Лука 14

Фарисеень кудосо

1Весть оймсема чистэ Иисус тердезель ярсамо вейке прявтокс аштиця фарисеень кудос. Весе, кить тосо ульнесть, пштистэ вансть Иисусонь прянь ветямонть мельга. 2Иисусонь каршо озадоль сэредиця ломань, конань весе рунгозо ульнесь таргозезь. 3Иисус кевкстинзе фарисейтнень ды Койс тонавтыцятнень: «Мери а мери Коесь шумбралгавтомс оймсема чистэ?» 4Сынь каштмольсть. Сестэ Иисус токизе сэредицянть, шумбралгавтызе сонзэ ды нолдызе. 5Мейле Иисус кевкстсь: «Бути тынк осёлонк эли, паряк, тынк буканк пры лисьмас, нать тынь нейке жо а таргасынк сонзэ тосто, бути те тевесь лиссь натой оймсема чистэяк?» 6Тень каршо сыненст ёвтамс ульнесь а мезе.

Иля лово эсь прят ломанде сэрейкс

7Иисус неизе, кода инжетне снартнесть озамс столь экшс паро таркатнева. Сестэ Сон ёвтнесь сыненст истямо валвелявкс: 8«Зярдо тонь тердтядызь урьвакстомань каванямос, иля снартне озамо икельце таркатнес. Сындеряй тондеть содавикс инже, 9сестэ азорось, кона тердинзеть тоньгак ды тердизе мельгат сыцянтькак, сы малазот ды мери: “Озавтык тарказот те ломаненть”. Ды сестэ тонеть сави стямс ды визьксчамасо озамс весемеде берянь таркантень. 10Зярдо жо тон тердезят инжекс, сак тов ды озак весемеде берянь таркас. Сестэ азорось сы малазот ды мери: “Оям, озак седе паро таркас”. Сестэ тон касат весе инжетнень сельме икеле. 11Эрьвась, кона сонсь эсь прянзо кепеди, ули алкиньгавтозь; кона эсь прянзо алкиньгавты, ули кепедезь».

12Теде мейле Иисус мерсь кудазоронтень: «Зярдо теят чинь эли чокшнень ярсамо, иля терде эсеть ялгат, лелят-ялаксот, роднят-раськеть ды сюпав шабрат, сень лангс кемезь: сыньгак мейле тердевлидизь тонь ды пандовлизь тонеть каванямонть. 13Арась, тон тердть каванямос арасьчисэ эрицят, кедтеметь-пильгевтеметь, ёколдыцят ды сокорт. 14Сыненст а мейсэ пандомс тонь паронть. Секскак улят уцяскав. Эдь тонеть мекев пандови парось се чистэнть, зярдо вельмевтевить Пазонь виде коень ломантне».

Ине каванямодо валвелявкс

15Тень марязь, кие-бути инжетнеде мерсь Иисуснэнь: «Уцяскав се, кона ули каванязь Пазонь Инязорксчисэнть». 16Иисус тень каршо мерсь сонензэ: «Вейке ломань анокстась покш каванямо ды тердсь ламо инжеть. 17Зярдо сась столь экшс озамонь шкась, сон кучизе важонзо тердезтненень ёвтамо: “Садо, эдь весе анок”. 18Ансяк весе тердезтне ве мельсэ кармасть вешнеме тувтал а молемантень. Васенцесь мерсь: “Мон раминь мода, монень эряви молемс варштамонзо, энялдан икелеть, нолдык чумом”. 19Омбоцесь мерсь: “Мон раминь кемень букат ды молян варштасынь тевсэ. Энялдан икелеть, нолдык чумом”. 20Колмоцесь мерсь: “Мон ансяк урьвакстынь ды секскак а молеван”. 21Важось мекев сась, весе нень ёвтнинзе азоронтень. Сестэ кудазорось кежень пачк мерсь важонтень: “Азё седе куроксто, ютак ошонь весе пуромома таркатнева ды куротнева-юткакштнева ды ветить тей арасьчисэ эрицятнень, кедтеметнень-пильгевтеметнень, сокортнэнь ды ёколдыцятнень”. 22Важось сась ды мерсь: “Азоро, теинь истя, кода мерить. Ялатеке столенть экшсэ кадовсть таркат”. 23Азорось таго кармавтсь важонтень: “Азё велень китнева ды пирявкстнэнь кувалт, кармавтыть весемень само ды кадык пешкеди кудом ломанде. 24Ёвтан тенк: икелев тердезтнеде кияк а озы монь столь экшс! Эдь ламо тердезтнеде, ансяк аламо кочказтнеде”».

Кодамокс улезэ Иисусонь тонавтницясь

25Иисус таго тусь эсь кияванзо, Сонзэ мельга мольсть ламо ломанть, ды Сон кортась тенст: 26«Бути сы Монень та-кие, кона Мондень пек вечксынзе эсь тетянзо, аванзо, нинзэ, эйкакшонзо, лелянзо-ялаксонзо, патянзо-сазоронзо ды мик эсензэ эрямонзо, се а маштови Монь тонавтницякс. 27Кие а канды эсь крёстонзо ды а моли Монь мельга, се а маштови Монь тонавтницякс. 28Мерьсынек, та-кие тынк эйстэ арси путомс сэрей кудо. Мезе тынь тейтядо васенцекс? Паряк, озатадо ды ловносынк, сатыть а сатыть ярмаконк кудонь прядоманть туртов? 29Лиякс, зярдо путсы сон кудоюронть ды а прядсы кудонь путоманть, сестэ весе ломантне кармить лангсонзо пеедькшнеме 30ды кортнеме: “Вана уставась кудонь путомо, кудонь прядомась жо а неяви”.

31Инязороськак, зярдо сырги тюреме лия инязоронь каршо, нать васняяк а озы ды а арсесы эсь пачканзо: саты а саты виезэ эсензэ кемень тёжат ушмантнэнь марто изнямс лия инязоронь комсь тёжат ушмантнэнь? 32Виесь а сатындеряй, сестэ инязорось кучи ёвтыцят сыненст ды веши сэтьмелув, зярс душмантнэ васолот. 33Истя тыньгак: бути а кадсынк весементь, мезенк ули, сестэ кияк тынк эйстэ Монень тонавтницякс а маштови.

34Салось – лезэв; бути ёмавтсы сон танстензэ, сестэ кода тейсак сонзэ одов саловокс? 35Модань паролгавтомскак сон а маштови, шукшпряскак а туи, ды кадови ансяк ёртомс сонзэ. Кинь улить мариця пилензэ – кунсолозо!»

Currently Selected:

Лука 14: ОВ

Highlight

Copy