Лука 7

Иисус ды римень сядонь прявтось

1Теде мейле, зярдо Иисус ёвтызе кунсолыцятненень весементь, мезде арсесь ёвтамс, Сон велявтсь Капернаум ошов. 2Те шкастонть тосо вейке сядонь прявтонь важозо пек сэредсь. Сон ульнесь кулома лангсо. Сядонь прявтось те важонть пек вечксь ды ванстсь. 3Зярдо сядонь прявтось марясь Иисусто, сон кучинзе Иисуснэнь евреень прявтнэнь энялдома марто: самс ды идемс важонть куломадо. 4Сынь састь Иисуснэнь ды кармасть псистэ энялдомо Сонзэ икеле: «Те сядонь прявтось паро ломань ды секскак, инеськеть, лездак тензэ! 5Сон вечксы минек раськенть ды мик тейсь минек туртов синагога». 6Иисус сыргась мартост.

Зярдо Иисус ульнесь аволь васоло кудонть эйстэ, сядонь прявтось кучинзе оянзо ёвтамо тензэ: «Азором, иля майсе. Мон Тонь коряс истямо вишкине ломанян: виздян натой совавтомс Тонь эсень кудос. 7Мон а маштован Тонь икеле аштицякс, секскак мон монсь эзинь са Тонеть. Ансяк ёвтак вал, ды пички монь важом. 8Мон монськак прявтонь кедь ало аштиця ломанян, ды монь кедь алояк аштить ушмант. Зярдо кармавтан вейкентень: “Азё!” – сон моли. Омбоцентень кортан: “Сак тей!” – сон сы, ды зярдо эсь важонтень мерян: “Теик сень!” – сон тейсы». 9Неть валтнэнь марязь, Иисус пек дивазевсь, велявтсь мельганзо молиця ломантнень пелев ды мерсь: «Ёвтан тенк: истямо кемема зярс Мон эзинь вастне Израилень ломантнень юткстояк». 10Зярдо кучозтне мурдасть мекев кудов, сынь неизь важонть шумбракс.

Наин ошсо довань цёранть вельмевтемазо

11Аламо шкань ютазь Иисус сыргась Наин ошов. Сонзэ марто мольсть ламот тонавтницянзо ды ламо лия ломанть. 12Зярдо Сон пачкодсь ошонь ортанть видьс, ошстонть ливтильть калмамо кулозь ломань. Те кулозесь ульнесь дова авань вейкине цёра. Аванть марто ошсто мольсть ламо ломанть. 13Зярдо Азорось неизе кулозенть аванзо, седеезэ ризнэзевсь кисэнзэ, ды Сон мерсь тензэ: «Иля аварде!» 14Мейле Иисус мольсь кулозенть малас ды токинзе кандолазтнэнь. Кандыцятне лоткасть, ды Иисус мерсь: «Цёрам, тонеть кортан: стяк!» 15Кулозесь озась ды кармась кортамо. Иисус сонзэ мекев максызе аванстэнь. 16Весе ломантнень копачинзе тандадома, сынь шнасть Пазонть истямо валсо: «Вана минек юткс сась ине пазмариця! Пазось сась Эсензэ раськентень лездамо!» 17Те кулясь Иисусто срадсь весе Иудеяванть ды перьканзояк.

Нававтыця-Лемдиця Иоаннонь кучозтне

18Зярдо Иоаннонь тонавтницятне ёвтнизь тензэ весементь, мезе Иисус тейсь, 19Иоанн тердинзе кавтотнень сынст эйстэ ды кучинзе Иисуснэнь истямо кевкстема марто: «Тон – Се, конанень эряви самс, эли миненек учомс лия?» 20Кучозтне састь Иисуснэнь ды кортасть: «Нававтыця Иоаннось кучимизь минек Тонь кевкстеме: “Тон – Се, конанень эряви самс, эли миненек учомс лия?”» 21Те шкане Иисус ламонь шумбралгавтсь ормадо ды сэредемадо ды ламосто пансесь апаро оймеялтт; ламо сокортнэнень велявтсь чивалдо. 22Ды секскак Иисус кучозтненень мерсь: «Азёдо ды ёвтадо Иоаннэнь, мезе тынь неиде ды мариде: сокортнэ неить, аякицятне якить, проказасо сэредицятне ванськадыть, амарицятне марить, кулозтне вельмить, кажовтненень пачтяви Кенярксов куля. 23Уцяскав се, кие Монь кувалма а кавтолды!» 24Зярдо Иоаннонь кучозтне тусть, Иисус кармась ёвтнеме ломантненень Иоанндо: «Мезе лангс ваномо тынь якиде чаво модав? Вармасо лымбакстниця нудей лангс? 25Мезень ваномо эно якиде? Паряк сюпав оршамосо оршазь ломанень? Сеть, конат оршазь питнейстэ ды эрить сюпавсто, – сеть эрить инязоронь кудова. 26Кинь ваномо эно якиде? Пазмарицянь? Виде, Иоанн пазмариця, ялатеке кортан тенк: сон пазмарицядояк покш. 27Сон се, конадонть ульнесь сёрмадозь:

“Вана Тонь самодо икеле

кучса Монсень кулянь кандыцям,

сон анокстасы кинть Тонь туртов”.

28Кортан тыненк: весе чачозтнень ютксо арась вейкеяк пазмариця, кона улевель Нававтыця Иоанндо инекс. Ялатеке сехте вишкинесь, кона Пазонть Инязорксчисэнть, сондензэ покш». 29Ды весе сонзэ кунсолыця ломантне, мик каявксонь пурныцятнеяк, ловизь видекс Пазонь меленть-арсеманть ды секс нававтовтызь пряст Иоаннонь кедьстэ. 30Фарисейтне ды Койс тонавтыцятне жо тусть Пазонь меленть каршо ды эзть карма Иоаннонь кедьстэ пряст нававтомо.

31Сестэ Азорось мерсь: «Ки марто вейкетстямс Монень неень пингень ломантнень? Кинь ёнов сынь молить? 32Сынь прок ошкужосо озадо аштиця эйкакшт, конат вейкест-вейкест туртов сеерить:

“Минь тынк туртов сединек нудейсэ,

тынь жо эзиде киште.

Минь тенк лайшинек,

тынь эзиде аварде!”

33Вана сась Нававтыця Иоанн, кшидеяк а ярсы, винадояк а сими – ды тынь кортатадо: “Сонзэ эйсэ идемевсь”. 34Сестэ сась Ломантнень Цёрась, ярсыяк ды симияк – ды тынь ялатеке кортатадо: “Вана опкан кургось ды винань вечкицясь, каявксонь пурныцянь ды лия пежетев ломанень ялгась!” 35Ялатеке Пазонь превейчинть невтить видекс весе ломантне, конат молить сонзэ киява».

Фарисей ды пежетев ава

36Фарисейтнень эйстэ вейкесь тердизе Иисусонь эстензэ ярсамо. Иисус совась се ломаненть кудос ды озась столь экшс. 37Те ошсонть эрясь усксевиця ава. Зярдо сон марясь Иисусонь ярсамодонть фарисеень кудосонть, сон сась тов ды кандсь тантей чине ой марто алебастрань* кедьге. 38Сон арась Иисусонь пильгензэ пес ды кармась авардеме. Сельведензэ валность Иисусонь пильгензэ. Авась эсензэ прячертнесэ кармась нардтнеме Иисусонь пильгтнень, палсесь сынст ды ваднесь эйсэст тантей чине ойсэ. 39Тень неезь, фарисеесь, кона тердизе Иисусонь, арсезевсь: «Улевельгак те ломанесь алкуксонь пазмариця, сестэ Сон содаволь, кодамо те авась, кона Сонзэ токши. Те авась – усксевиця». 40Иисус велявтсь фарисеенть ёнов ды мерсь тензэ: «Симон, Мон тонеть мезе-бути ёвтавлинь». Симон тень каршо пшкадсь: «Ёвтак, тонавтыця». 41«Весть кавто цёрат сайсть ярмаконь максницянь кедьстэ долкс ярмакт, – ушодсь Иисус. – Вейкесь эйстэст саекшнесь кедьстэнзэ ветесядт динарт, омбоцесь – ведьгемень. 42Конаньгак саицятнень эйстэ арасель мейсэ пандомс, ды максыцясь кавонест туртов нолдынзе пандовксост. Ёвтак: конась, тонь койсэ, карми седе пек вечкеме максыцянть?» 43Симон тень каршо ёвтась: «Арсян се, конанень ульнесь нолдазь седе покш пандовксось». «Видестэ тон арсят», – мерсь Иисус. 44Седе мейле Иисус велявтсь аванть ёнов ды мерсь Симоннэнь: «Тон несак те аванть? Зярдо Мон сынь тонь кудос, тон ведьгак эзить максо пильгень шлямс, авась жо Монь пильгень валнынзе сельведьсэнзэ ды нардтнинзе прячерьсэнзэ. 45Тон эзимик пала Монь вастомсто, авась жо а лоткси Монь пильгень палсемеде совамодон мейле те шкас. 46Тон Монь прям натой эзик ваде ойсэ, сон жо Монь пильгень ваднинзе тантей чине ойсэ. 47Мон ёвтаса теть, мекс истя: те аванть ламо пежетензэ нолдазь, ды секскак сон Монь пек вечксамам. Конань жо аламо пежетензэ нолдазь, сень вечкемазояк а покш». 48Мейле Иисус мерсь авантень: «Тонь пежететь нолдазь». 49Сестэ весе лия инжетне эсь пачкаст арсезевсть: «Кие те истямось, конась пежетненьгак нолды?» 50Иисус жо мерсь авантень: «Тонь кемемат идинзеть. Азё седейоймамо марто».

Currently Selected:

Лука 7: ОВ

Highlight

Copy