Matta 24
24
Sɨgbəshi kpawtɨ vɨratə
(Markus 13.1-31; Luka 21.5-33)
1Yesu a dɨmgə Kwa-Shafe a muɗə, də lagbe dan a shi hakan ɓa bɨlən wule nwoshi Shafəngɨn. 2Yesu a sarən, “A hwun naa nwoshe kat, diyalə na dɨ boyownə atɨ, nagi hiɗə itɨ farati aa dɨ mbiɗi a kangə nə itə, kat mya ləkədərən a fəlgərən təna kəji njiya.”
3Ite Yesu nee nza nə Motɨ Kade Zetun, lagbe dan a shi hakan a ɗiyən le kɨɗək-kɨɗək atɨ, “Boyenə pe, goɗinə shinə ɓa ɗa ya? Mɨnə sɨgbəshi mɨnasa ka mɨni i kpawtɨ vɨrata?”
4Yesu a luwa a sarən, “Bəmdə myensəwnə gəkɨlə ɓe ama aa vwakarəwnə. 5Gəkɨlə ɓwaare hananang ɓa shi hakəwnə a kwaka, imi ɓa səwnə atɨ, ‘Hɨnə Ma Həmɨnpwa a Yaɓwarən,’ tən ɓa vwaka ɓwaare furi-furi. 6Mbak-mbak hwun ɓa kɨl lə pa-kawatə ka dɨk-dɨkə pa-kawatə, ɓe kala aa gəwnə. Wule shingɨn ɓa ɗa, shezə aa kpawtɨ vɨratə nə. 7Ɓwaare dɨ njiya som-som ɓa markasə, həmye ɓa ndɨlkasə, myatə ɓa fuka, njiya ɓa humuro hee som-som. 8Angɨn nə tiyatɨ tənəte ɓaga shi, ɓətɨ otɨ yedi mwasati.
9“Mye ɓa kəttəwnə a vədəwnə gə mya tənəə dəwnə baa a ɓəltəwnə, vɨratə kat ɓa kworəwnə gə hwunə hɨnggi. 10A fərəngɨn ɓwaare hananang ɓa viriwagə kottə, tən ɓa ndɨlə ta ɗərdəsə a kwonəsə. 11Kpali jeronye furi-furi ɓa dɨma a vwaka ɓwaare furi-furi. 12Səhase ɓa maɗə a furo a mbəgə hee kat, angɨn ɓa ɗɨkə mwoha da ɓwaare hananang a mbɨra. 13Ma mbasɨsən kanyi kpəkəkə tɨlə kpawtə, mangɨn nə ɓa ɗɨm mbətə. 14Mye ɓa hiwa ka ləmə feme a nə həmne a mbəgə vɨratə kat gəkɨlə ɓwaare a kɨlə, beetɨ angɨn nə kpawtɨ vɨratə.
15“Gə ləngɨn hwun kana naa ‘Sə guname, a dɨ shi ka kɨɗashe’#24.15 Naasə: Daniyel 9.27; 11.31; 12.11. mye kangdən a haa ɗəmɗəmə vor Shafe ɓətɨ kpale Daniyel a kpalə – ma dɨ bəli a nda lee naarə ləngɨn itɨngɨn – 16myee a vor njiya Yawudiya a təna gyeɓə a nggɨrə mogye. 17Ma a nə vɨne dan, ɓe ndaa janga a njiya a pɨrə vor hwodan atɨ ɓa nggur asə. 18Ma mgban gaarə a gaashe dan, ɓe ndaa viriwa atɨ ɓa nggura ɓarawtɨ dan. 19A fərəngɨn sə oti ka mandye ka wape, ka 'ye dɨ shəwdə je. 20Ɗam hiwtə gəkɨlə ɓe hwunaa gyeɓə vor ɓoole, naasə mgban a fərə piyatɨ da Yawude. 21Gəkɨlə tənətə nə də kɨr-kɨr a fərəngɨn, a wule tənəte myaa ndaga ɗatɨrə dɨ fəra mya kwak vɨratə kan, baa dɨmə fəranə supo, myaa diyə ga naa wule tənətɨngɨn. 22Anda aa gəkɨlə Həmɨnpwa a bənggə bətɨngɨn ngga mɨna gbɨlɨm, taa ndəng ma də ɓa nda mbə. Shezə gəkɨlə le da myee Həmɨnpwa a taɗə mye ɓa bənggə bətɨngɨn. 23A fərəngɨn ama kana səwnə atɨ, ‘Niyəm, Ma Həmɨnpwa a Yaɓwarən nə ga,’ naasə mgban ‘Sɨndə gaarə,’ ɓe hwunaa mwaka angɨn. 24Gə wule myee dɨ kər-jeronye atɨ tənə myee Həmɨnpwa a yaɓwatɨrən, ka kpali jeronye ɓa dɨma ta ɗa zərgi shikoshopye ka sɨndəle som-som gə təna vwaka myee Həmɨnpwa a taɗə, anda tən ɓa mba vwakatə vwaka mingɨn. 25Niyəm, hɨn səwnə ka haa-tan.
26“Ama kana səwnə atɨ, ‘Sɨndə gaarə a vor kaake,’ ɓe hwunaa wudə hangɨn, tən kana mɨna səwnə atɨ, ‘Sɨndə ɓo vor vɨne,’ ɓe hwunaa mwaka ləngɨn. 27Gəkɨlə ɓətɨya mgbaratə a dɨ wuɗila bwang ka ɓɨrtə dɨ basa pwa, a muɗə dɨ basa njiyan, sə mgban shitɨ de hɨn Nze da Ɓwaara ɓa gə. 28Haa wo duwe a bə də, a hangɨn mgban nzəkɨlikitə ɓa peyə.
29“Beetɨ tənətɨngɨn a fərəngɨn tee gbyel,
“ ‘Fəre ɓa gə kulit,
likɨtə aa diyə ɓɨrə,
tyekəlye ɓa fwaka dɨ pwa,
gəte a pwa ɓa humuro.’#24.29 Naasə: Ishaya 13.10; 34.4.
30“Də mye ɓa naa sɨgbəshi shitɨ de hɨn Nze da Ɓwaara ɓa dɨma a pwa, mi vɨratə kat ɓa təwo a kehee. Tən ɓa ne hɨn Nze da Ɓwaara hɨnə dɨ janga dɨ vor pwa a nə pərɓye, ka gətə ka gbaktɨ fukatə. 31Ka kormɨ ɓome kaɓa kpan hɨn ɓa lyana malyenye de, təna payadə myee Həmɨnpwa a taɗə dɨ takatɨ vɨratə kat.
32“Ɗyegənəmshe dɨ haka kada nggwale. Basengɨn kana tiya twasatə ta mana jiba a sɨsən, hwun leyə atɨ ɓoole janga. 33Sə mgban hwun kana naa wule shingɨn kat, hwuna leyə atɨ sawtə tɨla a kwa-vɨnke. 34Diyalə na dɨ boyownə, imi a vɨra wanetɨnə aa dɨ mbərə a pɨrə ɓaa anda shinə na boyo kat aa ɗa. 35Pwa ka njiya ɓa pɨrə ɓaa, shezə ləməgye de aa dɨ ga pɨrə ɓaa.
Taa ndəng ma də lee fərəngɨn
(Markus 13.32-37; Luka 17.26-30,34-35)
36“Taa ndəng ma də lee fərəngɨn ka awatɨngɨn. Nagi malyenirə gaarə a vor pwa nə tənaa leyə, hɨn ka nəna hɨn Nze taa leyi, Baatə nə ɓəmbə leyi. 37Ɓətɨya a gə nzata Nuhu, sə mgban mɨnashi hɨn Nze da Ɓwaara a vɨratə ɓa gə. 38Gəkɨlə a vor nzata Nuhu, ite haɓye aa nda luu vɨratə kat, ɓwaare a pɨrə zəmshe ka soɓwe, tən ta ɗəməsə mandye baa tənaa yə lee fəra Nuhu a pɨrə koombote nda ɗa. 39Tənaa yə lee sa ɓa ɗa, baa haɓye a shi mgban a pɨrə kaarən kat. Sə mgban mɨnashi hɨn Nze da Ɓwaara ɓa gə. 40Morye kpe ɓa gə gaashe, mya nggur ma hiɗə a ɗaka ma hiɗə. 41Mandye kpe ɓa pɨrə mgbe-təmye ta sɨda, mya nggur mate hiɗə a ɗaka mate hiɗə.
42“Gəkɨlə ləngɨn, bəmdə myensəwnə, gəkɨlə hwunaa lee fəra Həmɨmiye dəwnə ɓa mɨnakan də. 43Zə leyəm atɨ, anda həmɨ-hwoɗye lee tukote mahɨre ɓa shi də, ndi ɓa nda nza ka diisən a gɨra gələ nda kərə mahɨre ɓiya haa. 44Gə-angɨn mgban nzam ka ɗaasɨtə gəkɨlə hwunaa lee awate hɨn Nze da Ɓwaara hɨn ɓa shi də.
Kɨsa twaye ka kɨsa ɓaye
(Luka 12.35-48)
45“Kɨsa twaya ka lele kan, sɨnə a həmɨ-hwodan a vən hwoɗye kat ka mbiɗitɨ lagbee a hwoɗingɨn gəkɨlə nda nidərən, ndi taawa vərən sɨzɨmtə fərə-fərə. 46Sə hanɨngti ka kɨsangɨn, həmɨ-hwodan kana mɨna asɨ pan sɨne dɨ ɗa lyentə ɓətɨya mya vən. 47Diyalə na dɨ boyownə, həmɨ-hwoɗingɨn ɓa pedə gɨnətɨ dan kat a ɗakarə a tɨfə kɨsangɨn. 48Shezə hye kana niyə mgban anda kɨsangɨn ma hasə, nda sa nəngɨn atɨ, ‘Həmɨ-hwode ɓa ɓwanga ndaa dɨ mɨna,’ 49nda tiya lyeb ndeyingɨn kɨse, a tiya zɨmshe a peyə ka ji-sob vwe, tən ta soɓwi a kpashi. 50Həmɨ-hwoda kɨsangɨn ɓa mɨna a fəra ndaa leyə də, mye ɓa sɨ mgbɨmrən a awate ndaa leyə də. 51Həmɨ-hwoda kɨsangɨn ɓa lyebə a ɗəkən ɓokye a sɨsən, nda shea pedən ka ji-kwakpeye, gaarə a hangɨn mye ɓa təwo ka tuula lintə.
Currently Selected:
Matta 24: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
