Лука 19

Закей

1Мейле Иисус совась Ерихон ошс ды ютась сонзэ трокс. 2Тосо ульнесь пек сюпав ломань, каявксонь-налогонь пурныцянь прявт, лемезэ Закей. 3Закеень ульнесь покш мелезэ неемс Иисусонь, ваномс, кодамо Сон. Ансяк Закей алкинель, ды секскак Иисус эзь неяво тензэ ломантнень ютксто. 4Сестэ сон икельдинзе ломантнень ды кузсь ки чиресэ касыця вирень инжир чувтонть пряс, конань вакска сави ютамс Иисуснэнь. 5Зярдо Иисус пачкодсь те таркантень, Сон варштась верев ды мерсь тензэ: «Закей, валгт седе куроксто! Монень улема течи тонь кудосо». 6Закей куроксто валгсь ды кенярдозь вастызе Иисусонь кода инжень. 7Зярдо весе ломантне неизь тень, сынь кармасть музгордеме: «Вай, Иисус совась инжекс пежетев ломаннень!» 8Закей стясь ды мерсь Азоронтень: «Азоро! Мон нейке явшеса пеле ули-паром кажовтненень, ды бути манязь саинь седе ламо киньгак кедьстэ, сенень нилексть велявтса!» 9Иисус мерсь сонензэ: «Течи идема сась те кудонь эрицятненень, эдь Закейгак – Авраамонь раськень ломантнень ютксто вейкесь. 10Ломантнень Цёрась саськак ёмазтнень вешнеме ды идеме».

Максозь ярмакто валвелявкс

11Ломантненень, конат тень кунсолость, Иисус ёвтнесь валвелявкс. Те шкане Сон ульнесь Ерусалименть маласо, ды ламот учость Пазонь Инязорксчинть курок самонзо. 12Секс Иисус поладызе ёвтамонзо: «Вейке содавикс раськень ломань сыргась туеме васоло масторов, теевемс тосо инязорокс ды теде мейле мекев самс. 13Ансяк туемадо икеле сон тердинзе кемень важонзо ды макссь эрьвантень вейке сырнень ярмак* ды мерсь: “Нолдынк неть ярмактнень тевс монь мекев самозон”. 14Те масторонь эрицятне эзть вечке сонзэ ды кучсть мельганзо зярыя ломанть, конат ёвтызь весе эрицятнень мелест: “Арась меленек неемс те ломаненть эсенек инязорокс!”

15Ялатеке инязорокс сонзэ путызь, ды зярдо сась мекев, кармавтсь тердемс эстензэ сеть важотнень, конатненень максозельть ярмактне, ды кевкстинзе сынст, кода ды зяроксть эрьвась кастынзе сынст питнест. 16Васенце важось сась инязоронть икелев ды ёвтась: “Азоро, тонь сырнень ярмакось кассь монь кедьсэ кеменьксть!” 17“Алят, – шнызе сонзэ азорось, – тон паро важо. Тон ульнить кемевиксэкс вишка тевсэ ды секскак максан теть кемень ошт ды путтан тонь сынст лангсо прявтокс”. 18Сась омбоце важось ды мерсь: “Азоро, тонь сырнень ярмакось кассь монь кедьсэ ветексть!” 19Азорось каршонзо мерсь: “Максан кедеть алов вете ошт”. 20Мейле сась колмоце важось ды мерсь: “Азоро, вана тонь сырнень ярмакось, мон сонзэ тапардакшныя пацине потс ды ванстыя. 21Мон пелинь тондеть, эдь тон калгодо седей ломанесь. Тон саят тосто, козо эзить путне, ды нуят сень, мезе эзить видне”. 22Азорось сестэ мерсь: “Тон – апаро важо! Эсеть кургонь валсот карман тонь судямо. Тон содылить: мон калгодо седей ломанян, саян тосто, козо эзинь путне, ды нуян сень, мезе эзинь видне. 23Мекс эно тон эзик максо монь ярмаконть полавтнема таркас? Сестэ самодон мейле мон мекев саевлия ламолгадозь те ярмаконть”. 24Инязорось мерсь эсензэ ломантненень: “Саинк кедьстэнзэ сырнень ярмаконть ды максынк сенень, конань кемень ярмаконзо”. 25Сынь мерсть тензэ: “Азоро, сонзэ уш улить кемень ярмаконзо!” 26“Кортан тенк”, – мерсь инязорось, – “эрьвантень, кинь ули, сенень седеяк ламо максови, кинь вана арась, сень кедьстэ саеви сеяк, мезезэ ули. 27Монь яттнэнь жо, конатнень арасель мелест путомс монь инязорокс, ветинк тей ды маштынк монь сельме икеле”».

Ерусалимс Иисусонь совамозо

28Те валвелявксонть ёвтнемадо мейле Иисус поладызе Ерусалимев молеманть. 29Зярдо Сон пачкодсь Бетфагия ды Бетания велетнень малас, конат сравтовсть Ойумарькс пандонть чирева, Сон кучинзе икелев кавто тонавтницянзо 30ды кармавтсь тенст: «Азёдо велентень, кона икеленк, ды эйзэнзэ совамсто сеске мутадо содозь осёлонь вашо, конань лангс зярс кияк эзь ойсе. Юксинк сонзэ ды ветинк тей. 31Бути кияк тынк кевкстядызь: “Мезекс юксетядо сонзэ?” – мереде истя: “Сон эряви Азоронтень”». 32Кучозтне тусть ды весементь муизь истя, кода Иисус сыненст мерсь. 33Зярдо тонавтницятне юксесть вашонть, вашонь азортнэ кевкстизь сынст: «Мезекс юксетядо вашонть?» 34Сынь тень каршо мерсть: «Сон эряви Азоронтень». 35Иисуснэнь ветизь вашонть, ацызь лангозонзо эсь оршамопелест ды Иисусонь озавтызь вашонть лангс ласте. 36Ды зярдо Сон мольсь ласте, ламот ацнесть эсь оршамопелест кинть ланга.

37Сынь пачкодсть се таркантень, косто кись туи алов Ойумарькс пандостонть, ды весе тонавтницятне кармасть кецязь верьга вайгельть шнамо Пазонть неть дивань тевтнень кисэ, конатнень сынь некшнизь:

38«Улезэ чанстязь-баславазь Инязорось,

Азоронть лемсэ Сыцясь!

Кадык ули сэтьме лув менельсэ,

шнамо Верепазонтень!»

39Ломантнень ютксто кой-конат фарисейтне мерсть Иисуснэнь: «Тонавтыця, лоткавтыть Эсеть тонавтницят!» 40Иисус каршозост мерсь: «Кортан тенк: бути сынь чатьмонезевить, сестэ кевтне кармить сеереме».

41Зярдо Иисус сась седе малав Ерусалиментень ды неизе сонзэ, Сон аварьгадсь ошонь уцяскадонть 42ды мерсь: «Вай, Ерусалим! Бути тонгак течи чарькодевлить, мейсэ тонь оймамось-идемась! Ансяк ней те кекшезь тонь сельметнень эйстэ. 43Эдь сыть тонь туртов истят чить, зярдо яттнэ чувить перькат латкт, пирятадызь ды каявить лангозот эрьва ёндо. 44Сынь юрс калавттадызь тонь, чавносызь тонь эрицят, а кадыть тонь эйстэ кев лангсо кевгак, секс мекс тон эзик чарькоде те шканть, зярдо Пазось сакшнось тонь идеме».

Иисус Пазонь кудосо

45Мейле Иисус совась Пазонь кудонь пирявксонть потс ды кармась тосто микшницятнень-рамсицятнень пансеме. 46Сон мерсь сыненст: «Пазонь Сёрмадовкссонть ёвтазь: “Монь кудонтень кармить мереме ознома кудо”. Тынь вана теинк сонзэ салыцянь-маштницянь пизэкс!»

47Иисус эрьва чистэ тонавтсь Пазонь кудосо. Попонь покштнэ, Койс тонавтыцятне ды раськень прявтнэ вешнесть тувтал маштомс Сонзэ. 48Ансяк те сыненст кодаяк эзь тееве, эдь весе ломантне свал ульнесть перьканзо ды кунсолость Сонзэ эрьва валонзо.

Currently Selected:

Лука 19: ОВ

Highlight

Copy