Svun Marcos 16

Ja' li' yaloj ti icha'cuxi loq'uel ta smuquenal ti Jesuse

(Mt 28.1-10; Lc 24.1-12; Jn 20.1-10)

1Ti c'alal i'ech' xa'ox li sc'ac'alil ta xcuxique, li María liquem tal ta Magdalae, xchi'uc li Salomee, xchi'uc li otro jun Maríae li sme' Jacoboe, ismanic muil pox yu'un chba yac'beic ta spat xocon ti Jesuse. 2Sob ta primero c'ac'al xemanae, ti c'alal naca to'ox chloc' c'ac'ale, ibatic yo' bu smuquenal ti Jesuse.

3Ja' yech iyalbe sbaic chac li'i:

—¿Much'u chisetetinbotic loq'uel li ton tana ta ti' ch'ene? ―Xut sbaic.

4Ti c'alal ic'otique, iyilic ti mu xa bu tey ta yav li muc'ta ton ti macbil o to'ox li ti'il ch'ene. 5Ti c'alal i'ochic ta yut muquenale, iyilic tey chotol ta sbats'i c'obic jun vinic slapoj natil saquil c'u'ul. Li antsetique ixi'ic o, 6ja' yech i'albatic chac li'i:

—Mu me xaxi'ic. Jna'oj ti ja' cha sa'ic ti Jesus Nazaret ti isjoc'anic ta cruze. Icha'cuxi xa; mu xa bu li'i. Q'uelavilic yo' bu istelanic to'oxe. 7Batanic ba albeic li yan yajchanc'optaque xchi'uc li Pedroe: “Ti tey xa chc'ot staic ta Galilea chac c'u cha'al albilic ono'oxe.” ―X'utatic li antsetique.

8Li antsetique anil iloq'uic ta muquenale, Xt'eleletic xa, mu xa sna' c'usi tspasic. Muc' much'u iyalbeic yu'un xi'emic.

Ja' li' yaloj ti iyac' sba iluc ta stojol María Magdala ti Jesuse

(Jn 20.11-18)

[ 9Ti c'alal cha'cuxiem xa'ox ta sob ta primero c'ac'al xemana ti Jesuse, ja' ba'yi iyac' sba iluc ta stojol ti María liquem tal ta Magdalae, ja' ti much'u iloq'uesbat vucvo' pucuj ta yo'one. 10Ba yalbe ti much'utic ixchi'in to'ox ta xanbal ti Jesuse, tey chat yo'onic xchi'uc ch-oq'uic c'ot sta. 11C'alal iya'iic ti icha'cuxi xa ti Jesuse, ti iyil li Maríae, muc' xch'unic.

Ja' li' yaloj ti iyac' sba iluc ta stojol cha'vo' viniquetic ti Jesuse

(Lc 24.13-35)

12Ts'acal to iyac' sba iluc ta be ta stojol cha'vo' xchi'ilic ti c'alal chbatic ta yosilique, muc' xojtiquinic ta ora yu'un ma'uc iyilic. 13Li cha'vo'e isutic tal, tal yalbeic li yantique, pero muc' xch'unbatic uc.

Ja' li' yaloj ti c'usi yabtel iyac'be comel li yajchanc'optaque

(Mt 28.16-20; Lc 24.36-49; Jn 20.19-23)

14Slajeb xa iyac' sba iluc ta stojol li buluchvo' yajchanc'optaque, ja' o tey yolel chve'ic c'ot sta. Tsot iyich'ic utel ta scoj ti ch'abal xch'unojel yo'onique xchi'uc ti mu xa c'usi sc'an xch'unic o ta jmoje, ti ja' mu xa bu ixch'unbeic o ti much'utic iyalic ti yilojic ti cha'cuxiem xae. 15I'albatic yu'un ti Jesuse: «Batanic ta sjunlej balamil, ba albeic scotol crixchanoetic li lequil ach'c'ope. 16Ti much'utic ta xch'unique, mi chich'ic vo'e, ta chcuxiic ta sbatel osil. Yan ti much'utic mu xch'unique jmoj sc'oplal chba yich'ic castico. 17Ti much'utic ta xch'unique ta xaq'uic iluc sq'uelobi chac li'i: Ta jbi ta sloq'uesic pucujetic, xchi'uc ta xc'opojic ta ach' c'op. 18Ac'u mi stsac ta sc'obic quiletel chon, ac'u mi xuch'ic ti c'usi oy sbenenoale, mu c'usi tspasic o; ja' no'ox yech noxtoc mi chac' sc'obic ta sba ti much'utic ipique, ta xcol yu'unic.» ―X'utatic yu'un ti Jesuse.

Ja' li' yaloj ti ibat ta vinajel ti Jesuse

(Lc 24.50-53)

19Ti c'alal laj c'oponaticuc comel yu'un ti Jesuse, ja'o i'ic'at muyel ta vinajel, tey ichoti ta sbats'i c'ob ti Rioxe. 20Li yajchanc'optaque iloq'uic ta yalel a'yuc ta buyuc no'ox li lequil ach' c'ope; icoltaatic yu'un ti Cajvaltique, ja' ivinaj o li lequil ach'c'ope ti iyaq'uic iluc slequilal syu'elal ti Rioxe.]

Currently Selected:

Svun Marcos 16: LeqAC

Highlight

Copy