Мф 7
7
7 ГЛАВА
1-6 Вес еҥым судитлыме нерген. 7-12 Сӧрвалыза, кычалза, пералтыза. 13-14 Шыгыр капка. 15-23 Пушеҥгым саскаж дене палат. 24-29 Кок негыз.
1Ида судитле, тунам теат огыда судитлалт. 2Кузе весым судитледа, теат тугак судитлыме лийыда; могай виса дене те виседа, тугай денак тыландат висалтеш. 3Молан тый лишылетын шинчаштыже шӱкым ужат, а шкендыныште пырням от шиж? 4Але шкендын шинчаштет пырня улмо ӱмбач кузе лишылетлан ”ане, мый тыйын шинчат гыч шӱкым луктам” манын каласет? 5Сайла кояш тӧчышӧ! Ондак шке шинчат гыч пырням лук, вара веле лишылетын шинчаж гыч шӱкым кузе лукташ, ужат.
6Нимо святойым пий-влаклан ида пу, сӧсна-влак ончыко ракывотшердам ида кышке, уке гын, тудым йолышт дене тошкат, ӱмбакыда кержалтын, тендам пурын кӱрыштыт.
7Сӧрвалыза – тыланда пуалтеш, кычалза – муыда, пералтыза – тыланда почылтеш, 8вет сӧрвалыше налеш, кычалше муэш, пералтышылан почылтеш.
9Эргыда киндым йодеш гын, тендан коклаште тудлан кӱм пуышо айдеме уло мо? 10Але колым йодшо эргыжлан кишкым пуышо? 11Тыгеже, те осал улмо ӱмбачат шочшыланда сай пӧлекым пуэн моштеда гын, Пылпомышсо Ачада йодшылан порым ок пу мо?
12Еҥ-влакым шкаланда мом ыштыктынеда, шкежат нунылан тидымак ыштыза. Закон ден пророк-влакын туныктымышт тыгае.
13Шыгыр капкаш пурыза, вет колымашке наҥгайыше капка лопка, корно кумда, шукын тиде корно дене каят. 14Илышыш наҥгайыше капка шыгыр, корно аҥысыр, шагалынже тудым кычал муыт.
15Шояк пророк-влак деч шекланыза. Нуно тендан деке шорык коваштым чиен толыт, а кӧргыштышт опкын пире улыт. 16Нуным те саскашт дене паледа. Иман вондо гыч виноградым, лопшудо гыч смоква саскам погат мо? 17Сай пушеҥге сай саскам пуа, а уда пушеҥгын саскажат йӧрдымӧ. 18Сай пушеҥге йӧрдымӧ саскам шочыктен ок керт, а уда пушеҥге сай саскам шочыктен ок керт. 19Сай саскам пуыдымо чыла пушеҥгым руат да тулыш шуат. 20Тыгеже, шояк пророк-влакым саскашт дене паледа.
21Мыланем ”Господь, Господь” манше-влак кокла гыч Пылпомыш Кугыжанышыш чыланжак огыт пуро, тушко Пылпомышсо Ачамын эрыкшым#7:21 Эрык – воля, желание. шуктышо-влак веле логалыт. 22Суд кечын Мыланем шукын ойлаш тӱҥалыт: ”Господь! Господь! Ме Тыйын лӱмет дене огыл мо пророкла ойленна? Тыйын лӱмет дене огыл мо иям поктен луктынна да Тыйын лӱмет дене огыл мо шуко чудым ыштенна?” 23Тунам нунылан увертарем: ”Мый тендам нигунам пален омыл. Закондымылыкым ыштыше-влак, Мый дечем кораҥза!”
24Кӧ Мыйын нине шомакем колыштеш да ойлымем семын ышта, тудо пӧртшым кӱ ӱмбалан чоҥышо ушан еҥ гай лиеш. 25Йӱр талын йӱрын, эҥер сер гыч лектын, озыркан мардеж пуаш тӱҥалын да пӧрт ӱмбаке керылтын. Но пӧрт сӱмырлен огыл, вет тудо кӱ ӱмбалан негызлыме улмаш. 26А кӧ Мыйын нине шомакем колыштеш да ойлымем семын ок ыште, пӧртшым ошма ӱмбалан чоҥышо шонен моштыдымо еҥ гай лиеш. 27Йӱр талын йӱрын, эҥер сер гыч лектын, озыркан мардеж пуаш тӱҥалын да пӧрт ӱмбаке керылтын. Пӧрт сӱмырлен, сӱмырлымыжӧ пеш кугу лийын».
28Иисус ойлен пытарымеке, калык Тудын туныктымыжлан пеш ӧрын: 29нуным закон туныктышо да фарисей-влак семын огыл, а власть улшан семын туныктен.
Currently Selected:
Мф 7: УС
Highlight
Share
Copy
Want to have your highlights saved across all your devices? Sign up or sign in
Библийым кусарыше институт, Хельсинки 2007
