ಅಪೊಸ್ತಲೊ 17

1ಪೌಲ ವರಿ ಸಿಲ ಅಗಾ ಪ್ರಯಾಣ ಕರಿ ಅಂಪಿಪೊಲಿ ವರಿ ಅಪೊಲೊನ್ಯ ಕವಾನಾ ಗಾಮೊ ದಾಟಿನ ಥೆಸಲೊನಿಕನೆ ಆಯಾ. ತ್ಯಾ ಯಹುದ್ಯೊನಿ ಸಬಾಮಂದಿರ ವ್ಹತ್ತಿ. 2ಪೌಲ ತಿನಿ ಪದ್ದತನಿಂತ ತ್ಯಾ ರಹೆಲ ಮನಕ್ಹೊಕನ ಗೈನ ತನ ಐತವಾರೊ ಕ್ಹುದಾನಾ ವಾತೊ ತ್ಯುನಾ ಕ್ಹಾತೆ ವಾದಸಿನ 3ತೆ ವಾಕ್ಯನು ಅರ್ಥ ತಿಳಸಾಯಾ. ಕ್ರಿಸ್ತ ತರಾಸ ಕ್ಹಯಿನ ಮರಿನ ಉಟಿನ ಆವಾನು ಜ಼ರುರತ ಛೆ ಕೈನ ಮಿ ತಮನೊನೆ ಪ್ರಸಿದ್ದಿಪಡಿಸಾನಾ ಹುತಿ ಯೆಸು ತೆ ಕ್ರಿಸ್ತ ವ್ಹೈ ಕೈನ ಸ್ಥಿರಪಡಿಸ್ಯಾ. 4ತಿಮಾ ದಕ್ಹಾಜ಼಼ನಾ ಕ್ಹುದಾನಾ ಭಕ್ತೊ ಥೈಯೆಲ ಗ್ರಿಕನು ಮ್ಹೊಟು ಗುಂಪ ವರಿ ಪ್ರಮುಖ ಬಾಕಡಿಯೊಮಾ ದಕ್ಹಜ಼ನಾ ವಾದಸಿನ ಪೌಲ ವರಿ ಸಿಲಾನೆ ಮಳೆಲಿದ್ಯಾ. 5ನಂಬೆಲವಾಲ ಯಹುದ್ಯೊ ಸಂಗಟ ಪಡಿನ ಬಾಜಾ಼ರಮಾ ಫರಾವಾಲಾ ದಕ್ಹಾಜ಼಼ನಾ ಪಾಲತು ಮನಕ್ಹೊನೆ ಬಲೈನ ಗುಂಪ ಕರಿನ ಗಾಮ್ಮಾ ಗದ್ದಲ ಕರಿನ ಪೌಲ ವರಿ ಸಿಲನೆ ಗಾಮಾನಾ ಸಬೆನಾ ಕ್ಹಾಮಾ ಲೌ ಕೈನೈ ತ್ಯುನೊನೆ ಹುಡಕತ್ತಾ ಯಾಸೊನಾ ಘರಕನ ಐನ ಮುಟ್ಯಾ. 6ತ್ಯುನೆ ಮಳೆವಾಚಿ ಗಯೆಲುಕ್ಹು ತೆ ಮನಕ್ಹೊ ಭಾಯೊನೆ ಯಾಸೊನೆ ವರಿ ದಕ್ಹಾ ಮನಕ್ಹೊನೆ ಗಾಮಾನಾ ಅದಿಕಾರಿಯೊ ಕನ ಯಳ್ದಿನ ಲೈನ ದುನಿಯಾನೆ ಅಲೊಲ್ಲಕಲ್ಲೊಲ ಕರಲ ಮನಕ್ಹೊ ನ್ಹ್ಯಾಬಿ ಆಯಾತಾ. 7ಯಾಸೊನ ತುನೊತೆ ಮಳೆಲಿದ್ಯೊತೊ, ತ್ಯುನೆ ಕ್ಹಾರಾಜ಼ನಾ ಯೆಸು ನಾಮನೊ ಬಿಜೆಕ್ಲೊ ರಾಜೊ಼ ಛೆಕೈನ ಚಕ್ರವರ್ತಿನಾ ಆಗನ್ಯೆ ವಿರುದ್ದ ಥೈನ ಚಾಲಾಡಾಸ ಕೈನ ವದರ್ಯಾ. 8ಗಾಮ್ಮವಾಲಾ ವರಿ ಗಾಮ್ಮನಾ ಅದಿಕಾರಿಯೊ ಆ ವಾತೊ ಐಕಿನ ಘಾಬ್ರಾ ಥೈಯಾ. 9ವಿಸ್ವಾಶಿಯೊನೆ ವರಿ ಬಿಜಾ಼ ಮನಕ್ಹೊನೆ ಜಾಮಿನ ಪರ ಛೊಡ್ಯಾ. 10ತೆಳಾಮಾ ತೆ ಭಾಯೊ ರಾತಮಾ ಪೌಲಾ ವರಿ ಸಿಲಾನೆ ಬೆರೆಯೊನನೆ ಮೊಕ್ಲಾಯಾ. ತ್ಯುನೆ ತ್ಯಾ ಗೈನ ಯಹುದ್ಯೊನಾ ಸಬಾಮಂದಿರಮಾ ಗಯಾ. 11ತೆ ಸಬೆವಾಲಾ ಕ್ಹುದಾನಿ ವಾಕ್ಯನೆ ಸ್ವಚ್ಚ ಮನಸೆ ಒಪಿಲಿನ ತ್ಯುನೆ ಕದಲ ವಾತೊ ವ್ಹೈಸು ನ್ಹವೈ ಕೈನ ವಪಿಲಿವಾನಹುತಿ ದಿನ್ನೆಬಿ ಪವಿತ್ರ ಗ್ರಂಥ ಪರಿಕ್ಷಾ ಕರಾನಾ ಹುತಿ ತುನೆ ಥೆಸೆಲೊನಿಕ ಸಬೆವಾಲೊತಿ ಚೊ಼ಕಾ ವ್ಹತಾ. 12ತಿಮ್ಮ ರ‍್ಹತಾಮಾ ತ್ಯುನಾಮಾ ಘನ್ನಾ ಜ಼ನಾ ನಂಬ್ಯಾತಾ, ತೆನೈಸೊ ಕಾಮ ಕರಾಲಾ ಗ್ರಿಕನಾ ಬಾಕ್ಡಿಯೊಮಾ ದಾಣ್ಗಾಮಾ ಘನ್ನಾ ಜ಼ನಾ ನಂಬ್ಯಾ. 13ವರಿ ಪೌಲಾ ಬೆರೆಯೊಮಾಬಿ ಕ್ಹುದಾನಿ ವಾಕ್ಯ ಪ್ರಸಿದ್ದಿಪಡಿಸಾನಾಹುತಿ ವರ್ತಮಾನಬಿ ಥೆಸೆಲೊನಿಕನಾ ಯಹುದಿಯೊನೆ ಗ್ವತ್ತ ಥಾತಾಮಾ ತ್ಯುನೆ ತ್ಯಾ ಐನ ಮನಕ್ಹೊನಾ ಗುಂಪನೆ ಪ್ರಚೊದ ಕರಿನ ತಡಾಯಾತಾ. 14ತೆಳಾಮಾ ಭಾಯೊ ಪೌಲಾನೆ ಸಮುಂದರ ಕನ ಜಾ಼ವಾನೆ ತಿನೆ ವೈಳೈನ ದಿದ್ಯಾ. ತೆಳಾಮಾ ಸಿಲಾ ವರಿ ತಿಮೊಥಿ ತ್ಯಾಜ಼ ಹುಬ್ರಯಾ. 15ಪೌಲಾನೆ ವಳೈಲವಾಲಾ ತಿನೆ ಅಥೆನೆತಕ ಬಲೈಲಿನ ಗಯಾ ಸಿಲಾ ವರಿ ತಿಮೊಥಿನೆ ಭೆಟಿ ಥಯಲ ಪರ ಭರನೆಜ ತಿಕನ ಆವಾನೆ ಅಪ್ಪಣೆ ಲಿನ ಪೌಲಾ ಕಂತೊ ಗಯೊ. 16ಪೌಲ ತ್ಯುನಾ ಹುತಿ ವಾಟ ದೆಕತಾ ಟೆಮಾ ತೆ ಗಾಮ್ಮಾ ತ್ಯಾ ತ್ಯಾ ಮೊರ್ತಿಯೊ ದೆಕಿನ ತಿನು ಮನಸ ಬಳಾಡ್ಯುತು. 17ತಿನಾಹುತಿ ತೆ ಸಬಾಮಂದಿರಮಾ ಯಹುದ್ಯೊ ವರಿ ಭಕ್ತನಾ ಕ್ಹಾತೆ ವರಿ ತ್ಯಾ ಮಳೆಲ ಮನಕ್ಹೊನಾ ಕ್ಹಾತೆ ವರಿ ದಿನ್ಯೆಬಿ ಬಾಜಾರಮಾ ವರಿ ತ್ಯಾ ದಿಕ್ಹೆಲ ಮನಕ್ಹೊನೆ ವಾದಾ ಕರಾಡೊತೊ. 18ತೆನೈತೊ ಎಪಿಕೊರಿಯೊನೆ ಸ್ತೊಯಿಕರೊನೆ ಕವಾಲಾ ತತ್ವ ವಿಚಾರವಾಲಾ ದಕ್ಹಾಜ಼಼ನಾ ತಿನಾ ಕ್ಹಾತೆ ವಾದಾ ಕರಾಡಾತಾ. ತ್ಯಾ ರಹೆಲ ದಕ್ಹಜ಼ನಾ ತೆ ಸು ವಾತ ಕವಾನೆ ಕೊಶಿಶ ಕರಾಡ್ಯೊಸ ಕೈನ ಕದ್ಯಾ. ತೆ ಯೆಸುನಾ ಹುತಿ ವರಿ ಮರಿನ ಜುತೊ ಥಯಲ ಹುತಿ ಕವಡೊಸ ಕೈನ ವರಿ ತೆ ಭಾರ ಗಾಮಾನಾ ದೆವಸ್ಥಾನವೊನಾ ಬಗೆ ಪ್ರಚಾರ ಕರಾವಾಲೊ ದಿಕ್ಹಾಡೊಸ ಕೈನ ಬಿಜಾ಼ ದಕ್ಹಾಜ಼಼ನಾ ಕವಾಡ್ಯಾತಾ. 19ತೆ ಮನಕ್ಹೊ ತಿನೆ ಧರ್ಲಿನ ಅರಿಯೊಪಾಯ ಗಾಮ್ನೆ ಗಯಾ ವರಿ ತಿನೆ ಕದ್ಯಾ ತು ಕವಾನು ಆ ನೈ ಉಪದೆಶ ಹಮೆಬಿ ತಿಳದಿ ಲಿಯೆಸು. 20ವಿಚಿತ್ರ ಥಯಲ ಸಂಗತಿಯೊನೆ ಹಮನೊನೆ ತಿಳಸಾಯಲಕ್ಹು ತಿನಾ ಬಗೆ ಹಮನೊನೆ ತಿಳದಿ ಲಿವಾನೆ ಹಮನೊನೆ ಅಪೆಕ್ಷ ಛೆ ಕದ್ಯಾ. 21ಅಥೆನೆಯೊನೊ ರಹೆಲ ಗಾಮ್ಮಾ ಬಿಜಾ಼ ಗಾಮಾವಾಲಾ ನವಾ ನವಾ ಸಂಗತಿಯೊ ಕವಾನು ವರಿ ಐಕಾನು ಛೊಡಿನ ವರಿ ಬಿಜಾ಼ ಕಾಮನೆ ಟೈಮ ನೈ ದೆತಾತಾ. 22ಪೌಲ ಅರಿಯೊಪಾಯಮಾ ವಚ಼ಮಾ ಹುಬರೈನ ಕದ್ಯೊ ಅಥೆನೆಯೊನಾ ಮನಕ್ಹೊ ತಮೆ ಕ್ಹಾರಾಮಾಜ ಘನ್ನಾ ಕ್ಹುದಾನೆ ನಂಬಾವಾಲಾ ವ್ಹೈ ಕೈನ ಮನೆ ದಿಕ್ಹಾಡುಸ. 23ಮಿ ತಮಾರಾ ಗಾಮ್ಮಾ ಮಿ ಫರತಾಮಾ ಮನೆ ತಮೆ ಪೊಜಾ ಕರಾನಾ ದೆವಸ್ಥಾನೊ ಮೊರ್ತಿಯೊ ದೆಕ್ತಾಮಾ ತಿಮಾ ಮನೆ ಎಕ ಬಲಿಪಿಟ ಡೊಳಾನೆ ಪಡ್ಯು ತಿನಾ ಉಪ್ಪರ ‘ಅಜ್ಞಾತ ರ‍್ಹಯಲ ದೆವಸ್ಥಾನ ಕೈನ ಲಿಕ್ಯಾತಾ. ತಿನಾ ಹುತಿ ತಮೆ ಸುಜ಼ ತಿಳದ್ಯಾವಾಚಿ ಪುಜಾಕರಾನು ತಮನೊನೆ ತಿಳಸಿನ ಕವಾನೆ ಆಯೊಸ ಕದ್ಯೊ. 24ಜಗತ್ಮಾ ವರಿ ತಿಮಾ ಕ್ಹಾರು‍ ಸೃಷ್ಟಿ ಕರಲ ಜಿಮಿನ ಆಕಾಶನೊ ಒಡೆಯೊ ಥೈಯೆಲ ತೆ ಹತೆ ಬಾಂದೆಲ ಗುಡಿಯೊಮಾ ವಾಸ ನೈ ಕರತೊ. ತೆಜ಼ ಕ್ಹಾರಾವೊನೆ ಉಸುಲ ಜಿವಸಾವೊನೆ ಕ್ಹಾರು ದಿವಾಲೊ ಮನಕ್ಹೊನ ಹತೆ ಮದತ ಕರಲೆವಾಲೊ ನ್ಹವೈ. 25ತೆಜ಼ ಕ್ಹಾರಾವೊನೆ ಉಸುಲ ಜಿವಸಾವೊನೆ ಕ್ಹಾರು ದಿವಾಲೊ ಛೆ ಕೈಜ಼ ಜರುತ ನೈಸೊ ಮನಕ್ಹೊನ ಹತೆ ಮದತ ಕರಲೆವಾಲೊ ನ್ಹವೈ. 26ಕ್ಹುದಾ ಎಕ ಮನಕ್ಹು ಕ್ಹಾರಾ ಜನಾಂಗನೆ‍‍‍ ಸೃಷ್ಟಿ ಕರಿನ ತ್ಯುನಾ-ತ್ಯುನಾ ರಹೆಲತೆ ವ್ಹಕತನೊ ತ್ಯುನಾ-ತ್ಯುನಾ ರಹೆಲ ಜ಼ಗಾನೆ ತಯಾರ ಕರಿನ ತ್ಯಾ ಮ್ಹೆಲ್ಯೊ. 27ಎಕ ಟೈಮ್ಮಾ ತ್ಯುನೆ ತಡಾ ಕರ್ಯಮ ತಿನೆ ದೆಕಾನ ಹುತಿ ತ್ಯುನೊನೆ ಧುಂಡಾ ಲಗಾಡ್ಯೊ. ತೆ ಹಮನೊನೆ ತಿನಾಕ್ಹು ದುರ ಕರ್ಯೊನೈ. 28ಕಾಕದ್ಯಾಮ ತಿಮಾ ಅಪೆ ಜಿವಿಸೆಸ ಚಾಲಿಯೆಸ ವರಿ ರಹೆಸ ತಮಾರಾ ಕವಿಯೊ ದಕ್ಹಾ ಜ಼ನಾ ಹಮೆ ತಿನಾ ಸಂತಾನಾ ವ್ಹೈ ಕೈನ ಕದ್ಯಾ. 29ಹಮೆ ಕ್ಹುದಾ ಸಂತಾನಾ ಥಯಲ ಪರ ಕ್ಹುದಾ ಮನಕ್ಹುನು ಗ್ಯಾನಕ್ಹು ವರಿ ವಿಚಾರಕ್ಹು ಕೆತೆಲ ರುಪು ಕ್ಹೊನು ವರಿ ದಹಡಾವೊನೆ ಸಮಾನ ವ್ಹೈ ಕೈನ ಅಪೆ ಭಾವಿಸಾನೆ ಜವುನೈ. 30ತೆ ಗ್ಯಾನ ನೈಸೊ ದಿನೊನೆ ಕ್ಹುದಾ ಲೆಕಾಮಾ ಲಿದ್ಯೊನೈ. ಕ್ಹುದಾ ಹಮ್ನಾ ಬಿ ಚಾರ ದಿಕೊಮಾ ಮನಕ್ಹೊನೆ ಪಚಾತಾಪ ಪಡಿನ ಮಕನ ಪ್ಹರೊ ಕೈನ ಕ್ಹುದಾ ಅಪ್ಪಣೆ ಕರ್ಯೊ. 31ಕಾಕದ್ಯಾಮ ತೆ‍ಸೃಷ್ಟಿ ಕರಲ ದಾಣಗಾನೊ ಹತಕ್ಹೊ ನಿತಿಕ್ಹು ಭುಲೊಕಮಾ ಫೈಸಲೊ ಕರನಾ ಹುತಿ ಎಕ ದಿನ್ನ ಗೊತ ಕರ್ಯೊ. ತಿನೆ ಮರೆಲ ಮಾತೊ ಜುತೊ ಕರಲ ವ್ಹೈ ಕೈನ ನಂಬಾ ಹುತಿ ಕ್ಹಾರಾವೊನೆ ಆ ಕಾನಿ ದಿದೊಸ ಕೈನ ಕದ್ಯೊ. 32ಮರೆಲ ಮಾತೊ ಜುತೊ ಥೈಲ ತ್ಯುನಾಹುತಿ ಐಕಿ ದಕ್ಹಾಜ಼಼ನಾ ಪೌಲಾನೆ ಹಿನಾಯಾ ತಿಮಾನಾ ದಕ್ಹಾಜ಼಼ನಾ ಕದ್ಯಾ ತು ಕದಲ ವಾತೊ ಹಮೆ ಹಜಿ ಎಕ ಸಲಾ ಐಕಿಯೆಸ ಕೈನ. 33ಇಮ್ಮ ರ್‍ಹತಾಮಾ ಪೌಲಾ ತ್ಯುನಾ ವಚಮಾತೊ ಗೈ ಪಾಡ್ಯೊ. 34ಬಿಜಾ಼ ದಕ್ಹಾಜ಼಼ನಾ ತಿನೆ ಮಳೆಲಿನ ನಂಬಾ ನಂಬೆಲವಾಲಾ ದಕ್ಹಾಜ಼಼ನಾ ಅರಿಯೊಪಾಯನಿ ಸಬೆಮಾ, ದಿಯೊನುಸ, ದಾಮರಿಯೆ ಕವಾಲಿ ವರಿ ದಕ್ಹಾಜ಼಼ನಾ ತ್ಯಾ ವ್ಹತ್ತಾ.

Currently Selected:

ಅಪೊಸ್ತಲೊ 17: NTSrr23

Highlight

Copy