Matta 26
26
Shalalə hase a nə Yesu
(Markus 14.1-2; Luka 21.2; Yohana 11.45-53)
1Ite Yesu a bwe ləməginə a mbəə kat, nda sa lagbe dan atɨ, 2“Hwun leyə atɨ, ɓə mbiɗi bətə kpe mya ɗa kwalə Lawuttɨ dam, myenə ɓa vədi hɨn Nze da Ɓwaara gə mya ɓɨdɨmdi.” 3Də kɨsehəmi kpan-kpanye ka mi kpan-kpanye da Yawude a peyə voti ta Kɨsahəmə kpane a mya wa atɨ Kayafas. 4Təna shalasə le gə təna ɓodək Yesu a kɨttən a ɓɨltən. 5Təna boyəsə atɨ, “Aa dɨ ɗa a fərə sɨkwalə Lawuttə, gəkɨlə ndəng ɓwaaree paya kat ɓa maddə mwanatə.”
Mye yaɓwa Yesu a Betani
(Markus 14.3-9; Yohana 12.1-8)
6Ite Yesu nee a vɨra Betani a vor hwoda Siman a mya leerən ka dagde, 7itɨ meti a shi haka Yesu ka nzɨ-hubo maara ka pome ɨhɨng-ɨhɨng, maarəngɨn ka taa kpan mya dɨ ɗərə. Ngga puka maarəngɨn a nə Yesu ite sɨne nza ɓɨdɨmi.
8Ite lagbe dan a naa sa ngga ɗa, təna ɗa yedi-kɨttə, a ɗiyə atɨ, “Mɨnə ɗa mya kɨɗa maara ɓaa? 9Mya nda ɗərdə maarəngɨn ka taa kpan a ɓyana ji-poritə taangɨn.”
10Yesu ɓe lee ləməgyee təna boyo, nda sarən atɨ, “Yadiya kəwnə ka metɨngɨn? Di sə pepeyə ngga ɗe. 11Hwunə ka ji-poritə a hakəwnə fərə-fərə, hɨn taa dɨ nza kəwnə mba-dɨ-mba. 12Maara ngga puka a sɨshi, di gəkɨlə ngga ɗadə sɨshi gə ɗɨkte mya ɗɨkri. 13Diyalə na dɨ boyownə, nagi a ndo haa mye ɓa hiwa ka ləmə fema nə a vor vɨratə kat, sə mgban mye ɓawa bwelə sa ngga ɗa gə mye ta ɗyanga kaarə.”
Yawuda a mwa ɓa ɗərdə Yesu
(Markus 14.10,11; Luka 22.3-6)
14Də hiɗə dɨ vor lagbe dan inə bəw a mbiɗi-kpe, a mya wa atɨ Yawuda Iskariyoti, a wudə haka kɨsehəmi kpan-kpanye. 15Nda ɗiyərən atɨ, “Mɨnə hwun ɓa vi, hɨn kana vəwnə Yesu?” Təna bəl taa nggɨrngɨme bəwtə mwaakɨn a vən. 16Dɨ fərəngɨn nə Yawuda a tiya ɨl kwatəfəgi ɗate ndi ɓa ɗa gə nda vədə Yesu.
Sɨzɨmtɨ kpawtə
(Markus 14.12-21; Luka 22.7-13,21-23; Yohana 13.21-30)
17A fəra mya tiya kwalə Lawuttə kan, a ite Yawude a dɨ zɨm burodite taa maɗə də, lagbe da Yesu a shi hakan a ɗiyən, “A ndo haa hye dɨ mwo atɨ hina zə a ɗəwdə haa gəkɨlə zɨm sɨlangsətɨ Lawutta?”
18Nda sarən atɨ, “Pɨrəmə vor vɨratə, hwuna zə haka ama nee də, hwuna san atɨ, ‘Nzə-kəndəshe a sa atɨ: Fəre ɓa dɨ kənə, a vor hwodəw hɨn ɓa zɨmshi sɨlangsətɨ Lawuttə, hɨn ka lagbe de.’ ” 19Lagbengɨn a muɗə ɓətɨ Yesu a boyərən, təna ɗa sɨzɨmtɨ sɨlangsətɨ Lawuttɨngɨn.
20Ite kaade a kənə, Yesu ɓe nza ɓɨdɨmə ka lagbe dan tən bəw a mbiɗi-kpesərən a haa zɨmshe. 21Təne a vor zɨmshe, nda sarən atɨ, “Diyalə na dɨ boyownə, hiɗə dɨ vorsəwnə ɓa ɗərdi.” 22Haa aa nɨngərən. Təna tiya ta ɗiyən le hyeɗə-hyeɗə atɨ, “Wonə yə Həmɨmiye? Ka twai aa hɨnə ka la.”
23Yesu a luwa a sarən atɨ, “Ma na shipdə tɨfe kan a vor kpaa sɨzɨmtə, sɨnə ɓa ɗərdi. 24Hɨn Nze da Ɓwaara nə ɓa mbɨrə ɓətɨ mya doro a na a vor Malɨmtɨ Ɗəmɗəmtə. Shezə sə oti ka mangɨn a ɗərdi hɨn Nze da Ɓwaara! Ɓa pɨrən ɓe myaa nda mwasarən a vɨratə.”
25Ndi Yawuda a ɓa ɗərdə Yesu a san atɨ, “Mbak-mbak aa hɨnə ka la kwe Rabi, hɨna?”
Yesu a san atɨ, “Hye boyo ka nənanga.”
26Təne a vor zɨmshe, Yesu a nggur buroditə, nda ɗa Həmɨnpwa usəkətə, nda takarə a və lagbe dan, a sarən atɨ, “Luwom zɨməm, sɨshi nə.”
27Nda mɨna nggur kpaa, nda ɗa usəkətə, nda vərən, a sa atɨ, “Hwun kat, səɓom dɨ vor kpaanə. 28Zaamba nə anə gəkɨlə kɨləsətə, a mya pukadən gə le da ɓwaare hananang, gə mya nggurərəngə səhase darən. 29Hɨnə dɨ səwnə atɨ, taa diyə sop haɓi mbwotɨ kada inabitɨnə baa fərarə a humwa, a itɨngɨn nə hɨn ɓa sop a hwele kəwnə a vor həmne da Baagi.”
30Tən ɓe ga dimsə ɓondiha mbəə, təna dɨmə a muɗə nə Motɨ Kade Zetun.
Yesu a bwe le a nə məntəməta Bitrus
(Markus 14.27-31; Luka 22.31-34; Yohana 13.36-38)
31Yesu a shea sarən atɨ, “Supo ka tukongnə, hwun kat ɓa ɗake, ɓətɨ mya doro atɨ,
“ ‘Hɨn ɓa ɓɨl majine,
mbage kat ɓa gyeɓə
a gbərə hyeɗə-hyeɗə.’#26.31 Naasə: Zakariya 13.7.
32Shezə beetɨ ite hɨn maggə taane, hɨn ɓa pɨrgəwnə a tɨlə vor njiya Galili.”
33Bitrus a tuwo a san atɨ, “Nagi mbiɗitɨ lagbe kat ɓa ɗakəw, hɨn taa dɨ ɗaasə.”
34Yesu a san atɨ, “Diyalə na dɨ boyu, supo ka tukongnə ɗeke ta wa, hye ɓa məntəmə lee shi a laka mwaakɨn.”
35Bitrus a mɨna luwa a san atɨ, “Nagi ɓə nza mbak-mbak na mbɨrə ɓwaa kəw, taa dɨ ga məntəmə lee sa.” Mbiɗitɨ lagbe dan kat a boyo sə mgban.
Gesamani
(Markus 14.32-42; Luka 22.39-46)
36Yesu a muɗə ka lagbe dan a pɨrə vor haa mya wa atɨ Gesamani, nda sarən atɨ, “Nzam kulam ganə, na zə humwa gaarə a ɗa hiwtə.” 37Nda nggur Siman ka je da Zabadi dɨ kpeyə, nda tiya ɗa yedi-kɨttə ka tənətə kɨr-kɨr a hubosən. 38Nda sarən atɨ, “Vor huboshi nə naa ka tənətə kɨr-kɨr ɓətɨ na mbɨrə. Nzam ganə ɓe hwunaa shenə.”
39Nda gɨsə humwa ɓyeləng, nda fukə ka humwasən a njiya, a ɗa hiwtə atɨ, “Baagi, na hye mwa zə nggurigə kpaa tənətɨnə nda pɨrgi. Kat ka angɨn, aa hɨngginə hye ɓa koɗən, shezə koɗə sa hye kana a kanatɨ dəw.”
40Nda mɨna a haka lagbe dan a parən təne dɨ sheni, nda ɗiyə Bitrus atɨ, “Hwun kat mgban hwunaa dɨ mba kangtə ɓwaa ke hwunaa shena, nagi nda awatə hiɗa? 41Ɓe hwunaa shenə, nzam ka diingəwnə ɗam hiwtə, gə ɓe hwunaa pɨrə vor kanaha. Pitə mwa, sɨtə nə taa gəti kaarə.”
42Nda mɨna mɨn kpeyətə ɓə, a hangɨn a ɗa hiwtə atɨ, “Baagi, anda myaa dɨ nggurigə kpaa tənətɨnə, anda ɓə nza mbak-mbak na soɓwo, naa kanatɨ dəw a nzasə.”
43Ite nda mɨna, nda sɨ pa lagbe dan təne mɨni dɨ sheni gəkɨlə ɓwatɨ shintə nee a diingrən. 44Nda mɨna mɨn mwaakɨnə hiwtə ta bwelə hiɗəti.
45Də nda mɨna a haka lagbe dan, nda sarən atɨ, “Hwunə puki ɗəng dɨ sheni piya? Fəre kənə. Niyəm, mye vədi hɨn Nze da Ɓwaara a tɨfə ji-ɗa səhase. 46Maɗəm mya muɗəm! Niyəm ma vədi tɨla!”
Mye kɨr Yesu
(Markus 14.43-50; Luka 22.47-53; Yohana 18.3-12)
47Sɨne a vor byele tee, Yawuda, hiɗə dɨ vor lagbe dan bəw a mbiɗi-kpe, a tɨla. Ɓwaare hananang a kwaɗan, təna pwara ka shi nyatə, yə sungwe ka gbɨlasakye. Mingɨn nə myee kɨsehəmi kpan-kpanye ka mi kpan-kpani Yawude a lyanatɨrən. 48Ndi ma vədə Yesu liya kɨləsə kaarən atɨ, “Səɓo ma na shawa bwakangɨn sɨnə mangɨn. Kɨsəmrən.” 49Yawuda a pɨrə haka Yesu tan-tan a san atɨ, “Rabi, hɨn wunakəw.” Nda shawa bwakangɨn.
50Yesu a san, “Ndewe, zə ɗa sa shikəw ga.”
Də mingɨn mgban a gɨsa asɨ kɨr Yesu a ɓwerən. 51Hiɗə dɨ vor myee ɓwaa ka Yesu a dɨr sungwa dan a viriwdən dɨ haka kɨsa da Kɨsahəmə kpane, a saggə kwakɨngɨn a dɨmdən vat.
52Yesu a san atɨ, “Mɨndə sungwa dəw a vɨnəngɨn. Myee kat dɨr sungwa nyatə, ka sungwa ta mbərə. 53Hye dɨ niyə ɓətɨ taa dɨ mba bwetə boyə Baagi, nda lyanashe ka təkə-təkətɨ malyenye tan-tan, a 'ye myaa dɨ mbarən a bələ, gə təna gwadi? 54Ɓə ya la mya doro vor Malɨmtɨ Ɗəmɗəmtə ɓa naa atɨ, mbak-mbak ləngɨn ɓa gə sa?”
55A itɨngɨn Yesu a boyə mingɨn atɨ, “Ɓə ya hwuna ɓə shi ɓa kɨtti ka sungwe ka gbɨlasakye ɓətɨ hɨn makpanə da ji-ɗa sɨkpaki? A fərə-fərə, hɨne nza Kwa-Shafe dɨ kəndəshe, hwunaa kɨtti. 56Shingɨn a ɗaasə gəkɨlə ləməgyee kpalye a boyo a naa.” Də a hangɨn lagbe dan kat a ɗakan a gyeɓə a təkəsə.
Yesu a humwaa peta ji-shalale da Yawude
(Markus 14.53-65; Luka 22.54-55,63-71; Yohana 18.13-14,19-24)
57Myee kɨr Yesu a zəkan a haka Kayafas ndi Kɨsahəmə kpane a haa ji-lee kəndə ɓashita Musa kat ka mi kpan-kpanye da Yawude a peyə də. 58Ndi Bitrus mgban, a koɗərən ta kəsə Yesu kaake baa a pɨrə vor hwoda Kɨsahəmə kpane a dɨ nza ɓwaa ka nggɨre, gə nda naa sa ɓa ɗa.
59Kɨsehəmi kpan-kpanye kat ka mbiɗitɨ ji-shalale da Yawude a ɨl kwatəfəgye gə təna ɗɨm myee ɓa kər-jeronye a nə Yesu gə təna ɗɨkə mya ɓɨltən. 60Shezə tənaa ɗɨm ama, kat ka ite atɨ ji-takale dɨma furi-furi.
Dɨ bee imi kpe a dɨma. 61Mingɨn a sa atɨ, “Ma, a sa atɨ, ‘Hɨn ɓa fala Shafe da Həmɨnpwa, na mɨna nwogən a vor bətə mwaakɨn.’ ”
62Kɨsahəmə kpane a maɗə a kangə a sa Yesu atɨ, “Tee dɨ luwa a bwe le ma? Tee kɨl ləməgyee myee a dɨ boyə nanga ma?” 63Yesu a nza ɗəng, ndaa wuna.
Də Kɨsahəmə kpane a san, “Hɨn peda ka Həmɨnpwate ka myentə, boyenə pee anda hyenə Ma Həmɨnpwa a Yaɓwarən, a Nze da Həmɨnpwa.”
64Yesu a san atɨ, “Hye boyo ka nənanga. Hɨn boyownə hwun kat atɨ, a humwa hwun ɓa nee hɨn Nze da Ɓwaara hɨn nza haa ka gətə a tɨfə zɨməngə Həmɨnpwa, hwun ɓa nee mgban hɨne dɨ janga dɨ vor pwa a nə pərɓye.”
65Də a hangɨn, Kɨsahəmə kpane a kɨr sɨɓwetɨ dan a sararən, nda sa atɨ, “Ɓə bwe le shar kwakɨ Həmɨnpwa. Ɓə takalə mɨnə mya dɨ ɨlə ɗɨm? Ləngɨn nee, hwun kɨla kɨɗate nda kɨɗa kwakɨ Həmɨnpwa a shartən. 66A shiya hwuna sa?”
Təna luwa a sa atɨ, “Ɓə kana mya ɓɨltən.”
67Də a hangɨn imi a təfən nawye a humwasən, imi a mow tefingrən a doltən. Imi mgban a falagən. 68Tən ta sa atɨ, “Zə kpalenə hye Ma Həmɨnpwa a Yaɓwara, boyenə ma dolta.”
Bitrus a məntəmə Yesu
(Markus 14.66-72; Luka 22.56-62; Yohana 18.15-18)
69Ndi Bitrus mgban, sɨndə nza haa bwangə voti, itɨ nji-kɨsati a shi hakan, a san atɨ, “Hye mgban hwunə ka yə Yesu a dɨ Galili.”
70Bitrus a məntəmətə a humwa myee a hangɨn kat, nda sa atɨ, “Taa lee la hye dɨ boyo.”
71Nda wudə kwatɨfe, itɨ njiti a mɨna nan, ngga boyə ɓwaare atɨ, “Manə, sɨne ka yə Yesu a dɨ Nazarat.”
72Bitrus a mɨna məntəmətə, nda gbə a sa atɨ, “Taa lee mangɨn.”
73Aa ɓongə myee kangə hangɨn a shi haka Bitrus a san atɨ, “Diyalə, hye nee hiɗə dɨ vorsərən, jiimanga lɨbada dɨ ha byele dəw.”
74Bitrus a tiya hiwdə nəngɨn, nda gbə atɨ, “Hɨn taa lee mangɨn.”
Tee gbyel ɗeke a wa. 75Də Bitrus a ɗyanga ka la Yesu a boyo atɨ, “Ɗeke ta wa, hye ɓa məntəmə lee shi a laka mwaakɨn.” Nda dɨmə haa bwange a fɨl kawatə kɨr-kɨr.
Currently Selected:
Matta 26: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
