Markus 3
3
Yesu a gwadə ma tɨfəngɨn a mbɨrə a Kafanawum
(Matta 12.9-14; Luka 6.6-11)
1Ite Yesu nee a vɨra Kafanawum, nda mɨna pɨrə vor vɨnə kəndəshe da Yawude, nda pa ama a vor vɨnəngɨn ma tɨfəngɨn a mbɨrə. 2Fərəngɨn fərə piyati da Yawude, gə ləngɨn imi dɨ vor Farise a pukən diingrən ta nidən anda ndi ɓa gwadə mangɨn a fərə piyatɨ darən gə təna ɗɨmgən le. 3Yesu a sa mangɨn atɨ, “Maɗi kangəə humwaa ɓwaare kat.”
4Yesu a virwo haka mbiɗitɨ myee nza a ɗiyərən, “Ɓə ndoɗinə ɓashitə a boyə nə fərə piyata? Ɗa səfeme nə ma naasə mgban ɗa səhase na, a mya mbə myenta naasə mya kɨɗa myentɨ ɓwaara?” Tən kat təna nza ɗəng, ama aa wunakan.
5Yesu a virwa a filakarən ka yedi-kɨttə, ləngrən a orən gə nyerəta hubosərən. Nda sa mangɨn atɨ, “Tɨddə tɨfanga.” Mangɨn a tɨddə tɨfəngɨn. Tɨfəngɨn a mɨna pepe. 6Də a hangɨn Farise a dɨmə haa bwange a peyə ka myee da həmɨn Hiridus a shalasə le a nə ɗate tən ɓa ɗa gə təna kɨt Yesu a ɓɨlə.
Təkə-təkətɨ ɓwaare a koɗə Yesu
7Yesu mgban ka lagbe dan a dɨmə a muɗə kwaka gərə Galili, ɓwaare hananang a dɨmə dɨ vor Galili a koɗən. 8Ite ləmə shee Yesu a dɨ ɗa a ngguro a mbəgə hee kat, ɓwaare furi-furi a dɨma dɨ vor njiya Yawudiya ka vɨra Urshelima ka njiya Idumiya ka myee a ɓayatɨ gbɨnuwo Urdun ka myee dɨ vɨra Taya ka Sidon. 9Gəkɨlə furo ɓwaare, nda sa lagbe dan atɨ a təna lɨkədə koombotə ngga gɨrgə kwakatə gə nda nza vorsə a tawagə ɓwaare. 10Gə a itɨngɨn ɓə gwadə ɓwaare hananang tən piyagə sɨtɨ otə darən, səngɨn ɗa myee ka ootə kat a paya ta ləkədəsə gəkɨlə nagi ndo ma nee dɨ mwi atɨ nda pa sɨtɨ Yesu. 11Myee ka pɨle ji-dwatə a sɨsərən kat, kana naa Yesu, təna dɨ fokə njiya a humwasən ta mgbəngtənyi ta gəəshe atɨ, “Hyenə Nze da Həmɨnpwa.” 12Shezə nda dɨ gɨra ji-dwatɨngɨn ɓe tənaa bɨlə ama atɨ sɨnə wonə.
Yesu a nggɨl kpe-lagbe bəw a mbiɗi-kpe
(Matta 10.1-4; Luka 6.12-16)
13Yesu a nggɨrə nə motə a waga myee ndi ɓa nggɨlə, təna zə hakan. 14Dɨ vorsərən nda nggɨl ɓwaare bəw a mbiɗi-kpe, tənə myee gəə kpe-lagbe, tənə ndi ɓa lyentɨrən təna woyo a hiwa ka le da Həmɨnpwa. 15Tənə mgban myee ndi ɓa vərən gətə gə təna dɨmdə pɨle ji-dwatə. 16Kwaki kpe-lagbengɨn bəw a mbiɗi-kpe nə yang:
Siman, a Yesu a warən atɨ Bitrus,
17ka Yakubu nze da Zabadi ka mufəngɨn Yohana 'ye Yesu ka nənəngɨn a dɨ watɨrən atɨ Bonajis (naarəngɨn nə je da mgbaratə),
18ka Andrawus,
ka Filibus,
ka Batalamawus,
ka Matta,
ka Tomas,
ka Yakubu nze da Alfiyus,
ka Siman nzə-nyatə gə njiya,
ka Tadawus,
19ka Yawuda Iskariyoti ma ɓaga ɗərdə Yesu.
Yesu ka Belzabub
(Matta 12.22-32; Luka 11.14-23; 12.10)
20Ite Yesu a mɨna a vɨra Kafanawum asɨ pɨrə hwoɗyee nda duwa nza də, təkə-təkətɨ ɓwaare a peyə hakan, hwoɗye a naa pas, taayə humwaa zɨmshi kan tən kat ka lagbe dan. 21Ite myee a sɨsən ɓətɨ yə ndewogən, ka mwafengɨn, ka mbiɗisərən ɓe naa ləngɨn, təna shi ɓa nggutən a muɗə kan a hwoɗye, gəkɨlə təna dɨ sa atɨ, “Ɓə tamdə a sombingɨn.”
22Ji-lee kəndə ɓashita Musa 'ye shi dɨ Urshelima a sa atɨ, “Makpanə pɨla da ji-dwate mya dɨ wa atɨ Belzabub nə pɨrə sɨtɨ Yesu! Ka gəta Belzabub#3.22 Belzabub: A kwakə mya dɨ wa Shetan kan. həme da pɨle ji-dwatə nda dɨ dɨmdə pɨle ji-dwatə gə sɨtɨ ɓwaare.”
23Yesu aɓə wagatɨrən a boyərən lə səɗe, nda sarən atɨ, “Ɓə ya Shetan ndi ma nzə-dwati ɓa mɨna dɨmdə nduwongɨn Shetanti gə sɨtɨ ɓwaare ɓə? 24Di həmne kana təkə kpe, həmnəngɨn aa dɨ kangaa, ndi ɓa fukə njiya a kɨɗə ɓaa. 25Sə mgban, hwoɗye kana təkə kpe, hwoɗingɨn aa dɨ kangaa, ta fukə a kɨɗə ɓaa. 26Shetan kana ndɨlə dɨ nya ka nəngɨn, a dɨ dɨmdə pɨle ji-dwatə dan, ndaa dɨ ɗɨm nyerətə a kangə, hɨnggən mbəə. 27Ka diyale, taa ama də ɓa mba pɨrtə a pɨrə hwoda gbinda a porgən shee a ndaa ɓwerən, nda ɓə porgən shi hwodan. 28Diyalə na dɨ boyownə, nagi ndo səhasə ɓwaara a ɗa, mye ɓa nggurəngə səhasəngɨn, nagi kɨɗa kwakə. 29Nagi ndo ma kɨɗa kwakɨ Pitɨ Ɗəmɗəmti ka sharha, angɨn myaawa ngguro ɓwaara gən. Shezə wule səhasəngɨn a dɨ nza nə ma kaaru-kaaru.”
30Yesu a boyə sə gəkɨlə təna dɨ sa atɨ, “Sɨne ka pɨle ji-dwatə a sɨsən.”
Nuwogə Yesu ka mwaafengɨn
(Matta 12.46-50; Luka 8.19-21)
31Nuwogə Yesu ka mwafengɨn a shi asɨ kangə kwatɨfə hwoɗye. Təna lyen ama atɨ na mya warən nda shi. 32Təkə-təkətɨ ɓwaare nee nza takadən kat a vor hwoɗye. Mya san atɨ, “Yə nuwogu ka mwafenga nee kangə haa bwange dɨ mwa təna nəw.”
33Nda ɗiyərən atɨ, “Nda yə nuwogi ka mwafe nə yə wonə?”
34Nda nidə myee nza takadən dɨ kɨltən a mbəə, nda ɓə shea sarən atɨ, “Minə nzaa nzatɨnə, tənə yə nuwogi ka mwafe! 35Ma kat dɨ koddə kanata Həmɨnpwa sɨnə nzə-mufa ka mwafɨri ka nuwogi.”
Currently Selected:
Markus 3: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
