Svun Juan 21

Ja' li' yaloj ti iyac' sba iluc ta stojol vucvo' yajchanc'optac ti Jesuse

1Ta c'alal ilaj chac taje, ti Jesuse iyac' sba ta ilel noxtoc ta stojol li yajchanc'optaque, ja' o ti c'alal teyic ta ti'nab Tiberiase. Ja yech ic'ot ta pasel chac li'i: 2Teyic ta ti'nab ti Simon Pedroe, xchi'uc ti Tomase ti vach xutique, xchi'uc ti Natanaele ti liquem tal ta jteclum Caná ta yosilal Galileae, teyic ti scremotic Zebedeo uque, xchi'uc otro cha'vo' yajchanc'optac ti Jesuse. 3Ti Simón Pedroe iyalbe li xchi'iltaque:

—Chba jtsac tal choy ―xut.

Itac'avic li yantique:

―Batic, chba jchi'inoticotic uc ―xutic.

Ibatic, i'ochic ech'el ta jcot canova, pero muc'bu istaic jcotuc choy ta sjunul li ac'ubale. 4Ti c'alal tsacub xa ox osile, tey iyac' sba ta ilel ta ti'nab noxtoc ti Jesuse, pero li yajchanc'optaque muc xojtiquinic mi ja ti Jesuse. 5Ijac'batic yu'un ti Jesuse:

—Cremotic, ¿mi oy ataojic choy jti'tic? ―X'utatic.

Itac'av li yajchanc'optaque:

―Ch'abal to ―xutic.

6I'albatic yu'un ti Jesuse:

—Jipo ochel ta abats'ic'obic ta xocon canova lanuti'ique, tey chataic ―x'utatic.

Ja' yech ispasic chac c'ucha'al i'albatique, mu xa xnit loq'uel yu'unic li snuti'ique yu'un inoj ta choy. 7Li jun yajchanc'op Jesús ti lec sc'anoje, iyalbe li Pedroe:

—¡Ja' li Cajvaltique! —Xut.

Ja' no'ox ti c'alal iya'i ti Simón Pedroe ti ja' ti Cajvaltique, ora islap sc'u' yu'un sloc'oj to'ox, isjip sba ta nab, loc' snup ti Jesuse. 8Li yan yajchanc'optac ti Jesuse, iloq'uic tal ta ti' nab xchi'uc li scanovaique, squilojic loq'uel tal li snuti'ique, yu'un noj ta choy, oy no'ox nan cien metrouc snamal ta ti' nabe.

9Ti c'alal iloq'uic tal ta ti'nabe, iyilic ti tey tsoybil c'oq'ue, tey chta'aj jcot choy, oy tey pan noxtoc. 10I'albatic yu'un ti Jesuse:

—Ich'ic tal jaycotuc li choy ja' to atsaquique ―x'utatic.

11Ti Simon Pedroe, i'och ta canova isnit loq'uel ta ti'nab li snuti'ique, noj ta muc'tic choy, oy ciento cincuenta y tres; ac'u mi ep li choye pero muc' xjat li stsacobile. 12I'albatic yu'un ti Jesuse:

—La' ve'anic ―x'utatic.

Mi jun muc'bu isjac'beic ti much'ue, yu'un iyojtiquinic ti ja' ti Cajvaltique. 13Ti Jesuse istam li pane iyac'be li yajchanc'optaque, iyac'be noxtoc li choye.

14Yox'ech'elal xa o iyac' sba ta ilel ta stojol li yajchanc'optac ti Jesuse ti c'alal cha'cuxiem xa'oxe.

Ja' li' yaloj ti i'albat ti Pedroe ti c'u x'elan chtune

15Ti c'alal laj ve'icuque, ti Jesuse isjac'be ti Simón Pedroe:

―Simón, vo'ot ti scremot Juane, ¿mi más to ac'anojon chac c'u cha'al li yantic li'i? ―X'utat.

Itac'av ti Pedroe:

―Cajval, ana'oj ti jc'anojote ―xut.

Xi i'albat ti Pedroe:

—Chabibon me li cunen c'ox chijtaque—xut.

16Ixcha' jac'be noxtoc:

—Simón, vo'ot scremot ti Juane, ¿mi ac'anojon? ―Xut.

―Cajval, ana'oj ti jc'anojote ―xi.

Xi i'albat yu'un ti Jesuse:

—Chabibon me li jchijtaque. ―X'utat.

17Ti Jesuse xi isjac'be ta yox'ech'elale―Simón, vo'ot scremot ti Juane, ¿mi ac'anojon? ―X'utat noxtoc.

Ti Pedroe iyat o yo'on ti yox'ech'elal xa ijac'bate, xi istac'be ti Jesuse:

—Cajval, ana'oj scotol: ana'oj ti jc'anojote, ―Xut.

Itac'av ti Jesuse:

—Chabibon me li jchijtaque. ―X'utat noxtoc. 18Ta melel chacalbe, ti c'alal cremot to'oxe mu c'usi vocol ava'i, atuc alap ac'u', achuc ach'ut, labat ti bu sc'an avo'one; Pero ti c'alal xamolibe, Alich'oj ac'ob, yan o much'u cha xchucbe lach'ute, chayic' ech'el yo' bu mu xa c'an xa bate. ―X'utat yu'un ti Jesuse.

19Ti x'elan iyal ti Jesuse, ja' iyac' ta a'yel ti c'u x'elan ta xcham ti Pedroe xchi'uc ti ja' yech chac' o ta ich'el ta muc' Riox ti c'alal xchame.

Ti c'alal laj yal chac taje ja' o xi i'albate:

―¡Nap'letaon ech'el! ―X'utat.

Ja' li' yaloj ti yech scotol ti c'usitic ists'iba ti Juane

20Ti c'alal ijoyij ti Pedroe, iyil ti tey nap'al ech'el ti jun yajchanc'op Jesús ti lec sc'anoje, ja ti much'u tey nopol ts'e'el ta xocon Jesús ti c'alal ive'ique, ja' ti much'u xi isjaq'ue: «Cajval, ¿much'u ti chayac' ta entrucale?» —Ti xute. 21C'alal liyil ti Pedroe, isjac'be ti Jesuse:

―Cajval, c'usi ch-c'ot ta pasel ta stojol li jun li uque? ―Xut.

22Itac'av ti Jesuse:

—Mi sc'an co'on ti cuxul chul jta ti c'alal xi sutale, ¿mu c'usi acuenta o li vo'ote? Li vo'ote, nap'letaon no'ox me. ―X'utat.

23Ti x'elan iyale, ora ivinaj ech'el ta stojol li xchi'ilic ta ch'unolajele, ti muc' bu ta xcham li jun yajchanc'ope. Pero ti Jesuse muc'bu iyal ti muc'bu ta xchame. Li c'usi iyale ja' chac li'i:

Mi sc'an co'on ti cuxul chul jta ti c'alal xi sutale, ¿mu c'usi acuenta o li vo'ote?» X'utat no'ox ti Pedroe.

24Ja' ono'ox li jun yajchanc'op Jesús ti chal ti c'usitic ic'ot ta pasele yu'un iyil stuc, yech'o ti ists'iba ta vune. Jna'ojtic ti melelic scotol li c'usitic chale.

25Toj ep to c'usitic ispas ti Jesuse, ti iyich'uc ts'ibael ta scojol cojol ti c'usitic ispase, toj ep libroetic ti yechuque, yic'al nan mu x'och o sjunlej li balamil ti yechuque.

Currently Selected:

Svun Juan 21: LeqAC

Highlight

Copy