Лука 16

Кудонь а виде ветицядо валвелявкс

1Иисус ёвтнесь Эсензэ тонавтницятненень: «Вейке сюпав ломаненть ульнесь кудоветицязо, конань ланга ёвтнесть азоронтень, келя, ветицясь ёмавтни-юводи азоронь ули-паронть. 2Азорось тердизе сонзэ ды кевкстизе: “Мезе мон марсян тонь эйстэ? Ёвтник, кода ветят монь кудонь тевтнень. Тон седе тов а маштоват улемс кудоветицякс”. 3Ветицясь арсезевсь: “Мезе монень ней теемс? Азором пани монь важодема таркастон. Модань чувомс арась вием, кши сускомонь вешеме виздян. 4Ней содан, мезе теемс, зярдо тестэ паньсамизь, лият саевлимизь кудозост”. 5Ды сон кармась тердтнемест вейкень-вейкень азоронть кедьстэ долкс саицятнень. Васенценть сон кевкстизе: “Зяро тонь пельде пандома монь азоронтень?” 6Се мерсь: “Сядодо ламо ойсэ пештязь парть”. Кудоветицясь мерсь тензэ: “Вана тонь сёрмадовт конёв панксот. Озак ды куроксто сёрмадт од: ведьгемень”. 7Омбоценть кевкстизе: “Зяро тонь пельде пандома?” Се мерсь: “Сядо кескавт товзюросо”. Кудоветицясь тень лангс мерсь: “Саик тонь сёрмадовт конёв панксонть ды сёрмадт: кавксоньгемень”.

8Ды азорось шнызе кудонь а виде ветицянть истя ёжовсто тееманть кисэ. Ды алкукскак, Пазонь ломантнень коряс Пазнэнь акемицятне седе парсте чарькодьсызь вейсэнь тевстэ эсест туртов лезэнть. 9Кортан тенк: ютавтодо те колазь масторлангонь ярмактнень эстенк ялгань-оянь пурнамга. Ды зярдо ёмить ярмактнень питнест, совавттадызь пингеде пингень кудонтень. 10Кие кемевикс вишкине тевсэ, се кемевикс покшсояк. Кие а кемевикс вишкине тевсэ, се а кемевикс покшсояк. 11Ды бути эзиде ульне кемевиксэкс а виде сюпавчисэ, сестэ алкуксонь сюпавчинтькак кияк а макссы тыненк. 12Ды бути эзиде ульне кемевиксэкс лиянь сюпавчисэ, сестэ эсь сюпавчинтькак кияк а макссы тыненк. 13Кодамояк важо кавто азорнэнь а важодеви. Бути снартсы тень теемс, сестэ сон вейкенть карми вечкеме, омбоценть сельмесэ а нееме. Бути вейкенень карми савтомо, омбоцестэнть карми прянзо велявтомо. Тыньгак ве шкасто а важодевтядо Пазонтень ды ярмактненень!»

Пазонь Коесь а сорновтови

14Тень маризь фарисейтне. Сынь вечксть ярмакт ды секскак пеедькшнесть Иисусонь лангсо. 15Ансяк Иисус мерсь тенст: «Тынь парсте содатадо, кода ломантнень икеле невтемс эсь прянк видестэ эрицякс, Пазось жо содасынзе тынк седеенк. Сень, мезе шныть ломантне, тень Пазось лови нулгодьксэкс. 16Коень ды пазмарицятнень шкась ульнесь Нававтыця-Лемдиця Иоаннонь видьс. Ней вана ёвтневи Кенярксов куля Пазонь Инязорксчиде ды тов понгоманть кисэ весе путыть покш вий. 17Зярдояк а ёми Коень вейкеяк тешкс! Седе куроксто ёмить менелесь ды модась! 18Эрьвась, кона яви нинзэ эйстэ ды урьваксты лия лангс, се ускури; ды эрьвась, кона урьваксты мирдестэ явозенть лангс, ускури».

Сюпавдо ды Лазарде валвелявкс

19«Эрясь вейке сюпав ломань, оршазель прок инязор, пек питней оршамопельсэ. Чистэ чис тейниль покш каванямот. 20Эрясь кажов ломаньгак, лемезэ Лазарь, кона ёртозель сюпавонть ортанзо икелев. Сонзэ рунгозо сыявкс потсоль. 21Лазарь арсесь пештеме пекензэ паморькстнэде, конат певерькшнесть сюпавонь столенть лангсто. Кискат сакшность ваксозонзо ды нолсесть сыявксонзо. 22Кулось кажовось, ангелтнэ кандызь оймензэ Авраамонь кедь лангс. Кулось сюпавоськак, ды калмизь сонзэ. 23Тоначисэ, косо пиштсь сюпавось, варштась сон верев ды неизе васолдо Авраам покштянть, конань мештес нежедезель Лазарь. 24Сюпавось серьгедсь: “Авраам тетяй! Чевтемтик седееть монь туртов, кучик Лазарень сур прянзо ведьсэ начтомо ды монь келем экшендямо. Мон пиян-палан те толсонть!” 25Авраам мерсь тензэ: “Эйдем! Ледстик мелезэть, кода тонеть максозель эсеть парось эрямстот, Лазарнень максозель ансяк берянсь. Секскак ней сонзэ тесэ лацить-оймавтыть, тон жо майсят-пиштят. 26Ды теде башка, тынк ды минек юткова юты потмакстомо латко. Бути киньгак ули мелезэ ютамс тестэ тыненк – сон а ютави, истя тостояк миненек те отьманть трокс кияк а ютави”. 27Сюпавось поладсь: “Мон энялдан икелеть, тетяй, сестэ кучик Лазарень монь тетянь кудов. 28Тосо монь улить вете лелян-ялаксон, кадык кармавты тенст: иляст понго сыньгак те пиштемань таркантень”. 29Авраам мерсь тензэ: “Сынст ули Моисеест ды пазмарицяст. Кадык кунсолыть эйсэст”. 30Ды мерсь сюпавось: “Арась, Авраам тетяй! Савольдеряй монь лелятненень-ялакстнэнень кияк кулозтнень эйстэ, сестэ сынь полавтовлизь эрямост”. 31Тень каршо Авраам мерсь: “Бути Моисеень ды пазмарицятнень а кунсолыть, сестэ кулозтнень ютксто вельмезеськак а кармавтсынзе кемеме”».

Currently Selected:

Лука 16: ОВ

Highlight

Copy