ಯೊಹಾನ್ 12

ಬೆತಾನಿತ್ ಯೇಸುಚಾ಼ ಅಭಿಶೆಕ್

(ಮತ್ತಾಯ್ 26:6-13; ಮಾರ್ಕ್ 14:3-9)

1ವಲ್ಯಾಂಡಾಚಾ ಸನಾಲಾ ಆಜು಼ನ್ ಸಾ ದಿಸ್ ಆಸ್ಥಾನಾ ಯೇಸು ಬೆತಾನಿತ್ ಗೆಲಾ. ಲಾಜರಾಚ಼ ಗಾವುಸ್ ಬೆತಾನಿ. ಯೇಸುನಿ ಮೆಲ್ಯಾಲಾ ಜಿತ್ತಾ ಕೆಲ್ಯಾಲಾ ಮಾನುಸುಸ್ ಲಾಜ಼ರ್. 2ತ್ಯಂಚಾನಿ ಯೇಸುಲಾ ರಾತಿಚ಼ ಜೆವಾನ್ ತಯಾರ್ ಕೆಲ. ಮಾರ್ಥಾ ಸೇವಾ ಕರೀತಿ. ಯೇಸು ಸಂಗ ಜೆವಾನ್ ಖಾತ್ಯಾಲ್ಯಾತ್ ಲಾಜ಼ರ್ಬಿ ಹುತ್ತಾ. 3ತವಾ ಮರಿಯಾನಿ, ಜಟಾ ಮಾಸ ವಾಸಾಚಾ ತೆಲಾಚಿ ಖುಬ್ ಕಿಮ್ತಿಚಿ ಬರ್ನಿ ಆನುನ್, ಯೇಸುಚಾ ಪಾಯಾವ ವತ್ಲ. ಆನಿ ತಿನಿ ಆಪ್‌ಲ್ಯಾ ಕೆಸಾಂಚಾನಿ ತ್ಯಚ಼ ಪ್ಯಾ ಪುಸ್ಲ. ತ್ಯಾ ತೆಲಾಚಾ಼ ಚಾ಼ಂಗ್ಲಾ ವಾಸ್ ಘರ್ಬರ್ ಜಾ಼ಲಾ.

4ಇಸ್ಕರಿತ್ ಯುದ್ ತಿಥ ಹುತ್ತಾ. ತ್ಯೊ ಯೇಸುಚಾ ಶಿಶಾತ್ಲಾ ಯೊಕ್ ಜಾ಼ಲ್ಥಾ. ಮೊರ‍್ಹ, ಯೇಸುಲಾ ದರುನ್ ದೆತ್ಯಾಲಾ ಹ್ಯೊಸ್. 5ತ್ಯೊ, “ತ್ಯ ವಾಸಾಚ಼ ತ್ಯಾಲ್ ತಿನ್ಸೆ ಚಾ಼ಂದಿಚಾ ಆನ್ಯಾನಾ ಇಕುನ್ ತೇ ಗರಿಬಾನಾ ಕಾ ದಿಲ ನಾಹಿ? ಮನ್ಲಾ 6ಫನ್ ಯುದಾಲಾ ಗರಿಬಾಂಚಿ ಕ್ಯಾಳ್ಜಿ ನವ್ಥಿ. ಫನ್ ತ್ಯೊ ಚೊ಼ರ್ ಹುತ್ತಾ. ಆನಿ ಪೈಶಾಂಚಿ ಪಿಸ್ವಿ ತ್ಯಚಾ ತಾಬ್ಯಾತ್ ಹುತ್ತಿ. ತ್ಯಾತ್ಲ ಪೈಸ ಚು಼ರುನ್ ಆಪ್‌ಲ್ಯಾ ಕಾಮಾಲಾ ವಾಪ್ರಿತಾ. ಮನ್ಹುನ್ ತಸಾ ಮನ್ಲಾ.

7ಯೇಸುನಿ ತ್ಯಲಾ, “ತಿಲಾ ಥಾಂಬ್ವು ನಕೊಸ್. ಮಾಜೆ ಮಾತಿಚಾ ದಿಸಾದಿಸಿ ಕರಾಚ಼ ಕಾಮ್ ತಿ ಆತಾ ಕರ್ತೆ. 8ಗರಿಬ ಕವಾಬಿ ತುಮ್ಚಿ ಸಂಗ ರಾಥ್ಯಾತ ಫನ್ ಮಿ ತುಮ್ಚಿ ಸಂಗ ಖಾಯಿಮ್ ರಾಹಿತ್ ನಾಹಿ” ಮನ್ಲಾ.

ಲಾಜ಼ರಾಚೆ ಆಡ್ವಿ ಪಾರಕ್

9ಯೇಸು ಬೆತಾನಿತ್ ಹಾ ಮನ್ಯಾಚ಼ ಯೆಹುದ್ಯಾಂಚಾನಿ ಐಕುನ್ ಆನಿ ಲಾಜ಼ರಾಲಾ ಬಗಾಯಾ ವ್ಹಯಿ ಮನ್ಹುನ್ ತಿಥ ಗಿಲಿತ. ಯೇಸುನಿ ಜಿತ್ತಾ ಕೆಲ್ಯಾಲಾ ಲಾಜ಼ರ್. 10ಫನ್ ಮುಖ್ಯ ಯಾಜಕಾಂಚಾನಿ ಲಾಜ಼ರಾಲಾಬಿ ಮಾರುನ್ ಟಾಕಾಯಾ ಪಾರ್ಖಿ ಕೆಲ್ಯಾ. 11ಲಾಜ಼ರಾಸ್ ಲಾಗುನ್ ಖುಬ್ ಯೆಹುದಿ ಲೊಕ ಆಪ್‌ಲ್ಯಾ ಜಾಂತ್ಯಾನಾ ಸುಡುನ್ ಯೇಸುವ ಇಸ್ವಾಸ್ ಥಿವಿತಿತ.

ಜಯೊತ್ಸವಾನಿ ಯೆರುಸಲೆಮಿತ್ ಯೇಸುಚ಼ ಯನ

(ಮತ್ತಾಯ್ 21:1-11; ಮಾರ್ಕ್ 11:1-11; ಲುಕ್ 19:28-40)

12ದಿಸ್ರೆದಿಸಿ, ವಲಾಂಡ್ಯಾಚಾ ಸನಾಲಾ ಆಲ್ಯಾಲ್ಯಾ ಲೊಕಾಂಚಾ ಮೊಟ್ಯಾ ಹಿಂಡಾನಿ ಯೇಸು ಯೆರುಸಲೇಮಿತ್ ಯತ್ಯೊ ಮನ್ಹುನ್ ಬಾತ್ನಿ ಐಕ್ಲಿ. 13ಆನಿ ಲೊಕ ಖರ್ಜುರಾಚಾ ಢಾಳ್ಯಾ ಗಿವುನ್ ತ್ಯಲಾ ಬಗಾಯಾ ಗಿಲಿತ. ಆನಿ “ಹೊಸನ್ನಾ” ಪ್ರಭುಚಾ ನಾವಾನಿ ಯತ್ಯಾಲ್ಯಾಲಾ ದೇವ್ ಆಶಿರ್ವಾದ್ ಕರುನಿ, ಇಸ್ರಾಯಲಾಚಾ ರಾಜಾಲಾ ದೇವ್ ಆಶಿರ್ವಾದ್ ದಿವುನಿ. ಆಸಿ ತೀ ವರ್ಡುನ್ ಸಾಂಗಿತಿತ.

14ಯೇಸುಲಾ ಯಾಕ್ ಗಾಡಾವ್ ಗಾವ್ಲ, ತ್ಯಚಿವ ಬಸುನ್ ನಿಗಾಲಾ. ಧರ್ಮಶಾಸ್ತಾರ್ ಸಾಂಗತ್ಯಾ ಶಾರ್ಕ ಹ್ಯ ಗಡ್ಲ.

15“ಚಿಯೊನ್ ಪೆಠತ್‌ಲ್ಯಾ ಲೊಕಾನಾ, ಭಿಹು ನಕೊಸಾ!

ಬಗಾ! ತುಮಚಾ಼ ರಾಜಾ಼ ತ್ಯೊ.

ತ್ಯೊ ಗಾಡ್ವಾಚಾ ಪೊರಾವ ಬಸುನ್ ಯತ್ಯೊ. #ಜಕರಿಯಾ 9:9

16ಯೇಸುಚಾ ಶಿಶಾಂಚಾನಿ ಆಂದಿ ಹ್ಯ ಸಮ್‍ಜು಼ನ್ ಗೆತ್ಲ ನಾಹಿ. ಫನ್ ಯೇಸು ಮೈಮಾನಿ ಜಿತ್ತಾ ವ್ಹವುನ್ ಉಟ್‌ಲ್ಯಾ ನಂತರ್, ಹ್ಯಾ ಗುಸ್ಟಿ ಧರ್ಮಶಾಸ್ತಾರಾತ್ ಲಿವ್‍ಲ್ಯಾತಾ ಮನ್ಹುನ್ ಶಿಶಾನಾ ಯಾದ್ ಆಲಿ; ಲೊಕ ಹೆ ತರನಿ ತ್ಯಚಿ ಸಂಗ ಚಾ಼ಲ್ಲಿತ ತವಾ.

17ಯೇಸುನಿ ಲಾಜ಼ರಾಲಾ ಮಸುರ್ಡಿತ್ನಿ ಬಾಹಿರ್ ಹಾಕಟ್‌ಲ್ಯಾಲ ಆನಿ ಮರ್ನಾತ್ನಿ ಜಿತ್ತಾ ಕೆಲ್ಯಾಲ ತ್ಯಚೆ ಮಾಗ ಆಸಲ್ಯಾಲ್ಯಾಂಚಾನಿ ಬಗ್ಲ ಆನಿ ಸಾಕ್ಶಿ ದಿಲಿ. 18ಯೇಸುನಿ ಕೆಲ್ಯಾಲಿ ಹಿ ಚಮತ್ಕಾರಾಚಿ ಕಾಮ ಐಕುನ್, ಲೊಕ ಹಿಂಡಾ ಹಿಂಡಾನಿ ಯೇಸುಲಾ ಬೆಠಾಯಾ ಗೆಲಾ. 19ಮನ್ಹುನ್ ಫರಿಸಾಯ್, “ಬಗುನ್! ಆಮ್ಚಿ ಯವಜ್ನಾ಼ ಉಪೆಗ್ ಜಾ಼ಲಿ ನಾಹಿ. ದುನ್ಯಾ ಸಗ್ಳಿ ತ್ಯಚೆ ಮಾಗ್ನಿ ಜಾ಼ಯಾ ಲಾಗ್ಲಿ!” ಮನ್ಹುನ್ ಯಕಾಮಕಾಲಾ ಬೊಲ್ಲ.

ಥೊಡ ಗ್ರೀಕ್ ಯೇಸುಲಾ ಶೊತ್ಯಾಲ

20ವಲಾಂಡ್ಯಾಚಾ ಸನಾಲಾ ಆರಾಧನ್ ಕರಾಯಾ ಯೆರುಸಲೆಮಿತ್ ಆಲ್ಯಾಲ್ಯಾತ್ ಥೊಡ್ ಗ್ರೀಕ್ಬಿ ಹುತ್ತ. 21ತೇ ಗಲಿಲಾಯಾಚಾ ಬೆತ್ಸಾಯಿ ಗಾವಾತಲ್ಯಾ ಫಿಲಿಪ್ಪಾಪ ಗಿಲಿತ. “ಆನಿ ಸಾಯಬಾ, ಆಮಿ ಪ್ರಭು ಯೇಸುಲಾ ಬಗಾಯಾ ವ್ಹಯಿ” ಮನ್ಲಿತ. 22ಫಿಲಿಪ್ಪ ಆಂದ್ರೆಯಾಪ ಗೆಲಾ ತ್ಯಾ ದೊಗಾಂಚಾನಿ ಯೇಸುಪ ಜಾ಼ವುನ್ ಹಿ ಖನ್ಕತ್ ಸಾಂಗ್ಲಿ.

23ಯೇಸುನಿ ಉತ್ತರ್ ದಿಲಾ, “ಮಾನ್ಸಾಚಾ಼ ಲ್ಯೊಕ್ ಆಪ್ನು ಮೈಮಾ ಗಿಯಾಚಾ಼ ಯೊಳ್ ಆತಾ ಆಲ್ಯಾ. 24ಮಿ ತುಮಾನಾ ಖರ ಸಾಂಗ್ತೊ. ಕುಟ್ಪರ‍್ಯಾತ್ ಘವ್ಹಾಚಾ಼ ಯೊಕ್ ದಾನಾ ಜಿಮ್ನಿವ ಪಡುನ್ ಮರತ್ ನಾಹಿ. ತಬರ್ ತ್ಯ ಯಾಕುಸ್ ರಾಥ ಕವಾ ತ್ಯ ಮರ್ತ ತವಾ ಮೆಜಾ಼ಯಾ ವ್ಹಯಿತ್ ನಾಹಿ ತ್ಯವ್ಡ ಘಹು ಉತ್ಪನ್ ಕರ್ತ. 25ಕೊನ್ ಆಪ್ಲಾ ಸ್ವತಾಚಾ ಜೀವಾಚಿ ಮಾಯಾ ಕರ್ತೊ ತ್ಯೊ ತ್ಯ ಸಾಂಡುನ್ ಗೆತೊ. ಕೊನ್ ಆಪ್ಲಾ ಸ್ವತಾಚಾ ಜಿವ್ ದ್ವೆಶ್ ಕರ್ತೊ ತ್ಯೊ ಶಾಶ್ವತ್ ಜಿವಾಲಾ ರಾಕುನ್ ಥೆವ್ನಾರ್. 26ಕೊನ್ ಮಾಜಿ ಸೇವಾ ಕರಾಯಾ ವ್ಹಯಿ ಮಂಥೊ ತ್ಯೊ ಮಾಜೆ ಮಾಗ್ನಿ ಯಯಾಸ್ ವ್ಹಯಿ. ಆನಿ ಮಾಜ಼ ಸೇವಕ್ ಮಿ ಕುಠ ಹಾ ತಿಥ ರಾನ್ಹಾರ್. ಆನಿ ಮಾಜಾ಼ ಬಾ ಮಾಜಿ ಸೇವಾ ಕೊನ್ ಕರ್ತ್ಯೊ ತ್ಯಲಾ ಆದಾರ್ ಕರ್ತೊ.

ಆಪ್‌ಲ್ಯಾ ಮರ್ನಾಚೆ ಗುಸ್ಟಿತ್ ಯೇಸುಚ಼ ಸಾಂಗ್ನ

27ಯೇಸುನಿ ಬುಲಿ ಚಾ಼ಲು ಕರುನ್, “ಆತಾ ಮಾಜಾ಼ ಜೀವ್ ಗಾಬಾರಲ್ಯಾ. ಮಿ ಕ್ಯಾ ಸಾಂಗು? “‘ಬಾ, ಹ್ಯೊ ಯೊಳ್ ಮಾಜಿವ ಯವು ದಿವುನಕೊಸ್ ಮನ್ಹುನ್ ಸಾಂಗು ಕ್ಯಾ”? ಕಾ ಮಂಜೆ ಮಿ ಹ್ಯಾ ತರಾಸಾಚಾ ಯಳಾತ್ನಿ ಜಾ಼ಯಾ ವ್ಹಯಿ. 28ಬಾ, ತುಜ಼ ನಾವ್ ಮೊಟ ಕರ್!” ಮನ್ಲಾ. ತವಾ ಸ್ವರ್ಗಾತ್ನಿ, “ ಮೊಟ ಕೆಲ್ಯಾ ಆನೀಕ್ ಮೊಟ ಕರ್ನಾರ್.” ಆಸಾ ಆವಾಜ಼್ ಆಲಾ

29ತಿಥ ಉಬಿ ರಾಯ್‌ಲ್ಯಾಲ್ಯಾ ಲೊಕಾಂಚಾನಿ ಹ್ಯೊ ಆವಾಜ಼್ ಐಕುನ್, “ತ್ಯ ಗರಾಜ಼ಲ್ಯಾಲ” ಮನ್ಲ. ಫನ್ ದುಸ್ರಿ ಲೊಕ, “ದೇವ್ದುತ್ ಯೊಕ್ ಯೇಸು ಸಂಗ ಬೊಲ್ಲಾ ಮನ್ಲಿತ.

30ಯೇಸುನಿ ಲೊಕಾನಾ, “ತ್ಯೊ ಆವಾಜ಼್ ಜಾ಼ಲ್ಯಾಲಾ ಮಾಜಾ ಬರ‍್ಯಾ ಸಾಟಿ ನವ್ಹ, ತುಮ್ಚಾ ಬರ‍್ಯಾ ಸಾಟಿ. 31ಆತಾ ಹ್ಯಾ ಲೊಕಾಚಾ಼ ನ್ಯಾಯಿ ತಿರ್ಮಾನ್ ವ್ಹಯಚಾ಼ ಯೊಳ್ ಆಲ್ಯಾ. ಆತಾ ಹೆ ದುನೆಚಾ ಅಧಿಕಾರ‍್ಯಾಲಾ ಬಾಹಿರ್ ಢಕಲ್ನಾರ್. 32ಮಿ ಕವಾ ಹೆ ದರ್ಥಿವ್ಲಾ ವರ್ ಜಾ಼ನಾರ್. ತವಾ ಸಗ್‌ಳ್ಯಾ ಲೊಕಾನಾ ಮಿ ಮಾಜಿಕ್ಡ ಗೆನಾರ್” ಮನ್ಹುನ್ ಸಾಂಗ್ಲ. 33ಆಪ್ನು ಕಸಾ ಮರ್ನಾರ್ ಮನ್ಹುನ್ ಯೇಸುನಿ ಹೆ ಬುಲಿನಿ ದಾವುನ್ ದಿಲ್ಯಾ.

34ಲೊಕಾಚಾಂನಿ ಉತ್ತರ್ ದಿಲಾ, “ಕ್ರಿಸ್ತ ಶಾಶ್ವತ್ ಜೀವ್ನಾ ಕರ್ನಾರ್ ಮನ್ಹುನ್ ಆಮಚ಼ ಧರ್ಮಶಾಸ್ತಾರ್ ಸಾಂಗ್ತ. ಆನಿ, ‘ಮಾನ್ಸಾಚಾ಼ ಲ್ಯೊಕ್ ವರ್ ಉಚ಼ಲ್ನಾರ್’ ಮನ್ಹುನ್ ತು ಸಾಂಗಾಚ ಕಾ? ಹ್ಯೊ ಮಾನ್ಸಾಚಾ಼ ಲ್ಯೊಕ್ ಕೊನ್?

35ತ್ಯವಾ ಯೇಸು ತ್ಯನಾ, “ಆನಿ ಥೊಡ ದಿಸ್ ತ್ಯವ್ಡಸ್ ಉಜಿಡ್ ತುಮ್ಚಿ ಸಂಗ ರಾನ್ಹಾರ್. ಕುಟ್ಪರ‍್ಯಾತ್ ಉಜಿಡ್ ಹಾ ತಿತ್ಪರ‍್ಯಾತ್ ಚಾ಼ಲತ್ ರಾವ್ಹಾ. ಕಾ ಮಂಜೆ ಅಂದಾರಾನಿ ತುಮಾನಾ ಜಾ಼ಕುನ್ ಗಿಹುನಾಹಿ. ಅಂದಾರಾತ್ ಚಾ಼ಲತ್ಯಾಲ್ಯಾಲಾ ಆಪ್ನು ಕುಠ ಜಾ಼ತ್ಯೊ ಮನ್ಹುನ್ ಸಮಜ಼ತ್ ನಾಹಿ. 36ಕುಟ್ಪರ‍್ಯಾತ್ ಉಜಿಡ್ ತುಮ್ಚಿ ಸಂಗ ಹಾ ತಿತ್ಪರ‍್ಯಾತ್ ತ್ಯಚಿವ ಇಸ್ವಾಸ್ ಥೆವಾ. ತ್ಯಚಿಸಾಟಿ ಉಜಿಡಾಚಿ ವ್ಹಸಿಲಾ” ಮನ್ಲಾ. ಹ್ಯಾ ಖನ್ಕತಿ ಸಾಂಗ್‌ಲ್ಯಾ ನಂತರ್ ಯೇಸು ತಿಥ್ನಿ ನಿಗುನ್ ಗೆಲಾ, ಆಪ್ಲೆ ಆಪ್ನುಸ್ ದಡಾಲಾ.

ಲೊಕಾಂಚಾ಼ ಇಸ್ವಾಸ್ ನಸ್‍ಲ್ಯಾಲಾ

37ಯೇಸುನಿ ಖುಬ್ ಚಮತ್ಕಾರಾಚಿ ಕಾಮ ತ್ಯಂಚೆ ಮೊರ‍್ಹ ಕಿಲಿತ. ತರಿಬಿ ತ್ಯಚಾಂನಿ ತ್ಯಚಿವ ಇಸ್ವಾಸ್ ಥೆವ್ಲಾ ನಾಹಿ. 38ಹ್ಯಚಿಸ್‌ ಲಾಗುನ್, ಪ್ರವಾದಿ ಯೆಶಾಯಾನಿ ಸಾಂಗ್‌ಲ್ಯಾಲ ತ್ಯ ಖರ ಪುರ್ನ ವ್ಹವುನಿ. ತ್ಯ ಕ್ಯಾ ಮಂಜೆ.

“ಪ್ರಭು, ಆಮ್ಚಾ ಸಾಂಗ್‌ನ್ಯಾವ ಕುನಿ ಇಸ್ವಾಸ್ ಥೆವ್ಲಾ?

ಪ್ರಭುಚ಼ ಬಳ್ ಕುನಾವ ಪ್ರಗಟ್ ಕೆಲ್ಯಾ? #ಯೆಶಾಯ್ 53:1

39ತ್ಯಂಚಿಸ್ ಲಾಗುನ್ ಲೊಕಾನಾ ಇಸ್ವಾಸ್ ತೆವಾಯಾ ಜಾ಼ಲಾ ನಾಹಿ. ಕಾ ಮಂಜೆ ಯೆಶಾಯಾನಿ ಆನಿ ಯಕಿಕ್ಡ ಆಸ ಸಾಂಗ್ಲ: 40ದೇವಾನಿ ತ್ಯಂಚ಼ ಡೊಳ್ ಆಂದ್ಳ ಕೆಲ್ಯಾತ ಆನಿ ತ್ಯಂಚಿ ಮನ ಕಟೊರ್ ಕೆಲ್ಯಾತ ಆನಿ ತ್ಯಂಚಾನಿ ಆಪಲ್ಯಾ ಡೊಳ್ಯಾನಿ ಬಗು ನಾಹಿ ಆಪ್ಲೆ ಬುದ್ದಿನಿ ಸಮಜು಼ನ್ ಗಿಹು ನಾಹಿ. ಆನಿ ತೀ ಮಾಜಿಕ್ಡ ಪರ್ತುನಾಹಿ ಆಸ ಮಿ ತ್ಯನಾ ಬರ ಕರುನಾಹಿ. ಮನ್ಹುನ್ 41ಯೆಶಾಯಾನಿ ಹ್ಯ ಸಾಂಗ್‌ಲ್ಯಾಲ ಕ್ಯಾ ಮಂಜೆ ತ್ಯನಿ ತ್ಯಚಿ ಮೈಮಾ ಬಗ್ಲಿ ಹುತ್ತಿ ಆನಿ ತ್ಯಚೆ ಗುಶ್ಟಿತ್ ಬೊಲ್ಲಾ.

42ತವಾ ಖುಬ್ ಲೊಕಾಚಾಂನಿ ಯೇಸುವ ಇಸ್ವಾಸ್ ಥೆವ್ಲಾ. ಖುಬ್ ಯೆಹುದಿ ಅಧಿಕಾರಿಂಚಾನಿ ಸಾಹಿತ್ ಯೇಸುವ ಇಸ್ವಾಸ್ ಥೆವ್ಲಾ. ಫನ್ ತ್ಯಂಚಾನಿ ಫರಿಸಾಯಾನಾ ಬಿಹುನ್ ಆಪ್ಲಾ ಇಸ್ವಾಸ್ ಬಾಹಿರ್ ದ್ಯಾವ್ಲಾ ನಾಹಿ. ಆಪ್ಲ ಫರಿಸಾಯ್ ಸಬಾಸ್ತಾನಾತ್ನಿ ಬಾಹಿರ್ ಗ್ಯಾಲ್ನಾರ್ ಮನ್ಹುನ್ ತ್ಯನಾ ಭೆ ಹುತ್ತ. 43ತ್ಯನಾ ಮಾನ್ಸ ದೆತ್ಯಾಲಿ ಮರ‍್ಯಾದ್ ದೇವಾಚೆ ಮರ‍್ಯಾದಿವ್ನಿ ಮುಟಿ ಜಾ಼ಲ್ಥಿ.

ಯೇಸುಚಾ ವಚ಼ನಾನಿ ನ್ಯಾಯಿ ತಿರ್ಮಾನ್

44ನಂತರ್ ಯೇಸು ಜೊ಼ರಾನಿ ಆಸಾ ಮನ್ಲಾ: “ಕೊನ್ ಮಾಜಿವ ಇಸ್ವಾಸ್ ಥೆವ್ತೊ ತ್ಯೊ ಮಾಜಿವ ತ್ಯವ್ಡಾಸ್ ನವ್ಹ ಮನಾ ಲಾವುನ್ ದಿಲ್ಯಾಲ್ಯಾವಬಿ ಇಸ್ವಾಸ್ ಥೆವ್ತೊ. 45ಮನಾ ಕೊನ್ ಬಗ್ನಾರ್ ತ್ಯೊ ಮನಾ ತ್ಯವ್ಡಸ್ ನವ್ಹ ಮನಾ ಲಾವುನ್ ದಿಲ್ಯಾಲ್ಯಾಲಾಬಿ ಬಗ್ನಾರ್. 46ಮಿ ದುನೆತ್ ಉಜಿಡಾಚಾ ರುಪಾತ್ ಆಲ್ಯೊ ಕಾ ಮಂಜೆ ಕೊನ್ ಮಾಜಿವ ಇಸ್ವಾಸ್ ಥೆವ್ನಾರಾ ತ್ಯೊ ಆಂದಾರಾತ್ ರಾಹುನಾಹಿ.

47ಕೊನ್ ಮಾಜಾ಼ ಸಮಾಚಾರ್ ಐಕುನ್ ತ್ಯಚಿವ ಇಸ್ವಾಸ್ ಥಿವಿತ್ ನಾಹಿ ಮಿ ತ್ಯಚಾ಼ ನ್ಯಾಯಿ ತಿರ್ಮಾನ್ ಕರ್ನಾರ್ ನಾಹಿ ಕಾ ಮಂಜೆ ಮಿ ನ್ಯಾಯಿ ಕರಾಯಾ ಆಲೊನಾಹಿ ತ್ಯನಾ ರಕ್ಶನ್ ಕರಾಯಾ ಆಲ್ಯೊ. 48ಕೊನ್ ಮನಾ ನಕ್ವಾಟ್ ಕರ್ತೊ ಮಾಜಾ ಬೊಲ್ಯಾ ಮಾನಿತ್ನಾಹಿ ತ್ಯನಾ ನ್ಯಾಯಿ ತಿರ್ಮಾನ್ ಕರ್ತ್ಯಾಲಾ ಯೊಕ್ ಹಾ ತ್ಯೊ ಮಿ ಸಾಂಗ್‌ಲ್ಯಾಲ ಮಾಜ಼ ವಚ಼ನುಸ್ ಜಾ಼ಲ್ಯಾ ಸರ್ತ್ಯಾ ದಿಸಾತ್ ತ್ಯಾ ಬೊಲ್ಯಾಸ್ ತ್ಯಚಾ಼ ನ್ಯಾಯಿ ತಿರ್ಮಾನ್ ಕರ್ನಾರ್. 49ಹ್ಯ ಖರ ಹಾ, ಕಾ ಮಂಜೆ ಮಿ ಮಾಜಾ ಅಧಿಕಾರಾನಿ ಕಾಯ್ ಸಾಂಗ್ಲ ನಾಹಿ ಫನ್ ಮನಾ ಲಾವುನ್ ದಿಲ್ಯಾಲ್ಯಾ ಬಾನಿ ಹುಕುಮ್ ದಿಲ್ಯಾ ಮಿ ಕ್ಯಾ ಸಾಂಗು ಆನಿ ಸಿಕ್ವು. ಮನ್ಹುನ್ 50ತ್ಯಚಾ ಆಜ್ಞೆ ಶಾಶ್ವತ್ ಜೀವ್ ಜಾ಼ಲ್ಯಾತಾ ತ್ಯ ಮನಾ ಠಾವ ಹಾ ಮನ್ಹುನುಸ್ ಮಿ ಬೊಲತ್ಯಾಲ ಸಗ್ಳ ಬಾನಿ ಮನಾ ಸಾಂಗ್‌ಲ್ಯಾಲಸ್. ”

Currently Selected:

ಯೊಹಾನ್ 12: NTGMi23

Highlight

Copy