Matta 28

Niinyo Yeso a tina wa

1Pa ndiira kaa nwiinya Yahudawa ɓa ma ɗenda a kaa ntiiri tǝro mbutu wa, pa Maryamu Magadaliya ma Maryamu fin nya ɓǝ ko me koɓǝ sengge tina.

2Pa putu a nya dem, me antimira Ankundi ya, yǝ ham sase a liura yǝ wo yǝ tǝng ɗungara yǝ kaɗ a si. 3Maabiri isi nga weɗweɗɗo, ɗǝm luktu usu pengpeng nga huru. 4Ɓan war ka ɓa, kokto ɓǝ ma ɓǝ madki ɓǝ tom nga ɓǝ woɗɗon.

5An timira Kaa ya, yǝ nkee toona kaɓa me, “Sǝ kura kokto ra, nǝ maan me sǝn kǝr Yeso yaa ɓaa kwaakǝsǝsǝ ya. 6Yǝ sem a hamɓa ra, yǝ niin, nga yǝ nkeesǝ wa. Sau sǝ sengge ham yǝ tǝrsǝ ɓa. 7Pa soo naakǝn, kosǝ nkee emfǝɗkaa ɓisa, ‘Yǝ niin a tiina, ɗǝm yǝn koko Galili a wii waso. Kǝsaa wǝr kǝnso.’ Waso nǝ nkeesǝn.”

8Pa toona kaɓa ɓǝ fiɗ ma haɗɗe a tina kawa, ɓaa kokto, pa ma kuɗa pengpeng ra ɗǝm, pa ɓǝ mon ɓǝ nkee emfǝɗkaa ɓisa. 9Semma ma ɓoso ra, pa ɓǝ pam ma Yeso, yǝɓǝ nkee me, “Sǝ naupa.” Ɓǝ ko ngwang ma sase ɓaa ma a kwelkǝte, ɓaa nyoo. 10Pa Yeso yǝɓǝ nkee me, “Sǝ kura kokto ra, so kosǝ nkee ɓaata ɓǝna ɓǝ ko Galili, kǝnso kǝ ɓǝnǝn wǝr wa.”

Mbu ɓan war handa ɓa ɓǝ nkeesǝ ɓa

11Pa toona sǝ ɓa, ɓǝn faɗsǝn faɗ wa, ɓaata ɓan war handa ɓa, ɓǝ kana uru ko ɓǝ nkee kuɓsa nek mbusa sa nsaad mbu tomsǝ ɓa. 12Pa wiina ɓan nek mbusa ɓa, ɓǝ pamsǝ ma wiina ɓeta ɓa wa, ɓǝ kan a ɗaaso ɓoso, pa ɓǝ na koɓaa nsosamse ka ya, 13ɓǝɓǝ nkee me, “Sǝ nkee me, ‘Emfǝɗkaa ɓisa ɓǝ wo a pǝrtǝra ɓaa tanga a fer tǝ saa munda wa.’ 14Me mara ra, kan a ngwee Ngomna ya ni, kǝtaa ti yǝ yau sase kǝn sǝ fiɗ a kongsa ta.” 15Pa nsosamse kaya ɓǝ kon koɓaa kasa ɓǝ tom nga ɓǝ nkee ɓǝsǝ wa. Ɗǝm mara ra kan a ngwee me ɓaa Yahudawa ɓa wo nga nawa.

Mbu kǝɓaa tomɓa ɓaa puu haa fin sǝɓa

16Pa emfǝɗkaa puu nhaa fin sǝɓa ɓǝ ko Galili, a yol Yeso nkee ɓǝsǝ me ɓǝ ko wa. 17Pa ɓǝ wǝr sǝsǝ wa, ɓaa nyoo, pa ɓaata ɓǝ tomma pǝno. 18Pa Yeso yǝ wo a ɓoni, yǝɓǝ nkee me, “Kwangto a liura ma putu wa nsaad ɓaa na nǝn. 19Me maaso, soo a put taandi wa nsaad, kosǝ ti ɓeta ɓǝ kaɗ emfǝɗkaa ɓǝna, sǝɓǝ tom baptisma a ɗǝnda Paapara ma Auwe ma Wis ɗekɗek wa, 20ɗǝm sǝ ɓǝ fǝɗkǝ me ɓǝ ɓǝɗ mbu nǝ nkee sǝ ɓa nsaad. Ɗǝm ɓong nǝ ke ma sase nfee a wo a kaɗo feɗefeɗe ntaandi wa ɓa.”

Currently Selected:

Matta 28: LLA

Highlight

Copy