so puimpugan oono. 6Oo su kosusulodan ku, bang lumoga' aku nai so kou om mutangar nu musosondiang totongaron, d'ado ya muad orati nu ono so kou. Owarong po potuturan aku nu onu yo po niintolang nu Kinoringan so aku, intawa potuturan nu koilaan, potuturan nu kodau kiat so Iyo, intawa potuduk nu kodau oono.

7Itu yo poinongan nu owarong pokayon suat so musosondiang totongaron dai oorotian nu lobuw, ono yo pikiro muyu kokaion nu d'ado inawo soko suling intawa kosapi. Bang dai ya osuat gama' popukai nu ono, dai ya oilaan nu lobuw ong onu nu lagu logu'on nu kokaion oono. 8Ido po poinongan wokon, ono yo bang popukaion-a tomod surumpit, tantu d'ado ya soujar murigap-rigap mian mutuda'. 9Soko ono ya pudi kou, bang mutangar kou nu musosondiang totongaron dai oorotian, d'ado ya kosudaan, soko uos-a tumalib so tolingo. 10Osuang tinongaran musosondiang so wonuo tu, om kiawi' nu ono kiorati. 11Nga bang dai ku oorotian totongaron nu ido koyuwan, soko okon ko muinong kai nu bansa. 12Suat so kou kondiri, oilaan ku nu sobana ko otigi' kou nu ponaak nu Atod nu Kinoringan, nga owarong po kaalap kou nu ponaak popiot nu koimaidan nu kiawi' puimpugan.

13Ono yo ko', lobuw oilo mutangar nu musosondiang totongaron subai mindamo so Kinoringan nu koilaan poorati nu ono. 14Bang mogdu'a aku momakai nu musosondiang totongaron om dai su koorati, inawo aku no ya su mogdu'a, okon ko maid nu pomikiran. 15Nadi, bang mogdu'a aku, soko itu gama' ku, ono yo mogdu'a aku so inawo ku no, nga pomikiran ku no maid-a mogdu'a. Mulagu aku so inawo ku no, nga pomikiran ku maid-a mulagu. 16Owarong ong waalon toko soko ono, so' bang inawo toko no ya su' mongunsopot so Kinoringan, om lobuw wokon dai koorati nu musosondiang totongaron toko nitaak nu Atod nu Kinoringan oono, dai kotaayun lobuw oono nu du'a pongunsopotan toko oono, so' dai oorotian niyo. 17Owarong pona du'a pongunsopotan mu so Tuhan oono, nga d'ado ya muad orati so lobuw.

18Mongunsopot aku so Kinoringan so' koputangar aku nu musosondiang totongaron kaalib po ko' kou. 19Nga, bang so puimpugan nu lobuw poimaid, todi'on ku po mutangar limo ya mutingkalos oorotian nu lobuw wokon, ko' mutangar nu boribu-ribu mutingkalos nu musosondiang totongaron, su' kopontuduk aku nu lobuw.

20Oo su kosulodan ku, adang-o momikir nu soko pikiran nu lolaing po. Otoop nai' ong soko lolaing kou suat nu koraayan nga bang so pomikiran, otoop ong soko lobuw nosukod-o.

21Nokosurat-o so Buuk nu Kinoringan nu tinangar Niyo nu,

“Monuu' Aku

nu lobuw bansa wokon

poputangar so lobuw songapan Ku

nu sondiang tangar,

nga dai ya mongkinongou nosiro nu totongaron Ku,”

koo ri.#Yis 28:11-12 22Nadi bang soko ono, ono yo po ponaak poputangar nu musosondiang totongaron nga ponondu'an nu kuasa nu Kinoringan niintolang so lobuw dai poimaid, okon ko so lobuw poimaid. Nga, ono yo po ponaak potuturan nu pontudukan nu Kinoringan so inawo, ono yo su ponondu'an nu kuasa nu Kinoringan so lobuw poimaid, okon ko so lobuw dai poimaid.

23Indadi, bang muimpug kou lobuw poimaid, om kiawi' so kou nga mutangar nu musosondiang totongaron, om lumoga' sono lobuw dai poimaid, intawa lobuw dai po koorati, tantu pokoulowon kou nosiro. 24Nga bang kiawi' so kou potuturan nu abar kiat so Kinoringan, om lumoga' lobuw dai poimaid intawa lobuw dai po koorati, oorotian sono niyo kiawi' pinutangar muyu iiri om oilaan niyo nu kikoraayan iyo. 25Om koraayan so pomikiran niyo nga kointolang, om musimbaba' sono iyo mongusaa' nu Kinoringan, om polongkop paabar nu bana-bana ya nu maid-waid Kinoringan so kou.

Kogoyaan owarong so puimpugan

26Oo su kosusulodan, orati yo po nu ono, bang muimpug kou mongusaa' nu Tuhan, kuwai mulagu, kuwai montuduk, kuwai polombus nu onu yo po kiat so Kinoringan, kuwai ya mutangar nu musosondiang totongaron, om kuwai ya potarang nu orati nu tinangar oono. Nga waalo muyu yo kiawi' oono popiot nu puimpugan nu lobuw poimaid. 27Bang mokipuputangar ido koyuwan nu musosondiang totongaron, subai duo intawa tolu ya koyuwan om mususulang, om ido koyuwan poorati nu ono. 28Nga bang d'ado ya ido moilo poorati nu ono, gaam nai' modog-a lobuw oono, om tongaron-a niyo so inawo. 29Bang duo intawa tolu koyuwan polombus nu tinongaran kiat so Kinoringan, lobuw wokon subai momikir nu obana ya ka ko' owudut tinangar oono. 30Nga bang ido koyuwan pointolangan nu Kinoringan nu abar Niyo, lobuw mosaan mutangar oono subai mingkoyod mutangar. 31Bang soko ono gama' muyu, ido soido so kou nga koponuturan nu abar kiat so Kinoringan, su' kiawi' otudukan om rumuang koimaidan. 32Iri lobuw kiponaak nu Atod nu Kinoringan potuturan nu abar kiat so Kinoringan, subai kokodos iyo mingkoyod mutangar om kokodos sumundur mutangar, 33so' dai moingin Kinoringan musasak mutangar so puimpugan, sondiang ko mususulang.

Soko koopotan so kiawi' puimpugan, 34subai modog-odog kowoinoyan. Dai lila'an nosiro mutangar. Mongowaid nu Ukum ni Musa, dai kowasa nosiro sumiliw nu wowaidon. 35Bang moingin nosiro koilo nu onu-onu ya, duaton-a ono nosiro so sawo nosiro ong kouli' yo. Sobana ko dai otoop ong woinoi mutangar so puimpugan.

36Ponontaman muyu gaam ong kou yo su inungkiaton nu tinongaran nu Kinoringan, om kou ya su potuturanan nu tinongaran Niyo, nga okon-a. 37Bang koirasa ido koyuwan nu kiponaak iyo nu koo'ilo polombus nu abar kiat so Kinoringan, intawa ponaak wokon nu Atod nu Kinoringan, orotion-o nu lobuw oono nu onu yo po sinurat ku iitu no suu' nu Tuhan. 38Nga bang dai iyo mongkinongou nu tinangar ku iitu, kodi muyu yo rongowo iyo.

39Oo su kosusulodan ku, ono yo ko' pogkari'-kari' kou yo polombus nu tinongaran nu Kinoringan, nga adang-o momogos nu lobuw mokipuputangar nu musosondiang totongaron. 40Opatut nu waidon muyu kowarong-warong kiawi' tinangar ku oono, om waalo muyu yo kiawi' nu otoop, om ousai sombiya-biya ya muimpug kou.

Currently Selected:

1 Kurintus 14: TomPWPgLgPn

Highlight

Copy