Svun Mateo 28

Ja' li' yaloj ti icha'cuxi loq'uel ta smuquenal ti Jesuse

(Mc 16.1-8; Lc 24.1-12; Jn 20.1-10)

1Svoljeal ox ixcuxic, c'alal naca to'ox tsacub ta primero c'ac'al xemanae, li María liquem tal ta Magdalae xchi'uc li otro jun Mariae, ba sq'uelbeic smuquenal ti Jesuse. 2Ja' o ital tsots niquel, yu'un iyal tal jun yaj-angel Cajvaltic ta vinajel, inopoj ech'el yo bu li muquenale, isloq'ues li ton macbil o li sti'il ch'ene, ichoti ta sba li tone. 3Ti angele oy xojobal co'ol c'u cha'al sactsevul, li sc'u'e sac tajmec co'ol c'u cha'al taiv. 4Ti c'alal iyilic ángel ti soltaroetique, xt'eleletic xa ta xi'el, chamem icomic yilel. 5Li angele iyalbe li antsetique:

—Mu me xaxi'ic. Jna'oj ti ja' cha sa'ic ti Jesús ijoc'anat ta cruze. 6Mu xa bu li'i; icha'cuxi xa chac c'u cha'al iyal onoxe. La' q'uelavilic yo' bu istelanic to'oxe. 7Batanic ta ora, ba albeic li yajchanc'optaque ti icha'cuxi xae. “Albeic ti ba'yi chbat ta Galileae, tey chc'ot staic.” Ja' no'ox yech chacalbeic ―x'utatic.

8Li antsetique, anil iloq'uic ta muquenale, xi'emic pero jun yo'onic noxtoc, anil ba yalbeic li yajchanc'optac ti Jesuse. 9Ti c'alal italique, ti Jesuse loc' snup ta be li antsetique. ¿Bu chabatic? ―X'utatic. Li antsetique inopojic ech'el yo' bu ti Jesuse, ismeybeic yoc, iyich'ic ta muc', 10ja' yech i'albatic yu'un ti Jesuse:

—Mu xaxi'ic. Ba albeic li jchi'iltaque, ti ac'u baticuc ta Galileae, Tey chc'ot staicon ―x'utatic yu'un ti Jesuse.

Ja' li' yaloj ti c'usi iyalic ti soltaroetic ti ch-chabiic to'ox muquenale

11Ti c'alal mu to'ox xc'otic li antsetique, ja'o ic'otic ta jteclum jayvo' soltaroetic ti ixchabibeic smuquenal ti Jesuse, c'ot yalbeic ti totil paleetique ti c'usitic ic'ot ta pasele. 12Ti totil paleetique istsob sbaic ta ora xchi'uc li moletique, co'ol isnopic ti c'usi tspasique. Iyac'beic ep taq'uin ti soltaroetique, 13tsots isc'anbeic vocol ti ja'uc yech ac'u yalic chac li'i:

—Ti c'alal listsacoticotic vayel ta ac'ubaltique, ti animae ay sloq'uesel yu'un li yajchanc'optaque, chianic me —x'utatic. 14Ti mi iya'i li goviernoe, vo'oticotic xa chba jch'ul c'oponticotic yo' mu c'u xa xcha'leic oe —x'utatic.

15Ti soltaroetique ixch'amic li taq'uine, ja' yech iyalic chac c'u cha'al i'albatique. Scotol li jurioetique ja' yech chalic c'alal tana ti muc' xcha'cuxi ti Jesuse.

Ja' li' yaloj ti c'usi yabtel iyac'be comel yajchanc'optac ti Jesuse

(Mc 16.14-18; Lc 24.36-49; Jn 20.19-23)

16Yech'o un li buluchvo' yajchanc'optac ti Jesuse, ibatic ta Galilea, tey ic'otic ta vits yo' bu albilic ono'oxe. 17Ti c'alal iyilic ti Jesuse, iyich'ic ta muc', pero oy jayvo' ti muc xch'unique. 18Ti Jesuse inopoj ech'el yo' bu li yajchanc'optaque, ja yech iyalbe chac li'i:

—Li ac'bat xa scotol jyu'el ta scuentainel li vinajel balamile. 19Yech'o un ba pasic ta cajchanc'optac li crixchanoetic ta sjunlej balamile; ac'beic yich' vo' ta sbi ti Jtotic Rioxe xchi'uc ta sbi li Ch'amalile xchi'uc ta sbi ti Ch'ul Espiritue, 20chanubtasic ta xch'unel scotol ti c'usitic lacalbeique. Li vo'one chacalbeic ta jamal ti li' jchi'inojoxuc o ti c'u sjalil mu to'ox bu chlaj li balamile ―x'utatic yu'un ti Jesuse.

Currently Selected:

Svun Mateo 28: LeqAC

Highlight

Copy