Апостолтнэнь тевест 3

Петра шумбралгавтсы чаморонть

1Весть Петра ды Иоанн сыргасть вейсэ Пазонь кудос. Шкась ульнесь чикуншкань колмо част, ознома шка. 2Пазонь кудонь ортанть вакссо, конанень мерильть Мазый орта, озадо аштесь чачомасто чамор ломань, конань эрьва чистэ кандылизь ды озавтылизь тов максовксонь вешеме ютыцятнень пельде. 3Зярдо чаморось неинзе Петрань ды Иоаннонь Пазонь кудов совамсто, сон кармась сынст пельдеяк максовксонь вешеме. 4Петра ды Иоанн видьстэ варштасть лангозонзо, ды Петра пшкадсь тензэ: «Варштак минек лангс». 5Ломанесь пштистэ вансь апостолтнэнь ёнов, пельдест кодамояк максовксонь учозь. 6Сестэ Петра мерсь: «Сиям ды сырнем арась, секс максан теть мезем ули. Назаретэнь Иисус Христосонь лемсэ кармавтан теть: стяк ды якак!» 7Петра саизе сонзэ вить кедте, лездась тензэ стямс, ды сеске чаморонть пильге эзнензэ ды санонзо кемекставсть. 8Сон кирнявтсь пильгензэ лангс ды кармась якамо! Совась апостолтнэнь марто Пазонь кудос, якась кирнявтнезь ды шнась Пазонть. 9Ломантне, конат тосо ульнесть, неизь сонзэ якицякс ды Пазонть шныцякс. 10Сынь содызь се ломаньсэнть чаморонть, кона свал озадоль Пазонь кудонь Мазый ортанть вакссо ды вешиль максовкст. Секскак сынь пек тандадсть ды талность сонзэ марто теевезенть кувалма.

Пазонь кудосо Петрань кортамозо

11Чаморось, кона шумбралгавтозель, эзь кадовкшно Петрань ды Иоаннонь эйстэ. Секскак ламо ломантне, талакалезь, пурнавсть сынст перька Пазонь кудонь галереянтень, конанень мерить Соломононь галерея*. 12Тень неезь, Петра пшкадсь ломантненень: «Израилень ломанть! Мезть тенень дивсетядо, мезть минек лангс вантадо, прок минь эсенек вийсэ эли парокойчисэ теинек тень, ды сон кармась якамо? 13Авраамонь, Исаконь ды Яковонь Пазост, минек покштятнень Пазост невтизе Эсь Иисус Цёранзо инексчинть. Тынь миинк Сонзэ прявтнэнень, велявтынк прянк Сонзэ эйстэ Пилатонь икеле, зярдо тона нолдыксэлизе Сонзэ. 14Тынь жо велявтыде Сонзэ, Иневаньксэнть, Видечисэнть, эйстэ ды тарказонзо вешинк нолдамс олячис ломань чавицянть. 15Тынь чавинк эрямонь Казицянть! Ансяк Пазось Сонзэ вельмевтизе кулозьстэ, ды минь минсь тень неицят-содыцят. 16Иисусонь лемензэ виесь ды Иисуснэнь кемемась кемекстызе те ломаненть. Тынь несынк ды содасынк те ломаненть, ды вана кемемась, конань кази Иисус, макссь тензэ шумбрачи весеменк икеле.

17Теке марто, ялгат-оят, мон содан: тынь, кода прявтонккак, те зыянонть теинк асодамочинк кувалма. 18Ансяк истя вана Пазось топавтызе весементь, мезесь умок ёвтазель пазмарицянзо вельде, зярдо кортась: Сонзэ кучовт Идицянть учить пиштемат-майсемат. 19Секскак янкседе ды велявтодо Пазонтень, пежетенк допрок нардамга. 20Сестэ Азоро Пазось кучи тенк оймень-седеень сыргозема шка. Сон кучсы тенк Иисус-Идицянть, конань уш умок кочкизе тынк туртов.

21Иисуснэнь жо кадовома менельс, зярс а сы шкась, зярдо Пазось аравтсы весементь эсь таркаванзо. Тень эйстэ Сон умок кортась Эсензэ кочкавт пазмарицятнень вельде. 22Эдь Моисей кортась покштятненень-тетятненень: “Азорось, тынк Пазось, кочки тенк тынсенк раськестэнть Пазмариця, кона монь кондямо. Кунсолодо Сонзэ весемесэ, мезе Сон тенк илязо корта. 23Эрьвась, кона а карми се Пазмарицянть кунсоломо, ули панезь Пазонь раськестэнть ды истожазь”. 24Истя икелев кортасть неть читнеде Самуилстэ саезь весе пазмарицятне, конат пачтясть Пазонь валонть. 25Пазмарицятнень вельде максозь алтавкстнэ ды вейсэньлувось, конань Пазось теизе-сюлмизе тынк покштятнень марто, те весе теезь тынк туртов. Сон мерсь Авраамнень: “Тонь раськень-буень поладыксэть вельде улить чанстязь масторлангонь весе эрицятне” 26Эсь Иисус Цёранзо вельмевтемадо мейле Пазось васняяк кучизе Сонзэ тыненк, тынк чанстямо, эрьванть эйстэденк тердеме велявтомс зыянонь кинть лангсто».

Currently Selected:

Апостолтнэнь тевест 3: ОВ

Highlight

Copy