Лука 22

Прявтнэ арсить Иисусонь маштомо

1Малавгадсь Ламбамсто сюкоронь покшчись, конанень истя жо мерить евреень Инечи. 2Попонь покштнэ ды Койс тонавтыцятне пельсть ломантнень эйстэ. Секскак вешнесть, кода маштомс Иисусонь. 3Ды вана Сатанась совась Иудас, конанень мерильть Искариот. Сон ульнесь кемгавтово тонавтницятнень ютксто вейкесь. 4Сон сась попонь покштнэнень ды Пазонь кудонь ванстыця прявтнэнень. Сынь эсь ютковаст кортнесть ды прасть ве лувс теде, кода Иуда макссы кедезэст Иисусонь. 5Весе сынь кенярдозевсть ды алтасть Иуданень ярмакт. 6Иуда макссь вал ды кармась вешнеме ён шка ломантнеде салава миемс сыненст Иисусонь.

Евреень Инечинтень ярсамопелень анокстамось

7Сась Ламбамсто сюкоронь покшчинь се чись, зярдо эрявсь печкемс инечинь вирез*. 8Иисус кучинзе Петрань ды Иоаннонь ды кармавтсь тенст: «Азёдо, анокстадо минек туртов инечинь ярсамо». 9Сынь кевкстизь Сонзэ: «Косо мерят миненек анокстамс?» 10Иисус мерсь тенст: «Вана, ошс совамсто каршонк понги кукшинсэ ведень кандыця цёра. Моледе мельганзо кудонтень, козонь сон сови. 11Мереде кудонь азоронтень: “Тонавтыцясь кевкстни тонь, косо нупалесь, конаньсэ Монень тонавтницян марто ярсамс инечинь ярсамодонть?” 12Сон невти тенк вере нупаль, покш, ацазь; тосо анокстадояк». 13Тонавтницятне тусть, ды весемесь лиссь истя, кода мерекшнесь тенст Иисус. Сынь анокстасть инечинь ярсамо.

Чокшнень ярсамось

14Зярдо весе аноколь, Иисус озась столь экшс, ды Сонзэ марто кемгавтово апостолтнэяк. 15Сон мерсь тенст: «Вай, Монь ульнесь покш мелем ярсамс мартонк те инечинь ярсамодонть пиштемадон-майсемадон икеле! 16Эдь кортан тенк: теде мейле Мон а карман ярснеме инечинь ярсамопельде се шкас, зярс а топавтови сонзэ смустезэ Пазонь Инязорксчисэнть». 17Иисус саизе кеченть ды, Пазонтень сюкпрянь ёвтазь, мерсь: «Саинк сонзэ ды явшинк эсенк юткова. 18Кортан тенк: теде мейле Мон а карман симеме винаумарень винадо се шкас, зярс а сы Пазонь Инязорксчись». 19Сон сайсь кши, таго ёвтась Пазонтень сюкпря, синтризе ды явшизе кшинть апостолтнэнь ланга истямо вал марто: «Те – Монь рунгом, кона тынк кисэ максови. Истя тейнеде мелезэнк Монь ледстнемга». 20Чокшнень ярсамодонть мейле Иисус саизе кеченть ды мерсь: «Те кечесь – Пазонть марто од вейсэньлув. Сон кемекстави Монь верьсэ, кона валови тынк кисэ. 21Ды вана ней Монь миицянть кедеськак Монь кеденть марто аштить вейке столь лангсо! 22Нама, Ломантнень Цёрась туи эрямостонть истя, кода ёвтазель икеле, ансяк кодамо зыян пры се ломаненть лангс, кона Сонзэ мисы!» 23Тонавтницятне кармасть кевкстнеме вейкест-вейкест, кие сынст ютксто истямось, кона тень тейсы.

Кие весемеде покш?

24Мейле тонавтницятне ютковаст спорязевсть: кие сынст эйстэ весемеде покшось. 25Сестэ Иисус кортась тенст: «Инязортнэ аштить азорокс эсест раськетнень лангсо, прявтнэ кармавтыть ловомо эсь пряст паронь теицякс. 26Тынк ютксо илязо уле истя. Мекевланк, тынк ютксо весемеде покшось улезэ прок весемеде вишкине, ды се, кона прявт, улезэ прок важо. 27Конась кавтотнень ютксто седе покшось: столь экшсэ аштицясь эли мельганзо якицясь? Нама, столь экшсэ аштицясь! Ялатеке мон тынк ютксо прок мельганк якиця! 28Ансяк тынь цидярдыде мартон ютамо весе Монь стакачитнень пачк. 29Ды секскак Мон максан тыненк Инязорксчи, кода Монь Тетям максызе сонзэ Монень. 30Сестэ тынь карматадо Монь Инязорксчисэнть ярсамо-симеме Монь столь экшсэ ды карматадо улеме Израилень кемгавтово буетнень лангсо прявтокс-судиякс».

Иисусонь ёвтамозо Петрадо

31Ды Азорось мерсь: «Симон, Симон! Вант! Сатанантень максозель варчавтомс тынк: сувтнемс тынк, кода товзюронть. 32Ялатеке Мон ознынь тонь кисэ, Симон, кемемат а ёмавтоманть кисэ. Ды мейле, зярдо мекев велявтат Монень, кемекстак эсеть малавикстнэнь кемемаст». 33Петра каршонзо мерсь: «Азоро! Тонь марто мон анокан молеме натой пекстамо кудос ды куломаскак!» 34Иисус мерсь: «Кортан теть, Петра, течи атякшось а кенери моразевемеяк, кода тон колмоксть тейсак прят Монь асодыцякс».

35Иисус кевкстинзе тонавтницянзо: «Зярдо Мон тынк кучнидизь ярмактомо, кансттомо, карсемапельтеме, ульнекшнесь мезеньгак арасьчинк?» «Арасель», – ёвтасть сынь тень каршо. 36«Ансяк ней, бути улить ярмаконк, саинк сынст, саеде кансткак, ды бути тынк арась торонк, миинк ланга оршамонк ды рамадо торо. 37Кортан тенк: мезе ёвтазель Монь эйстэ: “Сонзэ ловить зыянонь теицякс” – те Сёрмадовксось курок топавтови. Ды весе Монь эйстэ ёвтазесь ней топавтови». 38«Азоро! – кортасть тонавтницятне, – вана тесэ кавто торонок». Иисус мерсь каршозост: «Саты теде!»

Иисус озны Ойумарькс пандонть лангсо

39Иисус лиссь ошсто ды, кода свал, мольсь Ойумарькс пандонтень. Сонзэ мельга мольсть тонавтницянзояк. 40Тов сазь, Сон мерсь сыненст: «Ознодо, аволиде понго снартнемас-варчавтнемас». 41Сонсь тусь тонавтницятнеде колоньгеменьшка эскельксэнь тарка ве пелев, прась кумажа лангс ды ознось: 42«Тетяй, улиндеряй мелеть, саик те пиштемань кеченть Монь кедьстэ! Ансяк топавтовозо Тонь мелеть, аволь Монсесь». 43Те шкане валгсь менельстэ Сонензэ ангел ды кемекстась Сонзэ оймензэ. 44Седей сэредьксэнть пачк Иисус седеяк пек ознось. Ливезезэ, прок верень петнявкст, поцердсь мода лангс. 45Озномадо мейле Иисус стясь, сась тонавтницянзо ваксс ды муинзе сынст удыцякс, ризкссэ нусмакавтозекс. 46«Мекс тынь удотадо? Стядо ды ознодо, аволиде понго снартнемас-варчавтнемас!» – пшкадсь Сон.

Иисусонь кундамозо

47Зярдо Сон теде кортась, малазост састь ламо ломанть, конатнень ветясь Иуда, кемгавтовотнень ютксто вейкесь. Сон шаштсь Иисусонь ваксс паламонзо. Эдь сон икелев кортась мартост тешкстэнть: «Конань мон паласа, се Сон». 48Иисус кевкстизе: «Иуда, паламосо, нать, мият Ломантнень Цёранть?» 49Сестэ тонавтницятне, конат ульнесть Иисусонь перька, чарькодизь, ков моли тевесь, ды мерсть Тензэ: «Азоро! Паряк, нолдамс тевс торотнень?» 50Ды вейкесь эйстэст риштизе попонь прявтонь важонть ды керизе вить пилензэ. 51«Саты, лоткадо!» – пшкадсь Иисус. Ды токизе важонь пиленть, тона шумбралгадсь. 52Мейле Иисус мерсь попонь покштнэнень, Пазонь кудонь ванстыцянь ды раськень прявтнэнень, конат састь Сонзэ кундамо: «Мекс тынь сыде Монь саеме торо ды цётмар марто теке салыця-маштниця мельга? 53Эрьва чистэ Мон мартонк ульнинь Пазонь кудосо, мекс сестэ тынь эзимизь токше? Ней вана тынк шкась, чопода виень азорксчись!»

54Сынь сюлмсизь Иисусонь ды ветизь Сонзэ попонь прявтонь кудос. Васоло ве ёно, мольсь мельгаст Петра. 55Кудонь пирявксонть куншкасо кирвазтсть толбандя. Пурнавозтне ойсесть сонзэ перька. Петраяк озась сынст юткс. 56Толонь валдосонть неизе Петрань ве важо ава. Сон пштистэ варштась лангозонзо ды мерсь: «Те ломанеськак ульнесь Сонзэ марто». 57Петра каизе прянзо Сонзэ эйстэ ды мерсь авантень: «Арась! А содаса мон Сонзэ!» 58Аламо шкань ютазь лия ломань неизе Петрань ды мерсь: «Тонгак сынст ютксто». «Арась, ялгай!» – мерсь Петра. 59Часошкань ютазь таго кие-бути кармась кортамо: «Алкукс, те ломанеськак ульнесь Сонзэ марто, эдь сон Галилеянь эриця». 60Петра тень каршо мерсь: «А содан, ялгай, мезде тон кортат!» Петра эзизе прядо кортамонзояк, кода моразевсь атякшось. 61Сестэ Азорось велявтсь Петрань ёнов ды варштась лангозонзо. Петрань мельс ледсть Азоронь валтнэ: «Атякшось а кенери моразевемеяк, кода тон колмоксть прят каясак Монь эйстэ». 62Петра лиссь ушов ды кармась риксэ авардеме.

63Иисусонь ванстыцятне кармасть пеедькшнеме Сонзэ лангсо ды чавомонзо. 64Сынь сюлмизь Иисусонь сельмензэ, чавсть Сонзэ чама ланга ды вешсть пельдензэ: «Икелепелев содыця! Ёвтык, кие Тонь риштинзеть?» 65Ды ёртнесть лангозонзо ламо лия покордамот.

Иисус Инепромксонть икеле

66Валске марто, чинть лисемстэ, раськень прявтнэ, попонь покштнэ ды Койс тонавтыцятне пурнавсть Инепромксос. Сынст икелев ветизь Иисусонь. 67«Улиндерят Тон Пазонь кучовт Идицясь, ёвтак теде миненек», – вешсть пельдензэ. Иисус каршост мерсь: «Бути Мон ёвтан тыненк, тынь а кемсамизь. 68Бути Мон карман кевкстнеменк, тынь а ёвтатадо каршо вал Монень ды а нолдасамизь. 69Течинь чистэ саезь Ломантнень Цёрась карми озадо аштеме Весеменькирди Пазонть вить ёно». 70Сестэ сынь весе рангстазевсть: «Тон – Пазонь Цёра?!» Сон каршост мерсь: «Те тынь истя кортатадо». 71Сестэ сынь кортнесть: «Мезекс миненек лият та-кодат кемекстамот? Минь эсь пилесэнек маринек тень Сонзэ кургсто».

Currently Selected:

Лука 22: ОВ

Highlight

Copy