Апостолтнэнь тевест 5

Ананиянь ды Сапфирань кенгелемадост

1Вейке ломань, лемезэ Анания, Сапфира нинзэ марто вейсэ миизь эсест паксяст. 2Зярыя ярмакт Анания сёпсь, низэяк теде содась. Кадовозтнень сон кандынзе ды максынзе апостолтнэнь кедьс. 3Петра мерсь тензэ: «Анания, мекс истя нолдык Сатананть седеезэть, мик мельс прыть кенгелемс Иневанькс Оймеялтонтень ды сёпить талика ярмактнеде, конатнень саить миезь моданть кисэ? 4Эдь модась миемадонзо икеле ульнесь тонь, ды ярмактнеяк, конатнень тон кисэнзэ саить, – тонь. Мекс эно тон арсить теемс истя? Тон кенгелить аволь ломантненень – Пазонтень». 5Кода ансяк Анания тень маризе, сон оймевтеме прась. Весе, кить марясть теде, пек тандадсть. 6Мейле састь од цёрат, тапардызь Ананиянь уловонзо, ливтизь ды калмизь.

7Колмо часонь ютазь сась Ананиянь низэяк, кона эзь сода, мезе лиссь мирдензэ марто. 8Петра кевкстизе: «Ёвтык монень, истямо а истямо питнеде тынь мирдеть марто миинк моданть?» «Нама», мерсь авась, «зяродо». 9Петра мерсь тензэ: «Мекс тынь вейсэ арсиде вейке мельсэ снартнемс-варчавтнемс Азоронь Оймеялтонть? Марясыть кенкш удало эскелькстнэнь? Те састь тонь мирденть калмицянзо, сынь тоньгак ливттядызь». 10Авась сеске прась Петрань икелев оймевтеме. Од цёратне совасть, неизь кулозь аванть, ливтизь уловонзо ды калмизь мирдензэ ваксс. 11Весе кемицянь куронть ды лия ломантненьгак, кить теде марясть, копачинзе покш тандадома.

Дивань тевть ды тамашат

12Апостолтнэ тейнесть ломантнень ютксо ламо дивань тевть ды тамашат. Весе кемицятне ве мельсэ сеедьстэ пурнавильть Соломононь галереянтень*. 13Ве ёндонсетне пельсть вейсэндявомс мартост, теке марто весе пек шнасть эйсэст. 14Азорос кемицятнень ламочист яла кассь ды кассь, ламо цёрат ды ават вейсэндявсть сынст лувонтень. 15Ды вана сэредицятнень кармасть ливтнеме ушов тарканек-эземнек: паряк, куш Петрань сулеезэ пры лангозост, зярдо сон карми ютамо вакскаст. 16Ламот сакшныльть Ерусалимев оштнэстэ, конат маласольть, кандылизь сэредицятнень ды аванькс оймеялтсо колазтнень, ды весе шумбралгадыльть.

Апостолтнэнь пекстамост

17Попонь прявтонть ды мартонзо весе саддукейтнень пек сявадсть сельмест апостолтнэнь лангс. 18Секскак сынь кундызь апостолтнэнь ды озавтызь весень туртов пекстамо кудос. 19Ансяк веть Азоронь ангел панжинзе пекстамо кудонь кенкштнень ды ливтинзе апостолтнэнь. 20«Азёдо Пазонь кудос», – мерсь сон, – «ды ёвтнеде ломантненень весементь те од эрямодонть». 21Чинь стямодо икеле сынь совасть Пазонь кудос, кода тенст мерезель, ды кармасть ломантнень тонавтомо.

Валске марто попонь прявтось ды сонзэ малавиксэнзэ тердизь Израилень весе Инепромксонть ды кучсть ломанть апостолтнэнь мельга пекстамо кудос. 22Зярдо кучозтне састь пекстамо кудонтень, сынь тосто апостолтнэнь эзизь муе ды, мекев сазь, ёвтасть истя: 23«Минь минсь неинек: пекстамо кудонть кенкшензэ кеместэ сёлгозь, кенкштнень икеле аштить ванстыцят, ансяк зярдо минь кенкштнень панжинек ды совинек потс, тосто киньгак эзинек муе». 24Попонь прявтось, Пазонь кудонь ванстыцятнень прявтось ды лият попонь покштнэ кунсолызь абунгадозь – мезе те истямось? 25Мейле та-кие совась ды ёвтась: «Конатнень тынь озавтнинк пекстамо кудос, аштить Пазонь кудосо ды тонавтыть ломанть». 26Сестэ ванстыцянь прявтось тусь эсь ломанензэ марто ды сынь ветизь апостолтнэнь Инепромксос. Ансяк ветизь аволь вийсэ, сынь пельсть ломантнеде: эсест аволизь чавно кевсэ.

27Апостолтнэнь совавтызь ды аравтызь Инепромксонть икелев. Попонь прявтось ушодсь кевкстнеме сынст. 28«Минь кармавтынек тенк а тонавтомс Иисусонь лемсэ, – мерсь попонь прявтось, – ансяк тынь ялатеке весе Ерусалименть пештинк тонавтомасонк ды теке марто чумондтадо минек Сонзэ куломасо». 29Петра ды лия апостолтнэ мерсть тень каршо: «Миненек кунсолома Пазонть, аволь ломантнень! 30Минек ине покштятнень Пазост кулозьстэ вельмевтизе Иисусонь, конань тынь крёст лангс вачкодезь маштынк. 31Пазось озавтызе Сонзэ Эсь вить кедензэ ёнов Ветицякс ды Идицякс вана мекс: велявтомс Израилень весе раськенть Пазонтень ды нолдамс сынст пежетест. 32Тень неицятне-содыцятне – минь ды Иневанькс Оймеялтось, конань Пазось максызе Сонзэ меленть ваныцятненень».

33Зярдо Инепромкссо весе аштицятне тень маризь, сынь азаргадсть кежтнеде, мик анокольть маштомс апостолтнэнь. 34Сынст ютксо ульнесь вейке фарисей, Гамалил, Койс тонавтыця, конань весе ломантне пек вечкилизь. Сон стясь Инепромксонть икелев ды кармавтсь ливтемс аламнес апостолтнэнь. 35Мейле сон мерсь Инепромксонь ломантненень: «Израилень ломанть, вельть парсте арсинк, мезе карматадо тееме неть ломантнень марто. 36Аволь умок тесэль та-кодамо Тевда, кона эсь прянзо теиль-невтниль ине ломанькс, ды мельганзо сыргакшность нилесядошка ломань. Зярдо сон маштозель, весе сонзэ мельга молицянзо срадсть, весе теньсэ прядовськак. 37Теде мейле, сёрмадстома шкасто*, сась Иуда Галилеясто. Сон кепедсь эсь мельганзо ломантнеде байтяк, ансяк сонгак маштозель, ды сонзэяк мельга молицянзо срадсть. 38Секс, те тевенть коряскак, вана мезе тенк мерян: кадынк неть ломантнень. Нолдынк. Улиндеряй сынст тевесь ломань пельде, сон сонсь лепами. 39Мекевланк, улиндеряй те тевесь Пазонть пельде, сон тыненк а лоткавтови. Ванстынк прянк! Илязо лисе истя: тынсь карматадо улеме Пазонть каршо молицякс-тюрицякс!»

40Гамалилэнь валонзо кемевтизь Инепромксонть. Сынь тердизь апостолтнэнь, чавовтызь сынст, кардызь кортамодо Иисусонь лемденть ды нолдызь. 41Апостолтнэ лиссть Инепромксстонть кенярдозь – сыненст максозель уцяска пиштемс Иисус Азоронть лемензэ кисэ. 42Сынсь ялатеке таго чиде чис апак лотксе тонавтсть Пазонь кудосояк, ломантнень кудоваяк ды ёвтнесть весенень Кенярксов кулянть: Иисус – те Пазонь кучовт Идицясь.

Currently Selected:

Апостолтнэнь тевест 5: ОВ

Highlight

Copy