ಯೋಹಾನ 18
18
ಯೇಸುನ ಧರ‍್ಯೂತೆ ಬಾರೇಮ
(ಮತ್ತಾಯ 26:47-56; ಮಾರ್ಕ 14:43-50; ಲೂಕ 22:47-53)
1ಆ ಪ್ರಾರ್ಥನೆ ಕರಾನ ಬಾದ್‌ಮ, ಯೇಸು ಇನ ಶಿಷ್ಯರ್‌ನ ಜೋ಼ಡೆ ಕೆದ್ರೋನ್‌ ವ್ಹೇಕ್ಳಾನ ಪಾರ್ ಚ಼ಲೆಗಯೊ. ಹಿಜ್ಜಾ಼ ಏಕ್‌ ಭಾಗ್‌ ಥೂ, ಯೇಸುಬಿ ಇನ ಶಿಷ್ಯರ್‌ ಇನಾಮಹಿ ಗಯ. 2ಯೇಸುನ ಧೋಕೊ ದಿದೋತೆ ಯೂದನಾಬಿ ಯೋ ಝ಼ಗೊ ಮಾಲುಮ್‌ಥು. ಶನಕತೊ ಯೇಸು ಘಣಿ ಹಲ್ಲ ಇನ ಶಿಷ್ಯರ್‌ನ ಹಿಜ್ಜಾ಼ಸ್ ಮಳ್ಯೋಥೊ. 3ತದೆ ಯೂದನೆ ಶಿಪಾಯ್ನಿ ಏಕ್‌ ಝೂ಼ಂಡ್‌ನ, ಮಹಾಯಾಜಕರ್‌ ಅಜು಼ ಫರಿಸಾಯರ್‌ನೆ ಮೋಕ್‌ಲ್ಯುತೆ ಮಂದಿರ್‌ನು ಥೋಡ ಕಾವ್ಲಿ ಕರಾವಾಳಾನ ಜೋ಼ಡ್ಮ ಬುಲೈಲಿನ್ ಆಗ್ನು ಢಿಟಂಬು ಅಜು಼ ಕಫ್ಫನ್‌ಅಖ್ಖು ಧರಿಲೀನ್, ಬಾಗ್‌ನ ಮಹಿ ಆಯೊ. 4ಇನಜೋ಼ಡೆ ಚಾ಼ಲ್‌ಶೇತೆ ಖ್ಹಾರುಸ್‌ ಯೇಸುನ ಮಾಲುಮ್‌ ಥೂ, ಇನಖ್ಹಾಜೆ ಯೋ ಖ್ಹಾಮ್ಣೆ ಜೈ಼ನ್‌, “ತುಮೆ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ.
5ಇವ್ಣೆ, “ನಜ಼ರೇತ್‌ನೊ ಯೇಸುಕಿಶು” ಕರಿ ಬೋಲ್ಯು.
ತದೆ ಯೇಸುನೆ, “ಮೇಸ್ ಯೋ” ಕರಿ ಜವಾಬ್‌ ದಿದು.
ಯೇಸುನ ಧೋಕೊ ದಿದೋತೆ ಯೂದಬಿ ಇವ್ಣಿ ಜೋ಼ಡೆ ಹಿಜ್ಜಾ಼ಸ್ ಭೀರ‍್ಯೋಥೊ. 6ಯೇಸುನೆ ಇವ್ಣುನ, “ಮೇಸ್ ಯೋ” ಕರಿ ಬೋಲ್ಯೊ. ತದೆ ಇವ್ಣೆ ಪೀಠೆ ಖ್ಹರ್ಕಿನ್‌, ಜ಼ಮೀನ್‌ಪರ್ ಪಡಿಗಯು. 7ಪಾಛೊ಼ ಯೇಸುನೆ ಇವ್ಣುನ, “ತುಮೆ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ.
ಇವ್ಣೆ, “ನಜ಼ರೇತ್‌ನೊ ಯೇಸುನ” ಕರಿ ಬೋಲ್ಯು.
8ತದೆ ಯೇಸುನೆ, “ಮೇಸ್ ಯೋ ಕರಿ ಅಗಾಡಿಸ್ ತುಮೂನ ಬೋಲ್ಯೋನಿ. ತುಮೆ ಮನಾಸ್ ಢೂಂಡುಕರ‍್ತಾ ಉಶೇತೊ, ಅವ್ಣುನ ಜಾ಼ವಾನ ಮ್ಹೇಲೊ” ಕರಿ ಬೋಲ್ಯೊ. 9ಇನಖ್ಹಾಜೆ ಬೋಲ್ಯೊ, “ಬಾ, ತುನೆ ಮನ ದಿದೋತೆ ಇವ್ಣಾಮ ಏಕ್‌ನಾಬಿ ಮೇ ಗುಮೈಲಿದೊಕೊಯ್ನಿ” ಕರಿ ಇನೆ ಬೋಲ್ಯೊಥೋತೆ ವಾತೆ ಅಮ್ ಪೂರಹುಯು.
10ಸೀಮೋನ್‌ ಪೇತ್ರಕನ ಏಕ್‌ ತಲ್ವಾರ್‌ ಥೀ, ತದೆ ಇನೆ ತಲ್ವಾರ್‌ನ ಕಾಡೀನ್‌, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನು ಖಾವೊ ಕಾನ್ನ ಕತ್ರಿನಾಖ್ಯೊ. ಯೋ ಆಳ್‌ನು ನಾಮ್ ‘ಮಾಲ್ಕ’ ಕರಿ. 11ತದೆ ಯೇಸುನೆ ಪೇತ್ರನ, “ತಾರಿ ತಲ್ವಾರ್‌ನ ಕಷ್‌ಬಂದ್‌ನಿ ಚ಼ಂಚಿಮ ಪಾಛು಼ ಘಾಲ್‌; ತೂ ಸೋಚಕೊಯ್ನಿಕಿ ಶು? ಮಾರ ಬಾನೆ ಮನ ದಿದೋತೆ ಕಟೋರಿಮ ಮೇ ನಾ ಪೀಣು ಕರಿ” ಬೋಲ್ಯೊ.
ಅನ್ನನ ಖ್ಹಾಮ್ಣೆ ಯೇಸುನ ಲಾಯುತೆ
12ಅನಕೇಡೆಥು ರೋಮ್‍ನು ಶಿಪಾಯಿಖ್ಹಾರುಬಿ ಹಜಾ಼ರ್‌ ಶಿಪಾಯಿನೊ ಮೋಟೊಬಿ ಅಜು಼ ಯೆಹೂದ್ಯರ್‌ನ ಕಾವ್ಲಿ ಕರಾವಾಳು ಯೇಸುನ ಧರೀನ್ ಭಾಂದ್ಯು, 13ಇವ್ಣೆಪಹಿಲೆ ಅನ್ನಕನ ಬುಲೈಲಿಗಯು. ಆ ಅನ್ನ ಯೋ ವರಖ್ಹ್‌ಮ ಗಲ್‌ಢೊಯಾಜಕ್‌ ಹುಯಿರ‍್ಹೊಥೋತೆ ಕಾಯಫಾನೊ ಮಾಮ. 14ಆ ಕಾಯಫಾನೇಸ್, ‘ಏಕ್‌ ಅದ್ಮಿ ತಮಾಮ್‌ ಅದ್ಮಿನಖ್ಹಾಜೆ ಮರ್‌ವಾನುಸ್‌ ಅಛ್ಛು಼’ ಕರಿ ಯೆಹೂದ್ಯರ್‌ನ ಬೋಲಿದಿದೋತೆ.
ಪೇತ್ರನೆ ಯೇಸುನ ಝಿಟ್ಕಾರ‍್ಯೊತೆ
(ಮತ್ತಾಯ 26:69,70; ಮಾರ್ಕ 14:66-68; ಲೂಕ 22:55-57)
15ಸೀಮೋನ್‌ ಪೇತ್ರ ಅಜು಼ ಶಿಷ್ಯರ್‌ಮ ಬಿಜೇಕ್‌ ಜ಼ಣೊ ಯೇಸುನ ಪೀಠೆ ಗಯೊ. ಯೋ ಬಿಜ್ಜೇಕ್‌ ಶಿಷ್ಯನ ಗಲ್‌ಢೊ ಯಾಜಕ್‌ ಅಛ್ಛಿಂತರ ಮಾಲುಮ್‌ ಥೂ. ಇನಖ್ಹಾಜೆ ಯೋ ಶಿಷ್ಯನೆ ಯೇಸುನ ಜೋ಼ಡೆ ಮಹಾಯಾಜಕ್‌ನು ಘರ್‌ನ ಖ್ಹಾಮ್ಣೇನಿ ಝ಼ಗೋಮ ಗಯೊ. 16ಕತೋಬಿ ಪೇತ್ರ ಭಾರ್‌ ಬಾಕಲ್‍ಕನ ಟಿವೈರ‍್ಹೋಥೊ. ಮಹಾಯಾಜಕ್‌ನ ಮಾಲುಮ್‍ಥೋತೆ ಬಿಜ್ಜೇಕ್‌ ಶಿಷ್ಯನೆ ಪಾಛೊ಼ ಭಾರ್‌ಐನ್‌, ಬಾಕಲ್‍ಕನ ಕಾವ್ಲಿ ಕರಾವಾಳಿನ ಜೋ಼ಡೆ ವಾತೆ ಬೋಲಿನ್, ಪೇತ್ರಾನ ಮಹಿ ಬುಲೈಲಿಗಯೊ. 17ತದೆ ಬಾಕಲ್‌ ಕಾವ್ಲಿ ಕರಾವಾಳಿ ಆಳ್‌ನೆ, “ತೂಬಿ ಯೋ ಅದ್ಮಿನೊ ಶಿಷ್ಯರ್‌ಮ ಏಕ್‌ ಜ಼ಣೊ ಕಾಹೆಕಿ ಶು?” ಕರಿ ಬೋಲಿ.
ತದೆ ಪೇತ್ರನೆ, “ಕಾಹೆ ಮೇ ಕಾಹೆ” ಕರಿ ಬೋಲ್ಯೊ.
18ತದೆ ಠಣ್‌ ಥೀತೆ ಇನಾಖ್ಹಾಜೆ ಆಳ್‌ಖ್ಹಾರು ಅಜು಼ ಕಾವ್ಲಿ ಕರಾವಾಳು ಕೋಲ್‌ಖ್ಹಾಥಿ ಆಗ್ ಕರೀನ್, ಭೀರಿನ್‌ ಶೇಕುಕರ್ತುಥು, ಪೇತ್ರಬಿ ಜೈ಼ನ್‌, ಇವ್ಣಿ ಜೋ಼ಡೆ ಭೀರಿಗಯೊ.
ಗಲ್‌ಢೊ ಯಾಜಕ್‌ನೆ ಯೇಸುನ ಫುಛಾ಼ಯೋತೆ
(ಮತ್ತಾಯ 26:59-66; ಮಾರ್ಕ 14:55-64; ಲೂಕ 22:66-71)
19ಗಲ್‌ಢಯಾಜಕ್‌ನೆ ಯೇಸುನ ಇನ ಶಿಷ್ಯರ್‌ನಿ ಬಾರೇಮ ಅಜು಼ ಇನೆ ಬೋಲಿವತಾಳ್ಯೋತೆ ಬಾರೇಮ ಫುಛಾ಼ಯೊ. 20ತದೆ ಯೇಸುನೆ, “ಮೇ ಕದೇಬಿ ಜಗತ್ನ ಖ್ಹಾಮ್ಣೆಸ್ ವಾತೆ ಬೋಲಿರಾಖ್ಯೊಸ್; ಯೆಹೂದ್ಯ ಅದ್ಮಿಖ್ಹಾರು ಎಕ್ಟು ಹುಯಿನ್ ಆವಸ್ತೆ ಸಭೆ ಭರಾವನು ಮಂದಿರ್‌ಮ ಅಜು಼ ಮೋಟಿ ಮಂದಿರ್‌ಮ ಮೇ ಕದೇಬಿ ಬೋಲಿವತಾಳ್‌ತೊ ಆಯೊ, ಮೇ ಲಪೀನ್ ಕದೇಬಿ ಶಾತ್ಬಿ ಕೋ ಬೋಲಿರಾಖ್ಯೊನಿ. 21ಅಮ್ ರ‍್ಹವಾಪರ್, ಮನ ಶನ ಪುಛಾ಼ವಸ್ತೆ? ಮೇ ಶಶ್ಶಾತ್ ಬೋಲಿರಾಖ್ಯೊಸ್ ಕರಿ ಇನ ಖ್ಹಮ್‌ಜ್ಯೂತೆ ಅದ್ಮಿನ ಪುಛಾ಼ವೊ; ಮೇ ಬೋಲ್ಯೊತೆ ಇವ್ಣುನ ಮಾಲುಮ್‌” ಕರಿ ಬೋಲ್ಯೊ.
22ಯೇಸುನೆ ಆ ವಾತೆ ಬೋಲ್ಯೋತೆ ತದೆ, ಇನ ಖನ್ನೆ ಭೀರ‍್ಯುಥೂತೆ ಕಾವ್ಲಿ ಕರಾವಾಳಾಮ ಏಕ್ಜ಼ಣಾನೆ ಯೇಸುನ ಕಲ್ಲಪರ್ ಮಾರಿನ್, “ಮಹಾಯಾಜಕನ ಜೋ಼ಡೆ ಅಮ್ ವಾತೆ ಬೋಲಸ್ಕಿಶು? ತುನ ಕೆತ್ರೆ ದಮ್‌” ಕರಿ ಬೋಲ್ಯು.
23ಯೇಸುನೆ ಇನ, “ಮೇ ಶಾತ್‌ತೋಬಿ ಗಲತ್‌ ಬೋಲ್ಯೊ ಉಶೇತೊ, ಯೋ ಗಲತ್‌ನಿ ಬಾರೇಮ ಸಾಕ್ಷಿ ದೇ; ಕತೋಬಿ ಮೇ ಬೋಲ್ಯೋತೆ ಬರಾಬರ್‌ ಉಶೇತೊ, ತೂ ಮನ ಶನ ಮಾರಸ್?” ಕರಿ ಬೋಲ್ಯೊ.
24ತದೆ ಅನ್ನನೆ ಯೋ ಕಿಮ್ ಭಂದ್ಯೊಥೋಕಿ ಇಮ್ಮಸ್, ಗಲ್‌ಢೊಯಾಜಕ್‌ ಕಾಯಫಕನ ಇನ ಮೋಕ್‌ಲ್ಯೊ.
ಪೇತ್ರನೆ ಪಾಛೊ಼ ಯೇಸುನ ಝಿಟ್ಕಾರ‍್ಯೊತೆ
(ಮತ್ತಾಯ 26:71-75; ಮಾರ್ಕ 14:69-72; ಲೂಕ 22:58-62)
25ಸೀಮೋನ್‌ ಪೇತ್ರ ಬಿಜೂ಼ಬಿ ಇಮ್ಮಸ್ ಹಿಜ್ಜಾ಼ ಭೀರಿನ್‌, ಆಗ್ ಶೇಕುಕರ್‌ತೋಥೊ. ತದೆ ಹಿಜ್ಜಾ಼ ಥೂತೆ ಇವ್ಣೆ ಇನ, “ತೂಬಿ ಯೋ ಅದ್ಮಿನೊ ಶಿಷ್ಯರ್‌ಮ ಏಕ್‍ಜ಼ಣೊ ಕಾಹೆಕಿ ಶು?” ಕರಿ ಪುಛಾ಼ಯು.
ಕತೋಬಿ ಪೇತ್ರನೆ, “ಕಾಹೆ, ಮೇ ಕಾಹೆ” ಕರಿ ಬೋಲ್ಯೊ.
26ಗಲ್‌ಢಯಾಜಕ್‌ನೊ ಆಳ್‌ಮ, ಪೇತ್ರನೆ ಕಾನ್‌ ಕತ್ರಿನಾಖ್ಯೊಥೋತೆ ಇನ ಖನ್ನೆವಾಳಮ ಏಕ್ಜ಼ಣಾನೆ, “ಮೇ ತುನ ಬಾಗ್‌ಮ ಇನಜೋ಼ಡೆ ದೇಖ್ಯೋನಿ?” ಕರಿ ಬೋಲ್ಯೊ.
27ಪಾಛೊ಼ ಪೇತ್ರನೆ, “ಕಾಹೆ” ಕರಿ ಬೋಲ್ಯೊ. ತದ್‌ನು-ತದೇಸ್‌ ಮುರ್‌ಗೊ ಬಾಂಗ್‌ ದಿದೊ.
ಯೇಸುನ ಪಿಲಾತನ ಖ್ಹಾಮ್ಣೆ ಲಾಯುತೆ
(ಮತ್ತಾಯ 27:1-2,11-14; ಮಾರ್ಕ 15:1-5; ಲೂಕ 23:1-5)
28ಅನಕೇಡೆಥು ಇವ್ಣೆ ಯೇಸುನ ಕಾಯಫನ ಘರ್ ಕಂಥು ರಾಜ್ಯಪಾಲ್‌ನು ಮಹೇಲ್‌ನ ಬುಲೈಲಿಗಯು. ಯೆಹೂದ್ಯರ್‌ವಾಳನೆ ಇವ್ಣುನ ಮೈಲಾಪ್‍ ಹುಯಿನ್ ಪಸ್ಕನು ಖಾಣು ಖಾವಾನ ಅಡ್ಡಿಉಶೆಕರಿ ಮಹಾಲ್‌ನ ಮಹಿ ಕೋ ಗಯೂನಿ. 29ಇನಖ್ಹಾಜೆ ಪಿಲಾತ ಭಾರ್‌ ಇವ್ಣಾಕನ ಜೈ಼ನ್‌, “ಆ ಅದ್ಮಿಪರ್ ತುಮೆ ಶಾತ್‌ ಗಲತ್‌ ಲಾಗಡೋಸ್?” ಕರಿ ಇವ್ಣ ಪುಛಾ಼ಯು.
30ತದೆ ಇವ್ಣೆಬೊಲ್ಯು, “ಆ ಗಲತ್‌ ನಾಕರ‍್ಯೊಹೋತ್ತೊ, ಹಮೆ ಅನ ತಾರಕನ ಶನ ಲಾಯಹೋತ್‌?” ಕರಿ ಜವಾಬ್‌ ದಿದು.
31ಪಿಲಾತನೆ ಇವ್ಣುನ, “ಇಮ್‍ಕತೊ, ತುಮೇಸ್ ಅನ ಲೀಜೈ಼ನ್, ತುಮಾರಿ ಧರ್ಮಶಾಸ್ತ್ರನಿಘೊಣಿ ತೀರ್ಪ್‌ ಕರೊ” ಕರಿ ಬೋಲ್ಯೊ.
ತದೆ ಯೆಹೂದ್ಯರ್‌ನೆ, “ಕಿನಾಬಿ ಮರಣ್ ದಂಡ್‌ ದ್ಯವಾನಿ ಹಕ್‌ ಹಮೂನ ಕೊಯ್ನಿ” ಕರಿ ಫರೈನ್ ಬೋಲ್ಯು. 32ಯೇಸುನೆ, ಮೇ ಕಿಮ್ಕಿ ಮೋತ್‌ಮ ಮರಿಶ್‌’ ಕರಿ ಬೋಲ್ಯೊಥೋತೆ ವಾತೆ ಅಮ್ ಪೂರಹುಯಿಗಿ
33ಅನಕೇಡೆಥು ಪಿಲಾತನೆ ಪಾಛೊ಼ಫರಿ ಮಹೇಲ್‌ಮ ಜೈ಼ನ್‌, ಯೇಸುನ ಬುಲೈನ್, “ತೂ ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಇನ ಪುಛಾ಼ಯೊ.
34ಯೇಸುನೆ, “ಆ ತಾರೇಥಿ ತೂಸ್ ಪುಛಾ಼ವ್‌ ಕರಾಸ್ಕಿ, ನತರ್‌ಕಿ ಮಾರಿ ಬಾರೇಮ ಬಿಜಾ಼ನೆ ತುನ ಬೋಲ್ಯುತೆ?” ಕರಿ ಬೋಲ್ಯೊ.
35ತದೆ ಪಿಲಾತನೆ ಬೋಲ್ಯೊ, “ಮೇ ಯೆಹೂದ್ಯ ಕಿಶು? ತಾರು ಶೊಂತ್‌ ಅದ್ಮಿ ಅಜು಼ ಮಹಾಯಾಜಕರ‍್ನೆ ತುನ ಮಾರ ಹಾತ್‌ಮ ದೀರಾಖ್ಯೊಸ್. ತುನೆ ಶಾತ್‌ಕರ‍್ಯೊ?” ಕರಿ ಪುಛಾ಼ಯೊ.
36ಯೇಸುನೆ ಇನ, “ಮಾರಿ ರಾಜ಼್ ಆ ಜಗತ್‌ನು ಕಾಹೆ; ಮಾರಿ ರಾಜ್ಯ ಆ ಜಗತ್‌ನು ಹುಯಿರ‍್ಹೊಹೋತ್ತೊ, ಮೇ ಯೆಹೂದ್ಯರ್‌ನ ಹಾತ್‌ಮ ಮಳ್ಣುನಾತೆ ಇಮ್‌ ಮಾರು ಸೇವಕ್‌ಖ್ಹಾರು ಖ್ಹಾರು ಲಡ್ಯುಹೋತ್‌, ಕತೋಬಿ ಮಾರಿ ರಾಜ಼್ ಹಜ಼್ಜಾನು ಕಾಹೆ!” ಕರಿ ಜ಼ವಾಬ್‌ದಿದೊ.
37ತದೆ ಪಿಲಾತನೆ ಇನ ಬೋಲ್ಯೊ, “ಇಮ್‍ಕತೊ, ತೂ ರಾಜಾ಼ ಕಿಶು?” ಕರಿ ಪುಛಾ಼ಯೊ. ಯೇಸುನೆ, “ಮೇ ರಾಜ಼ ಕರಿ ತೂಸ್ ಬೋಲುಕರಾಸ್‌. ಮೇ ಖ್ಹಾಚಿನಿ ಬಾರೇಮ ಸಾಕ್ಷಿ ಬೋಲಾನಖ್ಹಾಜೆ ಪೈದಾಹುಯಿನ್‌, ಆ ಜಗತ್‌ಮ ಐರ‍್ಹೋಸ್. ಖ್ಹಾಚಿ ಭಣಿವಾಳು ಮಾರಿ ವಾತೇನ ಖ್ಹಮ್‌ಜಾ಼ಸ್‌” ಕರಿ ಜವಾಬ್‌ ದಿದೊ.
38ತದೆ ಪಿಲಾತನೆ, “ಖ್ಹಾಚಿಕತೊ ಶಾತ್‌?” ಕರಿ ಪುಛಾ಼ಯೊ.
ಯೇಸುನ ಮರಣ್ ದಂಡ್‌ ದಿದೂತೆ
(ಮತ್ತಾಯ 27:15-31; ಮಾರ್ಕ 15:6-20; ಲೂಕ 23:13-25)
ಆ ಬೋಲಾನ ಬಾದ್‌ಮ ಪಿಲಾತ ಪಾಛೊ಼ ಯೆಹೂದ್ಯರ್‌ಕನ ಬಹರ್ ಜೈ಼ನ್‌, “ಮನ ಅನಾಮ ಖೆವಿಸ್ ಗಲತ್‌ ದೆಖವ಼್‌ಕರಾಕೊಯ್ನಿ. 39ಕತೋಬಿ ಪಸ್ಕ ಪೂಜಾ಼ನಿ ವಖ್ಹತ್‌ಮ ಕೋಂಡಿ ಘಾಲಿರಾಖಾತೆ ಇವ್ಣಾಮ ಏಕ್‌ನ, ಮೇ ತುಮಾರಖ್ಹಾಜೆ ಭಾರ್‌ ಮ್ಹೇಲಾನಿ ಆದತ್ ಛಾ಼. ಮೇ ಯೆಹೂದ್ಯರ್‌ನ ರಾಜಾ಼ನ ತುಮಾರಖ್ಹಾಜೆ ಭಾರ್‌ ಮ್ಹೇಲ್ನು ಕರಿ ತುಮಾರಿ ಆಖ್ಹ್‌ಕಿ ಶು?” ಕರಿ ಪುಛಾ಼ಯೊ.
40ತದೆ ಇವ್ಣೆ, “ಅನ ನಕೊ! ಬರಬ್ಬನಾಸ್ ಮ್ಹೇಲಿದೆ!” ಕರಿ ಚಿಕ್ರಿನ್ ಬೋಲ್ಯು. ಆ ಬರಬ್ಬ ಏಕ್‌ ಢಾಕು ಹುಯಿರ‍್ಹೋಥೊ.
Currently Selected:
ಯೋಹಾನ 18: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
