Matta 6
6
Kəndəshe a nə vədə həmtə
1“Bəmdə myensəwnə, ɓe səfeme dəwnə aa dɨma bwang a humwa ɓwaare gə təna nan a humownə. Hwun kana ɗaasə, taayə moonə kəwnə dɨ haka Baagəwnə arə a vor pwa.
2“Gə-angɨn, hwun kana ɓa və myee taa gəti kaarən asə, ɓe hwunaa kangə a hiwa ka ləngɨn a haa bwange ɓətɨ ji-kwakpeye a dɨ ɗa a vor vɨnə kəndəshe ka nə təfəgye gə mya humwarən. Diyalə na dɨ boyownə, tən luu moone darən mbəə kat. 3Hɨnggu, hye kana ɓa və myee taa gəti kaarən asə, ɓe mwa ama a leyə, ɓe tɨfə lyekɗe aa lee sa tɨfə zɨme a dɨ ɗa, 4gələ həmte hye dɨ vədə a gə haa ɓotə. Ndi Baagu a dɨ naa sa mya dɨ ɗa a haa ɓotə mgban ɓa mbow moone.
Hiwtə
(Luka 11.2-4)
5“Na hwun ɓa hiwo, ɓe hwunaa ɗa ɓətɨ ji-kwakpeye a dɨ ɗa, gəkɨlə təna dɨ mwo kangtə a nə ɓwaare a vor vɨnə kəndəshe, ka kangtə a təktɨ təfəgye a haa bwange bwang, gə ɓwaare a naarən. Diyalə na dɨ boyownə, tən luu moone darən mbəə. 6Hɨnggu, na hye ɓa hiwo, pɨrə vor vɨne, hye gbə kwa-vɨne a ɗa Baagu a myaawa nan hiwtə. Baagu a dɨ naa sa mya ɗa a haa ɓotə ɓa mbow moone. 7Na hwun ɓa hiwo, ɓe hwuna ɗa hiwtə ta mɨn-magba a nə le hiɗə ɓətɨya myee aa lee Həmɨnpwa a dɨ ɗa, gəkɨlə təna dɨ niyə ɓətɨ mye ɓa kɨltɨrən gəkɨlə byelə gbake darən. 8Ɓe hwunaa gə ɓətɨ tən, gə ite hwunaa nda nyisən, Baagəwnə lee sa hwuna dɨ mwo.
9“Yangnə kana hwuna ɗa hiwtə:
“ ‘Baagenə gaarə a vor pwa,
maa kwakɨ ɗəmɗəme dəw a ɗɨm fukatə.
10Həmne dəw a shi,
maa kanatɨ dəw
a nza ganə a vɨratə
ɓətɨ ngga gə gaarə
a vor pwa.
11Venə supo sɨzɨmtɨ nagi ndo fərə.
12Hye nggurenə gə səhase denə,
ɓətɨya hina ngguro ɓwaare
gə səhasa təna ɗenə.
13Ɓe ɗakenə
hina pɨrə vor kanaha.
Hye mbədenə
gə tɨfə ma hasəngɨn.’
14Gə hwun kana dɨ ngguro ɓwaare gə səhase darən a təna ɗəwnə, Baagəwnə arə a vor pwa ɓa nggurəwnəgə hɨnggəwnə mgban. 15A hwunaawa ngguro ɓwaare gə səhase darən a təna ɗəwnə, Baagəwnə aa dɨ nggurəwnəgə hɨnggəwnə mgban.
Gone
16“Hwun kana ɓa gonə, ɓe hwunaa twaka humwasəwnə, ɓətɨ ji-kwakpeye a dɨ ɗa, gəkɨlə təna dɨ twaka humwaasərən ka myatə gə ɓwaare a leyə atɨ təne dɨ goni. Diyalə na dɨ boyownə, tən luu moone darən mbə kat. 17Hɨnggu hye kana ɓa gonə, suɓwa humwasa hye tukwi maare, 18gə ɓe ɓwaare aa leyə atɨ hye nee dɨ goni, pɨrgə Baagu a myaawa nan. Baagu a dɨ naa sa mya dɨ ɗa a haa ɓotə ɓa mbow moone.
Gɨnətə a vor pwa
19“Ɓe hwunaa gbəwo nəngəwnə də gɨnətə a vɨratə, a haa shem-shemətə ka lyewtə a dɨ kɨɗarən də, mahərye mgban a dɨ ɓi haa a pɨrə a hɨrə. 20Gbəwomə nəngəwnə də gɨnətə gaarə a vor pwa, a haa shem-shemətə ka lyewtə aa dɨ kɨɗarən də, mahərye mgban aa dɨ ɓi haa a pɨrə a hɨrə. 21Gəkɨlə a haa gɨnətɨ dəw a gə də, a hangɨn mgban hye ɓa bəə myensa.
22“Diitə, kotə tikɨlə sɨtə. Diinga kana gə pepe, sɨsa kat ɓa gəə ɓɨrti. 23Anda diinga tam pepe, sɨsa kat mgban ɓa gəə kuliti. Ɓə anda ɓɨrte a sɨsa kat kuliti, ka mɨnə mye ɓa kana gbaktɨ kulitɨngɨn?
24“Kɨsa hiɗə aa dɨ pedə həmi-hwoɗye kpe a ɗarən lyentə a kwa-hiɗə. Ndi ɓa kwo ma hiɗə a mwo ma hiɗə, naasə mgban ndi ɓa koddə ma hiɗə nda ushi ma hiɗə. Sə mgban, tee dɨ pedə koɗə Həmɨnpwa ka taa dɨ kpeyə a ɗarən kɨsawne a kwa-hiɗə.
Ɓe hwun aa pɨrə ɗyengle
(Luka 12.22-31)
25“Gə-angɨn na dɨ boyownə atɨ, ɓe hwunaa pɨrə ɗyenglə kɨr-kɨre gə nzaasəwnə a vɨratə, a nə sa hwun ɓa zɨmə ka sa hwun ɓa soɓwo, naasə mgban a nə sɨɓwete hwun ɓa kala. Myentə aa pɨrgə sɨzɨmtə ma? Ɓə sɨtə mgban nggaa pɨrgə sɨɓweta? 26Zə niyəmdə ɓakarye pe, tənaawa hawo a ɗɨkdə asə a bongge, kat ka angɨn Baagəwnə a gaarə a vor pwa a dɨ zɨmdərən. Hwunaa pɨrgə ɓakarye ka fukatə ma? 27Wono a vorsəwnə dɨ ha ɗyenglə kɨr-kɨre ɓa mba myensən a gɨrədə nagi ka mbwayi fəre awatə hiɗa?
28“Ɓə gə mɨnə hwuna dɨ ɗyengle kɨr-kɨr a nə sɨɓweta? Zə namə kaakə finte dɨ nggaara pe, a tənaawa lyenə, tənaawa faa saltə. 29Hɨnə dɨ səwnə, kat ka fukata həmɨn Solomon, ndaa ɗɨm sɨɓwetɨ fyemye wula nggaara ɓətɨ fintɨ kaaka. 30Anda Həmɨnpwa ɓa ɓoyo ɓaake sɨɓwetə 'ye supo tənə kanyi ka myentə, kɨɗa tən kpamə ɗiyə ɓa hinarən, gə-angɨn hwuna leyə mbak-mbak atɨ Həmɨnpwa ɓa vəwnə sɨɓwetə. Kək! Hwun ɗongə mwadiyale ɓwaa. 31Gə-angɨn ɗakamə ɗyenglə kɨr-kɨre ka satə atɨ, ‘Mɨnə hin ɓa zɨmə?’ Naasə, ‘Mɨnə hin ɓa soɓwo?’ Naasə mgban, ‘Mɨnə shee hin ɓa ɓoyo?’ 32Gə wule shingɨn kat tənə myee aa lee Həmɨnpwa a dɨ gyeɓərən. Shezə Baagəwnə gaarə a vor pwa leyə atɨ ɓə kana hwuna ɗɨm shingɨn kat. 33Gələ angɨn ɨləm həmne dan a kwamətə kat ka sə pepeya nda dɨ mwo kəwnə, shingɨn inə kat ndi ɓa ɗɨkəwnə də. 34Gə-angɨn ɓe hwunaa ɗyengle kɨr-kɨr a nə kɨɗa, gə kɨɗa nee ka tənəte nggi ɓa waya kaarə. Nagi ndo fərə nee ka tənəte nggi ɓa waya kaarə som.
Currently Selected:
Matta 6: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
