Апостолтнэнь тевест 8

Савла панси христиантнэнь

1Савлаяк паро мельсэ вансь Стефанонь маштоманзо лангс.

Секе чистэнть Ерусалимсэ сыргась покш пансема кемикуронть каршо. Весенень, апостолтнэде башка, савсь срадомс Иудеява ды Самариява. 2Паро коень ломанть калмизь Стефанонь, тейсть покш лайшемат сонзэ мельга. 3Савла снартнесь калавтомс кемицянь куронть, якась кудосто кудос, кундсесь цёратнень ды аватнень, озавтнесь эйсэст пекстамо кудова.

Филип пачти Паро кулянть Самариясо

4Те шкане эсь таркастост панезь кемицятне яксесть эрьва кува ды кандсть Кенярксов кулянть. 5Филип сась Самариянь прявтошс ды тосо ёвтнесь Пазонь кучовт Идицядонть. 6Филип тейнесь дивань тевть, конатнеде ломантне марсесть ды конатнень ней сынь сынсь несть. Секскак весе мельспаросо кунсолость сонзэ валтнэнь. 7Аванькс оймеялтнэ рангозь лисильть идемевсьсэ колазь ламо ломантнестэ, ламо катардыця ды чамордыця ломантне шумбралгадыльть. 8Ошсонть ульнесь покш кенярдома.

9Тосо эрясь ломань, лемезэ Симон, кона эсь мунямонь-орожиямонь тевтнесэ умок дивавтсь весе Самариянть. Сон сонськак невтсь эсь прянзо ине ломанькс. 10Ошонь ломантне, кода содавикстнэ, истя асодавикстнэяк, весе Симононь кунсолость мелень явозь ды кортасть: «Те ломаньсэнть сась миненек Пазонть ине виезэ». 11Ломантне мелень явозь кунсолость сонзэ, секс мекс сон пек умок дивавтсь эйсэст сельмевелявтоматнесэ. 12Ды вана зярдо кемезевсть Филипнень, кона ёвтнесь Кенярксов кулянть Пазонь Инязорксчиденть ды Иисус Христосонь лемденть, сестэ ламо цёрат ды ават нававтызь пряст. 13Симонгак кармась кемеме Филипень валтнэнень ды нававтызе прянзо. Сон эрьва кува якась Филип мельга, яла дивсесь сеть ине тамашатнень ды виев тевтнень лангс, конатнень тона тейниль.

14Зярдо Ерусалимсэ апостолтнэ марясть: Самариянь ломантне кемезевсть Пазонь валонтень, сынь кучизь тов Петрань ды Иоаннонь. 15Сынь састь ды озность, максовозо Самариянь кемицятнененьгак Иневанькс Оймеялт. 16Эдь сынст эйстэ киньгак лангс Оймеялтось те шкас эзь валгокшно, весе сынь ансяк нававтозельть Иисус Азоронть лемс. 17Петра ды Иоанн путызь лангозост кедест, ды тонатненень максозель Иневанькс Оймеялтось.

18Зярдо Симон неизе, кода Иневанькс Оймеялтось максови апостолтнэнь кедест путомасо, сон кандсь тенст ярмакт ды мерсь: 19«Максодо моненьгак истямо вий. Кадык сенень, кинь лангс путсынь кедень, максови Иневанькс Оймеялт». 20Петра тень каршо мерсь: «Ловиндерят, Пазонь казнесь рамави теть ярмакто, сестэ кадык ярмакоткак ёмить мартот вейсэ! 21Тонь арась те тевсэнть кодамояк пельксэть ды таликат, эдь Пазось неи тонь колазь седеенть. 22Янксек, кадыть пежететь ды ознок Азоронтень. Паряк, Сон нолдасынзе теть истят мельтнень. 23Мон неса, тон пештязят сявадомань сэпеде ды аштят сюлмазь пежетень тертьсэ». 24Симон кармась энялдомо: «Ознодо Азоронтень монь кисэ, илязо лисе мартон мезеяк сень кондямо, мезде тынь кортыде».

25Апостолтнэ ёвтнесть Самариясо Азоронть эйстэ ды тонавтсть Сонзэ валонтень. Мейле сынь мурдасть Ерусалимев ды тов молемстэяк ёвтнесть Иисусто Паро кулянть Самариянь ламо велева.

Филип нававты Эфиопиянь евнухонть

26Азоронть ангелэзэ мерсь Филипнень: «Стяк ды мольть лембе ёнксов, се кинть лангс, кона вети Ерусалимстэ Газав ды кона ломантеме». 27Филип стясь ды тусь. Ки лангсо вастсь эфиопиянь ломань, евнух*, кона ульнесь Эфиопиянь кандакинь, лиякс меремс, инязоравань, чинязокс ды весе сюпавчинзэ ванстыцякс. Сон якась Ерусалимев озномо 28ды ней ардыль кудов. Аштесь крандазсонзо ды ловнось Исайя пазмарицянть книганзо. 29Оймеялтось мерсь Филипнень: «Азё сасык крандазонть ды мольть вакссонзо». 30Филип чийсь тов ды мари, кода важонь прявтось ловны Исайя пазмарицянть валонзо. «Чарькодят-арась, мезде ловнат?» – кевкстизе Филип. 31«Кода монень чарькодемс, бути кияк а тонавты эйсэнь?» – мерсь тона ды тердизе Филипень куземс крандазс ды озамс ваксозонзо. 32Евнухось ловнось Сёрмадовксонь се тарканть, косо ульнесть истят валт:

«Кода реве Сон ветязель печкемас,

кода вирез нарыцянзо икеле вайгельтеме,

истя Сонгак кургонзо эзизе панжтне.

33Сон покордазель, ды судястькак Сонзэ а видестэ.

Ды кие ёвты Сонзэ эйкакштнэде-нуцькатнеде,

бути Сонзэ модалангонь эрямозо сезеви?»

34Важонь прявтось кевкстизе Филипень: «Энялдан, ёвтак монень, те таркасонть киде корты пазмарицясь: эсензэ эйстэ эли кидеяк лиядо?» 35Сестэ Филип кармась ёвтнеме. Ушодсь Сёрмадовксонь се таркастонть, конань евнухось ловнось, ды ёвтнизе тензэ Иисусто Кенярксов кулянть. 36Истя сынь, кинть ланга ютазь, пачкодсть ведь ваксс. «Вант, тесэ ведь», – мерсь евнухось. «Мекс монень а нававтомс-лемдемс прям?» 37Филип тень каршо мерсь: «Бути весе седейсэ кемат, сестэ нававтык прят». Евнухось мерсь: «Мон кеман: Иисус Христос – Пазонть Цёразо». 38Ды мерсь крандазонть лоткавтомадо. Филип ды евнухось совасть ведьс, ды Филип нававтызе сонзэ. 39Зярдо сынь лиссть ведьстэнть, Иневанькс Оймеялтось валгсь евнухонть лангс, Азоронть ангелэсь жо сеске саизе Филипень. Евнухось мейле сонзэ эзизе некшне ды седе тов тусь эсь кияванзо, кеняркссо пештязь. 40Филипень мейле некшнизь Асдод ошсто. Тосто Кесарияв молемстэ, сон килангонзо перть пачтясь Кенярксов кулянть весе оштнэва.

Currently Selected:

Апостолтнэнь тевест 8: ОВ

Highlight

Copy